Vaovao Tsara Nisoratin’i Matio 6:1-34
-
TORITENY TAN̈ABON’NY BONGO (1-34)
6 “Tandrema tsao raha tiho hitan’olo fo antony mahavy anarô man̈ano ny tsara.* Izikoa zen̈y raha ataonarô, anarô tsy hahazo hatsaran̈a baka amy Babanarô an-dan̈itry an̈y.
2 Ke anao koa fa man̈amia raha olo sahiran̈a,* aza atao dalaly amin’olo fa anao nan̈amia raha izy;* zen̈y baka raha fataon’olo mpihatsaravelatsihy amy synagoga ndreky amy lalabe an̈y, fôtony irô tihahazo dera baka amin’olo. Ambarako anarô mazava tsarabe fa, efa azondrô aby hatsaran̈a jiaby tiandrô ho azo.*
3 Fa anao ndraiky koa fa man̈amia raha olo sahiran̈a, aza atao hain’ny tan̈ananao ankavia raha ataon’ny tan̈ananao ankavanan̈a.
4 Aza atao hain’olo foeky fa anao nan̈ampy olo sahiran̈a, amy zen̈y Babanao an-dan̈itry an̈y han̈amia hatsaran̈a anao, fôtony izy mahita raha jiaby.
5 “Baka iô, anarô koa fa mivavaka, anarô aza man̈ano karaha irô mpihatsaravelatsihy aby io. Lera irô mivavaka baka, tiandrô mitsangana amy synagoga ndreky amôron-dalan̈a fôtony irô tiho hitan’olo. Ambarako anarô mazava tsarabe fa, efa azondrô aby hatsaran̈a jiaby tiandrô ho azo.
6 Fa anao ndraiky koa fa mivavaka, midira an-tran̈onao ao, baka iô afodia varavaran̈a. Iô amizay anao mivavaka amy Babanao an-dan̈itry an̈y. Izy ndray tsy hita maso, izy mahita raha jiaby; ke Babanao an-dan̈itry an̈y han̈amia hatsaran̈a anao.
7 Anarô koa fa mivavaka, aza man̈ampodimpody raha araiky fo karaha ataon’olo aby amy donia ty. Irô baka mieritreritry fa arakaraka mampalava vavakandrô hitandrin̈esan’ny Zan̈ahary irô.
8 Fa anarô aza mangala tahaka irô, fôtony ndray anarô mbala tsendriky mangataka raha amy Babanarô an-dan̈itry an̈y, efa hainy raha ilainarô.
9 “Karaha ty ataova koa fa mivavaka:
“ ‘Babanay an-dan̈itry an̈y, irarian̈a an̈aran̈anao ho masin̈y!*
10 Irarian̈a Fanjakan̈anao ho avy! Irarian̈a koa sitrapônao hatao ambony tany eto, karaha an-dan̈itry an̈y!
11 Azafady, ameza zahay hanin̈y* ilainay niany;
12 baka iô ambilà kony hadisovan̈anay,* karaha nataonay nan̈ambela hadisovan̈an’olo nan̈ano raha ratsy taminay.*
13 Ampia zahay baka tsy ho resin’ny fakam-pan̈ahy, aviô avaota* zahay baka tsy ho azon’ny Devoly.’*
14 “Izikoa anarô man̈ambela hadisovan̈an’olo, Babanarô an-dan̈itry an̈y koa han̈ambela hadisovan̈anarô.
15 Fa izikoa ndraiky anarô tsy man̈ambela hadisovan̈an’olo, tsy han̈ambela hadisovan̈anarô koa Babanarô an-dan̈itry an̈y.
16 “Anarô koa fa mifady hanin̈y,* aza man̈ano karaha irô mpihatsaravelatsihy aby io. Irô kinia tsy mikarakara ain̈indrô,* amy zen̈y ho hitan’olo fa irô mifady hanin̈y. Ambarako anarô mazava tsarabe fa, efa azondrô aby hatsaran̈a jiaby tiandrô ho azo.
17 Fa anao ndraiky koa fa mifady hanin̈y, isaora menaka lohanao, baka iô misafoa,
18 amy zen̈y Babanao an-dan̈itry tsy hita maso an̈y zaraiky fo hahita anao mifady hanin̈y, fa tsy olo. Babanao io mahita raha jiaby, ke izy han̈amia hatsaran̈a anao.
19 “Anarô aza mamory harian̈a ambony tany eto eky, fôtony atỳ misy kalalao ndreky harafesin̈y mandroba-draha, baka iô mpangalatra mamaky tran̈o ndreky mangalatra.
20 Fa anarô mamoria harian̈a an-dan̈itry an̈y, fôtony an̈y tsisy kalalao na harafesin̈y mandroba-draha, aviô an̈y koa tsisy mpangalatra mamaky tran̈o ndreky mangalatra.
21 Fôtony zay tany misy fanan̈ananao, an̈y koa handihanan’ny fônao.
22 “Maso jiron’ny vatan̈a. Ke izikoa masonao mifantoko amy raha araiky,* hazava* ain̈inao jiaby.
23 Fa izikoa masonao man̈iry rahan’olo,* hahiziky ain̈inao jiaby. Izikoa maso tôkony hampazava vatan̈a ndraiky nanjary mahiziky fôtony mifantoko amy raha ratsy, hahiziky mare vatan̈a jiaby.
24 “Tsisy olo mahay manompo tômpo aroe: Na araiky ho halany, fa araiky ho tiany; na araiky hajainy,* fa araiky ndraiky tsy hasiany fôtiny. Tsy ho vitanarô hanompo Zan̈ahary sady hanompo Harian̈a.*
25 “Zen̈y mahavy zaho mivolan̈a aminarô: Aza miasaloha amy raha momba ain̈inarô eky, karaha ataony raha hoaninarô ndreky raha higiahanarô, na amy raha momba vatan̈anarô, karaha ataony lamba sikininarô. Aia ma bebe: Hanin̈y sa fahin̈ana? Vatan̈a sa lamba sikinin̈y?
26 Diniha tsarabe baka irô vôron̈o aby io:* Irô tsy mamafy na mitsôngo vary* na mamory hanin̈y an̈atin’ny riha, kanefa irô amezan’ny Babanarô an-dan̈itry an̈y hanin̈y. Ke tsy mbala valera mandilatra irô vôron̈o aby io ma anarô?
27 Azôvy aminarô ma mahavita mankalava andra iain̈any, na hely* fo, izikoa fa miasaloha?
28 Aviô nan̈ino ma anarô miasaloha amy raha sikininarô? Diniha baka irô folera* maniry an-kiaka aby io! Irô io tsy miasa na manjaitry,
29 kanefa ambarako anarô fa ndray Solomona tamy voninahitrinany jiaby tsiary ndraiky nisikiny lamba tsara mare karaha araiky amindrô io.
30 Ke izikoa raha maniry an-kiaka an̈y ampisikinin’ny Zan̈ahary tsarabe karaha zen̈y, kanefa irô io maniry niany, amaray hatsipy an̈atin’ny môtro,* izy edy tsy han̈amia raha sikininarô? Anarô mba hely finoan̈a ay!
31 Anarô aza miasaloha foeky ke hivolan̈a: ‘Ino raha hoaninay?’, na ‘Ino raha higiahanay?’, na ‘Ino raha hisikininay?’
32 Raha jiaby zen̈y baka raha ten̈a tsakarehan’olo amy donia ty. Kanefa hain’ny Babanarô an-dan̈itry an̈y fa ilainarô aby raha jiaby zen̈y.
33 “Ke Fanjakan̈an’ny Zan̈ahary ndreky fan̈arehan̈a volan̈anany* fo ataova raha ten̈a maventy amy fiainan̈anarô,* fa izikoa anarô man̈ano zen̈y, hamezan’ny Zan̈ahary anarô edy raha jiaby zen̈y.*
34 Ke anarô aza miasaloha momba ny amaray, fa sitrany amaray koa mandiniky ny amaray. Prôblemo mandalo niany fo hatrefa.
Lamariky amy Pazy Ambany
^ Abt: “man̈ano ny marin̈y.”
^ Abt: “aza mitsoko trompety alohanao iô.”
^ Na: “irô tsy hahazo hatsaran̈a baka amy Zan̈ahary.”
^ Na: “hajain’olo fôtony izio masin̈y.”
^ Abt: “môfo.”
^ Abt: “traosanay.”
^ Abt: “nan̈ambela irô olo nitraosa taminay.”
^ Na: “araova.”
^ Abt: “araiky ratsy in̈y.”
^ Na: “mifehy.”
^ Na: “Irô man̈ano sary malahelo mare.”
^ Na: “masonao mahita tsarabe.” Abt: “masonao tsotra.”
^ Na: “ho feno hazavan̈a.”
^ Abt: “izikoa masonao ratsy.”
^ Abt: “tsy hivadiany.”
^ Na: “Tsy ho vitanarô hanompo Zan̈ahary izikoa vola ny raha ten̈a maventy aminarô.”
^ Abt: “vôron̈o amy lan̈itry.”
^ Na: “mandidy vary.”
^ Abt: “hakiho araiky”, izio nampiasaindro taloha tan̈y lera iro handrefy halavasan̈an’ny raha araiky. Hakiho araiky zen̈y kadiriny antsasaka metra.
^ Lisy an̈aran̈an’ny folera io.
^ Abt: “lafaoro.”
^ Abt: “ndreky fahamarin̈ananany.”
^ Na: “ataova voanalohany.”
^ Na: “hamezan’ny Zan̈ahary anarô aby raha jiaby ilainarô.”
