Vaovao Tsara Nisoratin’i Marka 6:1-56
6 Niala tiô izy ke lôso tamy tany faviany; irô mpianatranany aby io niaraka taminany.
2 Sabata koa fa navy, izy nanomboko nampianatra tamy synagoga. Lany fan̈ahy ankamaraozan’olo naharen̈y izy, ke ho irô: “Baka taia ma nahaizan’olo ty raha aby zen̈y? Karakôry nazahoany fahendrena karaha zen̈y? Aviô amy fomba akôry ahavitany man̈ano fahagagan̈a aby io?
3 Tsy io ma mpandrafitry, zanakan’i Maria in̈y? Baka iô tsy io ma rahalahin’i Jakoba, Josefa, Jodasy ndreky Simona? Aviô tsy tanàna araiky amintsika eto koa ma ry anabaviny?” Ke irô tsy nety nino izy foeky.*
4 Kanefa ho Jesosy tamindrô: “Efa amy tany faviany ndreky amin-dry havany aviô an-tran̈onany edy mpaminan̈y tsy hajain̈a.”
5 Ke izy tsy nafaka nan̈ano fahagagan̈a maro tao fa, nametra-tan̈ana tamin’olo marary vitsivitsy fo ndreky nampajanga irô.
6 Lany fan̈ahy izy fôtony irô tsy nino izy. Izy baka tiô lôso nandeha nitety tanàna man̈odidin̈y, nampianatra.
7 Ke nirahiny nan̈aton̈o izy tiô irô 12 Lahy, aviô irô nalefany tsiaroeroe, baka iô irô namezany angôvo* han̈aboaka demony.
8 Namezany beko koa irô fa, lera irô mandeha, irô tsy tôkony hitondra raha foeky izikoa tsy tongozo fo, ke irô tsy tôkony hitondra môfo na saka fatao vatsy na vola*
9 na lamba aroe,* fa irô ndraiky nirahiny han̈ano savaty.
10 Karaha ty koa ho izy tamindrô: “Amy zay tran̈o hidiranarô, midokoa ao parapialanarô amy tanàna io.
11 Ndray aia ndray aia tany imboanarô, izikoa olo ao tsy mandray anarô na tsy mitandren̈y anarô, lera anarô miala ao, ahintsàn̈a faotaka amy vitinarô, ho vavolombelon̈o amindrô.”
12 Ke lôso irô, aviô irô nitory fa olo mila mibebaka.
13 Baka iô irô nan̈aboaka demony maro, aviô maro olo marary nisôrindrô menaka ndreky nitahandrô.
14 Ren̈in’ny Mpanjaka Heroda raha zen̈y, fôtony nanjary nalaza an̈aran̈an’i Jesosy. Baka iô karaha ty hon’olo: “Jaona Mpan̈ano Batisa efa natsangana tamy maty. Zen̈y ahavitany man̈ano fahagagan̈a aby zen̈y.”
15 Fa sasany nivolan̈a: “Elia zen̈y.” Sasany ndraiky nivolan̈a: “Izio mpaminan̈y karaha araiky tamindrô mpaminan̈y taloha aby in̈y.”
16 Fa raha zen̈y koa fa ren̈in’i Heroda, ho izy: “Jaona araiky nitapahako loha in̈y fo zen̈y e! Izy natsangana tamy maty.”
17 Heroda baka efa nan̈iraka olo hanambotro Jaona ndreky hamehy izy an̈atin’ny prizon, fôtony izy tihan̈ano raha mamparavoravo Herodiasy. Man̈angy io vadin’i Filipo rahalahiny, fa izy fo nalainy vady.
18 Matetiky baka Jaona nivolan̈a tamin’i Heroda: “Anao tsy mahazo manambady vadin’ny rahalahinao.”
19 Ke Herodiasy tsy vôly neloko tamy Jaona aviô izy tihamono Jaona, fa izy fo tsy afaka nan̈ano zen̈y.
20 Navozoan’i Heroda baka Jaona, fôtony hainy fa izio olo marin̈y ndreky masin̈y, ke zen̈y nahavy Jaona io naraovany. Isaka izy baka nitandren̈y Jaona, tsy hainy foeky raha hatao. Ndray izy man̈ano zen̈y, izy mbala ravoravo fo nitandren̈y izy.
21 Navy andra ten̈a nety tamin’i Herodiasy han̈atantirahany tetikinany. Heroda tamin’io nan̈ano fihinanam-be harivariva fôtony izy nankalaza aniverseranany;* ke nikahiany aby manam-pahifan̈a ndreky sefon’ny maramila, aviô olo nanan̈a plasy an̈abo ta Galilia tao.
22 Ke zanakan’i Herodiasy man̈angy niditry, aviô izy nitsinjaka. Ravoravo mare Heroda ndreky irô niaraka nihinan̈a* taminany tiô. Ke ho mpanjaka io tamy tsaiky man̈angy io: “Angataha aminaka zay raha tianao fa hamiako anao.”
23 Ia, ndray izy aby nifanta tamy tsaiky man̈angy io: “Amezako anao zay raha hangatahanao aminaka, ndray antsasakan’ny fanjakan̈anaka.”
24 Ke tsaiky man̈angy io nandeha nan̈ontany mamany: “Ino raha hangatahako?” Ho mamany: “Lohan’i Jaona Mpan̈ano Batisa.”
25 Direkty izy nandeha tamy mpanjaka tan̈y nivolan̈a fangatahan̈anany. Ho izy: “Ameza zaho ziôty an̈atin’ny platô lohan’i Jaona Mpan̈ano Batisa.”
26 Ndray nampalahelo mpanjaka io mare fangatahan̈an’ny tsaiky man̈angy io, izio nikeny, fôtony izy efa nifanta nan̈oloan̈a olo jiaby nikahiany tiô.*
27 Direkty mpanjaka io nan̈iraka araiky tamindrô olo mpiambin̈y izy aby io, ke mpiambin̈y io namezany beko hitondra lohan’i Jaona. Ke olo io nandeha nanapaka lohan’i Jaona ta prizon tan̈y
28 aviô izio nindesiny tamy platô. Baka iô izio namezany tsaiky man̈angy io, izio am’izay namezan’ny tsaiky man̈angy io mamany.
29 Izikoa fa ren̈in’ny mpianatran’i Jaona raha zen̈y, navy irô nangala fatinany, aviô izio naterindrô tam-pasan̈a.
30 Vory nan̈odidin̈y Jesosy tiô irô apostolinany aby io, aviô nitantaraindrô taminany raha jiaby nataondrô ndreky nampianarindrô.
31 Ho izy tamindrô: “Alô atsika handeha amy tany mitaokan̈a, am’izen̈y anarô mangala kajo hely.” Naro baka olo nivezivezy tiô, ke ndray lera hihinanandrô tsisy.
32 Ke lôso irô nandeha niondran̈a sambo, nandeha tamy tany mitaokan̈a.
33 Kanefa nisy olo nahita irô nandeha, ke nanjary hain’olo maro raha zen̈y. Olo baka amy tanàna jiaby nilomoay nandeha tan̈y, ke irô navy tan̈y talohandrô.
34 Jesosy koa fa nijotso baka tamy sambo, izy nahita olo marobe. Izy nahinakinaka irô, fôtony irô miran̈a ôndrikôndriky tsisy tsiman̈aja in̈y. Ke izy nanomboko nampianatra irô raha maro.
35 Andra koa fa hariva, nan̈aton̈o izy irô mpianatranany aby io, ke ho irô: “Tany misy atsika ty mitaokan̈a, sady andra efa hariva.
36 Ravàn̈a irô olo aby io am’izen̈y irô mandeha ambanivolo ndreky amy tanàna man̈odidin̈y mivanga raha hoanin̈y.”
37 Ho izy tamindrô: “Amezanarô raha hoanin̈y irô.” Ke ho irô taminany: “Zahay ma tôkony handeha hivanga môfo valeran’ny 200 denaria hamezan̈a irô olo aby io hoanindrô?”
38 Ho izy tamindrô: “Firy ma môfo aminarô ao? Mindao zahava.” Irô koa fa baka nizaha, ho irô: “Misy môfo dimy ao, aviô misy laoko aroe koa.”
39 Ke nirahiny nangala plasy tamy bozaka* tiô olo jiaby, aviô irô nirahiny nitsitokotoko.
40 Irô olo aby io nangala plasy, ke irô nan̈ano andiany 100 ndreky 50.
41 Nalain’i Jesosy môfo dimy ndreky laoko aroe aby in̈y, aviô izy nisan̈andra lan̈itry ke nivavaka. Nitapahany am’izay môfo aby io, baka iô namezany mpianatranany ke irô nandrasa izio tamin’olo. Nirasainy tamin’olo jiaby koa laoko aroe aby in̈y.
42 Olo jiaby nihina ke voky.
43 Izikoa fa navory lambin’ny môfo tavela, izio nahafeno tanty 12, kanefa mbala tsy tan̈atin’izen̈y laoko.
44 Kadiriny 5 000 lelahy nihinan̈a môfo aby io.
45 Tsy ela tafaran’izen̈y, direkty nirahin’i Jesosy nandeha sambo nitsaka tandaforehy, ta Betsaïda tan̈y, irô mpianatranany aby io. Fa izy ndraiky mbala nandravan̈a vahoaka.
46 Izy koa fa baka nan̈ano sambitsara irô, lôso izy nandeha tamy bongo tan̈y nivavaka.
47 Andra koa fa alin̈y, sambo io tan̈ivon-dranomasin̈y tarỳ, fa izy* ndraiky tantety.
48 Hitan’i Jesosy fa sahiran̈a mare irô mpianatranany aby io nivehy sambondrô, fôtony irô nisetra tsiko. Kadiriny man̈ena akôho,* lôso izy nandeha tan̈abon’ny ranomasin̈y nan̈aton̈o irô. Fahitan̈a izy tam’izen̈y karaha raha efa hihoatra* irô in̈y.
49 Irô koa fa nahita izy nandeha tan̈abon’ny ranomasin̈y, irô niafatrafatra karaha ty: “Irỳ misy raha hafahafa!”*
50 Fôtony irô jiaby koa fa nahita izy, irô fombo mare. Fa tiô ny iô, Jesosy nivolan̈a tamindrô karaha ty: “Korazy anarô! Zaho fo ty; anarô aza mavozo.”
51 Izy koa fa tafanonga tan̈atin’ny sambo io tao, vôly tsiko nare be in̈y. Ke gaga mare irô.
52 Tsy nazava tamindrô baka dikan’ny fahagagan̈a natao tamy môfo aby in̈y, fôtony fôndrô mbala donto ke tsy takatran’ny jerindrô dikan’izin̈y.
53 Irô koa fa tafitsaka tandaforehy, irô navy ta Genesareta. Nalatsakandrô tsy lavitry tiô andrisandrô.*
54 Kanefa niaraka irô nijotso baka tamy sambo io, Jesosy hain’olo.
55 Ke irô olo aby io nilomoay nan̈ambara raha zen̈y tamin’olo tamy faritry io. Olo am’izay koa fa naharen̈y zay tany nisy Jesosy, nindesindrô tan̈y tamy brankara lan̈iany olo marary.
56 Ke ndray aia ndray aia tany nidiran’i Jesosy, na tamy tanàna hely zen̈y na tan-tanàbe na tambanivolo, napetrakandrô ta bazary olo marary, aviô irô niangavy izy han̈ambela irô hikasiky ndray kirômborômbon’ny lambanany ambelan̈a fo. Ke janga aby zay olo nikasiky izio.
Lamariky amy Pazy Ambany
^ Na: “irô avoatsikon̈o baka taminany.”
^ Abt: “fahifan̈a.”
^ Abt: “varahin̈y an̈atin’ny saintirindrô.”
^ Abt: “na hisikiny lamba aroe.”
^ Na: “aniverseran’ny andra nitirahany.”
^ Na: “irô nandry nandriran̈a nihina niaraka.”
^ Na: “olo nandry nandriran̈a tamy latabatra.”
^ Abt: “bozaka mahitso.”
^ Abt: “izy zaraiky.”
^ Abt: “tamy fotoan̈a fiambesan̈a fahefatra tamin’ny alin̈y.” Izio fotoan̈a an̈elan̈elan̈a 3h maraindrain̈y firaka masoandra mipiriaka, kadiriny 6h maraindrain̈y tiô.
^ Na: “handeha hihoatra.”
^ Na: “Fahitan̈a!”
^ Na: “vatofantsikindrô.”
