Tsipelapelaka izikoa fa alohany hitilin̈y, izy mila mangala hafanan̈a baka amy masoandra antsendriky, amy zen̈y mafana hozatra hahafahany mitilin̈y. Fa tsipelapelaka fotsy io ndraiky mahavita mitilin̈y alohany tsipelapelaka hafa izikoa fa aminy andra tsisy masoandra. Nan̈ino?

 Diniha hely baka: Karazany tsipelapelaka maro izikoa fa mitapy masoandra alohaniro hitilin̈y in̈y, elatrandro io afodindro na vilarindro maventy be. Fa hita tamy fikarohan̈a natao fa niny tsipelapelaka fotsy io ndraiky, ataony mibian̈a hely fo elatranany karaha man̈ano forma V in̈y. Ke izy loso mahazo hafanan̈a mare. Angovo baka amy masoandra in̈y baka direkty mandeha aminy hozatra amy tratranany an̈y. Mahavita mitilin̈y izy izikoa fa mafana hozatra aby io.

 Tiandro pikaroko aminy Iniversiteny Exeter, an Angletera an̈y ho hita asa izikoa iro mangala tahaka poziny elatrany tsipelapelaka fotsy io, iro hahavita panneaux solaires tsaratsara. Ke nalaindro tahaka izio. Hitandro fa panneaux solaires aby io loso man̈aboaka angovo efa ho 50 isanjato fan̈ampiny.

 Hitany pikaroko aby io koa fa elatrany tsipelapelaka fotsy io mora man̈ampody taratra. Ke ankoatrany elatranany karaha V in̈y, izio koa nalaindro tahaka. Ke iro nahavita panneaux solaires mahivankivan̈a ndreky azahoan̈a angovo maromaro. Zen̈y nahavy Profesera Richard ffrench-Constant, an̈isandro pikaroko aby io, nivolan̈a fa karazan̈a tsipelapelaka araiky io ten̈a efa zadraharaha amy famorian̈a angovo baka amy masoandra.

 Akory hevitrinao? Fahaizany tsipelapelaka fotsy mamory angovo io ma vokatrany evolision, sa izio nisy namoron̈o?