Karakory fahitanao famakian̈a Baiboly: Raha tsara sa raha mandany lera fo? Fa izio ndraiky miankin̈y amy fomba amakianao izy fo. Alo zahavantsika ino raha mety hataonao baka ho tianao tsarabe mamaky Baiboly io, avio karakory azahoanao hafizany amizio.

Mifidiana fandikanteny marin̈y tsara sady mampiasa volan̈a fampiasainolo avahizo. Izikoa anao mamaky Baiboly mampiasa volan̈a sarotro na efa taloha be tan̈y, tsy ho hainao edy dikany raha vakinao io ke anao tsy hahazo hafizany amizio. Mitadiava Baiboly mampiasa volan̈a mora azo sady marin̈y tsara, fotony zen̈y afaka manohin̈y fonao. *

Mampiasà fitaovan̈a elektroniky. Amy zioty Baiboly efa misy amy forma elektroniky. Aminy Internet ao fo anao efa afaka mamaky Baiboly sasany. Izio koa afaka kopienao aminy ordinateranao, tabletinao, na koa telefoninao. Amy sasany amindro Baiboly aby io, anao afaka direkty mizaha andininteny hafa mifandray aminy araiky vakinao io, na koa anao afaka mampiran̈a izio amy fandikanteny maromaro. Izikoa mitandren̈y mety aminao tozay mamaky, efa misy koa Baiboly nalain̈y feo. Maro olo tia mitandren̈y izio izikoa fa mandeha bisy, man̈ano asa antran̈o, na koa lera man̈ano asa hafa fa ahavitan̈a mitandren̈y raha. Tsao mba mety han̈oaranao araiky araiky amindro io?

Mampiasà fitaovan̈a fikarohan̈a. Iro fitaovan̈a fikarohan̈a aby io afaka man̈ampy anao hahazo hatsaran̈a amy famakian̈a Baiboly. Ohatra, misy sarintany ao afaka ahitanao toeran̈a aby koran̈iny andininteny vakinao, ke ho azonao sary antsain̈y tsarabe raha vakinao. Iro lahatsoratra karaha araiky ty, na fizaran̈a amy “Raha Ampianariny Baiboly” amy tranonkala jw.org koa, afaka man̈ampy anao hahay dikany raha volan̈iny Baiboly.

Ivoavoà fomba famakianao izio. Izikoa tsy tianao asesy rango amboanalohany famakianao Baiboly, mifidiana tapany araiky ten̈a mahalian̈a anao antsendriky hanampaon̈anao izy. Izikoa tianao ho hay momba iro olo malaza koran̈iny Baiboly, anao afaka mamaky amy tany misy tantarandro. Misy sasany amindro io aminy efajoro “ Alalin̈a Baiboly ke Mianara Momba Iro Olo Koran̈iny Ao.” Na koa mety asesinao mifan̈araka amy fotokevitry na fotoan̈a niboahany tantara io famakianao Baiboly. Nan̈ino izikoa man̈ohatra araiky amindro io?