Salmu 78:1-72
Asafihi nhimirobꞌuiꞌéré
78 Ĩnhibꞌaꞌuwẽ norĩ, maꞌãpé te aima iroti zaꞌra waꞌaba zé hã wapari pese zaꞌra waꞌaba!Duré aipoꞌre pese na marĩ na te aima irowaihuꞌu zaꞌra waꞌaba zé hã wapari pese zaꞌra waꞌaba!
2 Romnhimiréꞌé na wa za ãma aima nharĩ zaꞌra waꞌwa.Duréi pese marĩ we ihâimana dama isaꞌreseꞌõ na, wa za duré aima zaꞌra waꞌaba hã oto hâiꞌré,
3 niha na marĩ wa te ꞌre iwapari zaꞌra mono hã, duré wa te ꞌre iwaihuꞌu zaꞌra mono hã, wahiꞌrata norĩ te te wama ꞌre iwasuꞌu zaꞌra mono zé hã.
4 Ta hã, waꞌra norĩ wi hã wa te ꞌre udâ zaꞌra mono õ di za.Wa za wanhihudu norĩ ma hã Uburé Danhibꞌapito nhiptetezé hã wa te ꞌre wasuꞌu zaꞌra, duré tinhiptete na marĩ te te ꞌre iꞌabꞌmanharĩ wẽ mono zém na hã.
5 Uburé Danhibꞌapito, ma tô Izaraéu nhihudu norĩ ma, tinhimiroti hã tãma sõmri zaꞌra, Zacoho nhihudu norĩ ma hã.Wahiꞌrata norĩ ma hã ma te duré tãma waihuꞌu zaꞌra, isimiroti na tiꞌra norĩ ma, te te ãma tãma ꞌre rowasuꞌu zaꞌra mono da,
6 isihudu norĩ te te ꞌre waihuꞌu zaꞌra mono da, ta norĩ zama te te duré tiꞌra norĩ ma, ãma tãma ꞌre rowasuꞌu zaꞌra mono da.
7 Ãne te za õ norĩ zama tiꞌumnhasizé, ꞌRe ihâimana uꞌâsi mono ma, te te sina tãma ꞌre sõmri zaꞌra.Marĩ te te ꞌre iꞌabꞌmanharĩ mono zém na hã ãma ꞌre poꞌre simrami zaꞌra mono õ di za. Õne uꞌâ te za isimiroti hã te te ꞌre wapari pese zaꞌra.
8 Ta norĩ hã tihiꞌrata norĩ ne, ꞌRe ihâimana uꞌâsi mono mreme na ãma ꞌre nomro mono õ di za.Ihiꞌrata norĩ hã aꞌuwẽ iwasédé ma tô tinhimipari õ na si ꞌre nomro. Ta norĩ hã niwamhã siptete na ꞌRe ihâimana uꞌâsi mono hã te te sina ꞌre umnhasi zaꞌra mono õ di.Duré õne uꞌâsi õhõ ãma hã iꞌuwaibaba na ãma ꞌre nomro mono õ di.
9 Efraĩhĩ hawi aꞌuwẽ siꞌaibâ norĩ hã simnhiꞌãsi ré, duré tiꞌi réma tô bâtâ na dasiꞌwapéi wamhã dawi aimani zaꞌra.
10 Izaraéu nhihudu norĩ, ꞌRe ihâimana uꞌâsi mono tinhimiropisutu zahi te te tãma iꞌmanharĩ zaꞌra zém na hã te te ãma siwi uwaimrami õ di. Duré isimiroti zarina ꞌre inomro mono da hã te te sima wẽ zaꞌra õ di.
11 Iꞌubu nhoꞌa zaꞌra, marĩ iwaihuꞌuꞌõ te te tãma ꞌre iꞌabꞌmanharĩ mono zém na hã ma tô duré ãma poꞌre haꞌâri pese zaꞌra.
12 Ihiꞌrata norĩ nhoꞌa marĩ iwaihuꞌuꞌõ hã, ma tô ꞌRe ihâimana uꞌâsi mono hã ꞌmanha, Ezitu tiꞌai ꞌre, Zoã na romharé nhisi ãma.
13 Â na ma tô ãma aipoꞌo, te te ãma saprĩ zaꞌra da hã.Ãhã wa, te taré â zadaꞌré siꞌuiwa hã tiꞌâtâ zahuré, ꞌri ꞌwawi waꞌra ꞌrãihâ ne.
14 Bâtâ sidâpâsi te ꞌRe ihâimana uꞌâsi mono hâiwaꞌa zarobꞌa pisutu pese na te te ꞌre simro.Duré mara sidâpâsi te unhama roꞌo pisutu pese na hã te te duré ꞌre simro.
15 Ta hã supara ꞌré na ro ꞌre irosaꞌwari mono ãma ẽtẽ tõmo wawẽ te te itopoꞌo hawimhã ma tô tiꞌai ꞌrowi uptabi hawim ne â hã saꞌẽtẽ na tãma puꞌu zaꞌra, aꞌuwẽ te te iꞌâhuri da hã.
16 Ẽtẽ tõmo wawẽ hawi panhoꞌõmo ne â ipraba da hã ma tô âpuꞌu.
17 Tane nherẽ, wahiꞌrata norĩ, ma tô ꞌRe ihâimana uꞌâsi mono wi tiwasédé te te ꞌre iꞌmanharĩ zaꞌra mono zém na hã te te ãma ꞌre uzusi uꞌâsi zaꞌra.Ta norĩ hã ma tô supara ꞌré na rop si ꞌre irosaꞌwari mono ãma te te siwi ꞌre wẽꞌõ pese zaꞌra, danhipai u Isiptede ꞌre ihâimana mono hã.
18 Tahawa, niha na rosaꞌrada sihawim na te te sima iꞌmanharĩ zaꞌra zarina, ma tô ꞌRe ihâimana uꞌâsi mono hã niha zô sina te te ꞌre pibu zaꞌra, dasa te te tiwi ꞌre iwaptẽrẽ zaꞌra mono na.
19 ꞌRe ihâimana uꞌâsi mono na ma tô ãne nharĩ wasété zaꞌra:“E ꞌRe ihâimana uꞌâsi mono waihuꞌu pese bâ supara ꞌré na rop si ꞌre irosaꞌwari mono ãma dasa te te wama isõmri zaꞌra da hã.
20 Ãne hã tô wama waihuꞌu pese zaꞌra di, ẽtẽ tõmo wawẽ te te õ hã topoꞌo wa, â ihawi iprabazém na, panhoꞌõmo ãma ipraba ne hã.E ãne nherẽ, iꞌuꞌẽtẽ wapu za te te wama isõmri zaꞌra da hã tãma waihuꞌu pese bâ.E ãne nherẽ, tinhibꞌaꞌuwẽ norĩ ma, romnhi hã za te te tãma sõmri zaꞌra da bâ.”
21 Ãne hã Uburé Danhibꞌapito te te sina wapari wamhã, ma tô sada tinhitiꞌru zaꞌra.Tahawa, unhama roꞌo na ma tô susi zaꞌra. Ma tô duré sada isitiꞌru zaꞌra zé hã sina hâimo pese.
22 E marĩ wa. Ta norĩ hã ꞌRe ihâimana uꞌâsi mono te te ꞌre saze zaꞌra mono õ wa, duré tiwaihuꞌu pese na za te te ꞌre isõꞌreptu zaꞌra mono zém na te te sina ꞌre umnhasi zaꞌra mono õ wa.
23 Tane nherẽ, ꞌRe ihâimana uꞌâsi mono, hâiwa ma, te te nharĩ wamhã, ma tô hâiwa ꞌridawa norĩ ma hã tãma ꞌre ꞌru zaꞌra, siꞌuihâ na siꞌridawa zaꞌra da hã.
24 Ma tô hâiwa hawi iꞌuꞌẽtẽ wapu ne hã mana na isisi tisa te te ãma huri mono da, tãma rereꞌe mono da hã nasi tãma ꞌmanharĩ zaꞌra.
25 Ãne wa, te aꞌuwẽ norĩ hã hâiwa ãma romhuriꞌwa norĩ sazém na iꞌuꞌẽtẽ wapu na tisa hã te te huri.ꞌRe ihâimana uꞌâsi mono, tisa sima iwẽ na te te huri mono da hã ma tô tãma sõmri zaꞌra.
26 Taha pari hâiwa hawi, bâtâ pusizém hawi rowaꞌu te te rowapõrĩ da hã ma tô wadaꞌu. Hâiwa nhimiꞌe hawi tiwaihuꞌu pese na rowaꞌu watobro da hã, ma tô duré wadaꞌu, te te rowapõrĩ da.
27 Aꞌuwẽ nhisiwi, si ahâ uptabi na rereꞌe da hã ma tô ꞌmanha, robzapru te te ꞌre irobꞌupsibi mono ne, niha wamhã duré âporé zaihâ na supara ꞌré ꞌre isimiꞌwara mono ne.
28 Romhâ ꞌmanharĩ na ꞌri isisõré waꞌwa ma rereꞌe, si norĩ hã, ꞌri mana wi baba.
29 Ãhã wamhã, Izaraéu nhihudu norĩ sima iwẽ na ma tô tihu.Ãne ma tô te te ꞌmahâpãrĩ.
30 Tane nherẽ, zahadu te te huri ré, te te ꞌmahâpãrĩ uptabi zaꞌra õ ré,
31 ma tô ꞌRe ihâimana uꞌâsi mono sada tinhitiꞌru zaꞌra.Tahawa Izaraéu nhihudu aibâ isiptete norĩ iprédupté hã, ma tô uprosi.
32 Tawamhã marĩ dama iwaihuꞌuꞌõ te te tãma ꞌmanharĩ parib zaꞌra nherẽ, ma tô nasi tiwasété ꞌmanharĩ na hã te te ãma uzusi uꞌâsi zaꞌra.ꞌRe ihâimana uꞌâsi mono na tinhimizaze hã te te sima ꞌre wẽ zaꞌra mono õ di.
33 Tahawa, ma tô ihâimanazéb zaꞌra waptu na tiwi ꞌrãtõ zaꞌra, dazadawa waꞌuꞌu na isaꞌuri na ne, duré siwaꞌru bâtâ na waptu na marĩ ipipa ꞌre iwairébé mono ne.
34 ꞌRe ihâimana uꞌâsi mono, te te ꞌre ahâ zaꞌra mono sidâpâsi, ꞌre dâꞌâ zaꞌra mono wamhã, ma tô ihâiba ré norĩ hã apâ sima sô ꞌre sõpré.Ma tô duré apâ pẽꞌẽ toi wẽ te, itẽme ꞌre sipizari zaꞌra.
35 ꞌRe ihâimana uꞌâsi mono ãma ma tô ꞌre poꞌre puꞌu zaꞌra, ẽtẽ tõmo wawẽ ne tãma ꞌre ihâimana zaꞌra mono na hã.Danhisi danhipai u Isiptede ꞌre isãmra mono Isõꞌreptu zaꞌra ꞌwa na tãma ꞌre ihâimana zaꞌra mono na hã ma tô duré ãma ꞌre poꞌre puꞌu zaꞌra, we tãma ꞌre romhâimana zaꞌra mono sidâpâsi.
36 Tane nherẽ, ma tô apâ duré uburé sadawa nhipese na hã ꞌre nomro.Imreme zaꞌra hã senai õ na si ma tô duré ꞌre nomro.
37 Tihâiba uptabi na sena na ãma tãma ꞌre hâimana zaꞌra mono õ di.ꞌRe ihâimana uꞌâsi mono, tinhimiropisutu zahi te te aré tãma iꞌmanharĩ zaꞌra zém na hã, duré sena na ãma ꞌre nomro mono õ di, ta norĩ hã.
38 Tane nherẽ, ꞌRe ihâimana uꞌâsi mono, tinhibꞌaꞌuwẽ ãma hã ma tô ꞌre siwamri uꞌâsi zaꞌra.Iwasédé te te oto duré ãma ꞌre aꞌmadâꞌâ mono õ di. Tahawa, õne haré te te duré ꞌre aꞌuprosi mono õ di.Duré sada zaꞌra ꞌre sitiꞌrui pusi mono da nherẽ, ma tô nasi ꞌrâwi sisõwada, sada ꞌre sitiꞌrui pese zaꞌra mono tõ da.
39 Õ norĩ ãma hã ma tô ꞌre poꞌre puꞌu uꞌâsi zaꞌra, idâꞌâ pese zaꞌra na hã, aiwa rowaꞌu te te ꞌre rowapõrĩ mono pari, õne haré sô ꞌre irobꞌéꞌé zaꞌra mono ne hã.
40 E niha ma tô ꞌRe ihâimana uꞌâsi mono wi, rop si ꞌre irosaꞌwari mono ãma hã nasi tiwi isipizari na sahu ahâ zaꞌra!E niha ma tô duré tiwasété ꞌmanharĩ na nasi ãma sahu ahâ zaꞌra, robzeiꞌõ hã te te ãma tiwi iwazere zaꞌra zéb da hã.
41 Tinhimiꞌmanharĩ wasété zém na te te nasi ãma isisiwi zaꞌra zarina, ma tô ꞌRe ihâimana uꞌâsi mono hã siwaihuꞌu zaꞌra ãna taha na nasi ãma siwi pibu.Taha zarina ma tô duré ꞌRe ihâimana uꞌâsi mono, Izaraéu nhihudu norĩ ma, marĩ iwasédé, ãma ꞌre ihâimana mono õ, iwẽ uptabi wi, nasi ãma tiwi robzeiꞌõ zani zaꞌra.
42 Ta norĩ hã ma tô isiptete ꞌmanharĩzém na ãma poꞌre haꞌâri pese zaꞌra, bâtâ na te te isõꞌreptu zaꞌra zém na hã isitobꞌru norĩ wi.
43 Marĩ iwẽ uptabi, dama isaꞌreseꞌõ iwaihuꞌuꞌõ, Zoã romharé nhisi ãma bâtâ na te te tãma iꞌmanharĩ zaꞌra zém na hã ma tô poꞌre haꞌâri pese zaꞌra, Ezitu tiꞌai ãmam na.
44 Tame ma tô panhoꞌõmo mono na â hã âwaprui mono da hã ꞌmanha.Ãne wa, ezipsiu norĩ ma, â hã hâimana õ di, te te iꞌâhuri da hã.
45 Ubu ahâ uptabi na hupuꞌu da hã ma tô tãma robꞌru, taha na aꞌuwẽ norĩ hã te te ãma robzépata zaꞌra da.Uti zarãpré ma, ma tô duré robꞌru, rom na hã uburé marĩ te te tiwi iꞌuprosi zaꞌra mono da hã.
46 Tawamhã ꞌriti ma zama hã ma tô robꞌru, amnho te te itehâri mono, te te tiwi ihuri mono da hã, duré robꞌre te te tiwi iwamnarĩ pese zaꞌra mono da hã.
47 Tawamhã tã ipĩni nhama ré na, ma tô uva ꞌru daburu na hã tiwi uprosi zaꞌra.Duré robꞌrã figu wede iꞌrãi ré hã ma tô rowahâzé uꞌẽtẽ na hã tiwi uprosi zaꞌra.
48 Powawẽ hã, poneꞌẽrebâ norĩ zama hã tã ipĩni nhama zaꞌẽtẽ na, duré tãiwapsaꞌa na tiwi siꞌutõrĩ da hã ma tô duré tãma ꞌmanharĩ zaꞌra.
49 Õ hã ma tô unhama ne na tinhitiꞌru na hã duré sahi uptabi na hã sada tihâimana zaꞌra, hâiwa ãma romhuriꞌwa ahâ uptabi na te te ꞌre daꞌuprosi mono da, we dazô ꞌre inomro mono ne.
50 Tawamhã tinhitiꞌruzé wi hã sitété õ di.Duré dâꞌâ tõ zaꞌra da hã, te te tãma baꞌa zaꞌra õ di.Tãma irobꞌmanharĩ wasété zaꞌra zé ipipa na hã ma tô uprosi.
51 Ezitu tiꞌai ãma ꞌri mono bâ hã ma tô ꞌRe ihâimana uꞌâsi mono, daꞌra siꞌaibâ ipotoꞌrata si hã uprosi.
52 Taha pari, poneꞌẽrebâ ꞌmadâꞌâꞌwa tinhimizama te te ꞌre isimroi mono ne, ma tô ꞌRe ihâimana uꞌâsi mono, Izaraéu nhihudu norĩ hã Ezitu hawimhã te te simro, rop si ꞌre irosaꞌwari mono waꞌwaibaba.
53 Tawamhã ta hã tãma romnhimimnhasi ãna te te simro mono wa, te pahi ãna tihâimana zaꞌra.Ãhã wamhã, isitobꞌru norĩ si hã ma tô âporé na â hã suwa zaꞌra.
54 ꞌRe ihâimana uꞌâsi mono hã ma tô Izaraéu nhihudu norĩ, tinhiptiꞌa iwazéb zahi u hã te te simro, ẽtẽ ãma tô õ hã te te daꞌãma iꞌaiꞌutézéb u.
55 Tawamhã isibꞌaꞌuwẽ, tiꞌai u te te sina rotété zaꞌra mono sidâpâsi, ma tô tiꞌai ꞌre, ꞌre idahâimana siromo zaꞌra mono norĩ hã te te tãma ꞌre satõrĩ zaꞌra.Tahawa, Izaraéu nhihudu waꞌõtõ norĩ ꞌre ma, ma tô tiꞌa hã te te tãma ꞌre poꞌo zaꞌra.Duré iꞌre ꞌre idasiꞌubumroi mono norĩ nhorõwa siromo wa, Izaraéu nhihudu ꞌre ihâimana zaꞌra mono da hã ma tô tãma saꞌré zaꞌra.
56 Tane nherẽ, Izaraéu nhihudu norĩ, ꞌRe ihâimana uꞌâsi mono danhipai u ꞌre isãmra mono wi ma tô tiwi aipizari zaꞌra.Ma tô duré ꞌRe ihâimana uꞌâsi mono hã sihâimana waihuꞌu zaꞌra ãna sina siwi pibu.Tahawa, isimiroti hã te te ꞌre wapari zaꞌra mono õ wa,
57 ma tô apâ sima iwẽ na marĩ iwasété zô hã ꞌre sipizari zaꞌra, tihiꞌrata norĩ ne. Umnhiꞌãsi ꞌmanharĩ wasédé hã dama iꞌumnhasi õ ne, te umnhasi ãna hã ꞌre hâimana zaꞌra.
58 Ta norĩ hã ihâibaꞌõ norĩ ãma ꞌre iwata zaꞌra mono zéb da, wedezane ꞌmanharĩ hã te te siwi ꞌre iꞌmanharĩ mono uꞌâbâmhã ma tô siwi te te ꞌre sitiꞌru zani.Duré senaiꞌõ ihâibaꞌõ norĩ poto na romhâibarĩ te te siwi ꞌre iꞌmanharĩ mono uꞌâbâmhã ma tô duré te te ꞌre iꞌruiwapari zaꞌra mono zé hã te te sina tãma ꞌre sani zaꞌra, ꞌRe ihâimana uꞌâsi mono ma hã.
59 Ãne hã ꞌRe ihâimana uꞌâsi mono te te ꞌmadâꞌâ wamhã, ma tô tinhitiꞌru.Ma tô duré tinhibꞌaꞌuwẽ hã siwi awẽꞌõ pese.
60 Tahawa, romhâ ꞌmanharĩ na tinhorõwa iwazéb zahi, Silo ãma ꞌre isa mono hã ma tô tirẽ, ꞌri ꞌre dawaꞌwa, iwa ꞌre ihâimana mono zé hã.
61 Wanhitobꞌru norĩ ma, ma tô tãma saꞌré zaꞌra, tinhimiroti ré ite wedehâꞌre ꞌmanharĩ hã te te wawi âri zaꞌra da hã, ꞌre ihâimana mono hã iwaihuꞌu pese ré, duré ite rowẽ zaꞌẽtẽ ré hã.
62 Tawamhã tinhibꞌaꞌuwẽ da sitiꞌru wa, ma tô isitobꞌru norĩ ma hãtãma saꞌré zaꞌra, sibꞌézé ꞌwa pa na te te siwi simro da.
63 Tahawa, ipréduptém norĩ hã ma tô dasiꞌwapé na aiꞌutõ.Tahawa duré azarutu norĩ hã niꞌwai ãma ꞌre mro zaꞌra mono da hã waihuꞌu õ di.
64 Tawamhã sasedoti norĩ sibꞌézé ꞌwa pa na ma tô aiꞌutõ. Tahawa, iꞌamo aba norĩ hã ãma ꞌruꞌru waihuꞌu õ di.
65 Tawamhã niꞌwa topoꞌo wim ne, ma tô oto Uburé Danhibꞌapito hã robꞌmadâ, aibâ isibꞌru uva ꞌrãi waꞌu isé na siꞌrãiwamnarĩ pari, itopoꞌo wim ne.
66 Õ hã ma tô tinhitobꞌru norĩ ma sisaꞌrei mono da hã, duré da te ãma ꞌre aiꞌuté zaꞌra mono wa, õne uꞌâ tãma rowazép sina ꞌre hâimana zaꞌra mono da, tãma ꞌmanharĩ zaꞌra.
67 Õ hã ma tô duré Zuzéhé nhihudu norĩ hã siwi wẽꞌõ zaꞌra. Efraĩhĩ hawi aꞌuwẽ norĩ hã te te duré pisutu zaꞌra õ di.
68 Ta norĩ waꞌrãmi, ma tô Zudaha hawi aꞌuwẽ si hã pisutu zaꞌra.Siã na ẽtẽ nhisi te te ꞌre isawi pese mono ma tô duré pisutu.
69 Tawamhã tinhorõwa ꞌri, hâiwa ãma ꞌri, ꞌre isa mono ne hã ma tô tete na ꞌmanha, tiꞌa õne uꞌâ tete na ꞌre isaꞌwari mono ne.
70 Tawamhã ꞌRe ihâimana uꞌâsi mono, ma tô Davi tãma ꞌre iromhuri mono ꞌwa hã pisutu.Ma tô poneꞌẽrebâ ꞌwawi waꞌra hawimhã waze,
71 poneꞌẽrebâ ubumroiꞌwa na ꞌre ihâimana mono zém hawimhã.Ta hã ma tô Izaraéu nhihudu norĩ nhibꞌapito na tãma ꞌre hâimana zaꞌra mono da tisẽ, poneꞌẽrebâ ꞌmadâꞌâꞌwa ne ꞌRe ihâimana uꞌâsi mono nhibꞌaꞌuwẽ ma, ꞌre hâimana mono da.
72 Tawamhã Davi, tihâimanazé te te ꞌre pibui wẽ mono sina ma tô te te ꞌre aꞌmadâꞌâ.Duré tinhimirowaihuꞌu wẽ na ma tô te te ꞌre anhimro, aꞌuwẽ norĩ hã.
