Vaovao Tsara Nisoratin’i Marka 7:1-37
7 Nisy Fariseo ndreky sasany tamy mpanoratra lalàn̈a baka a Jerosalema nivory nan̈odidin̈y izy tiô.
2 Hitandrô fa sasany tamy mpianatran’i Jesosy nihinan̈a tamy tan̈ana maloto, tsy ino zen̈y fa tan̈ana tsy avoasasa.*
3 (Irô Fariseo ndreky Jiosy hafa jiaby tsy nihinan̈a izikoa tsy efa baka nanasa tan̈ana firaka tamy minko,* fôtony irô mentitry mare amy fan̈arehan̈a fomban-drazan̈andrô.
4 Aviô irô koa fa baka a bazary, irô tsy mihinan̈a izikoa tsy efa baka nanasa ain̈y. Maro koa fomban-drazan̈a nazondrô ndreky arehandrô, karaha ataony fan̈anaovan̈a batisa kôpy ndreky bakôly baka iô fitaovan̈a varahin̈y.)
5 Ke irô Fariseo ndreky mpanoratra lalàn̈a aby io nan̈ontany izy: “Nan̈ino ma mpianatranao aby io tsy man̈araka fomban-drazan̈a, fa mihinan̈a amy tan̈ana maloto?”
6 Ho izy tamindrô: “Mpihatsaravelatsihy aby ty! Marin̈y ankitin̈y faminanian̈a nambaran’i Isaia momba anarô, eraka raha efa voasoratra ty: ‘An̈arany* fo irô olo aby ty man̈aja zaho, kanefa fôndrô lavitry zaho mare.
7 Tsisy varany irô manohy manompo zaho, fôtony didy baka amin’olombelon̈o fo raha ampianarindrô.’
8 Tsy asianarô fôtiny foeky didin’ny Zan̈ahary, kanefa mentitry mare anarô man̈araka fomban-drazan̈a.”
9 Ho izy tamindrô koa: “Faran-draha hainarô eky miala didin’ny Zan̈ahary, misy an̈arehanarô fomban-drazan̈anarô.
10 Ohatra iziô, Mosesy efa nivolan̈a: ‘Hajà babanao ndreky reninao’, aviô: ‘Tsy maintsy vônen̈a lan̈iany olo manihitihy* babany na reniny.’
11 Fa anarô ndraiky mivolan̈a: ‘Izikoa misy olo mivolan̈a amy babany na amy reniny: “Raha jiaby anan̈ako ke mety hampiasaiko han̈ampian̈a anao efa korbany (tsy ino zen̈y fa fan̈amezan̈a voataokan̈a nin’ny Zan̈ahary)”’,
12 tsy ambelanarô han̈ano raha amy babany na amy reniny foeky izy.
13 Baka amy fomban-drazan̈a nampitampitaindrô, tsy nasianarô fôtiny foeky volan̈an’ny Zan̈ahary. Maro koa raha mitovitovy am’izen̈y ataonarô.”
14 Nikahiany taminany tiô ndraiky vahoaka, baka iô ho izy tamindrô: “Mitandrin̈esa zaho anarô jiaby, ke ataova raha hahaizanarô dikan’ny raha volan̈iko ty:
15 Tsy baka amy raha miditry amy vava ny raha mandoto olo araiky, fa raha miboaka baka am’izio ao.”
16 ——
17 Izy koa fa niala vahoaka ke niditry tamy tran̈o araiky, irô mpianatranany aby io nan̈ontany izy momba fan̈oharan̈a in̈y.
18 Ke ho izy tamindrô: “Anarô koa ma karaha irô olo aby in̈y ke tsy mazava aminarô raha zen̈y? Tsy hainarô ma fa tsisy amy raha miditry amin’olo araiky mety handoto izy,
19 fôtony izio tsy miditry an̈atin’ny fônany fa mandeha amy sarôtronany aviô miboaka amy tany fangirian̈a* an̈y?” Zen̈y fomba nan̈ambarany fa madio aby hanin̈y jiaby.
20 Baka iô ho izy: “Raha miboaka baka amin’olo fo mandoto izy.
21 Baka an̈atin’olo araiky, tsy aia zen̈y fa baka an̈atin’ny fônany, iboahan’ny jery tsy manjary, ke mahavy olo: Mijangajanga,* mangalatra, mamono olo,
22 mandiadia vady, manan̈a fan̈irian̈a tsy mety afa-pô, man̈ano raha ratsy, mamitaka, manan̈a fitondran-ten̈a tsisy hen̈amaso,* mitsiriritry,* manihitihy, man̈ambony ten̈a, ndreky man̈ano halifahan̈a.
23 Raha ratsy jiaby zen̈y baka an̈atin’ny fôn’olo araiky, ke zen̈y ny raha mandoto izy.”
24 Ke izy niala tiô, baka iô lôso izy nandeha tamy faritry Tyro ndreky Sidona. Izy koa fa navy tan̈y, izy niditry tamy tran̈o araiky. Tsy tiany hain’olo raha zen̈y, kanefa mbala nisy olo fo nahay.
25 Niaraka izy navy, nisy viavy nanan̈a zanaka man̈angy nisazaohan’ny demony naharen̈y raha momba izy. Ke viavy io navy, baka iô nankôhoko tamy vitinany.
26 Viavy io griky, aviô izy manan̈a zom-pirenena* syrianin̈y-fenisianin̈y. Izy tsy vôly nangataka Jesosy han̈adoso demony tamy zanany man̈angy.
27 Kanefa ho izy taminany: “Ambilà antsendriky tsaiky ho voky. Tsy mety izikoa môfon’ny tsaiky alain̈a, aviô atsipy amy zanak’amboa.”
28 Fa ho viavy io taminany: “Marin̈y zen̈y, tômpoko anao! Fa ndray zanak’amboa ambanin’ny latabatra koa ane mba mihinan̈a potipotikin’ny môfo nalatsakan’ny tsaiky e!”
29 Ke ho Jesosy taminany: “Mindao mody. Fôtony anao nivolan̈a zen̈y, demony nisazoko tamy zanakanao in̈y efa nafaka.”
30 Lôso izy nody, ke tsaiky io hitany nandrinandry tan̈abon’ny fandrian̈a tiô. Efa niala tamy tsaiky io demony in̈y.
31 Jesosy koa fa niala tamy faritry Tyro, izy nandalo ta Sidona ndreky namakivaky faritry Dekapolisy,* ke farany izy navy tamy Ranomasin̈in’i Galilia.
32 Izy koa fa navy tan̈y, nisy lelahy araiky maren̈iny sady mireki-dela nindesin’olo taminany, ke irô niangavy izy hametra-tan̈ana taminany.
33 Lelahy io nindesiny mitaokan̈a, lavidavitry vahoaka. Nampidiriny tan̈atin’ny sofin̈in’ny lelahy io tôndronany,* aviô izy koa fa baka nandraora, lelan’ny lelahy io nikasihiny.
34 Izy aviô nisan̈andra lan̈itry baka iô izy nihaimbe, ke ho izy tamy lelahy io: “Efata”, dikan’izio: “Mibiafa.”
35 Direkty sofin̈in’ny lelahy io nibian̈a,* aviô izy tsy nireki-dela eky fa nahay nivolan̈a tsara.
36 Fa irô fo nifeperin’i Jesosy tsy hikoran̈a raha zen̈y tamin’olo. Kanefa arakarakan’ny tsy nan̈omboany irô han̈ano zen̈y, nahainambarandrô olo fo raha io.
37 Lany fan̈ahy mare irô, ke ho irô: “Tsara aby raha jiaby ataony. Firaka mampaharen̈y olo maren̈iny ndreky mampivolan̈a olo moa mbala vitany fo.”
Lamariky amy Pazy Ambany
^ Avoasasa eraka fomban-drazan̈an’ny Jiosy.
^ Na: “kokohy; kiho.”
^ Abt: “Amy son̈y.”
^ Na: “tsy man̈isy fôtiny.”
^ Na: “amy kabone.”
^ Abt: “manan̈a maso mitsiriritry.”
^ Na: “izy teratany.”
^ Na: “Faritry Misy Tanàna Folo.”
^ Na: “tôndron-tan̈ananany.”
^ Na: “naharen̈y raha.”
