Nianarantsika tamy lahatsoratra io tao fa misy adihevitry araiky ten̈a maventy sady misy vokany aminolombelon̈o ndreky anjely jiaby. Tsy ino izio fa fankamasin̈ana an̈aran̈a be voninahitry Jehovah. Mbala an̈isany adihevitry io fan̈aporofoan̈a fa izy manan̈a zo hitondra; fitondrasan̈anany ny ten̈a tsara. Tafiditry amizio koa adihevitry momba tsy fivadihanolombelon̈o.

Nan̈ino atsika iziô mivolan̈a fa adihevitry momba an̈arany Jehovah ndreky fankamasinan̈a izio adihevitry ten̈a maventy? Alo atsika handiniky antony telo.

Voanalohany, tamy zaridainy Edena tan̈y, Satana nankaratsy an̈arany Jehovah, na lazanany. Iro fan̈ontanian̈a napetraka Satana taminy Eva aby in̈y karaha tihivolan̈a fa Jehovah matity avio tsy rariny raha tsy nan̈imboany Adama ndreky Eva. Baka io, Satana tsy navavy foeky nanohitry raha nivolan̈iny Jehovah, ke nivolan̈a fa Izy mavandy. Satana nankaratsy an̈arany Jehovah. Izy nanjary “Devoly”, dikanizen̈y “pan̈aratsy.” (Jaona 8:44) Eva nino vandiny Satana ke nanjary tsy nan̈araka volan̈a Zan̈ahary eky, sady nanohitry fitondrasan̈anany. (Gen. 3:1-6) Firaka amy zioty, Satana mbala tsy voly mankaratsy an̈arany Zan̈ahary sady man̈aparitaka vandy momba Izy. Lan̈iany olo mino vandy aby zen̈y loso tsy man̈araka volan̈a Jehovah. Ke amy vahoakany Zan̈ahary, fankaratsian̈a an̈aran̈a masin̈iny Jehovah io raha farany tsy rariny sady ten̈a ratsy. Izio fototro aviany raha ratsy ndreky jaly jiaby erantany.

Faharoe, baka hahazo hatsaran̈a zavaboarinany jiaby, Jehovah tapakevitry hankamarin̈y an̈aranany ndreky han̈adio izio amy fankaratsian̈a jiaby. Amy Jehovah tsisy raha bebenizen̈y. Zen̈y mahavy izy mivolan̈a ambaka ty: ‘Zaho tsy maintsy hankamasin̈y an̈aranaka be voninahitry.’ (Ezek. 36:23) Jesosy koa nivolan̈a ino raha tôkony ho farany maventy amy panompony Jehovah tsy mivadiky jiaby lera iro mivavaka. Karaha ty hoizy: “Irarian̈a an̈aranao ho masin̈y.” (Mat. 6:9) Matetiky Baiboly mankamafy fa ten̈a raha maventy man̈amia voninahitry an̈arany Jehovah. Ty misy ohatra vitsivitsy: ‘Ameza Jehovah voninahitry man̈eva an̈aranany.’ (1 Tan. 16:29; Sal. 96:8) ‘Man̈anaova hira hideran̈a an̈aranany be voninahitry.’ (Sal. 66:2) “Han̈amia voninahitry an̈aranao zaho mandrakizay.” (Sal. 86:12) Nisy fotoan̈a, tamy tempoliny Jerosalema tao Jesosy nivolan̈a ambaka ty: “Anao Babako andan̈itry an̈y, amia voninahitry an̈aranao.” Ke ho Jehovah taminany baka tandan̈itry tan̈y: ‘Izio efa namiako voninahitry sady mbala hamiako voninahitry fo koa.’​—Jaona 12:28. a

Fahatelo, fikasan̈any Jehovah jiaby misy ifandraisany aminy an̈aranany, na lazanany. Diniha baka ty: Ino raha hiboaka izikoa fa tapitry fitsapan̈a farany, afarany Fanjakan̈a Arivo Taon̈ony Kristy? Amy fotoan̈a zen̈y, ino raha ho tsapany anjely ndreky olombelon̈o jiaby momba an̈arany Jehovah?  Hamaliantsika fan̈ontanian̈a zen̈y, alo atsika ikoran̈a momba raha aroe tafiditry amy fankamasinan̈a an̈aranany: Adihevitry momba zony Jehovah hitondra ndreky tsy fivadihanolombelon̈o. Mbala ilainy olombelon̈o koa ma han̈aporofo fa iro tsy mivadiky, amy fotoan̈a zen̈y? Ehe. Iro efa lavorary sady efa nitsapain̈y tamy lafiny jiaby. Iro hahazo fiain̈ana mandrakizay. Anjely ndreky olombelon̈o jiaby ma amy fotoan̈a zen̈y mbala mila miady hevitry momba zony Jehovah hitondra? Ehe. Iro amy fotoan̈a io efa hiray sain̈y sady han̈eky fitondrasan̈any Jehovah. Fa mbala ho ten̈a raha maventy aminolo ma an̈aran̈a Jehovah amy zen̈y?

Amy fotoan̈a zen̈y, olo jiaby efa mahay ny marin̈y momba Jehovah sady efa nankamasinin̈y tanteraka koa an̈aranany. Fa ndray zen̈y, an̈aran̈a Jehovah io mbala ho raha ten̈a maventy amy panomponany jiaby andan̈itry an̈y ndreky ambony tany eto. Nan̈ino? Fotony iro mbala hahita raha mahavarian̈a maro hataony Jehovah. Iritrireta baka ty: Hampodiny Jesosy amy Jehovah fitondrasan̈a jiaby, ke Zan̈ahary hanjary “raha jiaby aminolo jiaby.” (1 Kor. 15:28) Afaranizen̈y, olombelon̈o hahazo ‘fahafahan̈a miavaka anan̈any zanaka Zan̈ahary.’ (Rom. 8:21) Baka io, Jehovah han̈atanteraka fikasan̈anany: Hanjary fianakavian̈a araiky miray sain̈y zanakanany jiaby andan̈itry an̈y ndreky ambony tany eto.​—Efes. 1:10.

Afarany raha jiaby zen̈y, ino raha ho tsapany fianakavian̈any Jehovah andan̈itry an̈y ndreky ambony tany eto? Hay be fa atsika amy fotoan̈a zen̈y mbala han̈iry mare hidera an̈arany Jehovah. Nahazo fan̈ahy masin̈y Davida panoratra salamo ke nanoratra karaha ty: ‘Anò hoderain̈a Zan̈ahary Jehovah ... Anò hoderain̈a mandrakizay an̈aranany be voninahitry.’ (Sal. 72:18, 19) Mbala hahita antony tsara ndreky vaovao han̈anaovan̈a zen̈y atsika mandrakizay.

An̈aran̈a Jehovah io man̈ambara raha jiaby momba izy. Atsika koa fa mieritreritry momba an̈aranany io direkty fitiavan̈anany avy an̈aty jerintsika. (1 Jaona 4:8) Tsisy andra han̈adin̈asantsika fa tia atsika Jehovah matoa niasa atsika ndreky nan̈amia vidipan̈avotan̈a, avio amy rariny fitondrasan̈anany sady feno fitiavan̈a. Atsika mbala hahatsapa fitiavany Jehovah atsika fo mandrakizay. Hahaihan̈iry han̈aton̈o Babantsika io fo atsika mandrakizay, sady han̈ano hira hideran̈a an̈aranany be voninahitry.​—Sal. 73:28.