Ligongo Chichi Ŵandu Ngakusachimbichisya Umi?

ALOLELE

LIGONGO CHICHI KUWUCHIMBICHISYA UMI KULI KWAKUSOSEKWA?

Naga akusatenda yindu yakusakala yampaka yijonanje umi wawo kapena kuŵika pangosi umi wa ŵane nikuti pelepo akusalosya kuti ngakusawuchimbichisya umi.

Kukwemba soona kukusatandisya ulwele wa kansa soni kukusatendekasya kuti chilu chilepeleje kulimbana ni ulwelewu. Ŵandu ŵajinji ŵakusawa ni ulwele wa kansa yikusaŵa kuti jemanjajo ŵakwembaga soona kapena ŵatamaga ni mundu jwakusakwemba.
Chaka chilichose ŵandu ŵajinji akusalagasika mnope nganisyo ligongo lya ndamo jakwagombela ni uti ŵandu ŵajinji. Lipoti line lyakutyochela ku Unifesite ja Stanford ku United States lyasasile kuti: “Yindu yine yatwapatile yili yakuti, ŵanache ŵane ŵaŵakulupwiche pandaŵi jele achimjawo ŵagombelaga kusukulu, akusaŵa ali mkulaga ni nganisyo soni kuyikumbuchilape kwa yaka yejinji yaŵayiweniyo.”
Ŵandu ŵakusajendesya galimoto ali akolelwe kapena kumwa mitela jakusokonasya mtwe akusatendekasya kuti ŵandu ŵakwenda musewu umi wawo uŵe pangosi. Naga ŵandu akutenda yindu yakulosya kuti ngakusamala yaumi, akusiŵawulasya ŵandu ŵangaleŵa.

YAMPAKA ATENDE PAKULOSYA KUTI AKUSACHIMBICHISYA UMI

Achisamalileje chilu chawo. Mpaka atende chenene kuleka kwemba soona, kumwa mnope ukana, kapena kukamulichisya masengo mitela jakusokonasya mtwe. Naga akusatenda yindu yeleyi akusalosya kuti ngakusawuchimbichisya umi wawo, wa ŵandu ŵane kupwatikaposoni ŵandu ŵa m’liŵasa lyawo.

“Kwende tuliswejesye. Tutyosye chilichose chakusakasya chilu.”—2 Akolinto 7:1.

Amanyilileje yampaka yitendekasye ngosi. Kuti aŵambale ngosi akusosekwa kulinganya yosope yayijonasiche pa nyumba jawo soni aŵeje ŵachasa. Ajendesyeje chenene galimoto kapena njinga jawo ja moto soni alolechesyeje kuti nganijikola futo jilijose. Akakundaga kuti ŵandu ŵane ŵakanganichisyeje kutenda maseŵela gampaka gawulasye kapena kwawulaga kwene.

“Naga mtaŵile nyumba jasambano, mkusosekwa kutaŵasoni kalutenje pamsakasa pakwe. Mkusosekwa kutenda yeleyi ni chakulinga chakuti liŵasa lyenu likakola magambo ga myasi naga mundu jwine agwile kutyochela pamsakasapo.”—Detulonomo 22:8. a

Ŵatendeleje ŵane yindu yambone. Mpaka tulosye kuti tukusachimbichisya umi naga tukusitwatendela yindu yambone ŵandu mwangajigalila mtundu wawo, chilambo chakutyochela, chinga ali ŵakulaga kapena ŵakusichila, soni ŵalijiganye kapena ŵangalijiganya. Tukusosekwa kumanyilila kuti lusagu soni uŵengani yili yindu yekulungwa yayikusatendekasya kuti pachilambopa patendekweje yachiwawa soni ngondo.

“Pasikati penu pakaŵa kuŵengana, kutumbililana, kupya mtima, kukalipa soni maloŵe gachipongwe. Soni mtyosye chindu chine chilichose chakusakala. Nambo mŵeje ŵambone kwa ŵane.”—Aefeso 4:31, 32.

YATUKUTENDA ŴA MBONI SYA YEHOFA PAKULOSYA KUTI TUKUSACHIMBICHISYA UMI

Ŵa Mboni sya Yehofa akusiŵajiganya ŵane kuti achisamalileje chilu chawo soni akoleje ndamo syambone. Pologalamu jakwajiganya ŵandu Baibulo jikamuchisye ŵandu ŵajinji kuti aleche ndamo syakusakala syasikajonasile umi wawo.

Tukusapikanila soni kukamulichisya masengo malangiso gakuŵambala ngosi patukukamula masengo ga yakutaŵataŵa. Tukusajiganya ŵandu ŵakusakamula masengo mwakulipeleka kuti akomboleje kuŵambala ngosi pakutaŵa malo gakutendela misongano soni gatukusakamulichisya masengo pakwajiganya ŵandu Baibulo. Ndaŵi syosope tukusalolasoni yindu yatwataŵile naga yikukamulana ni malamusi gakwayana ni kuŵambala ngosi.

Tukusakamuchisya ŵandu ŵakwayidwe ni ngosi syachilengedwe. Mu chaka cha 2022, pachilambo chosope patendekwe ngosi syachilengedwe syakogoya mnope chiŵandika 200. Myoyo twakamulichisye masengo mbiya syakusapeleka ŵa Mboni sya Yehofa mwakusaka kwawo syakwana madola chiŵandika 12 miliyoni pakwakamuchisya ŵandu ŵaŵakwayidwe ni ngosisi.

Pawagambile kutanda mlili wa Ebola ku West Africa mu (2014) soni ku Democratic Republic of Congo mu (2018), twajiganyisye ŵandu yampaka atende kuti aŵambale kuwandisya ulwele wakogoyawu. Twatumisye abale kuti akaŵechete ngani ku gulu ja ŵandu ja mtwe wakuti “Kupikanila Kukusakulupusya Umi.” Twatesilesoni yakuti pamalo getu gatukusatendelapo misongano paŵe yindu yampaka tukamulichisyeje masengo pakunaŵa myala. Twakamuchisyagasoni ŵandu kumanyilila umbone wa kunaŵa myala soni twasalilaga yindu yine yampaka atende kuti alichenjele ku ulwelewu.

Ku Sierra Leone, ŵakugulusya ngani ŵane pawayilesi ŵayamichile mnope ŵa Mboni sya Yehofa ligongo lyakwakamuchisya Ŵamboni achimjawo soni ŵandu ŵane ŵanganaŵa Ŵamboni kumanyilila yampaka atende kuti aŵambale ulwele wa Ebola.

Malo gaŵakamulichisyaga masengo pakunaŵa myala pa Nyumba ja Uchimwene ku Liberia mu 2014 pandaŵi ja m’lili wa Ebola

a Kalakala ku Middle East, ŵandu ŵakuyaga mnope malangiso gelega ligongo nganasakaga kuti ŵandu wa m’liŵasa lyawo soni achimjawo awulale.

AJIMUCHE!