Baka amy “Vavaka Nampianariny Tompo” io ahaizantsika raha tokony hatao izikoa fa mivavaka ndreky ino raha volan̈iny izikoa fa mivavaka. Iro pianatra Jesosy aby io koa fa niangavy Jesosy, “A Tompo, mba ampianara mivavaka kony zahay”, nisy raha nambarany Jesosy tamindro. (Lioka 11:1) Ndray zen̈y, tsy “Vavaka Nampianariny Tompo” io zaraiky fo vavaka ikeny Zan̈ahary. a Izio raha zisty modely fo, na araiky amy vavaka maro tandrin̈esany Zan̈ahary.

Ho hitantsika amy lahatsoratra ty

•  Mikoran̈a momba ino ma “Vavaka Nampianariny Tompo” io?

•  Ino ten̈a dikany “Vavaka Nampianariny Tompo”?

•  Izio ma “Vavaka Nampianariny Tompo” io mila atao tsianjery koa fa mivavaka?

•  Karakory hatao koa fa mivavaka?

•  Vavaka hafa koran̈iny Baiboly

 Amy Matio 6:9-13 ao misy vavaka “Vavaka Nampianariny Tompo” io. Arakaraka fomba nandikan̈a Baiboly, samby isany volan̈a ampiasaindro ao. Fa aroe amy zen̈y fo hizahavantsika:

 Fandikan-tenin’ny Tontolo Vaovao: “Anao Babanay andan̈itry an̈y, irarian̈a an̈aranao ho masin̈y. Irarian̈a ho avy Fanjakan̈anao. Irarian̈a hatao ambony tany eto koa sitraponao, karaha andan̈itry an̈y. Amia zahay niany hanin̈y sahaza zahay niany, baka io fafà hadisovan̈anay, karaha nataonay nan̈ambela hadisovan̈a namanay. Baka io aza ambela ho resiny fakampan̈ahy zahay, fa avota aminy araiky ratsy in̈y zahay.”

 Fandikan-tenin’ny Mpanjaka Jacques: ‘Anao Babanay andan̈itry an̈y, irarian̈a an̈aranao ho masin̈y. Irarian̈a ho avy Fanjakan̈anao. Hatao ambony tany eto sitraponao, karaha andan̈itry an̈y. Amia zahay niany hanin̈y sahaza zahay niany, baka io ambilà trosanay, karaha nataonay nan̈ambela trosanolo taminay. Baka io aza mitondra zahay amy fakampan̈ahy, fa avota zahay baka tsy ho azony araiky ratsy in̈y.’ b

 Raha nampianariny Jesosy mifan̈araka amy tapany hafa amy Soratra Masin̈y, ke matoky atsika fa han̈ampy atsika hahay dikany “Vavaka Nampianariny Tompo” io tapany hafa aby zen̈y.

“Anao Babanay andan̈itry an̈y”

 Mety kahian̈a “Babantsika” ankitin̈y Zan̈ahary fotony izy niasa atsika, avio baka aminany fahin̈anantsika.​—Isaia 64:8.

“Irarian̈a an̈aranao ho masin̈y”

 Mila hamian̈a voninahitry na hankamasin̈iny an̈aran̈a Zan̈ahary, Jehovah. Mankamasin̈y an̈aranany atsika izikoa mikoran̈a aminolo momba toetrinany ndreky raha tiany hatao.​—Salamo 83:18; Isaia 6:3.

“Irarian̈a ho avy Fanjakan̈anao”

 Fanjakan̈any Zan̈ahary io fanjakan̈a araiky andan̈itry an̈y, ke Jesosy panjakanizio. Nampianariny Jesosy atsika fa fanjakan̈a io hitondra tany jiaby.​—Daniela 2:44; Apokalypsy 11:15.

“Irarian̈a hatao ambony tany eto koa sitraponao, karaha andan̈itry an̈y”

 Tsisy fahafatesan̈a avio tsisy raha ratsy andan̈itry an̈y. Tiany Zan̈ahary hiain̈y tsisy farany ambony tany eto olombelon̈o, ke hiadan̈a sady tsisy raha havozoan̈a.​—Salamo 37:11, 29.

“Amia zahay niany hanin̈y sahaza zahay niany”

 Mahazatra olo niain̈y taminy andrany Jesosy nihinan̈a mofo. Mila alaintsika onon̈o fa miankiny amy Pamôron̈o atsika fiain̈anantsika, ke izy fo tavandraintsika han̈amia raha ilaintsika ndreky ivilomantsika.​—Asan’ny Apostoly 17:24, 25.

“Ambilà trosanay, karaha nataonay nan̈ambela trosanolo taminay”

 Eto “trosa” volan̈a griky nandikan̈a “hadisovan̈a” na “fahotan̈a” io. (Matio 6:12, lamariky amy pazy ambany; Lioka 11:4) Panota aby olo jiaby ke mila familankeloko. Fa izikoa tiantsika Zan̈ahary han̈ambela hadisovan̈antsika, atsika antsendriky mila man̈ambela hadisovan̈any namantsika.​—Matio 6:14, 15.

‘Aza mitondra zahay amy fakampan̈ahy, fa avota zahay baka tsy ho azony araiky ratsy in̈y’

 Jehovah Zan̈ahary tsy mitsapa atsika amy raha ratsy foeky. (Jakoba 1:13) Fa Satana Devoly, “araiky ratsy”, mitsapa atsika. Zen̈y mahavy izy kahian̈a “Pitsapa jery olo.” (1 Jaona 5:19; Matio 4:1-4) Ke mangataka amy Jehovah atsika baka atsika tsy ho resiny fakampan̈ahy handika fitsipikinany.

 Vavaka Nampianariny Tompo in̈y zisty vavaka modely fo fa tsy raha mila atao tsianjery. Taloha heliny Jesosy nampianatra pianaratranany hivavaka, izy nampitandrin̈y karaha ty: ‘Anao koa mivavaka, aza man̈apodipody volan̈a mitovy fo.’ (Matio 6:7) Tamy fotoan̈a hafa, nampianatra vavaka modely koa izy, fa hafa raha nivolan̈iny koa fa nan̈ano izio.​—Lioka 11:2-4.

 Ny raha ten̈a tsara atao izikoa fa mivavaka, izio mila atao baka amy fô ndreky karaha olo mikoran̈a in̈y.​—Salamo 62:8.

 Vavaka Nampianariny Tompo in̈y ahitan̈a modeliny vavaka tandrin̈esany Zan̈ahary. Misy toko sy andininy hafa koa amy Baiboly mikoran̈a raha miramira amy zen̈y momba vavaka.

•   Mivavaha amy Zan̈ahary zaraiky fo

   Andininy: “Aza miasaloha anaro, na aminino zen̈y na aminino, fa amy raha jiaby, koràn̈a amy Zan̈ahary fo raha tianaro hangatahin̈y, lera anaro mivavaka, miangavy ndreky misaotra izy.”​—Filipianina 4:6.

   Ino ma dikanizen̈y? Vavakantsika tokony havantan̈antsika amy Zan̈ahary, fa tsy amy Jesosy na Maria na olo masin̈y. Ino raha voanalohany koran̈iny amy Vavaka nampianariny Tompo in̈y? “Anao Babanay.” Dikanizen̈y, Jehovah Zan̈ahary zaraiky fo tokony hivavahantsika.

•   Ataova mifan̈araka amy sitrapony Zan̈ahary raha angatahinao amy vavaka

   Andininy: “Zay raha angatahintsika aminany, izikoa mifan̈araka amy sitraponany, izy mitandren̈y atsika.”​—1 Jaona 5:14.

   Ino ma dikanizen̈y? Mila raha mifan̈araka amy sitrapony Zan̈ahary fo angatahintsika, koa fa mivavaka. Nampianariny Jesosy atsika fa ten̈a raha maventy sitrapony Zan̈ahary io. Zen̈y nahavy izy nan̈iraka atsika hivolan̈a: ‘Irarian̈a sitraponao hatao.’ Hahay sitrapony Zan̈ahary momba tany ndreky olombelon̈o atsika, izikoa mianatra Baiboly.

•   Atsika mety mivavaka momba raha ilaintsika

   Andininy: “Apitraha amy Jehovah zay raha mampavesatra anao, fa izy hanohan̈a anao.”​—Salamo 55:22.

   Ino ma dikanizen̈y? Izikoa fa misy raha manahiran̈a atsika, Zan̈ahary ten̈a mijery atsika. Maromaro raha ilaintsika navoakoran̈a amy Vavaka Nampianariny Tompo in̈y. Atsika mety mivavaka momba raha ilaintsika andavanandra. Lera misy fanapahankevitry maventy tsy maintsy raisin̈y, atsika mety mangataka taridalan̈a. Mety mangataka fan̈ampian̈a baka aminany koa atsika lera atsika mandalo raha sarotro, avio mangataka familankeloko baka aminy hadisovan̈a vitantsika. c