Izikoa olo fivadiany mbala vo sambany niteraka, iro mety ho ravoravo mare, kanefa mety hiasa loha koa. Miova fiain̈anandro, fotony mikarakara tsaiky io mila fotoan̈a ndreky angovo. Iro mety tsy ho ampy toromaso, ke manjary mora mahinihiny. Mety handrobaka fiarahan̈andro raha karaha zen̈y. Dikanizen̈y, iro fivadiany samy mila mifen̈y mikarakara zanakandro ndreky miaro tokantran̈ondro. Izikoa anaro vo sambany niteraka, ino aby ma torohevitry Baiboly mety han̈ampy anaro?

KORAN̈INY BAIBOLY: “Fitiavan̈a io maharidraha ndreky tsara fan̈ahy.” Fitiavan̈a io koa “tsy mitady raha hahatsara izy tompiny fo”, baka io koa “tsy mora meloko.” (1 Korintianina 13:4, 5) Matetiky man̈angy koa vo sambany niteraka, izy varian̈a mikarakara zanany. Babany tsaiky io amy zay mety hahatsiaro tsy jireny vadiny foeky. Ataova raha hahitany vadinao fa anao mbala tia izy, baka io koa izy mety irahin̈y koa mitatahy anao mikarakara tsaiky io. Ho vitanao han̈ano zen̈y, izikoa anao maharidraha ndreky tsara fan̈ahy.

“Anaro lelahy ... mila miaraka mipetraka amy vadinaro fo mifan̈araka amy fahaizan̈a ny marin̈y.” (1 Petera 3:7) Tsy tokony hadin̈any lelahy fa zanakandroroe andaniany vadiny fotoan̈a io, baka io koa mbala man̈avao izy aminy andraikitrinany io, ke mety ho kajo mare. Zen̈y mahavy izy manjary mora mahinihiny na mora kivy. Izy mety ho tafasiaka aminao, ke anao mila maharidraha. Koran̈iny Baiboly: “Sitrany koa olo tsy mora meloko, toizay lelahy fatatra.” (Ohabolana 16:32) Anao koa mahay mandi- niky karaha zen̈y, ho vitanao han̈ampy izy. —Ohabolana 14:29.

AKORY AN̈ANOVANAO ZEN̈Y?

• Lelahy: Tatahia fo vadinao mikarakara zanakanaro, ndray alin̈y andra. Fotoan̈anao tokony hilaninao amy vadinao ndreky zanakanao fa tsy amy raha tsisy dikany

• Man̈angy: Vadinao koa mitatahy anao, anao tsy tokony hasiaka aminany fa tokony hankasitraka izy. Izikoa misy raha hitanao man̈avia izy amy fikarakarany zanakanaro, anao mila tsara fan̈ahy mampianatra izy

KORAN̈INY BAIBOLY: “Iroroe hanjary nofotro araiky.” (Genesisy 2:24) Anaro ndray misy tsaiky, aza adin̈a fa anaro fivadiany io mbala “nofotro araiky.” Ke mifen̈a fo anaro, baka ho tsara fo fihavan̈anaro fivadiany.

Anaro man̈angy, mahaiza mankasitraka vadinaro mitatahy anaro. Volan̈a karaha zen̈y mira aody “mampahivan̈a.” (Ohabolana 12:18) Anaro lelahy, ambarà vadinaro fa anaro ten̈a tia iro ndreky mankasitraka asa jiaby ataondro ikarakaran̈a tokantran̈onaro.—Ohabolana 31:10, 28.

“Irarian̈a anaro tsiaraikiaraiky samy hizaha raha mahatsara namanaro, fa tsy raha mahatsara anaro tompiny fo.” (1 Korintianina 10:24) Ataova raha mahatsara vadinao. Anaro mila manokan̈a fotoan̈a hikoran̈ana. Tandrin̈esa raha volan̈iny vadinao, baka io mahaiza mankasitraka. Aza tia ten̈a amy resaka firaisan̈a. Zahava ino raha ten̈a ilainy vadinaro. Baiboly mivolan̈a karaha ty: “Irarian̈a anaro samy han̈eky han̈ano adidy amy vadinaro, koa tsy raha efa nifan̈arahanaro.” (1 Korintianina 7:3-5) Anaro mila mifampikoran̈a tsarabe momba raha zen̈y. Anaro koa samy maharidraha ndreky mizaha tsarabe raha ilainy vadinaro, anaro hahay hifankatia fo.

AKORY AN̈ANOVAN̈A ZEN̈Y?

• Aza adin̈a manokan̈a fotoan̈a iarahanaro fivadiany

• Man̈anova raha madinidiniky ahitany vadinao fa anao mbala ten̈a tia izy. Ohatra, anao mety man̈amia kado izy na mandefa SMS

KORAN̈INY BAIBOLY: ‘Rango anao mbala hely efa nahay Soratra Masin̈y, ke zen̈y mahavy anao misy jery ... ndreky hahavoavonjy anao.’ (2 Timoty 3:15) Zahava ino raha mety ampianarinaro zanakanaro io. Tsaiky ndray mbala an̈aty kibony reniny, izy efa mianatra raha edy. Efa hainy man̈avaka feony babany ndreky reniny. Anao reniny koa fa ravoravo, izy koa mba ravoravo. Ke rango izy mbala hely, efa tsara amakianao boky edy, ndray mbala tsy hainy dikany, baka izy hanjary tia mamaky teny.

Izy ndray mbala hely, koràn̈a raha momba Jehovah fo. Anao koa fa mivavaka, ataova ren̈iny raha volan̈inao. (Deoteronomia 11:19) Ndray anaro misoma miaraka amy zanakanaro, aza adin̈a mikoran̈a raha namboariny Zan̈ahary. (Salamo 78:3, 4) Zanakanaro koa fa mahaibe, ho hitany fo fitiavanaro Jehovah, ke izy koa hanjary tia Jehovah.

AKORY AN̈ANOVANAO ZEN̈Y?

• Mivavaha amy Jehovah, baka izy han̈ampy anaro hitarimy zanakanaro

• Ampianara mivolan̈a izy, baka malaky mahay raha. Anao mety mifidy volan̈a araiky ampodipody aminany