1. მუ აფუ განზრახულ ღორონთის დედამიწაშო?

ღორონთიშ განზრახვათ დედამიწას დიდებულ მომავალ მელუ. იეჰოვას ოკო, ნამდა დედამიწაქ ეიფშას ჯამრთელ დო ბედნერ ხალხით. ბიბლია იჩიებ: „გაშენ იეჰოვა ღორონთიქ ბაღი ედემს“ დო „გეიჸონ დიხაშე ირნერ ჯა თოლშო სახიოლო დო ოჭკომალო ირგუნფერი“. თეშ უკულ ღორონთიქ გარჩქინუ პირველ ქომოლკოჩ დო ოსურკოჩ — ადამ დო ევა, ქუდახორუ თე სქვამ ბაღის დო უწუ: „ინაყოფიერით დო გემრავლით, ეიოფშით დედამიწა დო ქუმინჯით თის“ (დაბადება 1:28; 2:8, 9, 15). თერიგო, ღორონთიშ განზრახვაშა მიშმეშ, ნამდა ხალხიქ გემრავლუკო, ცხოველეფშა მუკულუაფდესკო დო იშო-იშო მთელ დედამიწა ედემიშ ბაღცალო გინურთინუაფდესკო.

2. ა) სოვრეშე მიჩქუნა, ნამდა ღორონთი შეასრულენს მუშ განზრახვას, ნამუთ დედამიწას ოხუ? ბ) მუს იჩიებ ბიბლია ხალხიშ მარადიულ ცხოვრებაშ გურშენ?

² მუჭო ფიქრენქ, შეასრულენსო იეჰოვა მუშ განზრახვას დო დღას ქიცხოვრენსო ხალხი დედამიწას სამოთხეს? „მა ფთქვი . . . დო შევასრულენქ“ — იჩიებ ღორონთი (ესაია 46:9—11; 55:11). ნამდვილო, ღორონთი მუდგას თქუანსინ, ირფელს ასრულენს. „ტყურათ ვაგურჩქინუ დედამიწა, დახორინალო  გარჩქინუ“ (ესაია 45:18). მუნერ ხალხიშ ოცხოვრებელო გარჩქინ ღორონთიქ დედამიწა დო მუსხი ხანს ოკო უცხოვრებდესკო თინეფს? ბიბლია პასუხენს: „მართალეფ დემკვიდრენა დედამიწას დო მარადიულო იცხოვრენა თექ“ (ფსალმუნი 37:29; გამოცხადება 21:3, 4).

3. მუ გურსაჭვო მდგომარეობა რე ამდღა დედამიწას დო მუ კითხვეფს წუმოჭკირუნს თენა?

³ გასაგებ რე, ნამდა დიო ვა რე სამოთხე. თე ქიანას ლახალა, ღურა, ჩხუპეფი დო ართიანიშ ჸვილუა ირიათო რე. მუდგარენ ქორე თეშ მიზეზი. ღორონთის ნამდვილო ვაკოდ თაშ ჸოფედკო. აბა მუქ მოხვად? მუქ შეუშალ ხე ღორონთიშ განზრახვას? თეშ პასუხის კოჩიშ ნაჭარა, ნამთინ ისტორიულ წიგნი ვერზენს, მუშენდა საქმე ზეცას მოხვალამირ ამბეს ოხუ.

4, 5. ა) მიქ გიმირინუ გვერი ევაწკუმა დარაგადაფალო? ბ) მუჭო შილებე ართ დროს პატიოსან დო ალალ კოჩიქ მახინჯო გინირთას?

⁴ ბიბლიაშ პირველ წიგნი იჩიებ ღორონთიშ ნტერიშ გურშენ, ნამუქით ედემიშ ბაღის ბუნტი წიმიჭყუ. ბიბლია თის „გვერო“ მიშინუანს. მარა თენა უბრალოთ გვერ ვა რდუ. ბიბლიაშ ბოლო წიგნის თინა ეჭარილ რე მუჭოთ „ეშმაკი დო სატანა . . . ნამუთ ოჩილითუანს მთელ მსოფლიოს“. თინა „ჯვეშ გვერო“ ხოლო რე მოშინაფილ (დაბადება 3:1; გამოცხადება 12:9). თე ძალიერ ანგელოზიქ, ნამუთ ვეძირენ ფერ სულიერ ქმნილება რე, ევაწკუმა ორაგადეთ გვერი გიმირინუ, ზუსტას თიშნერო, მუჭოთ ჯგირ მსახიობი ოლაფინუანს ოლაფინიას დო თეშ იძირე, ითამ მუ ვარინ, ოლაფინია იჩიებუ. უეჭველ რე, მუჟამს ღორონთი დედამიწას კოჩიშ ოცხოვრებელო ამზადენდუნ, თე ანგელოზი უკვე არსებენდუ (იობი 38:4, 7).

⁵ იეჰოვაშ გუნარჩქინა ირფელ სრულყოფილ ქორენ-და, აბა სოვრეშე მორთუ სატანა ეშმაკიქ? მოკლეთ ქოფთქუათინ, ღორონთიშ ართ-ართ ძალიერ ანგელოზიქ მუშ დუდ მუქ გინირთინუ ეშმაკო. მუჭო შილებედ, თეცალ მუდგარენქ ქუმოხვადუკო?  ართ დროს პატიოსან დო ალალ კოჩიქ შილებე მახინჯო გინირთას. მუჭო? დუდშე, შილებე კოჩის უბადოქ მაკორინას. თიქ გაგრძელუ თეშენ ფიქრ-და, მუშო ოკო რაგად, უბადო ხოლო უმოსო მაკორინე. უკულ, შურო საშუალებაქ ქიმიაჩ-და, აუცილებერო გაკეთენს უბადო საქმეს (წეკითხი იაკობიშ 1:13—15).

6. მუჭო გინირთ ღორონთიშ ართ სულიერ სქუაქ სატანა ეშმაკო?

⁶ თექ აღოლ სატანა ეშმაკის ხოლო. თის ნამდვილო არჩქვენუდ, მუთ ღორონთიქ უწუ ადამ დო ევას, ნამდა გამრავლებედესკო დო მუნეფიშ გამნარყით გუფშაფდესკო დედამიწა (დაბადება 1:27, 28). ეშმაკიქ ალბათ იფიქრუ: „ხომ ქიშილებე თე ხალხიქ, ღორონთის ვარინ, მა ფცან თაყვანი?!“. თეშ კორნებაქ უმოსო გენვითარ ეშმაკიშ გურს დო ბოლოს, თიქ ტყურა ქოუწუ ევას ღორონთიშ გურშენ დო მიოჩილითუ (წეკითხი დაბადებაშ 3:1—5). ათაშ გინირთ თე ანგელოზიქ „ეშმაკო“, მუთ ნიშნენს „ეკმაწამებელს“. თეშ გარდა თიქ გინირთ „სატანათ“, მუთ ნიშნენს „მოწინააღმდეგეს“.

7. ა) მუშენ ღურეს ადამ დო ევაქ? ბ) მუშენ ირჩინუ დო ღურუ ადამიშ არძა გამნარყი?

⁷ მაზაკვალობა დო ღორებათ სატანა ეშმაკიქ ადამ დო ევა გეიახნარ, ნამდა ღორონთის ვა დუჯერესკონ (დაბადება 2:17; 3:6). მუჭოთ ღორონთიქ უწუნ თეშ, უდუმორჩილებუობაშ გურშენ თინეფქ დოღურეს (დაბადება 3:17—19). ადამქ არასრულყოფილო გინირთუ, მუშენდა თიქ შეცოდუ. ათეშგურშენ არძა თიშ გამნარყი ცოდამ რე (წეკითხი რომაელეფიშ 5:12). მაგალთო, წერმიბდგინათ ქობალიშ ოჭვალ ყალიბი. თის დეფექტ ქუღუნ-და, მუნერ იჸუაფ თის ინნაჭვა ქობალეფი? ყალიბიშ დეფექტ არძა ქობალს მიოხედას იჸი. ათეშნერო, ირ კოჩის გეგნად ადამიშ არასრულყოფილებაშ „დეფექტიქ“. ათეშგურშენ, არძა ირჩინუ დო ღურუ (რომაელები 3:23).

8, 9. ა) მუ ეკაწამ სატანაქ ღორონთის? ბ) მუშენ ვა განადგურ იეჰოვაქ მოწინააღმდეგეფ ხეთეშე?

⁸ მუჟამს სატანაქ ადამ დო ევა მიოჩილითუ დო თინეფქ  ღორონთის შეცოდესინ, სატანაქ თეთ სინამდვილეს ღორონთის ბუნტი გეუტახუ. თიქ იეჰოვაშ მართველობაშ წინააღმდეგ მიდართუ. მუშ საქციელით თიქ თქუ: „ღორონთი გლახა მართველ რე. თინა აღორენს ხალხის დო ჯგირობუა ვაკო თინეფშო. ვა რე საჭირო ღორონთი რდას ხალხიშ მართველი. თინეფს შეულებნა მუნეფიშით გინოჭყვიდან, მუ რე ჯგირ დო მუ რე ფური. ხალხი უჯგუშო იცხოვრებ, მა ქიპჸი თინეფიშ მართველქ-და“. მუჭო ოკო მიქცუკო ღორონთიქ თეცალ ტყურაშ ეკოწამებაშ უკულ? ნამთინეშ აზრით, ღორონთის  მუშ მოწინააღმდგეეფი თიმ წუთის აფუდ მასპალ. მარა ქიმიაჩამუდუო თეთ პასუხი ეშმაკშე წუმორინაფილ ბრალდებეფს? დემტკიცებუდუო თეთ, ნამდა ღორონთიშ მართველობას მუთუნ კილი ვა უღუდუნ თინა?

⁹ იეჰოვა სამართლიანობას სრულყოფილო გიმოხანტუნს დო ათეშგურშენ, თიქ ხეთეშე ვა განადგურ თინეფი. ღორონთიქ გინოჭყვიდ, ნამდა დრო რდუ საჭირო სატანაშ წუმორინაფილ ბრალდებეფს პასუხიქ ქიმიაჩუკო დო დემტკიცკო, ნამდა თინა მეტყურე რე. თაშ ნამდა, ღორონთიქ საშვალება მეჩუ კათას, მუსხირენ დროთ სატანაშ გავლენაშ თუდო რდესკო დო მუნეფიშ დუდიშ მართველეფ ქოჸოფედესეკო. მა-11 დუდის იჸუაფუ რაგად, მუშენ ეირჩუ იეჰოვაქ თე შარა დო მუშენ უთმენს თესხი დროს თე საკითხიშ მოგვარებას. ასე მორთ დო დეფიფქრათ: სწორას მიქცისო ადამ დო ევაქ, მუჟამს სატანაშ სიტყვეფი დეჯერესინ? თის ხომ მუთუნ ჯგირ ვა უკეთებუ თინეფშო? ქორდუო სწორი თიშ დაჯერება, ნამდა იეჰოვა აღორენდ თინეფს, თი დროს, მუჟამსით ირფელ იეჰოვაშ მინაჩემ უღდეს? სი მუს ქიმინუნდი?

10. მუჭო შეილებუ დეკინე იეჰოვაშ მხარე დო თეთ პასუხ ქიმეჩე სატანაშ წიმორინაფილ ბრალდებეფს?

¹⁰ ჯგირ იჸუაფ დეფიფქრათ თე კითხვეფშე, მუშენდა ამდღა ირკოჩ გივორეთ თეცალ საკითხეფიშ წოხოლე. ნამდვილო, სი შეილებუ, დეკინე იეჰოვაშ მხარე დო თეთ პასუხ მეჩე სატანაშ წიმორინაფილ ბრალდებეფს. სი შეილებუ ქაძირუე, ნამდა იეჰოვა რე სქან მართველი დო სატანა მეტყურე რენ (ფსალმუნი 73:28; წეკითხი იგავეფიშ 27:11). მარა გურსაჭვო რე, ნამდა მილიარდობით ხალხშე, ჭე მითინ ორთუ თეცალ არჩევანს. თაშ ნამდა, წიმიჭკირუ მნიშვნელოვან კითხვა: მართალო იჩიებუნო ბიბლია, ნამდა სატანა განაგენს თე ქიანას?

11, 12. ა) მუჭო ოძირანს იესოშ ოჩილითაფარო ნარაგად სატანაშ სიტყვეფი, ნამდა სატანა რე თე ქიანაშ მართველი? ბ) ხოლო მუ ამტკიცენს თის, ნამდა სატანა რე თე ქიანაშ მართველი?

¹¹ იესოს დღას ვა უღუდ საეჭვოთ, თე ქიანაშ მართველ  სატანა რენ თინა. ართშა სატანაქ იესოს სასწაულებრივო ქაძირუ „მსოფლიოშ არძა სამეფო დო თინეფიშ დიდება“. თეშ უკულ თიქ იესოს პირობა მეჩუ: „თეს ირფელს სი მერჩა, ბირგულს ქუდომიშქვანქ დო თაყვანს ქოფცენქ-და“ (მათე 4:8, 9; ლუკა 4:5, 6). დეფიქრი: ქიჸიდუო თე სიტყვეფი მაჩილითაფარი, სატანა თე ქიანაშ მართველი ვა ჸოფედუკონ? იესოს ვაუვარებ, ნამდა მსოფლიოშ არძა სამეფოშ მართველი სატანა რდუნ. სატანას ძალაუფლება ვა უღუდუკონ, იესო აუცილებერო ქოთქუანდ თეს.

¹² მუშო ოკო რაგად, იეჰოვა ირფელიშ შემალებე ღორონთი დო ჩქინ დიდებულ სამყაროშ გუმაჭყაფალ რე (გამოცხადება 4:11). მარა ბიბლიას სოთინ ვა ჭარ, ნამდა იეჰოვა ღორონთი, ვარდა იესო ქრისტე განაგენს თე ქიანას. იესოქ სატანაშენ თქუ, თე ქიანაშ მართველ რენია (იოანე 12:31; 14:30; 16:11). ბიბლიას სატანა ეშმაკი „თე ქიანაშ ღორონთო“ ხოლო რე მოშინაფილ (2 კორინთელები 4:3, 4). ღორონთიშ მოწინააღმდეგე სატანაშენ, მოციქული იოანექ ჭარუ: „მთელ ქიანა უბადოშ ხეს რე“ (1 იოანე 5:19).

13. მუშენ მოსაჭირნა ახალ ქიანა?

¹³ მუთ დრო მიკურსინ თეშ, ცხოვრება უმოსო ირთულებ. მსოფლიო ეფშა რე ჯარეფით, კორუმპირებულ პოლიტიკოსეფით, ართის იჩიებუნა დო მაჟრას ორთნან-ფერ რელიგურ მანჯღვერეფით დო კრიმინალით. თე ქიანა მუთუნს ვეგშანწყუე. ბიბლია მირაგადნა, ნამდა მონჭაფილ რე დრო, მუჟამს ღორონთ არმაგედონიშ ჩხუპის განადგურენს თე უბადო ქიანას. ღორონთი ამდღარ მსოფლიოს დოთირანს ახალ სამართლიან ქიანათ (გამოცხადება 16:14—16).

14. მი ეირჩუ ღორონთიქ მუშ სამეფოშ მართველო დო მუჭო რდუ თეშ გურშენ წინასწარ რაგადებული?

¹⁴ იეჰოვა ღორონთიქ მუშ ზეციერ მთავრობაშ მართველო  იესო ეირჩუ. ბრელ ხანიშ წოხოლე ბიბლიას წინასწარ რდუ რაგადებული: „ქუმაშუეს სქუაქ, ქუმმაჩეს ქომოლსქუაქ, ნამუშ ხუჯის იჸუაფუ ხენწიფება. ქიგიადვალუ თის სახელი . . . მშვიდობაშ მთავარი. თიშ ხენწიფება გეფართოებუ დო მშვიდობას ბოლო ვაღვენუ“ (ესაია 9:6, 7). იესოქ მუშ მოციქულეფს დაგურუ, მუჭო ულოცებდესკო თე მთავრობაშენ: „მორთას სქან სამეფოქ დო რდას სქან ნება, მუჭოთ ზეცასინ, თეშ დედამიწას“ (მათე 6:10). თე წიგნიშ ანწიან დუდეფშე ქობძირუნთ, ნამდა ღორონთიშ სამეფო მალას განადგურენს არძა მართველობას დო თინეფიშ ადგილს ქიდეკინენს (წეკითხი დანიელიშ 2:44). თეშ უკულ ღორონთიშ სამეფო დედამიწას სამოთხეთ გინართინუანს.

15. მუს ნიშნენს „ახალ დედამიწა?“

¹⁵ ბიბლია მოპირუნა: „ჩქი თიშ [ღორონთიშ] დუნაპირებუთ ველუთ ახალ ცას დო ახალ დედამიწას, სოდეთ დამკვიდრებულ იჸუაფ სიმართლე“ (2 პეტრე 3:13; ესაია 65:17). ბიბლიას მოშინაფილ სიტყვა „დედამიწა“, მინშა დედამიწას მახორუ ხალხის ნიშნენს (დაბადება 11:1). თაშ ნამდა, „ახალ დედამიწა“ ღორონთიშ მოსაწონ ხალხის ნიშნენს.

16. მუ დიდებულ საჩუქარი მელუ თინეფს, მიდგას ღორონთი იწონუანს დო ჩქი მუ ოკო ვაკეთათ თე საჩუქარიშ მიოღებელო?

¹⁶ იესო მოპირნა, ნამდა მონჭაფილ ახალ ქიანას ღორონთიშ მოსაწონ კათა „მარადიულ სიცოცხლეს“ მიღენს (მარკოზი 10:30). გეგნოფაჩ სქან ბიბლიას იოანეშ 3:16 დო 17:3 დო ქოძირ, ჩქი მუ ოკო ვაკეთათ მარადიულო ქიფცხოვრათინ თიშენ. ასე მორთ ქობძირათ, მუ ხვამა მელუ თინეფს, მიდგას ღორონთი მეჩანს სამოთხეთ გინორთელ დედამიწას ცხოვრებაშ უფლებას.

17, 18. სოვრეშე მიჩქუნა, ნამდა მთელ დედამიწას მშვიდობა იჸუაფუ დო უშქურანჯუო იცხოვრენა?

¹⁷ უბადობა, ჩხუპეფი, კრიმინალ დო ძალაშ მერინაფა  მეჭყორდუ. „ვეჸუაფ უბედურიშ მაკეთებელ . . . თვინიერეფ დემკვიდრენა დედამიწას“ (ფსალმუნი 37:10, 11). ირდიხას მშვიდობა იჸუაფუ, მუშენდა ღორონთი „შეაჩერენს ჩხუპეპს დედამიწაშ ძგაშე ძგაშა“ (ფსალმუნი 46:9; ესაია 2:4). თი დროს „გოფალუნს მართალ დო იჸუაფუ დიდ მშვიდობა, ონდო თუთა არსებენს“, — თენა თის ნიშნენს, ნამდა მშვიდობა ირიათო იჸუაფუ (ფსალმუნი 72:7).

¹⁸ იეჰოვაშ თაყვანიშმაცემელეფი უშქურანჯო იცხოვრენა. ბიბლიურ დროს, მუჟამს ისრაელეფ ღორონთის ომორჩილუდესინ, თინეფ უშქურანჯო ცხოვრენდეს (ლევიანები 25:18, 19). ნამდვილო, მუშმაჯგირა იჸუაფუ სამოთხეს შიშიშ თუდო ცხოვრება ვეჸინ! (წეკითხი ესაიაშ 32:18; მიქა 4:4).

19. სოვრეშე მიჩქუნა, ნამდა ოჭკომალ ხვეიანო იჸი ღორონთიშ ახალი ქიანას?

¹⁹ ვეჸუაფუ ოჭკომალიშ სინაკლებე. ფსალმუნეფს ჭარუ: „ხვეიანო იჸუაფ მარცვლეული დედამიწას, გვალაშ წვანდეფს ხოლო ხვეიანო იჸუაფუ“ (ფსალმუნი 72:16). იეჰოვა ღორონთი დოხვამანს მართალ კათას დო „დედამიწა მუშ ნაყოფის ქომჩანა“ (ფსალმუნი 67:6).

20. სოვრეშე მიჩქუნა, ნამდა მთელ დედამიწა სამოთხეთ გინირთუ?

²⁰ მთელ დედამიწა სამოთხეთ გინირთუ. ახალ სქვამ ჸუდეეფი დო ბაღეფი გასკვამენს კოჩიშ აკნაპარტახა ადგილეფს (წეკითხი ესაიაშ 65:21—24; გამოცხადება 11:18). დრო-ხანიშ უკულ დოხორინელ ადგილეფ ჭიჭე-ჭიჭეთ გეფართოებ, ონდო მთელ დედამიწა ედემიშ ბაღცალო, კინ სქვამ დო ნაყოფიერ ადგილო ვეგნირთუ. ბიბლიას ღორონთიშ გურშენ ინოჭარ: „გოფაჩუნქ სქან ხეს დო აკმაყოფილენქ ირ შურდგუმილიშ კორნებას“ (ფსალმუნი 145:16).

21. სოვრეშე რჩქუ ნამდა, ადამიანეფი დო ცხოველეფი ართიანს ვეცილებნა?

²¹ ადამიანეფ დო ცხოველეფ ართიანს ვეცილებნა. ტყარ დო შინურ ცხოველეფ ართო იდიარდან იჸი. ჭიჭე ბაღანას ხოლო ვაშკურნე თი ცხოველეფშა, ნამუთ ამდღა საშქურანჯ რე (წეკითხი ესაიაშ 11:6—9; 65:25).

22. მუ აღოლე ლახალას?

 ²² ვეჸი ლახალა. იესო, ღორონთიშ ზეციერ სამეფოშ მართველი, ლეხეფს დასქილიდუანს. ახალ ქიანას ხალხიშ სქილადა უმოს მაშტაბურო იჸუაფ, ვინემ ქრისტე დედამიწას რდუნ თიმწკუმა (მათე 9:35; მარკოზი 1:40—42; იოანე 5:5—9). თი დროს „ნამთინ მახორუ ვა თქუანს, ლეხი ვორექია“ (ესაია 33:24; 35:5, 6).

23. მუშენ მომღანა დიდ ხიოლს ღურელეფიშ გათელება?

²³ ღურელეფი გეთელებნა დო დღას ვა ღურუდან იჸი. არძა ღურელ, მით ღორონთიშ მეხსიერებას რე, სიცოცხლეს დართუ. ბიბლიას ინოჭარ: „იჸუაფ ღურელეფიშ გათელება, მართალეფიშით დო მართალ ვარენ ფერეფიშ“ (საქმეები 24:15; წეკითხი იოანეშ 5:28, 29).

24. მუს გინაფლენქ, მუჟამს ფიქრენქ სამოთხეთ გინორთელ დედამიწას ცხოვრებაშენ?

²⁴ ჯგირ მომავალ ელუ თინეფს, მით იჩინებაფუანს დო ომსახურ ჩქინ დიდებულ გუმაჭყაფალ იეჰოვა ღორონთის! იესოს ზუსტას სამოთხეთ გინორთელ დედამიწაშ ამბე აფუდ, მუჟამს მუშ ხასლას შურეშმალაფ უბადოშმაკეთებელს დეპირუ: „ჩქიმწკუმა ართო იჸუაფუქ სამოთხეს“ (ლუკა 23:43). მნიშვნელოვან რე, მეტ ქიგებგათ იესოშენ, მუშენდა თეს ირფელს იესო გაკეთენს ღორონთიშ ნებათ.