Salmu 24:1-10
Davihi nhoꞌre
24 Uburé Danhibꞌapito ma, te tiꞌa hã duré uburé marĩ iwa ꞌre ihâimana zaꞌra mono hã ꞌre hâimana.Uburé pese daro mono bâ, iwa ꞌre idahâimana zaꞌra mono norĩ zama te duré tãma hã ꞌre hâimana.
2 Ta hã ma tô â poré nhisiwi tiꞌa hã ꞌmanha. Ma tô duré isãnaꞌrada hã â poré â ꞌrehâ uptabi ãmamhã tisã.
3 E ꞌwa hã iwẽ, Uburé Danhibꞌapito te ẽtẽ u, te te isaiꞌuri da hã.Duré e niꞌwa hã hâimana bâ, isõrõwa ꞌri iwazéb zahi u isébré da hã.
4 Ã norĩ si te za ꞌre sisisi; isibꞌrata uptobꞌõ norĩ si, duré ipẽꞌẽ wẽ norĩ si, romhâibarĩ ãma ꞌre iwata zaꞌra mono õ norĩ si, duré ropisudu senai õ na te te ꞌre iꞌmanharĩ zaꞌra mono õ norĩ si.
5 Ta norĩ ma si te za tô Uburé Danhibꞌapito iwẽ hã te te tãma ꞌre apisutu.Te za duré te te ꞌre anhoꞌreptu, wasété õ na te te ꞌre iꞌawaihuꞌu mono zéb zarina.
6 Ãne hã tô, Uburé Danhibꞌapito Zacoho te, ꞌRe ihâimana uꞌâsi mono zô, tinhimirosaꞌrata na te te ꞌre iꞌaba zaꞌra mono norĩ hã.
7 ꞌRidawa nhoꞌõmo norĩ hã ꞌridawa pese zaꞌra waꞌaba!Duréi ꞌridawa nhoꞌõmo iꞌrata norĩ, ꞌre ꞌridawa pese zaꞌra waꞌaba mono,Apito danhipai u isiptete uptabi hã sébré da.
8 E ꞌwa ã hã Apito, danhipai u, isiptede iwaihuꞌu pese uptabi hã.Uburé Danhibꞌapito, isiptede, duré iwaihuꞌu pe, dasiꞌwapéi wa, sibꞌru na ꞌre ihâimana mono.
9 ꞌRidawa nhoꞌõmo norĩ hã ꞌre ꞌridawa pese zaꞌra waꞌaba mono.Duréi ꞌridawa nhoꞌõmo iꞌrata norĩ, ꞌre ꞌridawa pese zaꞌra waꞌaba mono,Apito danhipai u isiptete uptabi hã sébré da.
10 E ꞌwa ã hã Apito, danhipai u, isiptede iwaihuꞌu pese uptabi.Ta hã, tô Uburé Danhibꞌapito, isiptede, duré iwaihuꞌu pe.
