FIANARAN̈A 3
Baiboly io ma Baka amy Zan̈ahary Ankitin̈y?
1. Volan̈anjovy ma an̈aty Baiboly ao?
Voasoratra an̈aty Baiboly ao vaovao tsara mivolan̈a fa olo ho velon̈o tsisy farany ambony tany eto. (Salamo 37:29) Baiboly io boky 66, natao boky araiky. Zan̈ahary nan̈iraka lelahy 40 nanoratra izio. Mosesy nanoratra Genesisy ziskamy Deoteronomia, efa misy 3 500 taon̈o zay. Apostoly Jaona nanoratra Apokalypsy, efa misy 1 900 taon̈o zay. Volan̈anjovy ma nisoratindro? Iro nanoratra Baiboly io nahazo fan̈ahy masin̈y baka amy Zan̈ahary. (2 Samoela 23:2) Tsy raha tiandro nisoratindro tao fa volan̈a Zan̈ahary. Dikanizen̈y, volan̈a Zan̈ahary an̈aty Baiboly ao.—Vakia 2 Timoty 3:16; 2 Petera 1:20, 21.
Zahava video Baka Aminjovy ma Baiboly Io?
2. Marin̈y ankitin̈y ma raha volan̈iny Baiboly io?
Baiboly mivolan̈a raha mbala tsendriky honohono ho avy. (Josoa 23:14) Zan̈ahary zaraiky fo mahay raha mbala ho avy.—Vakia Isaia 42:9; 46:10.
Baiboly io misy amy volan̈a maro karazany. Efa mahampy andrivony Baiboly nirasain̈y. Baiboly io ndray efa ela, mbala marin̈y fo raha volan̈iny amy resaka siansy. Nata 40 iro nanoratra izio, raha nisoratindro tsy nifanohitry. * Hita amy raha koran̈iny Baiboly koa fa Zan̈ahary ten̈a tia olo. Izio koa mahavita mankatsara toetrinolo. Hitantsika baka amy raha jiaby zen̈y fa tsisy boky mira Baiboly io. Zen̈y mahavy olo maro man̈eky marin̈y fa Baiboly io Volan̈a Zan̈ahary.—Vakia 1 Tesalonianina 2:13.
Zahava video Ten̈a Marin̈y ma Raha Koran̈iny Baiboly?
3. Ino ma raha koran̈iny Baiboly io?
Zan̈ahary manan̈a fikasan̈a tsara amintsika olombelon̈o. Vaovao tsara io raha ten̈a koran̈iny Baiboly io. Hazavainy ao fa nata paradisa taloha in̈y ravan̈a, tany ty mbala hanjary paradisa.—Vakia Apokalypsy 21:4, 5.
Amy Baiboly ao koa misy lalàn̈a, toro lalan̈a ndreky torohevitry. Baka amy raha nataony Zan̈ahary taminolonany taloha tan̈y koa ahaizantsika toetriny Zan̈ahary. Ambarany ao raha mila hatao, baka atsika manjary olonany.—Vakia Salamo 19:7, 11; Jakoba 2:23; 4:8.
4. Karakory ma hahaizanao raha koran̈iny Baiboly?
Fampianaran̈a amy boky ty mira fomba fampianarany Jesosy. Hahay Baiboly anao, izikoa mianatra izy ty. Misy toko ndreky andininy maro ndreky fan̈azavan̈a andininy aby io ato.”—Vakia Lioka 24:27, 45.
Mbala maro koa vaovao tsara koran̈iny Baiboly. Olo sasany fo tsy mijery Baiboly io, misy koa tsy tia izio foeky. Anao koa manohy mianatra Baiboly, anao ho velon̈o tsisy farany.—Vakia Jaona 17:3.
^ feh. 3 Zahava toko 7 amy boky Ny Baiboly—Tenin’Andriamanitra sa Tenin’olona? (malagasy).
