Kubalisa uLuka 12:1-59
-
Igwele labaFarisi (1-3)
-
Yoyikani uThixo, hayi abantu (4-7)
-
Ukuvuma ukuba bamanyene noKristu (8-12)
-
Umzekelo wendoda esisityebi kodwa esisidenge (13-21)
-
Yekani ukuba nexhala (22-34)
-
Umhlambi omncinci (32)
-
-
Ukuthi qwa (35-40)
-
Igosa elithembekileyo negosa elingathembekanga (41-48)
-
Akazisanga luxolo, uzokwahlukanisa (49-53)
-
Ukubona amaxesha (54-56)
-
Ukulungisa iingxaki (57-59)
12 Kwafika amawakawaka abantu, bebaninzi kangangokuba benyathelana. UYesu waqala wathetha nabafundi bakhe esithi: “Lilumkeleni igwele labaFarisi, balumkeleni banganiqhathi.+
2 Kodwa akukho nto ifihliweyo ingazukuvezwa, kungekho nanto iyimfihlo ingazukwaziwa.+
3 Ngoko ke, izinto enizithetha ebumnyameni ziza kuviwa ekuhleni, nezinto enizisebeza emfihlekweni ziza kukhwazwa phezu kwezindlu.
4 Kwakhona ndithi kuni, bahlobo bam,+ sanukuboyika abo babulala umzimba kodwa bangakwazi ukwenza enye into engaphezu koko.+
5 Mandinichazele ukuba yoyikani bani: Yoyikani Lowo unegunya lokuphosa eGehena*+ emva kokuba ebulele. Ndithi kuni, Nguye enimele nimoyike.+
6 Iintaka ezincinci* ezintlanu zithengiswa ngeesentana ezimbini,* andithi? Kodwa akukho nenye uThixo ayilibalayo.*+
7 Nina ke, kwaneenwele ezi zentloko yenu zibaliwe zonke.+ Sanukoyika; nixabiseke ngaphezulu lee kunezo ntaka.+
8 “Ndithi kuni, wonke umntu ondivumayo phambi kwabantu,+ naye uNyana womntu uza kumvuma phambi kweengelosi zikaThixo.+
9 Kodwa nabani na ondiphikayo phambi kwabantu, nam ndiza kumphika phambi kweengelosi zikaThixo.+
10 Nabani na othetha kakubi ngoNyana womntu, uza kuxolelwa, kodwa nabani na othetha kakubi ngomoya oyingcwele, akazukuxolelwa.+
11 Xa benisa phambi kwabantu,* phambi kwabalawuli nabasemagunyeni, ningabi naxhala lokuba niza kuzithethelela njani okanye nithini,+
12 kuba umoya oyingcwele uza kunazisa ngelo xesha ukuba manithini.”+
13 Omnye kwabo bantu wathi kuye: “Mfundisi, xelela umntakwethu ahlulelane nam ngelifa.”
14 Wathi kuye: “Mfondini, ngubani othe ndingangumgwebi okanye umlamli phakathi kwenu?”
15 Emva koko wathi kubo: “Vulani amehlo nize nizigade ninganyoluki,+ kuba nokuba umntu unezinto ezininzi, ubomi bakhe abuxhomekekanga kwizinto anazo.”+
16 Wabenzela umzekelo, wathi: “Umhlaba wesinye isityebi wachuma kakhulu.
17 Sathi, ‘Ndithini kanene ngoku, kuba andisenayo indawo yokufaka isivuno sam?’
18 Sathi, ‘Nantsi into endiza kuyenza:+ Ndiza kubadiliza oovimba bam ndize ndakhe abakhulu kunabo, ndisifake apho sonke isivuno sam nazo zonke izinto zam,
19 ibe ndiza kuzixelela ukuba: “Ndizigcinele izinto ezininzi eziza kundiqhuba iminyaka; ndiza kuzipholela, nditye, ndisele, ndonwabe.”’
20 Kodwa uThixo wathi kuso, ‘Mntundini ongasebenzisi ngqondo, uza kubulawa ngobu busuku banamhlanje. Ziza kuba zezikabani ke ezi zinto uzigcinileyo?’+
21 Siba njalo ke isiphelo somntu oziqwebela ubutyebi, kodwa engesosityebi kuThixo.”+
22 Emva koko wathi kubafundi bakhe: “Yiloo nto ndisithi kuni, yekani ukuxhalela ubomi benu, ukuba niza kutya ntoni, okanye nixhalele imizimba yenu, ukuba niza kunxiba ntoni.+
23 Kuba ubomi bubaluleke ngaphezu kokutya, nomzimba ngaphezu kwempahla.
24 Khanikhe nicinge ngamahlungulu: Awatyali, awavuni, awaqokeleli kutya koovimba, kodwa ondliwa nguThixo.+ Anibalulekanga ngaphezu kweentaka na nina?+
25 Ngubani kuni onokuthi ngokuba nexhala ongeze nomzuzu lo omnye* kubomi bakhe?
26 Ukuba nohlulwa nayiloo nto incinci kangaka, kuza kuninceda ngantoni ke ukuxhalela ezinye izinto?+
27 Khanicinge nje ngendlela ezikhula ngayo iintyatyambo zasendle:* Azisebenzi nzima, zingazithungeli nampahla; kodwa ndithi kuni, kwaneempahla ezimbeje-mbeje zikaSolomon zazingazogqithi ngobuhle.+
28 Ngoko ke, ukuba uThixo uzinxibisa ngaloo ndlela izityalo zasendle, ezibakho namhlanje zize ngomso ziphoswe eziko, akazukuninxibisa bhetele na nina, nina ninokholo oluncinci?
29 Ngoko yekani ukuba nexhala lokuba niza kutya ntoni, nisele ntoni; yekani ukuzikhathaza kangaka;+
30 kuba ezi zizinto iintlanga ezileqana nazo, kodwa uTata wenu uyazi ukuba niyazidinga ezi zinto.+
31 Kunoko, qhubekani nifuna uBukumkani bukaThixo, yaye ezi zinto ziza kongezelelwa kuni.+
32 “Sanukoyika mhlambi mncinci,+ kuba uTata wenu uza kuninika uBukumkani.+
33 Thengisani izinto zenu, nincede amahlwempu.*+ Yenzani iibhegi zemali ezingagugiyo, ubutyebi obungasoze buphele emazulwini,+ apho kungasondeli sela, kungonakalisi nazinambuzane.*
34 Kuba apho bukhoyo ubutyebi benu, neentliziyo zenu ziza kuba lapho.
35 “Hlalani nilungile,+ nezibane zenu zikhanya,+
36 nifane nabantu abalinde inkosi yabo ukuba ibuye+ emtshatweni,+ ukuze xa ifika inkqonkqoza bayivulele ngoko nangoko.
37 Onwabile loo makhoboka inkosi yawo efika elindile! Ndiyaniqinisekisa ukuba, iza kunxiba iimpahla zokusebenza, iwahlalise etafileni, ize iwaphe ukutya.
38 Onwabile ukuba ithe yakufika ezinzulwini zobusuku,* okanye ekuzeni kusa,* yafika elindile!
39 Kodwa yazini le nto, ukuba umnikazi wendlu ebelazi ixesha eliza kufika ngalo isela, ebeza kuqinisekisa ukuba indlu yakhe ayiqhekezwa.+
40 Ngoko ke nani, hlalani nilindile, kuba uNyana womntu uza ngexesha eningamlindelanga ngalo.”+
41 Ngoko uPetros wathi: “Nkosi, kulo mzekelo uthetha ngathi sodwa na okanye uthetha ngomntu wonke?”
42 Yaza iNkosi yathi: “Ngubani kanye kanye oligosa elithembekileyo neliyingqondi,* eliza kunikwa yinkosi yalo umsebenzi wokukhathalela abo basebenza endlini yayo, ukuze libanike ukutya kwabo ngexesha elifanelekileyo?+
43 Liza konwaba elo khoboka ukuba inkosi yalo ifika liwenza loo msebenzi!
44 Ndiyaniqinisekisa ukuba, iza kuliphathisa zonke izinto zayo.
45 Kodwa ukuba elo khoboka lithi entliziyweni yalo, ‘Inkosi yam ayide ifike,’ lize libethe amanye amakhoboka, litye, lisele linxile,+
46 inkosi yalo iza kufika ngemini elingayilindelanga nangexesha elingalaziyo, ilohlwaye kakhulu, ize iliphathe njengabo bangathembekanga.
47 Ngoko elo khoboka liyaziyo into efunwa yinkosi yalo, kodwa alakulungiselela ukubuya kwayo okanye alakwenza ukuthanda kwayo, liza kubethwa imivumbo emininzi.+
48 Kodwa elo lingayaziyo laza lenza izinto ezifanelwe yimivumbo, liza kubethwa embalwa. Ngoko ke, wonke umntu onikwe okuninzi, kuza kufunwa okuninzi kuye, nalowo ubekwe ukuba aphathe izinto ezininzi, kuza kulindelwa izinto ezininzi kuye.+
49 “Ndizokuqala umlilo emhlabeni, ukuba sowuvutha yintoni ke enye endiyifunayo?
50 Kukho indlela endimele ndibhaptizwe ngayo, ibe ndiza kuhlala ndikhathazekile de idlule!+
51 Nicinga ukuba ndizise uxolo emhlabeni? Andizisanga luxolo, ndizokwahlukanisa.+
52 Kuba ukususela ngoku kuza kubakho abahlanu endlini enye bengavani, abathathu bengavani nababini, nababini bengavani nabathathu.
53 Utata akazukuvana nonyana, nonyana angavani notata, umama akazukuvana nentombi, nentombi ingavani nomama, umazala akazukuvana nomolokazana, nomolokazana angavani nomazala.”+
54 Waphinda wathi kwabo bantu: “Xa nibona kuvela ilifu entshonalanga, niye nithi, ‘Kuza isaqhwithi,’ yaye kuba njalo.
55 Naxa nibona kuvuthuza umoya ovela ngasemzantsi, nithi, ‘Kuza kuba shushu kakhulu,’ yaye kuba njalo.
56 Bahanahanisindini,* niyakwazi ukubona into eza kwenzeka ngokujonga nje umhlaba okanye isibhakabhaka, kutheni ke ningakwazi ukubona ukuba kwenzeka ntoni ngoku?+
57 Kutheni ningayiqondi nje into enimele niyenze?
58 Ngokomzekelo, xa uhamba nomntu esiya kukumangalela, zama ukuba niyilungise ingxaki yenu nisesendleleni, ukuze angabi sakumangalela kwijaji, ize yona ikunikele kunogada wasenkundleni, yena akuphose ejele.+
59 Ndithi kuwe, soze uphume apho de ukhuphe nesenti yokugqibela.”*
Umbhalo osemazantsi
^ Funda Ingcaciso Yamagama.
^ Okanye “Oongqatyana.”
^ Ngokoqobo, “ngeeassarions ezimbini.” Le yimali encinci kakhulu. Funda Isihlomelo B14.
^ Okanye “angayihoyanga.”
^ Okanye “kwizindlu akhonzela kuzo amaYuda.”
^ Okanye “nekubhite le enye.” Funda Isihlomelo B14.
^ Okanye “iinyibiba.”
^ Funda Ingcaciso Yamagama.
^ Oko kukuthi, amanundu.
^ Nanini na phakathi kuka-12:00 a.m. no-3:00 a.m.
^ Nanini na phakathi kuka-9:00 p.m. no-12:00 a.m.
^ Okanye “ongumphathi wendlu othembekileyo noyingqondi.”
^ Oko kukuthi, abantu abazenza amalungisa bengengawo.
^ Ngokoqobo, “neyokugqibela ilepton.” Funda Isihlomelo B14.
