M’Baibulo, liloŵe lisyesyene lyacigiliki lyalikusagopolela kuti “kulupicika” likusagopolelasoni kuti “cindu cakusosekwa mnope.” Nambosoni mpaka ligopolele kuti cindu cakusalala cacikusosekwa kucinyakula mwakuŵajilwa.

Aklistu akusagawona maloŵe ga ndumetume Paulo gakuti, “Tusimicisye kutenda yosope mwacilungamo,” kuŵa gakusosekwa mnope. Ana maloŵega gakusapwatikapo cici?

Ŵandu ŵajinji akusalilolela paligalasi kundaŵi kulikose mkanajawule kukwenda. Ligongo cici akusatenda yeleyi? Akusasaka kuwoneka cenene. Nambo pana cinecakwe cakusosekwa mnope kupunda kuŵa jwakuwoneka cenene. Kusala yisyene, umundu wetu wamkati mpaka usalalisye kapena kusakasya kawonece ketu kakusa.

Maloŵe ga Mlungu gakusasala mwakupikanika cenene kuti twapagwile ni mtima wakusacilila kutenda yakusakala. Lilemba lya Genesis 8:21 likusati, “Nganisyo sya ŵandu sili syakusakala kutandila paucanda wawo.” Kuti tuŵe ŵakulupicika, tukusosekwa kulimbana ni yitendo yetu yakupagwa nayo yaulemwa. Ndumetume Paulo ŵapelecele umboni pangani jakulimbana ni yitendo ya ulemwa yakupagwa nayo, ŵatite, “Mtima wangu ukusasangalala ni malamusi ga Mlungu, nambo mumtima mwangu ngusawona lilamusi line lilikusalimbana ni lilamusi line lilikusajiticisya mtima wangu. Lilamusi lyelelo lindesile kuŵa kapolo jwa lilamusi lya ulemwa lilili m’cilu mwangu.”—Aroma 7:22, 23.

Mwambone, naga mtima wetu ukusatucisya kuti tutende cakusakala, tukusosekwa kana mwakulimba mtima kutenda yindu mwangakulupicika. Ngatukusasaka kuŵa kapolo jwa yakusaka ya mtima wetu. Nambope, tukusosekwa kusagula yakutenda pangani jelejo. Naga tusagwile kana kutenda cakusakala, mpaka tujendelecele kuŵa ŵakulupicika mwangasamala kandu kuti ŵandu kucilamboku akusatenda yangakulupicika.

Kuti tuŵe ŵakulupicika, tukusosekwa kola ndamo syakuŵajilwa. Yakutesya canasa yili yakuti, ŵandu ŵajinji akusamalila ndaŵi pakuganicisya ya kawonece kawo kulekangana ni ndaŵi jakusamalila pakuganicisya ndamo syawo syambone. Yakuyicisya yakwe, akusasagula kutenda yindu yakamulana ni yakusakayo. Buku jakuti The (Honest) Truth About Dishonesty jatite, “Kuli kulilambusya kuliwona wasyegwe kuti uli jwakulupicika.” Nambo, ana pana cilicose campaka citukamucisye kumanyilila ndamo syetu? Elo cipali.

Ŵandu ŵajinji ajiweni kuti Baibulo jili jakamucisya pa ngani jeleji. Pangali cilicose campaka citukamucisye kola ndamo syambone kulengana ni Baibulo. (Salimo 19:7) Baibulo jikusatukamucisya pa ngani sya umi wa liŵasa, masengo, ndamo syambone, soni pakulambila. Baibulo jiŵele jili mkamucisya ŵandu kwa ndaŵi jelewu. Malamusi gakwe gakusigakamucisya ŵandu ŵamitundu josope. Naga tukuŵalanga Baibulo soni kuganicisya yajikusalayo, mpaka tuwujiganye mtima wetu kuti tuŵe ŵakulupicika soni ŵalunda.

 Nambope, pana yejinji yampaka tutende kuti tumalane ni ungakulupicika mmalo mwakwamba kumanyilila usyesyene wa m’Baibulo. Tukusosekwa kumbucila kuti tukutama m’cilambo cakusakala cacikusatulimbikasya kujigalila yitendo yakwe yakusakala. Ni ligongo lyakwe tukusosekwa kupopela kwa Mlungu kuti atukamucisye. (Afilipi 4:6, 7, 13) Mwakutenda yeleyi, tucipakombola kana kutenda yakusakala ni kuŵa ŵakulupicika pa yindu yosope.

Ligongo lyakutenda yindu mwacilungamo, Hitoshi, jwatumsasile mu ngani jandanda jila, yindu yamjendele cenene. Apano jwalakwe ŵalembedwe masengo ni mundu jwine jwakusasaka ŵandu ŵacilungamo. Hitoshi jwatite, “Ndili jwakusangalala ligongo lyakuti napatile masengo gagakusangamucisya kwendelecela kola cikumbumtima ceswela.”

Ŵanesoni ayiweni yeleyi kuŵa yisyesyene. Kwende tulole yisyasyo ya ŵandu ŵane ŵele pakamulicisya masengo songa ja m’Baibulo jajikusati “tusimicisye kutenda yosope mwacilungamo,” jakamucisye mnope.

• Tukusaŵa ni Cikumbumtima Ceswela

  “Nalesile sukulu ndili ngwete yaka 13, ni cakulinga cakusaka kwinjila mlikuga lya ŵandu ŵawiyi. Yakuyicisya yakwe, yindu yejinji nayipatile m’litala lyangali cilungamo. Pali papite ndaŵi, nalombedwe. Ŵamkwangu ni une twatandite kulijiganya Baibulo ni ŵa Mboni sya Yehofa. M’yoyo twalijiganyisye kuti Yehofa * Mlungu akusaŵengana ni mteto ŵangakulupicika, ni twasagwile kucenga umi wetu. Mu 1990 twalipelece kwa Yehofa mwakubatiswa mpela Mboni sya Yehofa.—Miyambo 6:16-19.

  “Kalakala, m’nyumba mwangu mwagumbele ni ndundu sya wiyi, nambo apano ndili jwagopoka ku yitendo yakusakala soni ngwete cikumbumtima ceswela. Pangukumbucila yanatendaga munyuma, ngusayamicila mnope Yehofa ligongo lya canasa cakwe cekulungwa. Ngusaŵa jwakusangalala mnope pangugona lisiku lililyose ndili mkumanyilila kuti Yehofa ali jwakusangalala ni une.”—Cheryl, Ireland.

  “Abwana ŵangu paŵamanyilile kuti nganile kupocela mbiya sya kasitomala juŵasakaga kuti ndende yacinyengo, ŵaŵecete kuti: ‘Mlungu jwenu ni jwamtendekasisye kuti m’ŵe mundu jwakulupicika! Uli upile wekulungwa mnope kuŵa ni m’mwejo pa kampani jetu jino.’ Kuŵa jwakulupicika pa yindu yosope kukusangamucisya kola cikumbumtima ceswela kwa Yehofa Mlungu. Kukusangamucisyasoni kuti ngomboleje kulikamucisya liŵasa lyangu soni ŵane kuŵasoni ŵakulupicika.”—Sonny, Hong Kong.

• Tukusaŵa ni Mtendele Wamumtima

  “Ngusingamula masengo ku banki jine jekulungwa mpela jwaŵili kwa bwana jwamkulungwa. Pamasengo gelega, kuŵa mundu jwakusicila kuli kwakusosekwa mnope kulekangana ni kuŵa jwakulupicika. Ŵandu akusakola nganisyo syakuti, pangali cakulemweceka cilicose ni kuŵa jwangakulupicika panandi naga yikamucisya kuti usicile.’ Nambo, ligongo lyakuŵa jwakulupicika, yingamucisye kuti ngole mtendele wamumtima. Ndili jwakusimicisya mtima kwendelecela kuŵa jwakulupicika atamose yindu yisawusye wuli. Mabwana gangu gakusamanyilila kuti ngaŵa mkwalambusya kapena kwalambucisya.”—Tom, United States.

• Ŵandu Akusatucimbicisya

  “Jwakusatulolela pamasengo jwasalile kuti mbecete yaunami kwa abwana ŵakulungwa pakwamba ya yindu yine yayasoŵile ku masengo kwetu, nambo nakanile. Mundu jwaŵajiŵilejo paŵamanyice, abwanawo ŵayamicile mnope ligongo lyakulupicika kwangu. Pakusasosekwa kulimba mtima kuti uŵe jwakulupicika m’cilambo ca ŵandu ŵangakulupicikaci. Naga tukuŵa ŵakulupicika, pambesi pakwe ŵandu akusatukulupilila soni kutucimbicisya.”—Kaori, Japan.

Naga tuli ŵakulupicika tukusaŵa ni cikumbumtima ceswela, mtendele wa mumtima, soni ŵandu akusatucimbicisya. Yeleyi yikulosya kuti kulupicika kuli kwakusosekwa mnope. Ana ngakukamulana ni maloŵe gelega?