Akory Han̈ampiany Baiboly Anao ho Afaka amy Jamala?
Isaka taon̈o, antapitrisany olo maty baka amy fihinanan̈a jamala na mivantan̈a zen̈y na tsy mivantan̈a. Tan̈atiny valan̈aretin̈y COVID-19 in̈y, nahaimaro fo olo tatrany problemo io. Fahendrena amy Baiboly ao nan̈ampy olo maro ho afaka tamy jamala. Izikoa anao izioty mbala miady amy fialan̈a amizio, mety han̈ampy anao koa torohevitry ao. a
Amy lahatsoratra ty
Nan̈ino atsika tokony hizaha torohevitry amy Baiboly ao, han̈ampy atsika hiala amy jamala?
Iro pikaroko aby io nahita fa matetiky baka amy raha mahazo olo amy fiain̈ana mahavy olo mihina jamala. An̈atinizen̈y olo mahatsiaro latsatokana, miady sain̈y ndreky miasaloha mare. Baiboly afaka man̈ampy anao hanan̈a finoan̈a ilain̈a, baka hahavitanao handresy iro raha sarotro mety mahavy anao tsy afaka amizio. Hita amizio ao fa anao afaka hihavan̈a tsarabe amy Zan̈ahary. (Salamo 25:14) Zan̈ahary man̈ampy, ke ho vitanao fo hiatriky problemo jiaby mety hahavy anao karaha tsy hahavita hiala amizio.—Marka 11:22-24.
Dingana efatra miorin̈y amy Baiboly han̈ampy atsika hiala amy jamala
1. Mianara raha momba Jehovah Zan̈ahary. b (Jaona 17:3) Izy niasa atsika, avio izy manan̈a angovo tsy mahailany. Fa mbala mandilatra zen̈y koa, izy Babantsika andan̈itry an̈y, ten̈a tia atsika. Izy tihihavan̈a aminao, ke izy hampiasa angovonany han̈ampian̈a anao. (Isaia 40:29-31; Jakoba 4:8) Izy mampan̈anten̈a fa han̈amia anao fiain̈ana tsara aminy amaray an̈y, izikoa anao mifidy hahazo hatsaran̈a baka amy fitiavan̈anany.—Jeremia 29:11; Jaona 3:16.
2. Mangataha fan̈ampian̈a amy Jehovah. Mivavaha amy Zan̈ahary, ke angataha izy han̈ampy anao hiala amy jamala io, baka anao hanjary ho “masin̈y [na madio] ndreky ankasitrahiny [Zan̈ahary].” (Romanina 12:1) Hampiasa fan̈ahy masin̈inany izy han̈amezan̈a anao ‘angovo mandilatrany ninolombelon̈o.” (2 Korintianina 4:7; Lioka 11:13) Angovonany io han̈ampy anao ho voly amy jamala ndreky hanan̈a “toetry vaovao”, mifan̈araka amy sitraponany.—Kolosianina 3:9, 10.
3. Finoa hevitriny Zan̈ahary sain̈inao. (Isaia 55:9) Izy han̈ampy anao ‘han̈avao angovo mibeko sain̈inaro’ ndreky han̈ampy anao han̈ova fomba fisain̈ananao. Raha zen̈y hahavy anao ho afaka amy jamala io. (Efesianina 4:23) Amy Baiboly ao ahitan̈a hevitriny Zan̈ahary, ke ten̈a mila mamaky izio isanandra anao. (Salamo 1:1-3) Mahazo hatsaran̈a maro olo, izikoa mazava tsarabe aminany raha ampianariny Baiboly. (Asan’ny Apostoly 8:30, 31) Vavolombelon̈o Jehovah mampianatra Baiboly olo tsy man̈efa. Tahominay koa anao han̈aton̈o fivorian̈anay. Mandiniky raha koran̈iny Baiboly atsika an̈y, ndreky mianatra akory han̈arehan̈a raha ampianarinizio amy fiain̈ana.
4. Mifidiana naman̈a tsara. Mety hisy vokany be aminao olo ataonao naman̈a, izikoa anao tihiala amy jamala. Mety hisy vokany tsara na ratsy aminao iro olo ataonao naman̈a. (Ohabolana 13:20) Zan̈ahary man̈amia anao naman̈a tsara maro, iro olo manompo izy aby io. Tiany koa anao hinaman̈a amindro, fotony hahatsara anao raha zen̈y. (Salamo 119:63; Romanina 1:12) Fidiana tsara fangalan̈a diandian̈a ataonao, fotony mbala mira naman̈a fo iro raha fizahavanao, raha fitandrin̈esanao na raha fivakinao. Tandrema raha jiaby mety hahavy anao tsy ho tapakevitry tsarabe han̈ano ny tsara.—Salamo 101:3; Amosa 5:14.
Andininy amy Baiboly mety han̈ampy anao hiala amy jamala
Salamo 27:10: “Ndray miala zaho iry babako ndreky mamako, Jehovah handray zaho.”
“Zaho tsiary nahay babako niteraka zaho, ke zaho mahatsiaro karaha narian̈a in̈y. Fa zaho koa fa nahay fa Jehovah Zan̈ahary io ten̈a misy ankitin̈y, avio izy ten̈a tia zaho, hitako nanjary nisy dikany fiain̈ananaka, avio zaho nanjary nahavita niala tamy jamala.”—Wilby, baka a Haïti.
Salamo 50:15: “Kahia zaho anao koa fa an̈atiny sarotro. Zaho hamonjy anao.”
“Impirimpiry andininy io man̈amia angovo zaho baka zaho tsy himpody afara, nata misy raha man̈antsory zaho himpody amizio. Jehovah man̈atanteraka fampan̈antinan̈anany fo.”—Serhiy, baka a Ukraine.
Ohabolana 3:5, 6: “Matokisa Jehovah amy fonao jiaby, fa aza mitoron̈o fahaizan̈anao. Iritrireta izy amy raha jiaby ataonao, ke hataony mandeha mahitsy fiain̈ananao.”
“Andininy aby io nahavy zaho tsy hatoky ten̈a fa hatoky Jehovah. Angovo baka aminany nahavitako nan̈ova fiain̈ananaka tsarabe.”—Michele, baka an Italie.
Isaia 41:10: “Aza mavozo, fa zaho miaraka aminao. Aza miasaloha, fa zaho Zan̈aharinao. Zaho han̈ano raha hampafatatra anao. Ia, zaho han̈ampy anao. Zaho hitana anao mare amy tan̈anaka ankavanan̈a, tan̈ana man̈ano ny rariny.”
“Niasaloha mare zaho koa fa tsy nihina jamala. Fa andininy io nan̈ampy zaho ho resy lahatra fa Zan̈ahary han̈ampy zaho handresy asalohanaka io, ary zen̈y ankitin̈y nataony.”—Andy, baka an Afriky Atsimo.
1 Korintianina 15:33: “Anaro aza man̈eky ho voafitaka: Naman̈a ratsy mandrobaka fahazaran̈a tsara.”
“Baka tamindro kamaradiko aby io nianarako nihina jamala, ke zaho nanjary zatra izio. Tsy nafaka tamy jamala zaho izikoa tsy nisoloako olo madio fitondranten̈a namako. Olo karaha zen̈y baka ten̈a tiako hatao naman̈a.”—Isaac, baka a Kenya.
2 Korintianina 7:1: “Irarian̈a atsika han̈adio ain̈intsika, baka atsika ho afaka amy raha jiaby mandoto nofotro ndreky sain̈y.”
“Volan̈a baka amy Zan̈ahary io nan̈ampy zaho tsy ho voly nifen̈y nan̈adio vatan̈anaka, hiala amy raha ratsy nahazatra zaho io, ndreky hiala raha hahavy zaho handrobaten̈a.”—Rosa, baka a Kolombia.
Filipianina 4:13: “Baka aminy araiky man̈amia angovo zaho in̈y mahavy zaho manan̈a angovo hindesin̈y hiatriky karazandraha jiaby.”
“Haiko fa izikoa angovonaka tompiny fo, zaho tsy nafaka tamy jamala. Ke zaho nivavaka tamy Jehovah nangataka izy han̈ampy zaho. Namiany angovo nilaiko zaho.”—Patrizia, baka an Italie.
Tantaranolo efa nafaka tamy jamala nohony fan̈ampiany Baiboly
Joseph Ehrenbogen tombo taminy hakafirianan̈a, figiahan̈a toaka ndreky nihina lobaka, avio jamala isankarazany. Efa impirimpiry izy tseky naty, fotony efa dila loatra fihinanany izio. Nisy andininy araiky tamy Baiboly ten̈a nahitany fa izy mbala hahavita miova. Vakia tantaranany amy lahatsoratra “Lasa Nahay Nanaja Tena sy Nanaja Vehivavy Aho.”
Dmitry Korshunov taloha nandivoziny toaka, fa nifen̈y angovo jiaby izy baka ho afaka tamizio. Izikoa tianao ho hay ino raha nan̈ampy izy, zahava video “Tsy Tiako Foeky Fiain̈ananaka Taloha.”
Baiboly ma tsy man̈omba olo handeha dokotera baka mahazo fitahan̈a hialan̈a amy jamala?
Baiboly man̈omba olo handeha hitaha amy dokotera. Koran̈inizio ao: “Tsy olo salama mila dokotera fa olo marary.” (Matio 9:12) Karaha nataony Foibe Amerikain Miady amy Fihinanan̈a Jamala mivolan̈a karaha ty: “Aretimpatatra izio, ke tsy vitany zaho tihiala fo fialan̈a aminany io.” Fa Zan̈ahary man̈amia angovo farany fatatra, mandilatra fan̈irian̈anolo jiaby. Ndray zen̈y, olo araiky koa tihiala amy jamala efa tsara izy koa fa man̈araka torohevitriny Baiboly. Fa izy mbala mila mandeha dokotera mahay raha momba aretin̈inany io fo. c Ohatra, karaha ty nambarany Allen: “Tamy zaho niala toaka, ten̈a narary mare zaho. Fa zaho ndray efa nahazo fan̈ampian̈a baka tamy Baiboly, haiko fa zaho mbala mila mandeha dokotera koa.”
Baiboly ma tsy man̈omba olo hihina aodiny dokotera?
Baiboly man̈omba olo hihina aodiny dokotera. Koran̈inizio ao fa toaka io mety ampiasain̈a hitahan̈a aretin̈y na hampakirikiry tehokonolo efa miady fahin̈ana. (Ohabolana 31:6; 1 Timoty 5:23) Fa izio koa atao be loatra, izio mety hanjary han̈andevo foeky. Ke zen̈y aviany atsika mila man̈araka tsarabe daoziny aody tokony ahanin̈y ndreky man̈araka tsarabe raha volan̈iny dokotera izikoa fa mampiasa aodiny dokotera.—Ohabolana 22:3.
a Lahatsoratra ty ndray mikoran̈a fialan̈a amy jamala, torohevitry baka amy Baiboly ato mety harehanolo tihiala amy toaka, lobaka, fihinankanin̈y dila loatra, fizahavan̈a sary vetaveta ndreky fampiasan̈a tranonkala fifaneraseran̈a dila loatra.
b Jehovah io an̈aran̈any Zan̈ahary. (Salamo 83:18) Zahava lahatsoratra “Azovy ma Jehovah?”
c Maro koa lopitaly ndreky tany mety handihanan̈a mety han̈ampy olo tihiala amy jamala. Anjarany tsiaraikiaraiky mifidy fitahan̈a ten̈a mety aminany.—Ohabolana 14:15.
Mety ho Tianao Koa
SARISARY
Aza Robatin̈y amy Sigarety Fiain̈ananao
Maro olo mifima sigarety na misesitry sigarety elektroniky. Fa misy ndraiky olo sasany efa niala, fa mbala misy koa miady mare. Nan̈ino? Ten̈a ratsy mare ma mifima?
RAHA MOMBA ZAHAY
Mangataka Vangian̈a
Miaraha mandiniky fan̈ontanian̈a amy Baiboly aminay, na mianara raha maromaro momba Vavolombelon̈o Jehovah.
