Yobhi 31:1-40
31 “Ndenze isivumelwano namehlo am.+
Ngoko ndingayenza njani into yokuncwasa enye intombi?*+
2 Ebeza kundenza ntoni ke uThixo?Liliphi ilifa ebendiza kulifumana kuSomandla?
3 Akazukufumana ntlekele na umenzi-bubi?Abazukufikelwa ziingxaki na abo benza izinto ezenzakalisayo?+
4 Akaziboni na iindlela zam?+Akaziboni na iindawo endinyathela kuzo?
5 Ndakha ndaxoka na?*
Ukhona na umntu endakha ndamqhatha?+
6 UThixo makandibeke ezikalini ezichanileyo;+Uza kutsho ayibone indlela endimsulwa ngayo.+
7 Ukuba iinyawo zam ziyaphuma endleleni,+Okanye intliziyo yam ilandela amehlo am,+Okanye kukho into engcolise izandla zam,
8 Imbewu endiyihlwayelayo ke mayityiwe ngomnye umntu,+Nento endiyityalayo mayincothulwe.*
9 Ukuba ndiye ndancwasa omnye umfazi,+Ndalalela+ emnyango kwammelwane,
10 Umfazi wam makagubele enye indoda,Alale namanye amadoda.*+
11 Kuba ndiya kuba ndenze into elihlazo,Isono esifanele isohlwayo sabagwebi.+
12 Loo nto ibiya kuba njengomlilo otshabalalisayo,+Oqwenga neengcambu zayo yonke intsimi yam.
13 Ukuba bendingabamameli abasebenzi bamXa bendikhalazela,*
14 Ndiza kuthini ke xa uThixo endibuza?
Ndiza kuphendula ndithini xa efuna ndicacise?+
15 Abadalwanga nguye na, njengam?+
Asibunjwanga nguye sonke na ngaphambi kokuba sizalwe?*+
16 Ukuba bendingavumi ukuwanika izinto azifunayo amahlwempu,+Okanye ndakhathaza umhlolokazi;+
17 Ukuba bendisitya ndedwa,Ndivimbe iinkedama;+
18 (Kuba ukususela ebutsheni bam bendinjengotata kwiinkedama,Ndanceda nabahlolokazi ukususela ebuntwaneni bam.)*
19 Ukuba bendidla ngokubona nabani na esifa yingqele ngenxa yokungabi nampahla,Okanye ihlwempu lingenanto yokunxiba;+
20 Ukuba belingandibuleli+Njengokuba lizifudumeza ngoboya beegusha zam;
21 Ukuba bendiyigxotha inkedama,+Xa idinga uncedo lwam kwigeyithi yesixeko;+
22 Mayiqhawuke yonke ke ingalo yam,Yophuke engqinibeni.
23 Kuba bendisoyika ukohlwaywa nguThixo,Ibe bendingakwazi ukumelana nozuko lwakhe.
24 Ukuba bendithembele kwigolide,Okanye ndathi kwigolide yodidi, ‘Ungumkhuseli wam!’+
25 Ukuba bendivuyiswa kukuba sisityebi+Ngenxa yokuba ndinezinto ezininzi;+
26 Ukuba bendisithi xa ndibona ukuqaqamba kwelanga,Okanye ukukhazimla kwenyanga,+
27 Intliziyo yam itsaleleke kuzo,Ndize ndiphuze isandla sam ndizikhonza;+
28 Bendiya kuba ndenze isono esifanele isohlwayo sabagwebi,Kuba bendiya kuba ndimkhanyele uThixo wokwenene.
29 Kwakha kwandivuyisa na ukwenzakaliswa kotshaba lwam,+Okanye ndavuya xa lusehlelwa yinto embi?
30 Andizange ndiwuvumele wone umlomo wamNgokwenza isifungo ndicela ukuba lubulawe.+
31 Awatshongo na amadoda entente yam ukuba,‘Wonke umntu utya onele* apha’?+
32 Akukho mhambi* wakha walala phandle,+Kuba bendihlala ndiyivula iminyango yam.
33 Ngaba ndakha ndasifihla isono sam, njengabanye abantu,+Ngokusifaka epokothweni?
34 Ngaba ndakha ndoyika ukuba baza kuthini abantu,Okanye ndoyika ukudelelwa ngabantu beminye imizi,Bendenza ndithule, ndoyike nokuphuma phandle?
35 Akwaba bekukho umntu onokundimamela!+
Bendiza kuyisayinela phantsi le nto ndiyithethayo.
USomandla makandiphendule!+
Akwaba ummangaleli wam ebezibhale phantsi izinto andityhola ngazo!
36 Bendiza kuzithwala emagxeni am,Ndizibeke entloko ngathi sisithsaba.
37 Bendiza kumxelela yonke into endiyenzileyo;Bendiza kuba nesibindi sokuma phambi kwakhe okwenkosana.
38 Ukuba bendinokumangalelwa ngumhlaba wam,Ndililelwe yimijelo yawo;
39 Ukuba nditye isivuno sawo ndingasihlawulelanga,+Okanye ndabashiya bengenanto abanikazi bawo;+
40 Makukhule ameva endaweni yengqolowa,Nokhula olunukayo endaweni yerhasi.”
Aphela apha ke amazwi kaYobhi.
Umbhalo osemazantsi
^ Okanye “intombi engazange ilale nandoda.”
^ Okanye kusenokwenzeka, “ndahamba na nabantu abangenanyani?”
^ Okanye “Nenzala yam mayincothulwe.”
^ Ngokoqobo, “Amanye amadoda mawaguqe phezu kwakhe.”
^ Okanye “bendimangalela.”
^ Ngokoqobo, “esibelekweni.”
^ Ngokoqobo, “esibelekweni sikamama.”
^ Ngokoqobo, “uyitya onele inyama.”
^ Okanye “mntu wasemzini.”
