Kubalisa UMateyu 26:1-75
-
Ababingeleli baceba ukubulala uYesu (1-5)
-
UYesu ugalelwa ngeoli enuka kamnandi (6-13)
-
IPasika yokugqibela nokujikelwa kukaYesu (14-25)
-
ISidlo Sangokuhlwa SeNkosi sokuqala (26-30)
-
Kuprofetwa ukuba uPetros uza kuphika uYesu (31-35)
-
UYesu uthandaza eGetsemane (36-46)
-
UYesu uyabanjwa (47-56)
-
Kuxoxwa ityala kwiNkundla Ephakamileyo YamaYuda (57-68)
-
UPetros uphika uYesu (69-75)
26 Emva kokuba uYesu ethethe zonke ezi zinto, wathi kubafundi bakhe:
2 “Niyazi ukuba kusele iintsuku ezimbini ibe yiPasika,+ ibe uNyana womntu uza kunikelwa ezandleni zeentshaba ukuze abethelelwe esibondeni.”+
3 Ngoko ababingeleli abaziintloko nabadala badibana eyadini kwaKayafa,+ umbingeleli omkhulu,
4 baceba iqhinga+ lokubamba uYesu ukuze bambulale.
5 Kodwa ke babesithi: “Masingambambi ngexesha letheko, ukuze kungabikho sidubedube.”
6 Xa uYesu wayeseBhethani endlini kaSimon owayekade eneqhenqa,+
7 kweza kuye umfazi onebhotile yealabhasta ineoli enuka kamnandi nenexabiso elikhulu, waza wayigalela kuYesu entloko ngoxa wayehleli etafileni esitya.
8 Bathi bakuyibona le nto abafundi bakhe bacaphuka bathi: “Kutheni kudlalwa ngale oli nje?
9 Kuba ibinokuthengiswa ngemali eninzi ize inikwe amahlwempu.”
10 Uthe uYesu akwazi ukuba bathetha ngantoni, wathi kubo: “Nimhluphela ntoni lo mfazi? Intle le nto andenzele yona.
11 Kaloku aza kusoloko ekho amahlwempu,+ kodwa mna andizukusoloko ndikunye nani.+
12 Xa lo mfazi ebendigalela ngale oli, ebelungiselela ukungcwatywa kwam.+
13 Ndiyaniqinisekisa ukuba, naphi na apho zishunyayelwa khona ezi ndaba zilungileyo emhlabeni, kuza kuthethwa nangaye lo mfazi, aze akhunjulwe ngale nto ayenzileyo.”+
14 Ngoko omnye wabapostile abayi-12, lo ubizwa ngokuba nguYudas Skariyoti,+ waya kubabingeleli abaziintloko+
15 wathi: “Niza kundinika ntoni ukuba ndimnikela kuni?”+ Bathi baza kumnika amaqhosha esilivere ayi-30.+
16 Ukususela ngelo xesha, uYudas wakhangela ithuba lokujikela uYesu.
17 Ngosuku lokuqala leTheko Lezonka Ezingenagwele+ abafundi beza kuYesu, bathi: “Ufuna siyilungiselele phi iPasika?”+
18 Wathi: “Yiyani esixekweni kuZibani-bani nize nithi kuye, ‘UMfundisi uthi: “Ixesha lam lokuba ndife lisondele; ndiza kubhiyozela iPasika nabafundi bam kwakho.”’”
19 Ngoko abo bafundi benza njengokuba uYesu wayebayalele, baza balungiselela iPasika.
20 Kwathi kwakuhlwa,+ wahlala etafileni nabafundi bakhe abayi-12.+
21 Ngoxa babesitya, wathi: “Ndiyaniqinisekisa ukuba, omnye wenu uza kundijikela.”+
22 Bekhathazeke kakhulu yile nto, bonke bathi kuye: “Nkosi, asindim, andithi?”
23 Wathi: “Ndiza kujikelwa ngumntu oncinda kunye nam esityeni.+
24 Yinyani yona into yokuba uNyana womntu uza kufa, njengokuba kubhaliwe, kodwa uza kuthi shu+ loo mntu ujikela uNyana womntu!+ Ngekungcono ukuba wayengazange azalwe.”+
25 UYudas, owayesele eza kumjikela, wathi: “Asindim, andithi Mfundisi?”* Wathi uYesu: “Nawe utsho.”
26 Bathi njengokuba besitya, uYesu wathatha isonka, waza emva kokuba ethandazile* wasiqhekeza,+ wanika abafundi bakhe, wathi: “Thathani nitye. Esi sonka simela umzimba wam.”+
27 Wathatha nendebe, wathandaza, waza wabanika, esithi: “Selani nonke,+
28 kuba le wayini imela ‘igazi lam+ lesivumelwano,’+ eliza kuchitheka ukuze kuxolelwe izono+ zabaninzi.+
29 Kodwa ndithi kuni: Soze ndiphinde ndiyisele le wayini de kube yiloo mini ndiyisela nani intsha eBukumkanini bukaTata.”+
30 Ekugqibeleni, emva kokucula iingoma zokudumisa uThixo, bahamba baya kwiNtaba YemiNquma.+
31 Emva koko uYesu wathi kubo: “Kobu busuku banamhlanje, nonke niza kundishiya, kuba kubhaliwe kwathiwa: ‘Ndiza kuhlasela umalusi, uze uthi saa umhlambi weegusha.’+
32 Kodwa emva kokuba ndivusiwe, ndiza kuhamba kuqala kunani ndiye eGalili.”+
33 UPetros wathi kuye: “Nokuba bangakushiya bonke, soze mna ndikushiye!”+
34 UYesu wathi: “Ndiyakuqinisekisa ukuba, kobu busuku banamhlanje, uza kuthi ungekakhonyi umqhagi, ube sowundiphike kathathu.”+
35 UPetros wathi: “Nokuba kungafuneka ndife kunye nawe, soze mna ndikuphike.”+ Batsho ke nabanye abafundi.
36 Emva koko uYesu weza nabafundi bakhe kwindawo ekuthiwa yiGetsemane,+ wathi kubo: “Hlalani apha, ndisayokuthandaza phaya.”+
37 Wahamba noPetros noonyana ababini bakaZebhedi, yaza yabuhlungu kakhulu intliziyo yakhe.+
38 Wathi kubo: “Ndikhathazeke kakhulu, intliziyo yam ibuhlungu ngeyona ndlela. Hlalani apha, nihlale nithe qwa kunye nam.”+
39 Waya phambili umganyana, wawa ngobuso, wathandaza+ esithi: “Tata, ukuba kunokwenzeka, mayidlule le ndebe+ kum. Kodwa, mayingabi kukuthanda kwam, mayibe kukuthanda kwakho.”+
40 Wabuyela kubafundi bakhe, wafika belele, wathi kuPetros: “Nohlulwa kukulinda iyure nje enye?+
41 Hlalani nithe qwa,+ ningayeki ukuthandaza,+ ukuze ninganikezeli xa nilingwa.+ Ndiyaqonda kona ukuba intliziyo iyafuna ukwenza okulungileyo, kodwa wona umzimba ubuthathaka.”+
42 Waphinda wahamba wayokuthandaza okwesibini, esithi: “Tata, ukuba ayinakudlula le ndebe ngaphandle kokuba ndiyisele, makwenzeke ukuthanda kwakho.”+
43 Waphinda weza, wafika belele, kuba babesindwa bubuthongo.
44 Waphinda wabashiya waya kuthandaza okwesithathu, umthandazo ofanayo.
45 Emva koko wabuyela kubafundi bakhe waza wathi kubo: “Nilala njani ngexesha elibaluleke kangaka! Jongani! Lifikile ixesha lokuba uNyana womntu anikelwe ezandleni zaboni.
46 Phakamani sihambe. Jongani! Sele efikile lowo uza kundijikela.”
47 Uthe esathetha, kwafika uYudas, owayengomnye wabapostile abayi-12, ehamba neqela elikhulu labantu ababethunywe ngababingeleli abaziintloko nabadala, bephethe amakrele namagqudu.+
48 UYudas wayethe kubo: “Lowo ndiye ndamphuza,* ze nazi ukuba nguye; mbambeni.”
49 Waya ngqo kuYesu, wathi kuye: “Molo Mfundisi!”* waza wamphuza.
50 UYesu wathi kuye: “Mfondini, ufuna ntoni apha?”+ Emva koko basondela kuYesu baza bambamba.
51 Kodwa omnye wabo babehamba noYesu wathi rhuthu ikrele, wahlasela ikhoboka lombingeleli omkhulu, waliqhawula indlebe.+
52 UYesu wathi kuye: “Buyisela ikrele lakho endaweni yalo,+ kuba bonke abalwa ngekrele baza kufa kwangalo.+
53 Okanye ucinga ukuba andikwazi kucela uTata andithumelele ngoku imikhosi eyi-12 yeengelosi?+
54 Ibiza kwenzeka njani ke le nto ithethwa ziZibhalo yokuba kumele kwenzeke ngale ndlela?”
55 Ngoko uYesu wathi kwaba bantu: “Ndim na lo nizokumbamba, nide niphathe amakrele namagqudu ngokungathi nizokubamba utsotsi? Kudala ndisiza etempileni ndifundisa,+ kodwa anandibamba.+
56 Kodwa yonke le nto yenzeke ukuze izinto ezabhalwa ngabaprofeti zibe yinyani.”+ Ngoko bonke abafundi bakhe babaleka bamshiya.+
57 Abo babebambe uYesu, bamsa kuKayafa+ umbingeleli omkhulu, apho kwakudibene ababhali nabadala.+
58 Kodwa uPetros waqhubeka emlandela ekude, de wayokufika kwiyadi yombingeleli omkhulu, waza emva kokuba engenile, wahlala noonogada bendlu ukuze abone ukuba iza kuphelela phi le nto.+
59 Ngelo xesha ababingeleli abaziintloko nayo yonke iNkundla Ephakamileyo YamaYuda* babekhangela ubuxoki ababenokumtyhola ngabo uYesu ukuze bambulale.+
60 Kodwa abazange bafumane nto, nangona kweza amangqina amaninzi ethetha ubuxoki.+ Ekugqibeleni kweza amabini,
61 athi: “Lo mntu wathi, ‘Mna ndingayichitha itempile kaThixo, ndiphinde ndiyakhe ngeentsuku ezintathu.’”+
62 Athi akutsho, umbingeleli omkhulu waphakama, wathi kuye: “Uza kuthula ungaphenduli? Yintoni le akutyhola ngayo la madoda?”+
63 Kodwa uYesu wathula wathi cwaka.+ Ngoko umbingeleli omkhulu wathi kuye: “Funga ngoThixo ophilayo ukuba unguye nyhani na uKristu, uNyana kaThixo!”+
64 UYesu wathi kuye: “Nawe utsho. Kodwa ndithi kuni: Ukususela ngoku niza kumbona uNyana womntu+ ehleli ngasekunene kwaLowo unamandla,+ esiza ngamafu ezulu.”+
65 Umbingeleli omkhulu wakrazula izambatho zakhe zangaphezulu, esithi: “Udelele uThixo! Sisawafunelani ke amangqina? Jongani! Nani nizivele, udelele uThixo.
66 Nithini nina?” Bathi: “Ufanele abulawe.”+
67 Bamthufela ebusweni+ baza bambetha ngamanqindi.+ Abanye bamqhwaba ngempama,+
68 besithi: “Profeta kaloku Kristu. Ubethwe ngubani?”
69 Ngelo xesha uPetros wayehleli phandle ebaleni, kwafika intombi eyayisebenza apho, yathi kuye: “Nawe ubukunye noYesu umGalili!”+
70 Kodwa waphika phambi kwabo bonke, esithi: “Andiyazi le nto uthetha ngayo.”
71 Wathi xa ephuma esiya ngasegeyithini, wabonwa yenye intombi yaza yathi kwabo babelapho: “Lo mntu ebekunye noYesu umNazarete.”+
72 Kwakhona wafunga ephika, esithi: “Andimazi mna lo mntu!”
73 Akubanga kudala, abo babemi apho beza kuPetros, bathi: “Ngokuqinisekileyo nawe ungomnye wabo, uvakala kwakwindlela othetha ngayo.”
74 Waqalekisa, efunga esithi: “Andimazi mna lo mntu!” Ngoko nangoko wakhonya umqhagi.
75 Emva koko uPetros wakhumbula amazwi kaYesu athi: “Uza kuthi ungekakhonyi umqhagi, ube wena sowundiphike kathathu.”+ Waphuma phandle waza wakhala kabuhlungu.
Umbhalo osemazantsi
^ Okanye “Rabhi.”
^ Ngokoqobo, “ecele intsikelelo.”
^ Ukuphuza umntu, mhlawumbi esidleleni, kwakuyindlela eqhelekileyo yokubulisa.
^ Okanye “Rabhi.”
^ Okanye “iSanhedrin.”
