Jehovah an̈arany Zan̈ahary. Dikanizio “Izy Mahavita Man̈ano Zay Raha Iriny.” Jehovah Zan̈ahary farany mahery. Izy koa niasa raha jiaby. Izy manan̈a angovo han̈anovan̈a zay raha tiany.

Soratra efatra nanoratan̈a an̈arany Zan̈ahary amy volan̈a hebreo. Karaha ty mety handikan̈a izio: YHWH na JHVH. Tamy soratra hebreo voanalohany nandikan̈a Baiboly, an̈arany Zan̈ahary io efa ho im-7 000 mimpody. Olo erantany samy amy fanoratany an̈aran̈a Jehovah io, mifan̈araka amy fanon̈onandro izy amy volan̈andro.

▸ Toko 1, feh. 15

Zan̈ahary tompiny volan̈a amy Baiboly, fa izy fo nan̈iraka lelahy maromaro nanoratra izio. Mira matoelahy man̈iraka zanany manoratra taratasy raha zen̈y. Zan̈ahary nampiasa fan̈ahy masin̈inany tamy fomba isankarazany nan̈ambaran̈a hevitrinany natao amy Baiboly ao. Sasany taminolo nanoratra izio nahita fahitan̈a, sasany nan̈inofy, ke izin̈y baka tio nisoratindro.

▸ Toko 2, feh. 5

Izio tsy lalàn̈a, fa hevitry marin̈y hahaizantsika manapakevitry. Ohatra, misy toro lalan̈a mivolan̈a fa “naman̈a ratsy mandrobaka fahazaran̈a tsara.” (1 Korintianina 15:33) Izio mampianatra atsika fa olo ataontsika naman̈a mahavita mampiova atsika. Misy araiky koa, “zay raha afafinolo fo hijinjainy.” (Galatianina 6:7) Izio mampianatra atsika fa zay raha ataontsika mivaly amintsika.

▸ Toko 2, feh. 12

Izio hafatra baka amy Zan̈ahary, baka io ambaranolo nirahiny. Izio mety ho fan̈azavan̈a raha tiany Zan̈ahary hatao, torohevitry, lalàn̈a, na fitsaran̈a. Izio koa mety ho hafatra man̈ambara raha mbala ho avy. Maro faminanian̈a amy Baiboly ao efa tanteraka.

▸ Toko 2, feh. 13

Tanteraka tamy Jesosy faminanian̈a maro momba Mesia. Zahava efajoro “ Faminanian̈a Momba Mesia.”

▸ Toko 2, feh. 17, l.p.a.

Tiany Jehovah hatao paradisa tany ty, baka hipitrahanolo tia izy. Tsy niova fikasan̈anany zen̈y. Tsy ho ela izy han̈adoso raha ratsy jiaby ndreky han̈amia olonany fiain̈ana tsisy farany.

▸ Toko 3, feh. 1

Satana io anjely voanalohany nivadiky tamy Zan̈ahary. Dikany Satana zen̈y “Panohitry,” fotony izy manohitry Jehovah fo. Devoly koa ikahian̈a izy. Dikanizio, “Pan̈aratsy”, fotony izy nivolan̈a vandy mikasiky Zan̈ahary ndreky mamitaka olo.

▸ Toko 3, feh. 4

Jehovah niasa anjely mandilatra zato tapitrisa, ela be talohany niasany tany ty. (Daniela 7:10) Hiain̈y andan̈itry an̈y niasan̈a iro io. Iro io samy aminy an̈arandro ndreky toetrindro. Anjely tsy mivadiky amy Zan̈ahary tsy man̈eky ivavahan̈a. Iro io samy amy toeran̈andro ndreky aminy asandro. Sasany manompo man̈oloan̈a seziny Panjaka Jehovah, misy man̈ambara hafatra Jehovah, misy miaro ndreky mitariky panomponany ambony tany eto, sasany man̈atanteraka fitsaran̈anany, baka io misy koa man̈ampy aminy asa fitorian̈a. (Salamo 34:7; Apokalypsy 14:6; 22:8, 9) Iro io hiady miaraka amy Jesosy aminy Haramagedona.—Apokalypsy 16:14, 16; 19:14, 15.

▸ Toko 3, feh. 5; Toko 10, feh. 1

Fahotan̈a zen̈y ivolan̈ana zay raha tsy mifan̈araka amy Jehovah na sitraponany, na raha an̈aty fontsika izio, na raha iritriretintsika, na zay raha ataontsika. Fahotan̈a io mandrobaka fihavan̈antsika amy Zan̈ahary, ke zen̈y nahavy izy nan̈amia atsika lalàn̈a ndreky toro lalan̈a han̈ampy atsika. Lavorary raha jiaby niasainy Jehovah, fa Adama ndreky Eva koa fa tsy nan̈araka volan̈a Jehovah, iro nanota, ke tsy lavorary eky. Iro nahainatoe, baka io naty. Atsika io nandova fahotan̈a taminy Adama, ke mety matoe ndreky maty koa.

▸ Toko 3, feh. 7; Toko 5, feh. 3

Izio adiny Zan̈ahary handripahan̈a doniany Satana ndreky han̈adosoan̈a raha ratsy jiaby.

▸ Toko 3, feh. 13; Toko 8, feh. 18

Izio Fanjakan̈a natsangany Zan̈ahary andan̈itry an̈y. Jesosy Kristy panjakanizio. Jehovah hampiasa Fanjakan̈a io han̈adosoan̈a raha ratsy jiaby. Izio zaraiky fo hanjaka amy tany jiaby.

▸ Toko 3, feh. 14

Jesosy voanalohany niasainy Zan̈ahary. Jehovah nan̈iraka izy nandeha tambony tany tatỳ, hofoaty hamonjian̈a olo jiaby. Tafaranizy naty, Jehovah namelon̈o izy. Jesosy Panjakany Fanjakan̈any Zan̈ahary io izioty efa manjaka andan̈itry an̈y.

▸ Toko 4, feh. 2

Baiboly efa nan̈ambara ombian̈a hiseho Mesia io. Tanteraka zen̈y koa fa tapitry 69 herin̈iandra, konten̈a manomboko tamy taon̈o 455 T.K. firaka tamy farany taon̈o 29. *

Akory ahaizantsika fa nifaran̈a tamy taon̈o 29 izio? Tamy taon̈o 455 T.K. nanomboko 69 herin̈iandra io, tamy Nehemia navy ta Jerosalema tao, ke nanomboko nan̈amboatra tanàna io. (Daniela 9:25; Nehemia 2:1, 5-8) Atsika koa fa maharen̈y “herin̈iandra” zen̈y, fito andra fahaizantsika izy. Amy faminanian̈a io fo, tsy fito andra ankitin̈y raha tiany koran̈iny fa fito taon̈o, mifan̈araka amy kontinandra amy Baiboly, “andra araiky soloan̈a taon̈o araiky.” (Nomery 14:34; Ezekiela 4:6) Dikanizen̈y herin̈iandra araiky, fito taon̈o, ke 69 herin̈iandra io mahadin̈y  483 taon̈o (69 x 7). Atsika koa mikonty 483 taon̈o baka amy taon̈o 455 T.K., atsika avy amy taon̈o 29. Taminio tsarabe taon̈o nan̈anovan̈a batisa Jesosy, ke tamy zen̈y izy nanjary Mesia!—Lioka 3:1, 2, 21, 22.

Mbala faminanian̈a io fo koa mikoran̈a momba herin̈iandra hafa, misy fito taon̈o koa. An̈atiny fotoan̈a io, tamy taon̈o 33 Mesia io nivonen̈y, baka io koa nanomboko tamy  taon̈o 36 vaovao tsarany Fanjakan̈any Zan̈ahary io nambara tamy firenena jiaby, fa tsy tamy Jiosy zaraiky fo.—Daniela 9:24-27.

▸ Toko 4, feh. 7

Baiboly mampianatra fa Zan̈ahary Jehovah io Pamoron̈o. Izy niasa Jesosy talohany niasany raha jiaby. (Kolosianina 1:15, 16) Jesosy tsy Zan̈ahary Farany Mahery. Tsiary nivolan̈a izy ke mira izy ndreky Zan̈ahary. Nivolan̈iny: “Baba andan̈itry an̈y io bebe toizay zaho.” (Jaona 14:28; 1 Korintianina 15:28) Fivavahan̈a sasany ndraiky mampianatra fa Zan̈ahary io tokana olo telo zen̈y, na Trinite: Baba, Zanaka, ndreky fan̈ahy masin̈y. “Trinite” zen̈y tsisy an̈aty Baiboly foeky. Diso fampianaran̈a zen̈y.

Fan̈ahy masin̈y io tsy olo ke hitany maso. Izio angovo ampiasainy Zan̈ahary han̈atantirahany sitraponany. Ohatra, iro Kristianin̈y taloha tan̈y “nanjary feno fan̈ahy masin̈y.” Jehovah koa nivolan̈a: “Zaho handatsaka sasany amy fan̈ahinaka amy karazan̈a nofotro jiaby.”—Asan’ny Apostoly 2:1-4, 17.

▸ Toko 4, feh. 12; Toko 15, feh. 17

Nan̈ino ma olo ten̈a Kristianin̈y tsy mampiasa lakroa, koa fa mivavaka?

1. Lakroa io nampiasainy fivavahan̈a diso taloha be tan̈y. Izio nampiasain̈y tamy fivavahan̈a tamy natiora ndreky tamy fomba misy firaisan̈a. Tan̈atiny 300 taon̈o tafarany nifatesany Jesosy, iro Kristianin̈y aby io tsy nampiasa lakroa foeky, koa fa nivavaka. Efa ela tafaranizen̈y, Constantin Emperora Romanin̈y nan̈ano lakroa io lamariky ahaizan̈a Kristianin̈y, baka olo jiaby han̈araka Fivavahan̈a Kristianin̈y zen̈y. Lakroa io tsisy ifandraisany amy Jesosy  Kristy foeky. Karaha ty nazavainy Rakipahaizan̈a Katolika Vaovao (angiley): “Talohany nisiany Kristianin̈y, samy nampiasa lakroa na olo Kristianin̈y na tsy Kristianin̈y.”

2. Jesosy tsy naty tamy lakroa. Dikany volan̈a griky nisoloan̈a “lakroa” io “kakazo mahitsy” na “vatany kakazo.” Jesosy naty tamy kakazo mahitsy. Karaha ty an̈azavany boky araiky izio: “Amy [Testamenta Vaovao] amy volan̈a griky, tsisy mivolan̈a kakazo aroe misampan̈a zen̈y foeky.”—Ny Baiboly Namana (angiley).

3. Tsy tiany Jehovah atsika koa fa mivavaka mampiasa sary na raha hafa.—Eksodosy 20:4, 5; 1 Korintianina 10:14.

▸ Toko 5, feh. 12

Jesosy nan̈iraka pianatranany aby io hahatsiaro nifatesany. Isaka taon̈o iro man̈ano izio, andra 14 Nisana, mifan̈itsy aminandra nankalazandro Israelita aby io Pasky. Misy mofo ndreky divain, man̈ambara vatan̈a ndreky liony Jesosy ampandalovin̈y aminolo tsiaraikiaraiky amy Fahatsiarovan̈a io. Olo hiaraka hanjaka amy Jesosy andan̈itry an̈y fo mihina mofo ndreky migiaka divain aminio. Olo man̈anten̈a hiain̈y tsisy farany ambony tany eto tsy mihina mofo io ndreky migiaka divain io, fa man̈aton̈o ampan̈ajan̈a fo.

▸ Toko 5, feh. 21

Maro olo mino fa olo koa maty, fan̈ahinany tsy maty. Olo sasany koa mino fa olo maty mbala mahavita mitahy ndreky mampijaly olo.

• Baiboly tsy mivolan̈a fa olo koa fa maty, misy raha tsy maty zen̈y. Koran̈iny ao fa olo maty tsisy raha vitany eky. Volan̈iny mazava karaha ty: ‘Olo koa mbala velon̈o mahay fa izy  mbala hofoaty. Fa olo maty fo tsisy raha hainy eky, fotony efa hadin̈a raha nahatsiarovan̈a izy. Samy efa foan̈a aby ndray fitiavan̈anany, ndray raha halany, ndray fialon̈ananany. Ke tsisy anjaranany eky amy raha jiaby atao ambaniny masoandra atỳ. Tsisy asa na eritreritry na fahaizan̈a na fisiany jery eky amy Fasan̈a an̈y.’ (Mpitoriteny 9:5, 6, 10) Koran̈iny Baiboly koa fa olo koa fa maty, efa tsisy eky, fotony “izy mipody amy fotaka niasan̈a izy. Andranin̈y fo eritreritrinany efa foan̈a edy.”—Salamo 146:4; Genesisy 3:19.

• Ke Baiboly tsy mampianatra fan̈ahy tsy maty zen̈y foeky. Olo maty efa tsy velon̈o antany hafa eky, ke iro tsy mahavita mitahy ndreky mampijaly olo.

▸ Toko 6, feh. 5; Toko 15, feh. 17

Tsy mira dikany “fan̈ahy” io amy volan̈a hebreo ndreky griky, fa miankiny amy volan̈a man̈odidin̈y izy, ke karaha zen̈y koa nandikan̈a izy amy Baiboly Fandikan-tenin’ny Tontolo Vaovao, amy volan̈a malagasy. Izio ivolan̈ana raha tsy hita, karaha ataony tsiko na fahin̈ana. Ndraikindraiky koa izio ivolan̈ana Jehovah, na anjely, na fan̈ahy masin̈y, angovony Zan̈ahary. Baiboly tsy mampianatra foeky fa olo koa fa maty, fan̈ahy io miala amy vatan̈a.—Eksodosy 35:21; Salamo 104:29; Matio 12:43; Lioka 11:13.

▸ Toko 6, feh. 5; Toko 15, feh. 17

Gehena io an̈arany vavasaha narikitry Jerosalema tan̈y. Tamy Jesosy tambony tany teto, niroan̈a tan̈y fako jiaby. Tsiary nisy biby na olo niroan̈a velon̈o tamy vavasaha io tan̈y. Dikanizen̈y, Gehena io tsy tany araiky an̈oroan̈a ndreky ampijalian̈a olo maty mandrakizay zen̈y. Jesosy koa fa nivolan̈a fa hisy olo sasany hatsipy amy Gehena,  raha tiany volan̈iny, ho ripaka mandrakizay iro olo aby io.—Matio 5:22; 10:28.

▸ Toko 7, feh. 20

Izio vavaka nampianariny Jesosy pianatranany aby io. Rainay izay any an-danitra na vavaka modely koa ahaizanolo izio. Ohatra, Jesosy nampianatra atsika hivavaka karaha ty:

• “Irarian̈a an̈aranao ho masin̈y”

  Mivavaka atsika baka tsisy hangala baraka an̈aran̈a Jehovah iro mipetraka andan̈itry an̈y ndreky ambony tany eto, fa han̈amia voninahitry ndreky han̈aja an̈aran̈a io fo.

• “Irarian̈a ho avy Fanjakan̈anao”

  Mivavaka atsika baka Fanjakan̈any Zan̈ahary io handravan̈a donia ratsiny Satana ty, baka io hanjaka amy tany jiaby, ndreky han̈ova tany ty paradisa.

• “Irarian̈a hatao ambony tany eto koa sitraponao”

  Mivavaka atsika baka ho tanteraka fikasan̈any Zan̈ahary, ke hiain̈y tsisy farany amy Paradisa ambony tany eto olo man̈araka volan̈anany ndreky ho lavorary. Zen̈y raha tiany hatao rango tamy voanalohany tan̈y.

▸ Toko 8, feh. 2

Jehovah nan̈amia vidipan̈avotan̈a io han̈adosoan̈a olo amy fahotan̈a ndreky fahafatesan̈a. Izio vangany fahin̈ana lavorary nariany Adama, lelahy voanalohany, ndreky hampihavan̈a atsika amy Jehovah ndraiky. Jesosy nirahiny Jehovah nijotso tambony tany tatỳ, hofoaty hamonjian̈a olo jiaby. Baka amy zen̈y nahavy olo jiaby mety hiain̈y tsisy farany ndreky ho lavorary.

▸ Toko 8, feh 21; Toko 9, feh. 13

Faminanian̈a amy Daniela toko faha-4 ao mampianatra atsika fa taminy 1914 Zan̈ahary nanangana Fanjakan̈anany.

Faminanian̈a: Jehovah nampan̈inofy Panjaka Nebokadnezara momba kakazo be araiky nitapahan̈a. Tamy nofy tao, nasian̈a fehy vy ndreky varahin̈y vodiny kakazo io, baka tsy mitombo an̈atiny “fetrandra fito.” Koa fa vita zen̈y, hitombo ndraiky koa kakazo io.—Daniela 4:1, 10-16.

Dikany faminanian̈a io: Kakazo io ivolan̈ana fitondrasan̈any Zan̈ahary. Tan̈atiny taon̈o maro, Jehovah nampiasa panjaka ta Jerosalema tan̈y nitondra firenenany Israely. (1 Tantara 29:23) Iro panjaka aby tao nivadiky tamy Zan̈ahary. Ravan̈a Jerosalema tamy taon̈o 607 T.K. Nanomboko tamy zen̈y “fetrandra fito” io, fotony tsisy panjaka eky tao. (2 Mpanjaka 25:1, 8-10; Ezekiela 21:25-27) Zen̈y raha tiany Jesosy nivolan̈iny tamy “Jerosalema hitsahindro firenena hafa aby io firaka fotoan̈a voatondro nindro firenena hafa io tapitry.” (Lioka 21:24) Tsy tapitry tamy Jesosy tambony tany teto “fetrandra fito” io. Jehovah nampan̈anten̈a fa hifidy Panjaka araiky, amy farany “fetrandra fito” io. Jesosy Panjaka vaovao io hitondra hatsaran̈a tsisy farany aminolony Zan̈ahary ambony tany eto.—Lioka 1:30-33.

Halavasany “fetrandra fito”: Izio mahadin̈y 2 520 taon̈o. Izikoa atsika mikonty 2 520 taon̈o baka amy taon̈o 607 T.K., atsika avy amy taon̈o 1914. Taminio Jehovah nan̈ano Jesosy Mesia, Panjakany Fanjakan̈any Zan̈ahary andan̈itry an̈y.

 Karakory ma naviany konty 2 520 taon̈o io? Baiboly mivolan̈a fa fetrandra telo sy tapany mahadin̈y 1 260 andra. (Apokalypsy 12:6, 14) Dikanizen̈y, “fetrandra fito” io indroenizio, na 2 520 andra. Koa ‘andra araiky soloan̈a taon̈o araiky’, 2 520 andra io manjary 2 520 taon̈o.—Nomery 14:34; Ezekiela 4:6.

▸ Toko 8, feh. 23

Dikany “arkanjely” io “sefonanjely.” Araiky fo arkanjely koran̈iny Baiboly. Mikaela an̈arany.—Daniela 12:1; Joda 9.

Mikaela io mitariky anjeliny Jehovah, iro koa fa hiady. Karaha ty koran̈iny Apokalypsy 12:7: ‘Mikaela ndreky anjelinany aby io niady tamy dragona ndreky anjelinany aby io.’ Aminy Apokalypsy 19:14-16 mivolan̈a fa Pitariky tafiky Zan̈ahary io Jesosy. Mikaela io mbala an̈aran̈a hafa hikahian̈a Jesosy.

▸ Toko 9, feh. 4

Fotoan̈a lava andra farany io, fa tsy andra araiky. Hisy raha maro hiboaka aminandra farany, alohany handripahany Fanjakan̈any Zan̈ahary doniany Satana ty. ‘Farany rafitry donia ty’ ndreky “fan̈atrehany Zanakolo” koa hikoran̈any faminanian̈a hafa izio. (Matio 24:3, 27, 37) ‘Andra farany’ io nanomboko tamy Fanjakan̈any Zan̈ahary nanomboko nanjaka tandan̈itry tan̈y taminy 1914. Tapitry izio koa fa ravan̈a doniany Satana ty aminy Haramagedona.—2 Timoty 3:1; 2 Petera 3:3.

▸ Toko 9, feh. 5

Izio fotoan̈a hamilomany Zan̈ahary olo maty. Sivy olo maty nivilomin̈y tantarainy Baiboly. Elia, Elisa, Jesosy, Petera ndreky Paoly samy namelon̈o olo maty. Angovony Zan̈ahary fo nahavitandro fahagagan̈a zen̈y. Jehovah nampan̈anten̈a fa “olo marin̈y ndreky tsy marin̈y samy mbala hivilomin̈y” ambony tany eto. (Asan’ny Apostoly 24:15) Baiboly koa mivolan̈a fa misy olo maty hivilomin̈y hengo andan̈itry. Olo nifidiny Zan̈ahary fo hivilomin̈y hiaraka hipetraka amy Jesosy andan̈itry an̈y.—Jaona 5:28, 29; 11:25; Filipianina 3:11; Apokalypsy 20:5, 6.

▸ Toko 9, feh. 13

Ratsy mifandray amindro demony aby io. Misy olo mifandray mivantan̈a amindro io, fa misy ndraiky man̈aton̈o moasy, na raha miramira amy zen̈y. Olo man̈ano izio mino fa olo maty mbala velon̈o antany hafa an̈y, ke manjary hian̈a na lolo mahery. Tsy marin̈y hevitrindro zen̈y. Tiany demony aby io mitaon̈o olo tsy han̈araka volan̈a Zan̈ahary. Mifandray amindro io koa olo man̈ano mahay mizaha lakintan̈a, pisikidy, olo man̈ano mazy, moasy, olo misikidy karata, olo minomino foan̈a, olo misoma aody. Aboaka amy boky maro, gazety, horoskopy, filma, lamoziky, na sary fa karaha tsy mampan̈ino mifandray amindro demony aby io. Misy ifandraisany amy demony koa fomba sasany atao izikoa fa misy olo maty, karaha ataony fiaretantory, fety hatsiarovan̈a olo maty, man̈atitry raha ampasan̈a an̈y, na man̈ano fomba aminolo maty vady, na raha miramira zen̈y. Matetiky olo koa fa hampiasa angovony demony aby io, iro mihina jamala.—Galatianina 5:20; Apokalypsy 21:8.

▸ Toko 10, feh. 10; Toko 16, feh. 4

Jehovah io Zan̈ahary Farany Mahery. Izy niasa raha jiaby. (Apokalypsy 15:3) Zen̈y mahavy izy Tompiny raha jiaby ndreky manan̈a fahifan̈a feno, hanjaka amy raha niasainy. (Salamo 24:1; Isaia 40:21-23; Apokalypsy 4:11) Izy nan̈ano lalàn̈a amy raha jiaby niasainy. Jehovah koa manan̈a fahifan̈a hifidy olo hatao panjaka. Man̈eky fahifan̈any Zan̈ahary io atsika, izikoa tia izy ndreky man̈araka volan̈anany.—1 Tantara 29:11.

▸ Toko 11, feh. 10

Fan̈adosoan̈a tsaiky zen̈y, olo mavesatra kinia man̈ano raha hamonoan̈a tsaiky an̈aty kibo. Izio tsy raha baka aminy aksidan na baka amy raha tsy mety amy vatan̈any reniny. Miaraka misy tsaiky miforon̈o an̈aty kibo ao, efa olo edy.

▸ Toko 13, feh. 5

Izio fitahan̈a ataony dokotera, ke lionolo vo nalain̈y na lio efa nikajin̈y efa ela ampidirin̈y aminy ain̈inolo marary. Mety raha araiky baka amy taharo fototro lio ampidirin̈y aminolo io: Na liomena, na liofotsy, na plakety, na plasma.

▸ Toko 13, feh. 13

Dikany “fan̈anaran̈a” io amy Baiboly tsy fan̈asazian̈a fo. Tafiditry amizio koa fampianaran̈a ndreky fan̈itsian̈a, baka io famalavalan̈a. Jehovah tsy kafiry ndreky tsy man̈araraotro fahifan̈anany izikoa fa man̈anatra. (Ohabolana 4:1, 2) Tsara arehany raimandreny raha ataony Jehovah zen̈y. Malaka aminolo anarin̈y fomba fan̈anarany Jehovah io, fotony manjary tia man̈araka fan̈anaran̈a olo anariny io. (Ohabolana 12:1) Jehovah tia olonany, ke izy mampianatra iro. Man̈amia fampianaran̈a izy baka iro han̈itsy hevitry diso mety hanan̈andro. Izy koa mampianatra iro hieritreritry tsarabe ndreky han̈ano raha mamparavoravo izy. Aminolo mananjanaka, fan̈anaran̈a io hahavy iro tsaiky aby io hahay antony tokony han̈arahandro volan̈a raimandrenindro. Fan̈anaran̈a io koa mampianatra iro ho tia Jehovah ndreky Volan̈anany, baka io hahay toro lalan̈a aby ao.

▸ Toko 14, feh. 13

Iro io fan̈ahy ratsy mahery mandilatra atsika. Iro tsy hitantsika. Anjely ratsy iro io, fotony iro fo nan̈ano iro nanjary fahavalony Zan̈ahary, ke nifidy tsy han̈araka volan̈anany. (Genesisy 6:2; Joda 6) Iro nan̈araka Satana ke nivadiky tamy Jehovah.—Deoteronomia 32:17; Lioka 8:30; Asan’ny Apostoly 16:16; Jakoba 2:19.

▸ Toko 16, feh. 4