Vaovao Tsara Nisoratin’i Lioka 3:1-38
3 Tamy taon̈o faha-15 nanjakan’i Tiberio Kaisara, Pontio Pilato governeran’i Jodia, Heroda* mpitondra* ta Galilia, Filipo rahalahiny mpitondra tamy faritry Itoria ndreky Trakonitisy, aviô Lysania mpitondra ta Abilena,
2 tamin’ny andran’i Anasy lohandohan’ny mpisôron̈o ndreky Kaiafa, Jaona zanakan’i Zakaria nahazo hafatra baka tamy Zan̈ahary, tamy tany paiky tan̈y.
3 Izy nandeha tamy faritry jiaby man̈odidin̈y Ten̈aranon’i Jordany; ke izy nitory fa tôkony hatao batisa olo araiky, misy han̈aboahany fa izy efa nibebaka, amy zen̈y Zan̈ahary han̈ambela fahotan̈anany,
4 eraka raha avoasoratra amy boky misy volan̈an’ny mpaminan̈y Isaia ty: “Zen̈y misy olo* mandronton̈o baka amy tany paiky an̈y: ‘Amboara lalan̈a handihanan’i Jehovah! Ataova mahitsy lalan̈anany.
5 Vavasaha jiaby tsy maintsy totofan̈a, aviô bongo ndreky tazoa jiaby tsy maintsy hadeky; lalan̈a mibilobiloko tsy maintsy hatao mahitsy, baka iô lalan̈a be vatovato tsy maintsy hatao mitovy tantan̈a;
6 aviô olombelon̈o* jiaby hahita fomba hitondrasan’ny Zan̈ahary famonjian̈a.’”*
7 Ke karaha ty ho izy tamindrô vahoaka aby io, irô koa fa navy handeha hataony batisa: “Taranakan’ny bibilava misy poazon aby ty, azôvy ma nan̈amia hevitry anarô hilefa heloko ho avy?
8 Aboaha amy raha ataonarô fa anarô mibebaka.* Anarô aza mieritreritry karaha ty: ‘Babanay kony Abrahama ay!’ Fôtony zaho man̈ambara anarô fa ndray vato aby io, vitan’ny Zan̈ahary man̈aova irô io hanjary zanakan’i Abrahama.
9 Ia, efa amy fôtotron’ny kakazo iô famaky. Ke hitiven̈y lan̈iany kakazo tsy man̈amia voany tsara, baka iô hatsipy an̈atin’ny môtro.”
10 Ke irô vahoaka aby io nan̈ontany izy: “Ino basy raha tôkony hataonay?”
11 Ke ho izy tamindrô: “Zay olo manan̈a lamba aroe,* mila mandrasa amin’olo tsy manan̈a. Aviô zay olo misy raha hoanin̈y, mila man̈ano karaha zen̈y koa.”
12 Ndray irô mpamory hetra aby io koa mba navy hatao batisa, ke ho irô taminany: “Mpampianatra, ino raha tôkony hataonay?”
13 Ho izy tamindrô: “Anarô aza mitaky hetra mandilatran’ny tôkony hifen̈a.”
14 Nisy maramila koa nan̈ontany izy karaha ty: “Ino raha tôkony hataonay?” Ke ho izy tamindrô: “Aza manjikiziky amin’olo* na man̈ody olo amy raha tsy nataony, fa mahaiza afa-pô amy karamanarô.”*
15 Irô olo aby io efa niambikambin̈y, ke irô jiaby nieritreritry karaha ty tan̈atin’ny fôndrô tan̈y momba Jaona: “Tsy ndraiky izy Kristy zen̈y?”
16 Fa ho Jaona tamindrô jiaby: “Zaho man̈ano batisa anarô amy rano. Fa araiky manan̈a fahifan̈a mandilatra zaho ndraiky ho avy. Zaho tsy man̈eva hamaha tadin’ny savatinany foeky! Izy han̈ano batisa anarô amy fan̈ahy masin̈y ndreky amy môtro.
17 Efa amy tan̈anany raha handeha hampiasainy hikorôko vary, ke hidioviny tsara tany fikorohany vary. Vary havoriny an̈atin’ny rihanany, fa angafony ndreky mololo ndraiky hiroany amy môtro tsy mety maty.”
18 Izy koa nan̈amia torohevitry maro, aviô izy tsy vôly nan̈ambara vaovao tsara tamin’olo.
19 Kanefa izy nan̈anatra Heroda, mpitondra ta Galilia, fôtony Heroda io nan̈ainga Herodiasy kanefa izio vadin’ny rahalahiny, aviô maro koa raha tsy manjary nataony.
20 Sôsokon’ny raha tsy manjary nataony aby zen̈y, mbala nigadrainy tamy prizon tan̈y koa i Jaona.
21 Olo jiaby koa fa vita batisa, natao batisa koa Jesosy. An̈atiny izy nivavaka in̈y, nibian̈a lan̈itry,
22 aviô fan̈ahy masin̈y karaha forman’ny pizon in̈y nijotso tan̈abonany tiô, ke nisy feo baka tan-dan̈itry nivolan̈a karaha ty: “Anao Zanako, tiako mare anao, sady ten̈a mamparavoravo zaho raha ataonao.”
23 Kadiriny 30 taon̈o Jesosy, tamin’izy nanomboko fanompoan̈anany. Erakan’ny fahaizan’olo izy, izy zanakan’iJosefa,Josefa zanakan’i Hely,
24 Hely zanakan’i Matata,Matata zanakan’i Levy,Levy zanakan’i Melky,Melky zanakan’i Janay,Janay zanakan’i Josefa,
25 Josefa zanakan’i Matitia,Matitia zanakan’i Amosa,Amosa zanakan’i Nahoma,Nahoma zanakan’i Esly,Esly zanakan’i Nagay,
26 Nagay zanakan’i Mata,Mata zanakan’i Matitia,Matitia zanakan’i Semey,Semey zanakan’i Joseka,Joseka zanakan’i Joda,
27 Joda zanakan’i Joanana,Joanana zanakan’i Resa,Resa zanakan’i Zerobabela,Zerobabela zanakan’i Sealtiela,Sealtiela zanakan’i Nery,
28 Nery zanakan’i Melky,Melky zanakan’i Ady,Ady zanakan’i Kosama,Kosama zanakan’i Elmadama,Elmadama zanakan’i Era,
29 Era zanakan’i Jesosy,Jesosy zanakan’i Eliezera,Eliezera zanakan’i Joreima,Joreima zanakan’i Matata,Matata zanakan’i Levy,
30 Levy zanakan’i Simeona,Simeona zanakan’i Jodasy,Jodasy zanakan’i Josefa,Josefa zanakan’i Jonama,Jonama zanakan’i Eliakima,
31 Eliakima zanakan’i Melea,Melea zanakan’i Mena,Mena zanakan’i Matata,Matata zanakan’i Natana,Natana zanakan’i Davida,
32 Davida zanakan’i Jese,Jese zanakan’i Obeda,Obeda zanakan’i Boaza,Boaza zanakan’i Salmona,Salmona zanakan’i Nasona,
33 Nasona zanakan’i Aminadaba,Aminadaba zanakan’i Arny,Arny zanakan’i Hezrona,Hezrona zanakan’i Pereza,Pereza zanakan’i Joda,
34 Joda zanakan’i Jakoba,Jakoba zanakan’i Isàka,Isàka zanakan’i Abrahama,Abrahama zanakan’i Tera,Tera zanakan’i Nahora,
35 Nahora zanakan’i Seroga,Seroga zanakan’i Reo,Reo zanakan’i Palega,Palega zanakan’i Ebera,Ebera zanakan’i Sela,
36 Sela zanakan’i Kenana,Kenana zanakan’i Arpaksada,Arpaksada zanakan’i Sema,Sema zanakan’i Noa,Noa zanakan’i Lameka,
37 Lameka zanakan’i Metosela,Metosela zanakan’i Enoka,Enoka zanakan’i Jareda,Jareda zanakan’i Mahalalila,Mahalalila zanakan’i Kenana,
38 Kenana zanakan’i Enosa,Enosa zanakan’i Seta,Seta zanakan’i Adama,Adama zanakan’ny Zan̈ahary.
Lamariky amy Pazy Ambany
^ Na: “lehibem-paritry.”
^ Abt: “feon’olo.”
^ Abt: “nôfotro.”
^ Abt: “hahita famonjian̈an’ny Zan̈ahary.”
^ Abt: “Mamokàra voa mifan̈entan̈a amy fibibahan̈a.”
^ Na: “lamba fan̈ampiny.”
^ Na: “mandrava olo.”
^ Na: “raha amezan̈a anarô.”
