1, 2. Azovy aby an̈isany kamaradiny Jehovah?

OLO karakory ma tianao hatao kamarady? Olo tianao ndreky olo mifan̈araka tsarabe aminao. Mety ho tianao hatao kamarady koa olo tsara fan̈ahy ndreky manan̈a toetry tianao.

² Zan̈ahary Jehovah koa mba mifidy olo ataony kamarady. Ohatra, Abrahama an̈isany kamaradiny Jehovah. (Isaia 41:8; Jakoba 2:23) Jehovah koa tia Davida. Izy nivolan̈a fa Davida io ‘lelahy tiany fonany.’ (Asan’ny Apostoly 13:22) Paminan̈y Daniela koa ‘ten̈a tiany’ Jehovah.—Daniela 9:23.

3. Nan̈ino ma Jehovah nan̈ano kamarady Abrahama, Davida, ndreky Daniela?

³ Akory nahavy Abrahama, Davida, ndreky Daniela nanjary kamaradiny Jehovah? Nivolan̈iny Jehovah taminy Abrahama: “Anao nitandren̈y volan̈anaka.” (Genesisy 22:18) Olo manetry ten̈a ke man̈araka volan̈a Jehovah, tiany Jehovah hatao kamarady. Na firenena araiky, mbala mety hanjary kamaradiny Jehovah fo. Izy nan̈azava karaha ty tamy firenenany Israely: “Tandrin̈esa feonaka, baka zaho hanjary Zan̈aharinaro, anaro hanjary olonaka.” (Jeremia 7:23) Ke izikoa ten̈a tianao hanjary kamaradiny Jehovah, anao mila man̈araka volan̈anany.

4, 5. Karakory ataony Jehovah miaro kamaradinany?

⁴ Baiboly mivolan̈a fa Jehovah mizaha olo, baka ‘hampiboaka angovonany hamonjiany olo tsy miala aminany  amy fo jiaby.’ (2 Tantara 16:9) Amy Salamo 32:8 ao Jehovah mampan̈anten̈a kamaradinany karaha ty: “Zaho han̈ano raha hahavy anao hahadiniky raha, baka io hambarako anao lalan̈a tokony himboanao. Zaho han̈ambara anao hevitry, baka io masonaka hitsinjo anao.”

⁵ Misy fahavalo mahery mila hisakana fikamaradianantsika amy Jehovah, fa Jehovah hiaro atsika. (Vakia Salamo 55:22.) Atsika manompo Jehovah amy fontsika jiaby, fotony atsika kamaradiny. Atsika tsy mivadiky aminany, na amy raha farany sarotro. Atsika matoky mira pan̈ano salamo nanoratra karaha ty momba Jehovah: “Zaho tsy mety hangozohozo, fotony izy ankavanan̈anaka.” (Salamo 16:8; 63:8) Karakory ataony Satana misakana fikamaradianantsika amy Zan̈ahary?

6. Ino vandiny Satana momba olombelon̈o?

⁶ Tamy Toko faha-11 tamy boky ty atsika nianatra fa Satana nivolan̈a Jehovah io pavandy ndreky tsy mahay mitondra, fotony Jehovah tsy nan̈omba Adama ndreky Eva hanapakevitry momba ny tsara ndreky ratsy. Bokiny Joba amy Baiboly ao mampianatra atsika fa Satana io mankaratsy olo jiaby tihanjary kamaradiny Zan̈ahary koa. Satana mivolan̈a fa fitiavan̈a hahazo raha fo mahavy olo manompo Jehovah, fa tsy fitiavan̈a Jehovah. Satana mivolan̈a koa fa izy mahavita mampiala olo jiaby amy Jehovah. Atsika hizaha raha mety ianaran̈a baka amy Joba, ndreky raha nataony Jehovah niarovan̈a izy.

7, 8. a) Akory fahitany Jehovah Joba? b) Ino ndraiky raha nivolan̈iny Satana momba Joba?

⁷ Azovy ma Joba zen̈y? Izio lelahy tia Jehovah, niain̈y kadiriny tamy 3 600 taon̈o taloha tan̈y. Jehovah nivolan̈a fa tamy zen̈y, tsisy olo nira Joba tambony tany teto. Joba  nan̈aja Zan̈ahary mare. Izy tsy tia ny ratsy foeky. (Joba 1:8) Joba ten̈a kamaradiny Jehovah ankitin̈y.

⁸ Satana nivolan̈a fa fitiavanten̈a fo nahavy Joba nanompo Zan̈ahary. Nivolan̈iny tamy Jehovah: “Tsy anao ma niaro izy ndreky tran̈onany ndreky harian̈anany jiaby? Anao nitahy asany tan̈anany, ke tany jiaby feno biby tariminy. Ampara baka tan̈anao, azafady, adosoa aminany raha jiaby anan̈any, zahavako izy tsy han̈ozon̈o anao zen̈y.”—Joba 1:10, 11.

9. Nambelany Jehovah han̈ino Satana?

⁹ Satana nivolan̈a fa fitiavanten̈a fo nahavy Joba nanompo Jehovah. Satana koa nivolan̈a fa izy mahavita man̈ano raha hahavy Joba tsy hanompo Jehovah eky. Hainy Jehovah tsarabe fa tsy marin̈y volan̈a Satana zen̈y, fa nambelany fo Satana hitsapa jery Joba, baka hita izikoa fitiavan̈a Jehovah ankitin̈y nahavy Joba nikamarady amy Jehovah.

10. Karakory nataony Satana nanafiky Joba, baka io karakory nataony Joba?

¹⁰ Voanalohany, nitaperiny Satana biby jiaby nitariminy Joba. Nivoneny Satana koa ankamarozany piasany Joba. Ravan̈a fanan̈any Joba. Farany, nivoneny Satana tamy sikilony zanaka Joba folo. Izy mbala tsy nivadiky tamy Jehovah fo. “Tamy raha jiaby zen̈y, Joba tsy nanota sady tsy nan̈amia tsin̈y Zan̈ahary foeky.”—Joba 1:12-19, 22.

11. a) Nataony Satana ino koa Joba? b) Akory nataony Joba?

¹¹ Satana mbala tsy niova hevitry. Izy mbala nankaratsy Zan̈ahary fo, ke nivolan̈a: “Kasiha firaka amy taolan̈anany ndreky nofotronany, zahavako izy tsy han̈ozon̈o anao zen̈y.” Nataony Satana baibay ain̈iny Joba jiaby. (Joba 2:5, 7) Joba mbala tsy nivadiky tamy Jehovah fo. Nivolan̈iny:  “Zaho tsy han̈eky hivadiky zen̈y foeky, nata zaho afaka fahin̈ana.”—Joba 27:5.

12. Akory nataony Joba nahitan̈a fa Satana io pavandy?

¹² Tsy hainy Joba foeky Satana nankaratsy Jehovah zen̈y, baka io tsy hainy koa nan̈ino izy nijaly mare. Sambarany baka amy Jehovah fo raha jiaby nahazo izy. (Joba 6:4; 16:11-14) Ndray zen̈y, Joba mbala tsy nivadiky tamy Jehovah fo. Nazava taminio fa Joba tsy tia ten̈a zen̈y. Izy kamaradiny Zan̈ahary, fotony izy tia Zan̈ahary. Hita tsarabe fa tsisy marin̈y fankaratsian̈a nataony Satana in̈y!

13. Joba koa fa tsy nivadiky foeky, karakory nataony Jehovah?

¹³ Joba ndray tsy nahay raha nandalo tandan̈itry tan̈y, izy tsy nivadiky tamy Zan̈ahary ndreky nan̈aboaka fa Satana io ratsy jery. Jehovah nitahy Joba, fotony izy kamaradinany tsy nivadiky taminany.—Joba 42:12-17.

14, 15. Ino fankaratsian̈a ataony Satana aminolo jiaby, na lelahy na man̈angy?

¹⁴ Misy raha maro maventy ianaranao baka amy raha nahazo Joba in̈y. Satana mivolan̈a fa atsika mahazo raha amy Jehovah fo mahavy atsika manompo izy. Amy Joba 2:4 Satana nivolan̈a: “Zay raha anan̈anolo hamiany hiarovan̈a ain̈inany.” Dikanizen̈y, tsy Joba zaraiky fo volan̈iny Satana fa tia ten̈a, fa olo jiaby, na lelahy na man̈angy. Efa anjatony taon̈o tafarany nifatesany Joba, Satana mbala mankaratsy Jehovah ndreky olo manompo Jehovah fo. Ohatra, karaha ty vakintsika aminy Ohabolana 27:11: “Misia jery zanako, ataova raha mamparavoravo fonaka, baka zaho hamaly araiky mankaratsy zaho io.”

¹⁵ Anao mety mifidy han̈araka volan̈a Jehovah, ke hanjary kamaradinany tsy mivadiky aminany. Haboakanao amy zen̈y Satana io pavandy. Mety misy raha maventy mbala mila hivoanao, baka anao manjary kamaradiny  Zan̈ahary, fa io fanapahankevitry farany tsara! An̈isany raha ten̈a maventy koa fanapahankevitry karaha zen̈y. Satana mivolan̈a fa hivadiky amy Zan̈ahary anao, izikoa tojy raha manahiran̈a. Izy man̈ano fandriky isankarazany, baka atsika hivadiky amy Jehovah. Ino aby raha ataony?

16. a) Ino aby fandriky ampiasainy Satana, baka olo tsy hanompo Jehovah eky? b) Akory mety hataony Satana, baka anao tsy hanompo Jehovah?

¹⁶ Satana man̈ano fandriky isankarazany, baka atsika tsy hikamarady amy Zan̈ahary eky. Izy manafiky “mira lion mitreron̈o, mitady olo vonen̈a in̈y.” (1 Petera 5:8) Ke anao aza gaga izikoa kamaradinao, havanao, na olo hafa koa, hitady hampijanon̈o fianaranao Baiboly ndreky fan̈anovanao ny marin̈y. Mety hahatsiaro tsy tian̈a mare anao amy zen̈y. * (Jaona 15:19, 20) Satana man̈ano karaha “anjeliny mazava.” Izy mety hamandriky atsika, baka atsika tsy han̈araka volan̈a Jehovah. (2 Korintianina 11:14) Fandrihiny Satana koa atsika, ke ataony raha hivolan̈antsika fa atsika io tsisy varany aby manompo Zan̈ahary.—Ohabolana 24:10.

17. Ino mahavy atsika man̈araka volan̈a Jehovah?

¹⁷ Atsika koa man̈araka volan̈a Jehovah, ho hita tsarabe fa Satana io pavandy. Ino raha han̈ampy atsika han̈araka volan̈a Jehovah? Karaha ty koran̈iny Baiboly: “Tiava Jehovah Zan̈aharinao amy fonao jiaby ndreky ain̈inao jiaby ndreky angovonao jiaby.” (Deoteronomia 6:5) Atsika man̈araka volan̈a Jehovah, fotony atsika tia izy. Izikoa  mitombo fitiavantsika Jehovah, atsika von̈ono han̈ano zay raha an̈irahany. Apostoly Jaona nanoratra karaha ty: “Dikany tia Zan̈ahary zen̈y mitandrin̈y didinany, fa didinany io fo tsy mavesatra.”—1 Jaona 5:3.

18, 19. a) Ino sasany amy raha volan̈iny Jehovah fa ratsy? b) Ino ahaizantsika fa Jehovah tsy man̈iraka atsika han̈ano raha tsy vitantsika?

¹⁸ Ino aby ma raha volan̈iny Jehovah fa ratsy? Sasany aminany io natao aminy efajoro “ Aza Tia Raha Halany Jehovah.” Anao mety hivolan̈a fa tsisy maharatsy sasany amindro io. Izikoa ndraiky anao mamaky ndreky mangala onon̈o toko ndreky andininy aby io, hazava aminao fa tsara man̈araka lalàn̈any Jehovah. Mety ho hitanao koa raha tokony hivoanao amy fiain̈ananao. Mety ho sarotro man̈ano zen̈y, fa mifen̈a fo. Anao koa man̈ano raha tokony hivoan̈a io, anao hiadantsain̈y ndreky ho sambatra, fotony baka amy fikamaradianan̈a amy Zan̈ahary fo azahoan̈a  zen̈y. (Isaia 48:17, 18) Akory ahaizantsika fa atsika mahavita miova?

¹⁹ Jehovah tsiary nan̈iraka atsika han̈ano raha tsy vitantsika. (Deoteronomia 30:11-14) Jehovah ten̈a Kamarady tsara, fotony izy ten̈a mahay raha mahatsara atsika. Hainy raha mety ho vitantsika ndreky raha tsy ho vitantsika. (Salamo 103:14) Apostoly Paoly mankahery atsika karaha ty: “Zan̈ahary tsy mivadiky amy raha efa nivolan̈iny, ke izy tsy mety han̈ambela anaro hitsapain̈y mandilatra raha tondranaro, fa izikoa fa misy fitsapan̈a, mbala hasiany lalan̈a koa hiboahanaro, baka anaro mahatondra izio.” (1 Korintianina 10:13) Atsika tokony hatoky tsarabe fa Jehovah tsy voly man̈amia angovo atsika, baka atsika mahavita man̈ano ny marin̈y. Izy han̈amia anao “angovo fan̈ampiny.” (2 Korintianina 4:7) Paoly an̈isany nahita fa marin̈y volan̈a Jehovah zen̈y, fotony izy efa nandalo fiain̈ana sarotro. Karaha ty nivolan̈iny: “Baka aminy araiky man̈amia  angovo zaho in̈y mahavy zaho manan̈a angovo hindesin̈y hiatriky karazandraha jiaby.”—Filipianina 4:13.

20. Ino aby toetry tokony halainao tahaka? Nan̈ino?

²⁰ Izikoa atsika man̈iry hanjary kamaradiny Jehovah, tsy maintsy ialantsika raha jiaby halany Jehovah. Mbala misy raha koa tsy maintsy ataontsika. (Romanina 12:9) Raha tiany Zan̈ahary fo tiany kamaradiny. Mikoran̈a momba zen̈y amy Salamo 15:1-5. (Vakia.) Olo kamaradiny Jehovah mangala tahaka toetrinany, an̈atinizen̈y “fitiavan̈a, haravoan̈a, fiadan̈ana, maharidraha, hatsarampan̈ahy, man̈ano ny tsara, finoan̈a, malemy toetry, mahafehy ten̈a.”—Galatianina 5:22, 23.

21. Karakory ianaranao han̈araka toetry tiany Zan̈ahary?

²¹ Akory hahavy anao hanan̈a toetry maro tsara io? Anao mila mianatra raha tiany Jehovah, ke mila mamaky ndreky mianatra Baiboly isanandra. (Isaia 30:20, 21) Anao koa man̈ano zen̈y, hitombo fitiavanao Jehovah, ho tianao han̈araka raha volan̈iny.

22. Ino hatsaran̈a ho azonao, izikoa anao man̈araka volan̈a Jehovah?

²² Fan̈ovoan̈a mila ataonao amy fiain̈ananao io mety ampitovisin̈y aminy anao man̈adoso lamba maloto, baka io misikiny lamba madio. Baiboly mivolan̈a fa anao mila ‘man̈adoso toetry taloha’, baka io ‘misikiny toetry vaovao.’ (Kolosianina 3:9, 10) Marin̈y fa tsy mora man̈ano fan̈ovoan̈a aby io ndreky man̈araka volan̈a Jehovah, fa izy nampan̈anten̈a fa han̈amia atsika ‘rady be.’ (Salamo 19:11) Mifidiana han̈araka volan̈a Jehovah, ke aboaha fa Satana io pavandy ankitin̈y. Manompoa Jehovah, tsy baka amy fitiavan̈a hahazo rady fo, fa baka amy fitiavan̈a Jehovah. Hanjary ten̈a kamaradiny Zan̈ahary ankitin̈y anao amy zen̈y!