Ia, ten̈a misy ankitin̈y Devoly zen̈y. Izy “pitondra donia ty”, avio izy anjely tsara fa nivadiky tamy Zan̈ahary, ke nanjary anjely ratsy. (Jaona 14:30; Efesianina 6:11, 12) Baiboly man̈ambara toetriny Devoly io amindro an̈aran̈a ndreky fikahian̈a izy aby ty:

•   Satana, dikany “Panohitry.”​—Joba 1:6.

•   Devoly, dikany “Pan̈aratsy.”​—Apokalypsy 12:9.

•   Bibilava, ke “Pamitaka” dikanizio amy Baiboly.​—2 Korintianina 11:3.

•   Pitsapa jery.​—Matio 4:3.

•   Pavandy.​—Jaona 8:44.

Devoly io tsy raha ratsy an̈atinolo

 Olo sasany mihevitry fa Satana Devoly io raha ratsy an̈atintsika ao. Fa kanefa Baiboly mitantara fa nikoran̈a Zan̈ahary ndreky Satana. Zan̈ahary io lavorary, ke tsy marin̈y izikoa an̈atinany ao misy raha ratsy ikoran̈any. (Deoteronomia 32:4; Joba 2:1-6) Karaha zen̈y koa Satana nitsapa jery Jesosy, kanefa Jesosy tsisy fahotan̈a. (Matio 4:8-10; 1 Jaona 3:5) Hitantsika amy raha koran̈iny Baiboly zen̈y fa Devoly io ten̈a misy ankitin̈y, fa tsy izio tsy raha ivolan̈ana raha ratsy.

 Tokony hahalany fan̈ahy atsika ma izikoa misy olo tsy mino fisiany Devoly? Aha, fotony Baiboly mivolan̈a fa Devoly io mamitaka olo, baka tatrany tanjon̈onany. (2 Tesalonianina 2:9, 10) Fandriky ten̈a azahoany olo maro, izy man̈ajamba olo baka iro tsy mino fa izy ten̈a misy ankitin̈y.​—2 Korintianina 4:4.

 Ny marin̈y: Amy Baiboly sasany, dikany “Losifera” zen̈y ‘araiky mangilangilatra in̈y.’ (Isaia 14:12) Iro andininy aby afaranizio mikoran̈a taranaka panjaka Babylonianin̈y raha tian̈a koran̈iny amizio. Nadekiny Zan̈ahary izy, fotony nan̈ambony ten̈a loatra. (Isaia 14:4, 13-20) Nampiasa volan̈a “araiky mangilangilatra in̈y” Baiboly ikotran̈ana Babylony resy.

 Ny marin̈y: Satana Devoly io fahavalony Zan̈ahary fa tsy panomponany. Izy manohitry ndreky mankaratsy olo manompo Zan̈ahary.​—1 Petera 5:8; Apokalypsy 12:10.