Salmu 19:1-14
Davihi nhoꞌre
19 Hâiwa na ꞌre isimasa mono hã ꞌRe ihâimana uꞌâsi mono waihuꞌu pese uptabi na ꞌre ihâimana mono zé te wasuꞌu, duré te te iꞌaropoto mono zé tinhibꞌrata na.
2 Bâtâ sidâpâ te te ꞌre wasuꞌu, iwaihuꞌu pe hã.Mara sidâpâsi te duré mara hâiba amoi u hã te te ꞌre hâiꞌré.
3 Hâiwa na ꞌre isimasa mono hã mreme õ nherẽ, duré da te ꞌre wapari zaꞌra mono õ nherẽ, te tô isimiꞌmanharĩ wẽ zé hã sina te te dama ꞌre wasuꞌu zaꞌra.
4 Tane nherẽ, iwasuꞌuzé hã ma tô uburé tiꞌai mono bâ te te datẽme ropé.Duré ꞌRe ihâimana uꞌâsi mono hã ma tô bâdâ ꞌre isa mono zéb da, ro te te tãma ipisutu ãma tisã.
5 Mararé sidâpâsi te bâdâ hã ta hawimhã toi uptabi sina hã ꞌre pusi, aibâ ꞌre mro zaꞌra mono wa, to sina ꞌre ihâimana zaꞌra mono ne, duré isisamroiꞌwa norĩ sisada ꞌre sisaꞌrei mono da, pẽꞌẽ toi uptabi wa, sirési sina ꞌre isisisi mono ne.
6 Bâdâ hã te hâiwa naꞌrata hawimhã ꞌre pusi. Te duré tawamhã hâiwa naꞌrata hâiba amoi u hã ꞌre ne, marĩ norĩ hã iwaꞌro wi, ꞌre simaꞌuri waihuꞌu zaꞌra mono ãna.
7 Uburé Danhibꞌapito nhimiroti hã wẽ uptabi na te ꞌre hâimana. Te duré wanhiptetezé ité hã te te wama ꞌre anhomri.Tô ibâre isimiroti hã umnhasi na dama ꞌre ihâimana mono zéb zarina, te rowaihuꞌu prãiꞌwa norĩ ma, rowaihu iwẽ hã te te tãma ꞌre anhomri.
8 Uburé Danhibꞌapito marĩ na te te ãma dama ꞌre irowahutu mono zé iꞌuwaibaba na si, te dapẽꞌẽ ꞌre rowẽ zaꞌẽtẽ zé hã te te dama ꞌre anhomri.Duré isimiroti iꞌuptabi na sõꞌawi marĩ te te wama ꞌre ahâiꞌré mono wa, te duré waꞌrãi ꞌremhã te te wama ꞌre arowaꞌa.
9 Uburé Danhibꞌapito, da te ꞌre iwazé zaꞌra mono zé hã iwẽ. Te za õne uꞌâ ꞌre hâimana.Duré te te dama ꞌre iꞌarowairébé mono zé hã, iꞌuwaibaba na si, tô sena na si.
10 Sô robꞌruiwapari zaꞌẽtẽ uptabi di, ẽtẽ waipo pré oru nhipai u, tô oru iwazariꞌõ iwẽ uptabi nhipai u.Duré ropĩni ise nhipai u, tô ropĩ iwazariꞌõ ise uptabi nhipai u te ꞌre hâimana, isimiroti hã.
11 Taha na te wa hã asibꞌaꞌuwẽ ãma ꞌre ĩpoꞌre puꞌu wẽ uꞌâsi mo.Duré aimreme te ꞌre iwapari pese mono zarina, wa ĩpawaꞌâbâzé iwẽ hã te ĩsima te ꞌre awaibui uꞌâsi.
12 E ꞌwa hã marĩ na te te ꞌre iꞌupai mono zé hã te te sina ꞌmadâꞌâ waihuꞌu pese bâ.Apito, maꞌãpé ĩpẽꞌẽ ꞌremhã ĩma pari, ĩwasédé te ꞌre iꞌaꞌmanharĩ mono zé hã, te waihuꞌu ãna.
13 Duré ĩwasédé te ĩsima iwẽzéb zarina, te ꞌre iꞌaꞌmanharĩ mono hã maꞌãpé tiwi ĩzawi na.Õne uꞌâ te te ꞌre ĩwadaꞌuri mono tõ da hã maꞌãpé tiwi ꞌre ĩnhiptete mono.Tawamhã wa za sena na iꞌuwaibaba na si ꞌre ĩhâimana. Wa za ĩwasédé ipire nhiti ĩsima iwẽ na oto ꞌre mo, aimreme te ꞌre iwapari mono õ zém na ꞌre ĩhâimana mono nhiti hã.
14 Uburé Danhibꞌapito, ẽtẽ tõmo wawẽ ne ĩma ꞌre iꞌaihâimana mono hã, duré ĩꞌwawi ꞌre iꞌaimapa mono, ĩmreme hã, duré ĩnhimirosaꞌrada hã ꞌre iwẽsãmri mono da si, ĩma iwẽ hã.
