BUKU ja Ngani Syambone ja Mateyu jikusasala kuti, “Yesu ŵajinjile m’nyumba ja Mlungu ni kwatopola wosope ŵaŵasumisyaga soni kusuma yindu m’nyumba ja Mlungujo. Jwalakwe ŵapitikwisye matebulo ga ŵakucenga mbiya soni mabenci ga ŵakusumisya ngunda. Ni ŵasasile kuti, ‘Malemba gakusati, “Nyumba jangu jicikolanjikwa kuti nyumba ja mapopelo,” nambo jemanja mkujisusya mbanga ja ŵawiyi.’”—Mat. 21:12, 13.

Yakulemba yakala yikusalosya kuti ŵamalondaŵa ŵajiŵilaga ŵandu mwakwasumisya yindu pamtengo wakwela mnope. Mwambone, yakulemba yine yalosisye yayatendekwe m’yaka 100 yandanda pele mtengo wa njuŵa siŵili wakwesile mnope ni kwika pa dinali jagolidi. Mundu kuti apate mbiya syelesi ŵasosekwaga kamula masengo kwa masiku 25. Njuŵa kapena ngunda yaliji yilango yele ŵandu ŵakulagape ni ŵaŵakundidwaga kuti apeleceje mpela mbopesi, nambo mtengo wakwewo waliji wakwela mnope mwamti jemanjaji ngamkanakombolaga kusuma. (Lev. 1:14; 5:7; 12:6-8) Mwalimu jwine lina lyakwe Simeon ben Gamaliel, ŵatumbile mnope ni yeleyi mwamti ŵanandiye yindu yaŵasosekwaga kupeleka mbopesi Ayudawo. Mwangacelewa, mtengo wa njuŵa siŵili watulwice mnope.

Mwakamulana ni yatusasile penaniyi, Yesu nganalemwesya kwakolanga ŵamalonda ŵaŵasumisyaga yindu m’nyumba ja Mlungu kuti “ŵawiyi” ligongo ŵaliji ŵakutunduka soni ŵakulinonyela.