Indraiky fo Baiboly mikoran̈a momba tatoazy io. Amy Levitikosy 19:28 ty raha zen̈y: “Aza asian̈a tatoazy ain̈inaro.” Nan̈amia didy firenenany Israely aby io Zan̈ahary taminio, hampiavaka iro amy firenena hafa, fotony iro firenena aby io nan̈ano tatoazy taminy ain̈indro. Natao an̈arany zan̈aharindro izio, na koa lamarikiny zan̈aharindro io. (Deoteronomia 14:2) Atsika ndray efa tsy fiheziny Lalàn̈any Israely io, toro lalan̈a hitantsika baka amizio mila dinihintsika tsarabe.

Kristianin̈y ma tokony han̈ano tatoazy?

 Iro toko sy andininy amy Baiboly aby ty tsara dinihinao antsendriky:

•   “Man̈angy mila misikiny lamba ... man̈aja.” (1 Timoty 2:9) Handeha amy man̈angy ndreky lelahy koran̈a io. Tsy tokony hisariky sain̈inolo amintsika atsika, fa tokony hihevitry fihetsehampondro.

•   Olo sasany man̈ano tatoazy, fotony tiandro haboaka fa iro ten̈a olo, avio tsisy olo tokony hivolan̈a iro amy raha tiandro hatao ain̈indro. Kanefa Baiboly mandrisiky atsika karaha ty: “Hamianaro ain̈inaro hatao soron̈o velon̈o ndreky masin̈y, baka io ankasitrahiny Zan̈ahary. Izio fanompoan̈a masin̈y ampiasanaro sain̈inaro.” (Romanina 12:1) Ampiasà fahaizanao misain̈y, ke diniha antony mahavy anao tihan̈ano tatoazy. Mamalan̈a aminaro an̈y ma izio sa ahaizan̈a labandinolo? Koa zen̈y antony mahavy anao tihan̈ano tatoazy, tsarova fa mety hiova hevitry anao afara an̈y, kanefa izio efa mipetaka aminy ain̈inao. Ke diniha tsarabe antony mahavy anao tihan̈ano tatoazy, misy hahaizanao hanapakevitry.​—Ohabolana 4:7.

•   “Olo mazoto mahazo tombony, fotony mandamin̈y tsialohaloha raha hataony, fa hanjary masikiny ndraiky zay olo mekimeky man̈ano raha.” (Ohabolana 21:5) Matetiky olo malaky manapakevitry han̈ano tatoazy, kanefa izio mety hisy vokany maharitry amy fifandraisanao aminolo ndreky aminy asanao. Lafo sady marary mare fan̈adosoan̈a tatoazy io aminy ain̈y. Hita baka amy fikarohan̈a natao ndreky hamarozanolo mandeha aminolo pan̈adoso tatoazy io fa maro olo manen̈iny nan̈ano tatoazy.