Yaka yipite pacangakaŵapa, acinangolo ni ŵaŵaliji ŵandanda kwasalila ŵanace ŵawo pakwamba yagonana kuti ayimanyilileje cenene. Nambosoni ŵasalilaga yindu mwakamulana ni msingu wa ŵanacewo.

Moŵa agano yeleyi yicenjile mnope. Buku jine jatite, “Ŵanace akusatanda kumanyilila yakwamba kugonana mnopemnope ali ŵacinandipile, soni mafidiyo gakulosya ŵandu ali mgonana ni ŵanace gakutupilatupila.” (The Lolita Effect) Ana yindu yeleyi mpaka yakamucisye ŵanace kapena kwawulasya?

Yakuŵagula yili palipose. Jwamkongwe jwine lina lyakwe Deborah Roffman jwalembile m’buku jakwe kuti “yakusaŵecetana ŵandu, yamalonda, m’mafilimu, m’mabuku, mu nyimbo, m’mapologalamu ga pa TV, m’mautenga, m’mang’asi, soni m’yikwangwani mugumbele ni yiwulili soni maloŵe gakuŵagula. Nambosoni ŵandu ŵane akusanonyela kuŵika yakuŵagulayi m’mafoni, ni m’makompyuta. Yeleyi yikusatendekasya ŵanace ganisya kuti gonana . . . kuli kwakusosekwa mnope kupunda cilicose.”—Talk to Me First.

Ŵamalonda akujigala nawo mbali. Jemanjaji akusasumisya yakuwala ya ŵanace yakulimbikasya gonana, yayili mpela kwalondecesya ŵanace yagonana m’litala lyangaŵajilwa. Buku jine jasasile kuti, “Ŵamalonda akusamanyilila kuti ŵanace akusasacilila kola yindu yakulandana ni ya acimjawo. Yeleyi yikusapa upile wakupanganya yindu yakwakopa ŵanacewo.” Bukuji jasasilesoni kuti, “Cakulinga ca ŵamalondaŵa ngaŵa kwajiganya ŵanace yagonana” nambo “cili kwatendekasya kuti asumeje yindu yasambano.”—So Sexy So Soon.

Akamulicisyeje masengo yalijiganyisye. Kumanyilila yayikusatendekwa kuti galimoto jijende kuli kwakulekangana ni kujijendesya cenene. M’yoyosoni mundu jwakusagamba kumanyilila yagonana ali jwakulekangana ni mundu jwakusayimanyilila cenene ni kombola kusagula kutenda yakuŵajilwa.

Songa jakusosekwa mnope: Moŵa agano, kupunda ni kala kose, akusosekwa kwakamucisya ŵanace ŵawo kwiganya ‘macili gawo gakumanyilila’ kuti akomboleje ‘kulekanganya cambone ni cakusakala.’—Ahebeli 5:14.

Ŵakamucisyeje ŵanace ŵawo. Mwangasamala kandu kuti mpaka yiŵe yakutesya sooni, nambo kwalondecesya ŵanace ŵawo pakwamba yagonana uli ukumu wawo.—Lilemba lyakamucisya: Miyambo 22:6.

Akamsalilaga yindu yejinji pandaŵi jimo. M’malo mwakumsalila mwanace jwawo yosope yakwamba gonana ndaŵi jimo, mpaka apatileje upile wakumsalila panandipanandi pakwenda yimpepe kapena pakukamula masengo ga pamlango. Pakusaka kumkamucisya mwanace jwawo, am’wusyeje yiwusyo yakumtendekasya kusala nganisyo syakwe. Mwambone, pakwenda najo naga akumsimonga kuti akulolecesya yikwangwani yakola yiwulili yangaŵajilwa, akam’wusyaga kuti, “Ligongo cici m’mweji mkusakola lung’wanu mnope ni yindu mpela yeleyi?” M’malo mwakwe am’wusyeje kuti, “Mkuganisya kuti ligongo cici ŵamalondaŵa akusanonyela kamulicisya masengo yindu mpela yeleyi?” Pambesi pakwanga ciwusyoci, mpaka am’wusyesoni kuti, “Nambi m‘mwejo mkuganisya wuli?” —Lilemba lyakamucisya: Deuteronomo 6:6, 7.

Amsalileje yindu mwakamulana ni msingu wakwe. Acinangolo mpaka ŵasalileje ŵanace ŵawo ŵanganatande sukulu mena ga yiŵalo yosope ya pacilu cawo. Nambosoni mpaka ŵasalileje yakusosekwa kutenda kuti alicenjele kwa ŵandu ŵampaka ŵatende yacipongwe. Pakukula, mpaka ŵasalilesoni masengo ga yiŵalo yakusisika. Pakwikanaga kuti amasile msingu, aŵeje ali mkupikanicisya yosope pakwamba yagonana.

Atandeje ni kwajiganya ndamo syambone. Atandeje kumjiganya mwanace ali jwacinandipile ndamo syambone mpela kulupicika, kuŵa jwacilungamo, soni kucimbicisya. Yeleyi, yicakamucisya wawojo kuti atagulilane najo mwagopoka ngani syakwayana ni gonana. Ŵasalileje mwangasisa yakusayiwona kuti yili yakuŵajilwa. Mwambone, mpaka ŵasalile ŵanace ŵawo kuti gonana mkanajinjile mwiŵasa kuli kwakulemweceka. Mpaka ŵasalilesoni ligongo lyakwe kuli kwakulemweceka soni kwakuwulasya. Buku jine jasasile kuti, “Kwa ŵacinyamata ŵakusamanyilila kuti acinangolo ŵawo ŵangasaka kuti ŵacinyamata atendeje yagonana, yikusaŵa yakusawusya kuti atende yagonanayo.”—Beyond the Big Talk.

Aŵeje cisyasyo kwa ŵanace ŵawo. Atendeje yindu yakamulana ni ndamo syakwajiganya ŵanacewo. Mwambone, ana akusasangalala ni ngwelegulo syakutukana, kuwala mwangaŵajilwa, kapena kwakopa ŵane? Kutenda yeleyi mpaka kujonanje ndamo syambone syakusiŵajiganya ŵanace ŵawo.—Lilemba lyakamucisya: Aloma 2:21.

Amsalileje umbone wakwe. Kugonana uli mtuka wakutyocela kwa Mlungu, soni mpaka kuŵe kwakusangalasya naga kukutendekwa kwa ŵandu ŵali paulombelape. (Miyambo 5:18, 19) Amkamucisye mwanace jwawo kumanyilila kuti jiciyika ndaŵi jakuti nombe najo cacisangalala ni mtukawu.—1 Timoteo 1:18, 19.