Vaovao Tsara Nisoratin’i Lioka 17:1-37
17 Baka iô, karaha ty ho Jesosy tamy mpianatranany: “Raha mahavy olo hanota* tsy maintsy ho hisy. Kanefa, hidiran’andra lan̈iany olo mahavy raha zen̈y.
2 Fa sitrany aby asian̈a vato maventy fandisanan̈a vary amy tendan’olo zen̈y, aviô izy hatsipy an-dranomasin̈y an̈y, tozay izy han̈ano raha hanafintohin̈y araiky amindrô madiniky aby ty.
3 Anarô mitandrema. Rahalahinao koa manota, volàn̈a mare izy; aviô izikoa izy mibebaka, ambilà hadisovan̈anany.
4 Ndray izy manota aminao impito an̈atin’ny andra araiky, aviô impito izy mimpody aminao iô ke mivolan̈a: ‘Zaho mifôn̈o’, anao tsy maintsy man̈ambela izy.”
5 Karaha ty ho irô apostoly aby io tamy Tômpo: “Ampitombosa finoan̈anay.”
6 Ho Tômpo: “Izikoa anarô manan̈a finoan̈a ndray hely fo karaha voan’ny motardy, ke anarô hivolan̈a amy voandroy ty: ‘Miombota aviô maniria an-dranomasin̈y an̈y!’, han̈araka volan̈anarô edy izio.
7 “Azôvy aminarô ziôty ma manan̈a mpanompo miasa tany na miambin̈y ôndrikôndriky ke hivolan̈a aminany lera izy baka ambilo an̈y in̈y: ‘Anao direkty mavia mihina amy latabatra eto’?
8 Tsy ty edy ny raha handeha hivolan̈iny aminany: ‘Amboara hanin̈inaka hariva, ataova tablienao aviô karakarà zaho firaka zaho baka mihina ndreky migiaka. Afaran’izen̈y anao vo mahazo mihina ndreky migiaka’?
9 Hankasitraka mpanompo io ma izy fôtony izio nan̈ano raha jiaby nirahiny natao? Ehe.
10 Karaha zen̈y koa, lera vitanarô raha jiaby nan̈irahan̈a anarô, ty volàn̈a: ‘Zahay ty kony mpanompo fo ay! Raha tôkony nataonay fo izy nataonay in̈y.’”
11 Izy koa fa nandeha a Jerosalema, izy nandalo tan̈elan̈elan̈an’i Samaria ndreky Galilia.
12 Izy koa fa niditry tamy tanàna hely araiky zay, nisy olo boka folo lahy nahita izy. Fa irô fo nitsangana lavidavitry.
13 Ke irô nandronton̈o karaha ty: “Jesosy, Mpampianatra e, mamindrà fô aminay!”
14 Irô koa fa hitany, ho izy tamindrô: “Mindao anarô miboaka amy mpisôron̈o an̈y.” Mbala tan-dalan̈a fo irô, irô nadio.
15 Izikoa fa hitan’ny araiky tamindrô fa izy janga, izy nimpody, ke nan̈amia voninahitry Zan̈ahary sady nataony mare tsara feonany.
16 Izy nankôhoko tamy vitin’i Jesosy, aviô izy nan̈ano mersy izy. Lelahy io Samaritanin̈y.
17 Ke Jesosy nivolan̈a: “Irô folo ma tsy efa samby voadio? Ke aia fo basy ny sivy?
18 Irô ma tsisy nimpody foeky han̈amia voninahitry Zan̈ahary izikoa tsy lelahy hafa firenena ty fo?”
19 Baka iô ho izy taminany: “Mitsangàna, aviô mindao. Finoan̈anao nampajanga anao.”
20 Irô Fariseo aby io koa fa nan̈ontany izy ombian̈a Fanjakan̈an’ny Zan̈ahary avy, ho izy tamindrô: “Tsy mibaribary fomba favian’ny Fanjakan̈an’ny Zan̈ahary;
21 aviô, tsisy olo hivolan̈a: ‘Izy arỳ!’ na ‘Izy atỳ!’, fôtony Fanjakan̈an’ny Zan̈ahary an̈ivonarô.”
22 Baka iô karaha ty ho izy tamy mpianatranany: “Ho avy andra han̈irianarô hahita araiky amin’ny andran’ny Zanak’olo, fa anarô fo tsy hahita.
23 Aviô hisy olo hivolan̈a aminarô: ‘Zahava arỳ!’ na ‘Zahava atỳ!’, fa anarô aza mandeha na man̈araka irô.
24 Fôtony karaha ataon’ny pelakandra man̈azava faritry araiky amy lan̈itry firaka faritry hafa amy lan̈itry, ho karaha zen̈y Zanak’olo amin’ny andranany.
25 Fa alohan’izen̈y izy tsy maintsy hiaritry fijalian̈a maro, baka iô taranaka ty tsy han̈eky* izy.
26 Fa tsisy ny hafa tamin’ny andran’i Noa raha hiboaka amin’ny andran’ny Zanak’olo:
27 Olo nihinan̈a, nigiaka, lelahy nan̈ainga, viavy ningain̈y, firaka tamin’ny andra nidiran’i Noa tan̈atin’ny samboafiara tao. Baka iô navy Safodrano ke nandripaka irô jiaby.
28 Aviô, tsisy ny hafa tamin’ny andran’i Lota: Olo nihinan̈a, nigiaka, nivanga, nivarotro, nambôly, baka iô nan̈amboatra tran̈o.
29 Fa tamin’ny andra niboahan’i Lota baka ta Sodoma tao, nisy môtro ndreky sofra latsaka baka tan-dan̈itry karaha mahalen̈y, ke nandripaka irô jiaby.
30 Ho karaha zen̈y koa amin’ny andra han̈aboahan̈a Zanak’olo.
31 “Amin’ny andra zen̈y, lan̈iany olo an-tampon-tran̈o* tsy tôkony hijotso hangala fanan̈ananany an-tran̈o ao, aviô lan̈iany olo an-tsabo tsy tôkony himpody amy raha efa ningiany.
32 Tsaraova vadin’i Lota.
33 Ho foaty lan̈iany olo mifen̈y hiaro ain̈inany, fa lan̈iany olo mafoe izio ndraiky hiaro izio.
34 Zaho mivolan̈a aminarô fa amin’ny alin̈y zen̈y, hisy olo aroe fandrian̈a araiky: Araiky hindesin̈y, fa araiky ndraiky hambela.
35 Hisy man̈angy aroe hiaraka han̈odin̈y vato fandisanan̈a vary: Araiky hindesin̈y, fa araiky ndraiky hambela.”
36 ——
37 Ke irô nivolan̈a taminany: “Aia ma zen̈y, Tômpo?” Ho izy tamindrô: “Amy tany misy faty, an̈y koa hivorian’ny vôromahery.”
Lamariky amy Pazy Ambany
^ Abt: “Raha mampavoatsikon̈o.”
^ Na: “hanohitry.”
^ Ankamaraozan’ny tran̈on’olo tamy zen̈y nisy terasy tamy tampony, ke tao nan̈anaovandrô raha isan-karazany.
