თე სტატიაშე ქიგებგით, ნამდა არძა გონიერ ქმნილება ართ საკამათო საკითხიშ წოხოლე გერე, თენა რე იეჰოვაშ დიდებულ სახელიშ განწმენდა. თე საკამათო საკითხშა ჟირ მხარე მიშურს. პირველ, იეჰოვაშ უზენაესობა, შხვა სიტყვეფით ქოფთქუათინ, ქორენ დო ვარ თიშ მართველობა არძაშ უჯგუშ დო მაჟია, ადამიანეფიშ ართგურობა ღორონთიშ მიმართ.

მარა, ასე მუშენ იფჩიებუთ, ნამდა თე საკამათო საკითხ ძირითადო ღორონთიშ სახელს დო თიშ განწმენდას ოხუ? გუვარჩუათ თეშ სუმ მიზეზ:

პირველ, სატანაქ ღორონთიშ სახელიშ, თაშ ქოფთქუათინ, თიშ რეპუტაციაშ წინააღმდეგ მიდართჷ. ედემიშ ბაღის სატანაქ თიცალ მუდგარენ კითხჷ ევას, მუდგათ ოფიქრებაფუ, ნამდა იეჰოვა მუდგარენ ჯგირს უფულუნდჷ თინეფს დო ზედმეტ შეზღუდვეფს არზენდჷ. თეშ უკულ, თიქ პირდაპირ მიდართჷ იეჰოვაშ სიტყვეფიშ წინააღმდეგ დო თეშნერო, ღორონთ მეტყურეთ გეგშეჸონ. თაშ ნამდა, თიქ ტყურა ქეკაწამ ღორონთიშ სახელს, მუდგაშ უკულ ქიგიადვჷ „ეშმაკიქ“, მუთ „ტყურაშ ეკმაწამებელს“ ნიშნენს (იოან. 8:44). ევაქ დეჯერ სატანაშ ტყურეფ, მუდგაშ შედეგო ვედემორჩილ იეჰოვას დო თიშ უზენაესობაშ წინააღმდეგ მიდართჷ (დაბ. 3:1—6). თევრეშე მოჸუნაფილ სატანა შეურაცხყოფას მიორინუანს ღორონთიშ სახელს დო იეჰოვაშ გურშენ ტყურეფს ოსიმუანს. ხშირ შემთხვევას თინეფ, მით იჯერენა სატანაშ ტყურეფს ვამორჩილნა ღორონთის. ღორონთიშ სახელიშ შეურაცხყოფა რე არძანერ უბადობაშ დო ადამიანეფიშ ტანჯებაშ მიზეზ. ზუსტას ათეშენ, იეჰოვაშ მსახურეფშო თიშ წმინდა სახელიშ შეურაცხყოფა დიდ უსამართლობა რე.

მაჟია, მუშ არძა გონიერ ქმნილებაშ საჯგირობუოთ, იეჰოვაქ გინოჭყვიდ, განწმინდას მუშ სახელ დო დირთინუას რეპუტაცია. თეშ კეთება იეჰოვაშო არძაშ უმოს მნიშვნელოვან რე. ზუსტას ათეშენ იჩიებ თინა: „განბწმინდენქ ჩქიმ დიდებულ სახელს“ (ეზეკ. 36:23). იესოქ ლოცვაშ დროს თეცალ სიტყვეფ თქუ: „გენიწმინდას სქან სახელქ“ (მათ. 6:9), მუდგათ ოძირუ, ნამდა იეჰოვაშ სახელიშ განწმენდა თიშ ართგურ მსახურეფშო არძაშ უმოს მნიშვნელოვან ოკო რდას. ბიბლიას მუსხირენშა არგამათ რე ძირაფილ, მუსხით მნიშვნელოვან რე იეჰოვაშ სახელიშ განწმენდა. მაგალთო, თექ ბკითხულენთ: „განადიდით იეჰოვა მუშ სახელიშ გურშენ“ (1 მატ. 16:29; ფსალმ. 96:8), „ქუბირით თიშ დიდებულ სახელს“ (ფსალმ. 66:2), „მარადიულო განვადიდენქ სქან სახელს“ (ფსალმ. 86:12). ართშა, მუჟამსით იესო იერუსალიმიშ ტაძარს რდჷ, იეჰოვას უწუ: „მუმა, განადიდ სქან სახელ!“. იეჰოვაქ თის ზეცაშე უპასუხ: „განვადიდ დო ხოლო განვადიდენქ!“ (იოან. 12:28). a

მასმა, იეჰოვაშ განზრახვა რე, თიშ სახელქ მარადიულო განდიდებულქ იჸუას. დეფიქრით, მუ მოხვადუ ქრისტეშ ანთასწანიან მართველობაშ ბოლოს, მუჟამსით ადამიანეფ საბოლათ გეგმიცადებნა. კინ საკამათო იჸუაფნო იეჰოვაშ სახელიშ განწმენდაშ საკითხ გონიერ ქმნილებეფშო? თე კითხვას პასუხ ქიმეფჩათინ, ქიგიფშინათ  თი ჟირ მხარე, მუთ იეჰოვაშ სახელიშ განწმენდაშა მიშურს, თენა რე ადამიანეფიშ ართგურობა დო ღორონთიშ უზენაესობა. გუჭირდუნანო ღორონთიშ მორჩილ ადამიანეფს ვადინუან ართგურობა? ვარ, მუშენდა თინეფ სრულყოფილეფ იჸუაფნა დო საბოლა გამოცდა ხოლო მიკულირ აჸინა. თეს გეძინელ, მარადიულ სიცოცხლეს ხოლო მიღენა. მუს ფთქუანთ იეჰოვაშ უზენაესობაშენ? კინ საკამათო იჸუაფნო თენა გონიერ ქმნილებეფ შქას? ვარ! თიმ დროს ქოთ ზეცას დო ქოთ დედამიწას არძა ქმნილება აღიარენს, ნამდა იეჰოვა სამართლიან დო უზენაეს მართველ რე. მუშ რაგად შილებე ღორონთიშ სახელშენ?

თიმ დროს გეგმიარგამებ, ნამდა ირფელ, მუთ სატანაქ იეჰოვაშ გურშენ თქუ ტყურა რდჷ დო ღორონთიშ სახელ საბოლათ განწმენდილ იჸუაფ. მარა ღორონთიშ ართგურეფშო მუჭოთ ზეცას თეშ დედამიწას იეჰოვაშ სახელ ირიათო მნიშვნელოვან იჸუაფ, მუშენდა მუნეფიშ თოლით ქოძირნა ღორონთიშ დიდებულ საქმეეფს. დეფიქრით, მუჟამსით იესო თანდაბლურო გეგნოჩანს იეჰოვას მართველობას, ღორონთ იჸუაფ „ირფელ არძაშო“ (1 კორ. 15:28). თეშ უკულ, ადამიანეფ დედამიწას გეხარენა „ღორონთიშ სქუალეფიშ დიდებულ თავისუფლებათ“ (რომ. 8:21). იეჰოვა ღორონთ ბოლოშა შეასრულენს ირფელს, მუთ განზრახულ აფუდ დო ართ დიდ ოჯახო გაერთიანენს მუშ გონიერ ქმნილებეფს, მუჭოთ ზეცას თეშ დედამიწას (ეფეს. 1:10).

მუჭო იმოქმედენს თე ირფელ იეჰოვაშ ართგურეფშა მუჭოთ ზეცას, თეშ დედამიწას? მუშო ოკო რაგად, არძას ძალიერ სურვილ მაღვენუნა, განვადიდათ იეჰოვაშ დიდებულ სახელ. ფსალმუნმაბირე დავითიქ ღორონთიშ შთაგონებათ თეცალ სიტყვეფ ჭარჷ: „კურთხეულ რდას იეჰოვა ღორონთ … მარადიულო გენედიდას თიშ დიდებულ სახელქ“ (ფსალმ. 72:18, 19). მთელ მარადიულობას ვედმელიებნა თიშ მიზეზეფ, ნამდა განვადიდათ ჩქინ დიდებულ ღორონთ იეჰოვა.

იეჰოვაშ სახელ ბოლოშა ეჭარუნს თიშ პიროვნებას. მუჟამსით თე სახელშე ფიფქრენთ, პირველო გონებაშა თიშ ჸოროფა მუმალენა (1 იოან. 4:8). ჩქი დღას ვეგიბჭყოლიდუანთ, ნამდა იეჰოვაქ ზუსტას თე დიდ ჸოროფათ გუმოჭყეს, გეგშამჸიდეს დო მოძირეს, ნამდა თიშ მართველობა სამართლიან რე დო ჸოროფაშა რე გერსხილ. იეჰოვა ირიათო გეგმირჩქინანს ჸოროფას მუშ გუნაჭყეფუეფიშ მიმართ, მუდგას მთელ მარადიულობას ბრელშა იბგინანთ. თენა აღბძრენა უმოსო დევეახლოვათ ჩქინ ზეციერ მუმას დო განვადიდათ თიშ წმინდა სახელ (ფსალმ. 73:28).