TOKO 35

Akory Ataoko Hanjary Kamaradiny Zan̈ahary?

Nisy raha sarotro nandalo tamy fiain̈anany Jeremy. Tamy fotoan̈a zen̈y nahitany fa ten̈a tsara mikamarady amy Zan̈ahary. Karaha ty hoizy: “Tamy zaho 12 taon̈o, papako niala zahay. Alin̈y araiky zay, tan̈abo fandrian̈ako, zaho nivavaka tamy Jehovah nangataka taminany baka papako mimpody.”

Kivy mare Jeremy tamy zen̈y, ke izy namaky Baiboly. Nanohin̈y fonany mare raha nikoran̈iny Salamo 10:14. Karaha ty raha volan̈inizio momba Jehovah: “Anao hitodianolo sahiran̈a. Anao pan̈ampy tsaiky kamboty baba.” Karaha ty nivolan̈iny Jeremy: “Karaha ren̈iko in̈y Jehovah nikoran̈a taminaka ndreky nivolan̈a taminaka fa izy iô man̈ampy zaho. Izy Babako. Azovy koa ma baba tsaratsara tozay Jehovah!”

METY karaha raha navoa Jeremy io koa mavoa anao, na koa raha hafa. Na karakory na karakory raha mavoa anao, Baiboly mivolan̈a fa anao tiany Jehovah hanjary kamaradiny. Karaha ty baka hoizy: “Man̈aton̈a Zan̈ahary anaro fa izy han̈aton̈o anaro.” (Jakoba 4:8) Diniha baka zen̈y! Anao tsy afaka mahita izy sady izy koa mbala an̈abo lavitry mandilatra atsika olombelon̈o. Kanefa ndray zen̈y, Zan̈ahary Jehovah mitaon̈o anao hanjary kamaradiny!

Mikamarady amy Zan̈ahary zen̈y ndraiky tsy raha vita mora, fa mila ezaka baka aminao. Ty baka misy ohatra: Anao ziô koa mamboly folera, hitombo hoazy edy izio? Ehe. Izio tsy maintsy rozianao isanandra ndreky ataonao amy toeran̈a mety tsara aminany, zay izio vo hitsiry tsarabe, tsy zen̈y? Karaha zen̈y koa mikamarady amy Zan̈ahary io. Izio mitaky ezaka. Ino eky raha mety hataonao baka anao loso kamaradiny Jehovah?

Ten̈a Ilain̈y Mianatra Baiboly

Olo aroe tihanjary kamarady zen̈y tsy maintsy mifampikoran̈a ndreky mifampitandren̈y. Karaha zen̈y koa mikamarady amy Zan̈ahary. Mitandren̈y izy atsika izikoa fa mamaky ndreky mianatra Baiboly.​—Salamo 1:2, 3.

Ankamarozany tanora tsy dia tia mianatra zen̈y. Ny ten̈a tiandro, mizaha tele, misoma jeux video, na koa miarakaraka amy naman̈a. Ke rariny izikoa anao koa mety tsy dia tia mianatra. Kanefa izikoa anao tihanjary kamaradiny Zan̈ahary, efa zen̈y edy raha mila ataonao. Anao mila mitandren̈y izy ke mianatra Volan̈anany.

Aza mavozo! Fianaran̈a Baiboly io tsy raha sarotro aby. Anao afaka mianatra mankafy izio, ndray anao karazanolo tsy dia tia mianatra in̈y. Raha voanalohany mila ataonao, manokan̈a fotoan̈a hianaran̈a Baiboly. Karaha ty nambarany tsaiky man̈angy araiky, Lais an̈arany: “Zaho efa nan̈ano programo. Isaka maraindrain̈y, raha voanalohany ataoko mamaky toko araiky amy Baiboly.” Fa hafanizen̈y ndraiky niny Maria, 15 taon̈o, hoizy: “Isaka alin̈y alohany zaho hatoro, zaho mamaky tapany hely amy Baiboly.”

Izikoa anao fa han̈amboatra programo fianaranao Baiboly, zahava  efajoro amy pazy 292. Baka io, sorata iô ombian̈a anao misy kadiriny 30 minity iô afaka hianaran̈a Volan̈a Zan̈ahary.

․․․․․

Man̈amboatra programo io mbala vo fanombohany fo. Lera anao fa manomboko mianatra amizay, mety ho hitanao fa kaiky tsy mora mamaky Baiboly zen̈y. Mety hitovy hevitry amy Jezreel, 11 taon̈o, ty koa anao: “Mila mifantoko mare anao vo mahazo raha koran̈iny toko sasany amy Baiboly ao. Raha koran̈iny amizio ao aby tsy ten̈a mahalian̈a.” Aza kivy izikoa zen̈y koa raha tsapanao. Alaiva onon̈o fa mitandren̈y Jehovah kamaradinao anao, lera mianatra Baiboly. Ho hitanao amy farany, fa tsy very borin̈y ezaka nataonao in̈y, fotony anao hahita hatsaran̈a baka io loso efa tsy din̈inao fotoan̈a hianaranao amy man̈araka.

Vavaka Io Ten̈a Raha Maventy

Vavaka io fomba hikoran̈ana amy Zan̈ahary. Diniha baka ty: Amy fotoan̈a jiaby, na mantsan̈a na alin̈y, anao afaka mikoran̈a amy Zan̈ahary Jehovah. Izy pare fo hitandren̈y anao. Vavaka io kadô miavaka mare! Fa mbala mandilatra zen̈y, izy tihitandren̈y raha koran̈inao. Zen̈y mahavy Baiboly mandrisiky atsika karaha ty: “Amy raha jiaby, koran̈a amy Zan̈ahary fo raha tianaro hangatahin̈y, amy vavaka ndreky fangatahan̈a mare ndreky fankasitrahan̈a izy.”​—Filipianina 4:6.

Karaha volan̈iny andininy io, maro raha afaka koran̈inao amy Jehovah. Tafiditry amy zen̈y, problemonao ndreky raha mampiasaloha anao. Mety koran̈inao koa raha mamparavoravo anao. Koa misy namanao man̈ano raha tsara aminao, ataonao mersy izy sa tsy ataonao? Azo antoko fa ataonao. Kanefa mbala tsisy naman̈a mahavita man̈ano raha maro mandilatrany efa nataony Jehovah taminao. Ke nan̈ino koa basy izy, izikoa mba ataonao mersy amy raha aby zen̈y?​—Salamo 106:1.

Sorata ambany iô raha sasany tianao han̈anaovan̈a mersy Jehovah.

․․․․․

Azo antoko, fa ndraikindraiky anao mba mavozo ndreky miasaloha. Salamo 55:22 mivolan̈a: “Apitraha amy Jehovah zay raha mampavesatra anao, fa izy hanohan̈a anao. Olo marin̈y tsy hambelany hangozohozo foeky.”

Sorata ambany eto raha mampiasaloha anao ke tianao koran̈iny amy vavaka.

․․․․․

Diniha Raha Mandalo amy Fiain̈ananao

Ty koa misy raha mila hainao momba fikamaradiananao amy Zan̈ahary. Davida panoratra Salamo nanoratra karaha ty: “Andramana baka io zahava fa tsara Jehovah.” (Salamo 34:8) Tamy Davida nanoratra Salamo faha-34 io, nisy raha mampavozo mare niain̈any. Izy nilefa fotony Panjaka Saoly nitady hamono izy. Baka tio izy tsy maintsy nilefa tamy taniny Filistiny fahavalonany aby io. Davida tamy zen̈y efa tseky naty, ke izy nan̈ano sary lefaka. Zen̈y nampa avotro izy.​—1 Samoela 21:10-15.

Davida nidera Jehovah fotony hainy fa baka tamy Jehovah nazahoany hevitry in̈y ke nahavy izy tsy naty, fa tsy baka taminany tompiny. Aminy andininy alohany araiky avoakoran̈a an̈abo io in̈y, Davida nanoratra ty: “Zaho nan̈ontany Jehovah, ke izy namaly zaho. Izy nankafaka zaho tamy raha jiaby nampavozo zaho.” (Salamo 34:4) Davida nandrisiky olo hafa ‘han̈andran̈a baka io hizaha fa tsara Jehovah’, fotony hitany tamy fiain̈ananany raha zen̈y. a

Iritrireta raha araiky nandalo tamy fiain̈ananao ke nan̈aboahany Jehovah taminao fa izy mikarakara anao. Sorata ambany iô zen̈y. Izio tsy voatery raha miavaka mare. Iritrireta raha tsara madinidiniky amiany anao isanandra, kanefa mety tsy ho azontsika onon̈o aby.

․․․․․

Raimandreninao mety efa nampianatra anao Baiboly. Raha zen̈y kado maventy. Kanefa, anao koa mila mankatsara fifandraisanao amy Zan̈ahary. Hevitry an̈aty toko ty afaka han̈ampy anao izikoa anao mbala tsendriky nan̈ano zen̈y. Jehovah hitahy ezaka ataonao. Karaha ty baka volan̈iny Baiboly: “Anaro koa tsy voly mangataka, hahazo. Anaro koa tsy voly mitady, hahita.”​—Matio 7:7.

IZIKOA ANAO MILA FAN̈AMPINY FAN̈AZAVAN̈A, ZAHAVA AMY BOKY VOANALOHANY, TOKO 38 NDREKY 39

AMY TOKO FAN̈ARAKA TY

Sarotro aminao ma mikoran̈a aminolo raha momba Zan̈ahary? Anao ma tihasaky hiaro finoan̈anao?

[Lamariky amy pazy ambany]

ANDININY TSARA ALAIN̈A ONON̈O

“Sambatra lan̈iany mahatsiaro fa mila Zan̈ahary.”​—Matio 5:3.

SOSOKEVITRY

Mamakia dimy pazy isanandra, fa ho voavakinao an̈atiny taon̈o araiky edy Baiboly io.

ASA MBA HAINAO...

Matoa anao mamaky boky ty ndreky man̈araka torohevitriny Baiboly amezany ato, dikanizen̈y Jehovah efa man̈ampy anao.​—Jaona 6:44.

RAHA HANDEHA ATAOKO!

Ty raha handeha hataoko baka zaho hahita fianaran̈a maromaro lera mianatra Baiboly: ․․․․․

Ty raha handeha hataoko amy zen̈y tsy hadin̈ako foeky mivavaka: ․․․․․

Ty raha han̈ontaniako raimandreniko momba izio: ․․․․․

AKORY HEVITRINAO?

● Ino raha mety hataonao baka anao hahazo hafizany amy fianaran̈a Baiboly?

● Nan̈ino ma Jehovah tihitandren̈y vavakantsika olombelon̈o tsy lavorary?

● Akory hankatsaranao vavakanao?

[Volan̈a nalain̈y]

“Tamy zaho mbala helihely, vavakanaka raha efa parikera fo. Fa zaho ziô ndraiky koa fa mivavaka, koran̈iko raha tsara ndreky ratsy nandalo tan̈atiny andra araiky. Amy zen̈y tsy mitovy raha koran̈iko isanandra, fotony tsy raha araiky fo ampodimpodiko.”​—Eve

[Efajoro/​Sary]

 Diniha Tsara Baibolinao

1. Mifidiana tantara araiky mahalian̈a anao amy Baiboly ao. Mivavaha baka anao hahazo fahendrena, amy zen̈y ho azonao tsara raha vakinao.

2. Vakia tsara tantara io. Aza meky, fa mangalà fotoan̈a tsarabe. Anao koa fa mamaky, miniminia raha nandalo tamy zen̈y. Ataova karaha fa hitanao in̈y raha nandalo, ren̈inao feonolo ao ndreky fofokondraha, avio ataova karaha ren̈inao koa sirony hanin̈y iô, ndreky raha hafa koa. Ataova karaha raha amy tantara ao anao!

3. Iritrireta raha vakinao io. Man̈ontania karaha ty:

● Nan̈ino tantara ty nirahiny Jehovah nisoratin̈y an̈aty Volan̈anany?

● Azovy aminolo koran̈iny ao mila alaiko tahaka, baka io azovy tsy mila alaiko tahaka?

● Ino fianaran̈a azoko baka tamy raha nivakiko ty?

● Ino raha ampianarinizity zaho momba Jehovah ndreky fomba fan̈anaovany raha?

4. Man̈anaova vavaka fohiky. Koràn̈a amy Jehovah raha nianaranao baka tamy tantara io, ndreky fomba hitanao mety han̈arehan̈a izio. Ataova mersy fo izy, fotony izy nan̈amia anao kadô tsara mare, tsy ino izio fa Baiboly!

[Sary]

“Volan̈anao jirony vitinaka ndreky mampazava lalan̈anaka.”​—Salamo 119:105.

[Efajoro/​Sary]

Diniha Raha Voanalohany Tokony Hatao

Anao ma tsisy fotoan̈a hivavahan̈a ndreky hianaran̈a Baiboly? Nan̈ino? Matetiky izio miankiny amy raha ataonao voalohantoeran̈a fo.

An̈ohara baka ty: Mangalà siô, baka io asiava vato maventy maromaro an̈aty ao. Andraraha jia amy zay an̈aty siô ao, ke ataova feno tsara. Siônao ziô sady feno vato baka io feno jia koa.

Ziô ndraiky, adosoa jia ndreky vato in̈y, fa aza tsendriky arian̈a. Koa fa foan̈a siô in̈y, araraha ao antsendriky jia, fa vato ampidira farany. Ino raha misy? Tsy tandry an̈atiny siô ao raha aby io, tsy zen̈y? Nahavy zen̈y baka jia nataonao tao voanalohany.

Ino raha ianarantsika baka amy zen̈y? Baiboly mandrisiky atsika handiniky tsarabe ino “raha ten̈a maventy.” (Filipianina 1:10) Izikoa raha madiniky, karaha ataony fangalan̈a diandian̈a, ataonao voanalohany, tsy ho ampy han̈anaovan̈a raha ten̈a maventy edy fotoan̈anao. Tsy ino raha ten̈a maventy io fa raha mifandray amy fanompoan̈a Jehovah. Izikoa volan̈a amy Filipianina 1:10 in̈y arehanao, anao sady hahita fotoan̈a han̈anaovan̈a raha ten̈a maventy, baka io hahavita hangala diandian̈a hely koa. Ke diniha tsarabe raha tokony hatao voalohantoeran̈a!

[Sary]

Karaha folera, fifandraisan̈a amy Zan̈ahary io mila karakarain̈y zay vo mitombo