ართ-ართ გამოკითხვაშ თანახმათ, ამერიკას ახალგაზრდეფიშ 80 პროცენტ ლოცულენს, მარა ირ დღას თინეფიშ გვერდ ლოცულენს. თინეფშე ნამთინე შილებე ფიქრენდას, ლოცვა ხვალე ჯგირ განწყობაშ დართინაფალო რენო დოვარ შხვა ჯგირობუა მოუღ?

•  მუ ნიშნენს ლოცვა?

•  ქირჩქილუანსო ღორონთ ლოცვეფს?

•  მუშ გურშენ შემლებ იბლოცე?

•  მუს იჩიებნა სქან მახანეფ

 ლოცვა ირფელიშ გუმაჭყაფალწკუმა ჩიებაშ საშვალება რე. დეფიქრ, მუს ნიშნენს თენა. მართალ რე, იეჰოვა არძაშ უმოს დიდებულ რე, მარა „შორს ვა რე ჩქინდე თითოულშე“ (საქმეები 17:27). თეს გეძინელ, ბიბლიას ჭარჷ: „დეახლოვით ღორონთის დო თინა ხოლო დეგეახლოვებნა“ (იაკობი 4:8).

 მუჭო შეილებნა დეახლოვათ ღორონთის?

•   ართ-ართ საშვალება რე ლოცვა — მუჟამსით ღორონთის ეჩიებუქ.

•   ხოლო ართ საშვალება რე ბიბლიაშ გურაფა — მუჟამსით ღორონთ „გეჩიებ“ სი.

 თეცალ ურთიერთობა — ლოცვა დო ბიბლიაშ გურაფა — მიგეხვარებ, გამანგარე იეჰოვაწკუმა ურთიერთობა.

 „იეჰოვაწკუმა, უზენაეს ღორონთწკუმა ჩიება, არძაშე დიდ პატი რე, მუთ შილებე კოჩის უღდას“ (ჯერემი).

 „ლოცვაშ საშვალებათ იეჰოვაშა ჩქიმ გრძნობეფიშ გაზიარება უმოსო მაახლოვენს თიწკუმა“ (მირანდა).

 შილებე რჯერს, ნამდა არსებენს ღორონთ, ლოცულენქ, მარა იშენით გიჭირდას თიშ დაჯერება, ნამდა თინა მართალო ირჩქილე სქან ლოცვას. მარა ბიბლია იეჰოვაშ გურშენ იჩიებ, ნამდა თინა რე „ლოცვეფიშ მარჩქილე“ (ფსალმუნი 65:2). ბიბლიას ჭარჷ: „არძა თქვან ოწუხებელ თის მიანდით, მუშენდა თინა ზრუნენს თქვანო“ (1 პეტრე 5:7).

 დეფიქრ: ქუგმურთუნქო რეგურალურო დროს სქან ხოლოშიან მეგობარწკუმა ჩიებას? შეილებ ღორონთის ხოლო თაშ ეჩუე. ქილოც რეგურალურო დო ლოცვაშ დროს გეგმირინე ღორონთიშ სახელ, იეჰოვა (ფსალმუნი 86:5—7; 88:9). თაშ ნამდა, ბიბლია ელამჩანა „ირიათო ილოცით“ (1 თესალონიკელები 5:17).

 „ლოცვა რე ჩქიმ დო ზეციერ მუმა შქას ჩიება, მუჟამსით გურს ვუნწყუნქ თის“ (მოისესი).

 „იეჰოვას ირფელს ალალას ვეჩიებუქ, მუჭოთ დიდას ვარდა ხოლოშიან მეგობარს ვუწინდჷ“ (კარენ).

 ბიბლია იჩიებ: „ლოცვათ, ხვეწინით დო სიმარდულით ქუწით არძა თქვან ოთხუალ ღორონთის“ (ფილიპელები 4:6).

 ნიშნენსო თენა თის, ნამდა სქან პრობლემეფიშ გურშენ ხოლო შეილებ ილოცე? მუშო ოკო რაგად, ქო. ბიბლია იჩიებ: „იეჰოვას მიანდ სქან ოღალ დო თინა ქელაიდირთუ“ (ფსალმუნი 55:22).

 მარა ლოცვაშ დროს ღორონთის ხვალე პრობლემეფშენ ოკო ვეჩუე. ჩანტელ, ნამუთ 23 წანერ რე, იჩიებ: „მოხვარა დეგესაჭირებუნ ხვალე თიმ დროს ქილოცენქ-და, ჯგირ მეგობარ ვეჸუაფუქ. ჩქიმ აზრით, ლოცვაშ დროს პირველ რიგის ღორონთის მადლობა ოკო ვუწუე ირფელშე, მუშენდა მარდულობაშ გიმოხანტუაშ ბრელ მიზეზ მიღნა“.

 დეფიქრ: მუშ გურშენ შეილებ მადლობა უწუე ღორონთის? შეილებნო გეგმოკოროცხე სუმ მუდგარენ, მუდგაშეთ ამდღა უწინდჷ იეჰოვას მადლობას.

 „სქვამ ყვავილიშ ძირაფაქ ხოლო შილებე აღბძრან, ნამდა ლოცვას მადლობა ვუწუათ იეჰოვას“ (ანიტა).

 „დეფიქრ თიშე, მუთ არძაშ უმოსო მორწონს ღორონთიშ გუნაჭყეფუეფშე, ვარდა თი ბიბლიურ მუხლშე, ნამუთ სქან გურს არძაშ უმოსო ოხუ. თეშ უკულ, ლოცვას მადლობა ქუწი იეჰოვას“ (ბრაიანი).