Izikoa Baiboly zahan̈a, antipan̈ahy ndreky pan̈ampy amy fanompoan̈a natao hikarakara fiangonan̈a. (Filipianina 1:1) Isaka fiangonan̈a, tokony misy antipan̈ahy ndreky pan̈ampy amy fanompoan̈a. Ino fo ma asany pan̈ampy amy fanompoan̈a?

Iro io miaraka miasa aminy antipan̈ahy. Lelahy tanora na efa be taon̈o mety atao pan̈ampy amy fanompoan̈a io. Mila olo mahay Soratra Masin̈y tsarabe, atokisan̈a ndreky mazoto miasa atao izio.

Iro io miasa mare amy fiangonan̈a. Sasany amindro io irahin̈y handray olo avy amy fivorian̈a. Sasany mikarakara mikro, mikarakara boky, man̈ano konty, ndreky mikarakara tany itorian̈a. Iro koa mikarakara fikobabian̈a Tran̈o Fivorian̈a. Misy lera koa olobe amy fiangonan̈a aby io mety han̈iraka iro hikarakara naman̈a mivory efa matoe. Na ino na ino asa irahin̈y ataondro, iro von̈ono fo. Zen̈y mahavy atsika mila man̈aja iro.—1 Timoty 3:13.

Iro io ten̈a tsara alain̈y tahaka. Matoa olo araiky atao pan̈ampy amy fanompoan̈a zen̈y, izy manan̈a toetry tsara koran̈iny Baiboly. Iro man̈oman̈a tsarabe, izikoa fa misy raha irahin̈y ataondro amy fivorian̈a. Zen̈y mahavy finoan̈antsika mahay matanjaka. Mampazoto mitory koa mahita iro tsy kamo mandeha mitory. Mamparavoravo ndreky mampihavan̈a olo jiaby amy fiangonan̈a koa mahita iro mahay miaraka miasa. (Efesianina 4:16) Koa fa mandeha taon̈o, iro io koa mety ho loso antipan̈ahy.

• Olo karakory ma tsara atao pan̈ampy amy fanompoan̈a?

• Ino aby asany pan̈ampy amy fanompoan̈a amy fiangonan̈a?