YOOSOMA YA MWAHA 47
NCIPO 103 Axitokweene: Yoovaha ya Yehova
Niire Munna Munniilipihera Wiira Nrumeele Nkhama Ntokweene?
“Akhala wiira mulopwana oniphavela okhala mutokweene onihoolela, owo onniphavela etthu yooreera.”—1 TIM. 3:1.
ETTHU NIN’YA NHU OHUDHA
Nin’ya woona itthu dhikina dhiri mBiibiliyani onreerela iye opaka munna ontthuna orumeela nkhama ntokweene.
1-2. Miteko seeni asitokweene anvara awa?
AKHALA wiira mooviriha okathi nrumeela nkhama nrumeyi ookhalihera, woonawene nhinnuwihera mikhalelo dhawaatta wiira mphwanelele okhala ntokweene. Niire nyuwo mwaanitthuna opaka “etthu yooreera” asitokweene ampaka awa?—1 Tim. 3:1.
2 Miteko seeni anvara awa asitokweene? Awo annihoolela nteko woolaleerya, nteko wa waasekurya anna, ohudhiha ni olipiha muloko orweela wa moolumo ni ntakihero-na. Tivondho Biibiliya onlotta iye wiira asitokweene anivara nteko muulupale ari nkhama ‘dhoovaha dha alopwana.’—aEefe. 4:8.
3. Eseeni munna onreerela iye opaka wiira aphwanelele okhala ntokweene? (1 Timootheyo 3:1-7; Tito 1:5-9)
3 Eseeni munreerela nnyu opaka wiira mphwanelele okhala ntokweene? Opaka itthu dhinvekeliwa wiira ntthu aphwanelele okhala ntokweene tivoovirikana ni opaka itthu wiira mphwanelele ovara nteko vemperesani. Okhalawene, akhala wiira munnidhuwela ovara nteko mwaneene emperesa ontthuna iye wiira ovariwe, nyuwo munniphwanya nteko. Masi moovirikana ni elo, wiira nthanliwe okhala ntokweene tivootthuneya opaka itthu dhikina ohiya pahi odhuwela olaleerya ni ohudhiha. Nyuwo nhaana opaka itthu Biibiliya onaavekela iye asitokweene wiira epake dheidho dhiri 1 Timootheyo 3:1-7 ni Tito 1:5-9. (Munsome.) Yoosoma ela nin’ya woona itthu ttharu dhootthuneya anreerela awa opaka asitokweene: (1) Okhalana mweettelo wooreera ohoolo atthu oota ni a mmuloko, (2) okhala nhooleli eettheko onvaha ntakihero nooreera, ni (3) waakhulela orumeela mmulokoni.
OKHALANA MWEETTELO WOOREERA
4. Ontaphulelani ‘weettiha saana ekumi nnyu wiira atthu ehoophwanyennani nlattu’?
4 Wiira mphwanelele okhala ntokweene, nhaana ‘weettiha saana ekumi nnyu wiira atthu ehoophwanyennani nlattu,’ elo entaphulela wiira nhaana okhalana mweettelo wooreera mmulokoni, okhala wiira khaavo ntthu onoona wiira mookhalana mweettelo woohiloka. Ohiya-vo, nhaana ‘wooniwa saana ni atthu ahikhanle a mmulokoni.’ Ekhweeli wiira atthu akina pooti woonyokhani mwaha wookhala Nkiristau, masi awo ehikhalena mathowa owootheryani voohima dha okhala ororomeleya ni mweettelo nnyu. (Dan. 6:4, 5) Ndho mwiikohe wiira: ‘Kiire atthu oota ni a mmulokoni annoona wiira kookhalana mweettelo wooreera?’
5. Eseeni munreerela nnyu opaka wiira moonihere wiira ‘munnidhiveliwa ni itthu dhooreera’?
5 Nhaana ‘odhiveliwa itthu dhooreera,’ nyuwo nnoowerya opaka elo moonaka itthu dhooreera anna ni arokora ampaka awa ni mwaattottopelaka mwaha wa mikhalelo-dha dhooreera. Nitho nnoohakalala owiirela itthu dhooreera atthu akina, hata elo etaphulelaka ovara itthu mwahareerela nnyu opaka. (1 aTes. 2:8) Seeni nkhalelo owo oraawa wootthuneya wa asitokweene? Okhala wiira annirumeela okathi-ya wawaatta wiira yaasekurye anna mmulokoni ni ekhapelele miritti-dha. (1 Ped. 5:1-3) Masi hata eri dhiidho, itthu dhawaatta ampaka awa dhinniwiiriha ohakalala mwaha wa warumeela atthu akina.—Mit. 20:35.
6. Inamuna seeni nkhanle nnyu woonihera “oowaakhela aletto”? (aHeeberi 13:2, 16; moone-tho efootu.)
6 Nyuwo munnoonihera “oowaakhela aletto” vaavo munaapakela nnyu itthu dhooreera atthu akina, waahela mpuwa ale ahikhanle axirikha nnyu. (1 Ped. 4:9) Eliivuru emodha enlottaka voohima dha ntthu onwaakhela aletto, enlotta wiira: Owo onnaareerela nrima atthu ohinaadhuwela iye ni onnihakalala waalaleya owannye.” Ndho mwiikohe wiira: ‘Kiire kinnidhuweliwa okhala ntthu onaareerela nrima atthu ansekurya muloko aka?’ (Munsome aHeeberi 13:2, 16.) Ntthu oowaakhela aletto onnoonihera waareerela nrima ni onnaavaha itthu dhootheene oriiyena atthu ootheene aninsekurya, elo enhela mpuwa waareerela nrima atthu oohaawa ahikhanlena etthu yoonivaha, anna anlaleiwa olotta miyaha muloko nhu ni akina anvara miteko dhawaatta wiira yaalipihe anna nkhama asitokweene a esirkwiitu.—Maph. 18:2-8; Mir. 3:27; Luka 14:13, 14; Mit. 16:15; aRo. 12:13.
Anamathelana amodha emwaakhelaka saana owannya ntokweene esirkwiitu vamodha ni amwariye (Moone ettima 6)
7. Ntokweene onoonihera dhai wiira ‘khampheta nsurukhu’?
7 ‘Ohimpheta nsurukhu.’ Elo entaphulela ohivaha efaita yuulupale itthu dha veerutthuni. Voohixikha akhala wiira mwa ntthu oothaciri aahiidho oohaawa, nyuwo munnipweha nipuro noopacera Omwene mweekumini mwinyu. (Math. 6:33) Nitho munnirumeela okathi nnyu ni ikuru dhinyu wiira munkokhorele Yehova, nkhapelele ettheko nnyu ni nrumeele mmulokoni. (Math. 6:24; 1 Yohani 2:15 -17) Ndho mwiikohe wiira: ‘Miyo kinoonela dhai nsurukhu? Kiire kinnihakala vaavo kinkhalakana itthu dhinkithowa? Aahiidho kiire kiniilipihera ophwanya nsurukhu wawaatta ni okhalana mireerelo dhawaatta?’—1 Tim. 6:6, 17-19.
8. Inamuna seeni nkhanle nnyu woonihera wiira ‘munnidhuwela wiiphimela itthu dhootheene’ ni ‘wiihiiha’?
8 Akhala wiira ‘munnidhuwela wiiphimela itthu dhootheene’ ni okhala “aawiihiiha” elo entaphulela wiira munniphimelela itthu dhootheene mweekumini mwinyu. Elo enhela mpuwa okhalana mphimo voohima dha mwaattelo wa eyooca, owuurya, moopora woowara aahiidho wiikociha ni mararelo. Nyuwo khamuntakiha mweettelo wa atthu ahininrumeela Yehova. (Luka 21:34; Yak. 4:4) Ndho vaavo atthu akina anoolikawani aahiidho anoothokorerawani voohiloka khamunhiya okhala oomaleleya. Nitho ‘nhikhale nanhapaliwa’; aahiidho ohidhuweliwe okhala ntthu onwurya evinyu yawaatta. Ndho mwiikohe dho: ‘Kiire mweettelo aka onnoonihera wiira kinnidhuwela wiiphimela itthu dhootheene ni wiihiha?’
9. Eseeni enhela mpuwa ‘wuupuwela vookhalela’ ni ‘wiikociha saana’?
9 Wiira nwerye okhala ntthu ‘onuupuwela vookhalela,’ nhaana othokodha khuta mwaha nrumeelaka malakihero a mBiibiliyani. Wuupuwela ni ephoole moopora malakihero a mBiibiliyani anvareleya awa nteko khuta mwaha, enawookhaliherani wiiwasasa saana ni opaka dhoothanla dhooreera. Nitho kamumpaka yoothanla, nhinatthi wuupuwelela itthu dhootheene dhinhela mpuwa mwaha owo. (Mir. 18:13) Ndho opaka elo, enawookhaliherani odhuwela ophimelela itthu ni opaka dhoothanla nttharaka moonelo wa Yehova. Masi wiira ‘nkhale aawiikociha saana’ nhaana wiikociha ni opeherya. Mwaapaka elo, nnoodhuweliwa okhala ntthu oororomeleya ni ontthara malakihero. Ndho mikhalelo idho dhinawookhaliherani okhalana mweettelo wooreera. Vano, nirowe noone moopora wawaakhwanihera itthu Biibiliya onlotta iye ni moopora woovaha ntakihero nooreera nkhama nhooleli eettheko.
OVAHA NTAKIHERO NOOREERA NKHAMA NHOOLELI EETTHEKO
10. Nlopwana oothela on’ya owerya dhai ‘okhala nlopwana oneettiha saana ettheko-ye’?
10 Akhala wiira moothela ni muntthuna okhala ntokweene, nhiliyale wiira mweettelo wa atthu eettheko nnyu tiwootthuneya wiira mphwanelele okhala ntokweene. Ndho nhaana ‘okhala nlopwana oneettiha saana ettheko-ye.’ Nitho nhaana odhuweliwa okhala nhooleli eettheko oopheta ni onkhapelela saana miritti-dhe. Elo enhela mpuwa ohoolela inamuna dhootheene dhiniirela mphatta onkokhorela Yehova. Seeni oraawa vootthuneya opaka elo? Nrummwa Paaulu okonhe wiira: ‘Akhala wiira nlopwana khandhuwela weettiha saana ettheko-ye, on’ya owerya dhai okhapelela muloko wa Muluku’?—1 Tim. 3:5.
11-12. Seeni mweettelo wa atthu a vatthekoni oraawa wootthuneya wiira munna aphwanelele okhala ntokweene? (Moone-tho efootu.)
11 Akhala wiira mwa paapa, nhaana okhalana “anamwane aniiwelela ni arina mweettelo wooloka.” Wiira epake elo tivootthuneya waahudhiha aninnyu moopheta. Ekhweeli wiira muntthuna wiira aninnyu ekahakalala ni oraara nkhama anaahima akina. Masi itthu munaahudhiha nnyu, dhinawaakhalihera okhala awiiwelela, awaattittimiha atthu akina ni okhalana mweettelo wooloka. Ohiya-vo, nhaana opaka itthu dhootheene munwerya nnyu wiira mwaakhalihere aninnyu okhalana waataana wooreera ni Yehova, otthara malakihero a mBiibiliyani ni orowa vahoolo mpakha opatisiwa.
12 ‘Akhalena anamwane animwaamini Muluku ni ahinhimmwa okhalana mweettelo woohiloka aahiidho oohiiwelela.’ Akhala wiira mwaana a Namoona a Yehova onnipaka etampi yuulupale, nxankiho seeni okhanle iye waakhumihera apapaye? Ndho akhala wiira apapaye mwaana owo khaninhudhiha ni onttarusa nkhama vanreerela awa, awo khamphwanelela okhala ntokweene.—Mmoone A Sentinela a 15 a Outubro a 1996, epaax. 21, etti. 6-7.
Nhooleli eettheko ohaana waahudhiha ane onvarela miteko dhawaatta Yehova ni muloko (Moone ettima 11)
ORUMEELA MULOKO
13. Mun’ya woonihera dhai wiira mwa ntthu ‘ooreera nrima’ ni ‘ohiniidhoona’?
13 Anna arina mikhalelo dha Ekiristau anikhalihera vawaatta mmulokoni. Ntthu ‘ooreera nrima’ oniilipihera okhumihera nrettele. Akhala wiira muntthuna odhuweliwa okhala ooreera nrima, nhaana owiriyana ele atthu akina anlotta awa ni okhala olikaneene waakhulela moonelo-ya. Niire okathi wa nthukumano wa asitokweene, mwaankhala olikaneene okhalihera miyoonelo dha asitokweene akina vakhala wiira dhinnivarihana ni malamulo aahiidho malakihero a mBiibiliyani? Nitho ‘nhikhale awiidhoona’ elo entaphulela ohuumelela opaka itthu nttharaka moonelo nnyu. Nyuwo nhaana ovaha efaita miyoonelo ni miruku dha atthu akina. (Maph. 13:8, 9; Mir. 15:22) Nhaana okhala ntthu ‘ohinnyakulihana’ aahiidho ‘ohinaakuva onanariwa.’ Ohiya wuumelela wiira atthu akina epake itthu nkhama muntthuna nnyu nhaana okhala oreera nrima ni olotta mwanttittimiho. Akhala wiira nnookhala ntthu a ‘nrettele’, elo enawookhaliherani okathi wootheene okhala oopacera aahiidho nraaci okhumihera nrettele, hata okathi wooxankiha. (Yak. 3:17, 18) Ndho akhala wiira nnawoonihera oreera nrima vaavo munlotta nnyu ni atthu ootheene, waahela mpuwa ale ahikhanle anna elo enawaakhalihera okhala oomaleleya ni ovukula onanariwa-wa.—Makh. 8:1-3; Mir. 20:3; 25:15; Math. 5:23, 24.
14. Ontaphulelani ‘ohikhala nlopwana opatisiwe naanaano’ ni okhala “oororomeleya”?
14 Wiira munna aphwanelele okhala ntokweene “ahikhale nlopwana opatisiwe naanaano.” Elo khentaphulela wiira ohaana oviriha iyaakha dhawatta apatisiwe wiira akhale ntokweene, masi ohaana oviriha okathi wooreerela wiira akhale Nkiristau oolipa mwa omunepani. Ndho nlipelelaka okathi wooreerela wiira nthanliwe okhala ntokweene ni wiira Yehova oovaheni miritti dhawaatta, moonihere wiira munnintakiha Yeesu nkhalaka awiiyeviha ni oopisa nrima. (Math. 20:23; aFil. 2:5-8) Nyuwo nnoowerya woonihera wiira mwa ntthu “oororomeleya” nhihiyaka onrumeela Yehova, wiiwelela malamulo ni malakihero-ye, ohiya pahi otthara malakihero ninvahiwa nhu ni ntthenkeso-ye.—1 Tim. 4:15.
15. Niire ntthu ohaana olotta miyaha dhootepa oreera wiira okhale ntokweene? Nthokihere.
15 Biibiliya onnoonihera saana wiira asitokweene ahaana ‘odhuwela ohudhiha.’ Niire elo entaphulela wiira ahaana odhuwela olotta miyaha dhootepa oreera? Naari. Nnaamwi asitokweene awaatta ehidhuwelaka olotta miyaha dhootepa oreera, awo annidhuwela ohudhiha saana nteko woolaleerya ni vaavo anaasekurya awa anna. (Nlikanyihe ni 1 aKorinto 12:28, 29 ni aEefeso 4:11.) Hata ohikhanle vootepa otthuneya nyuwo odhuwela olotta miyaha dhootepa oreera, nhaana wiilipihera odhuwela ohudhiha saana. Ndho mun’owerya dhai opaka elo?
16. Mun’ya owerya dhai okhala nhudhihi oreera? (Moone-tho efootu.)
16 ‘Atthare saana moolumo oororomeleya a Muluku.’ Wiira ndhuwele ohudhiha saana, okathi wootheene nhaana onrumeela Biibiliya vaavo munhudhiha nnyu ni munvaha nnyu miruku. Wiira mpake elo, nhaana onsoma saana Biibiliya ni iliivuru dhihu. (Mir. 15:28; 16:23.) Vaavo munsoma nnyu, moone moopora iliivuru dhihu dhinlelihera awa dhawaatikhiwa dha mBiibiliyani wiira nwerye odhuwela saana moopora woovarihela nteko. Ndho vaavo munhudhiha nnyu, mwiilipihere waaphara nrima atthu anoowiriyanani. Nitho nnoowerya odhuwela ohudhiha saana, akhala wiira nnawaavekela miruku asitokweene andhuwela ohudhiha saana wiira yookhalihereni. (1 Tim. 5:17) Asitokweene ahaana ‘owerya waalipiha’ anna ni arokora. Masi ivaara dhikina asitokweene, ahaana waavaha miruku aahiidho ‘waattarusa’ ale atthenke. Okathi wootheene awo ahaana opaka elo mooreera nrima. Akhala wiira okathi wootheene nnoorumeela Nuulumo na Muluku vaavo munhudhiha nnyu, nnookhala nhudhihi oreera muntakihaka Nhudhihi Muulupale, Yeesu.—Math. 11:28-30; 2 Tim. 2:24.
Nrumeyi ookhalihera mmodha attharaka ntakihero na ntokweene mmodha vaavo oninrumeela iye Biibiliya wiira ahudhihe. Nitho nrumeeyi owo ookhalihera ansayariki mwaha vaavo onimooleya iye vaspeelyuni (Moone ettima 16)
NHIHIYE WIILIPIHERA
17. (a) Eseeni en’ya onkhalihera nrumeyi ookhalihera ohihiya wiilipihera? (b) Eseeni asitokweene anreerela awa wuupuwelela vaavo anaavarerya awa anna wiira yaavahe miritti? (Moone ekwaaturu eni: “ Nhilipelele Wiira Anna Ekhale Oomalela.”)
17 Noomala arumeyi ookhalihera woona itthu anvekeliwa awa opaka wiira ephwanelele okhala asitokweene, woonawene akina pooti wuupuwelela wiira khanne ewerye waakhwanihera itthu anvekeliwa awa. Masi nhiliyale wiira Yehova vamodha ni ntthekeso-ye khanlipelela wiira anna yoonihere mikhalelo idha moomalela. (1 Ped. 2:21) Munepa wawaarya wa Yehova onawookhaliherani wiira nwerye okhalana mikhalelo idha. (aFil. 2:13) Niire wookhala nkhalelo mmodha nnoona nnyu wiira munnireera wunnuwihera? Akhala wiira wookhala, munvekele Yehova munleelaka mwaha owo. Nitho nthokodhe mwaha owo ni munvekele miruku ntokweene mmodha dhin’ya wookhaliherani wunnuwihera nkhalelo owo.
18. Eseeni arumeyi ookhalihera ootheene antumereriwa awa opaka?
18 Ootheene nhu waahela mpuwa asitokweene, nihaana wiilipihera okhalana mikhalelo nithokorerye nhu yoosoma ela. (aFil. 3:16) Niire nyuwo mwa nrumeyi ookhalihera? Nhihiye wiilipihera! Munvekele Yehova wiira oohudhiheni ni ookhalihereni otepa orumeeliwa vawaatta mmulokoni. (Yes. 64:8) Ndho Yehova onooreeliha vawaatta wiilipihera winyu wiira mphwanelele okhala ntokweene.
NCIPO 101 Nimurumeeleke Yehova Moowiiwanana
