1. Ana Aklistu akusalandana ni chitela m’litala lyapi? (Alole chiwulili.)

 MU YIŴECHETO yine mwana maloŵe gakuti, “Mbungo jangatemanyaga chitela chachikusapindika pajikupuga mbungojo.” Maloŵega gakulosya kuti kundilila kapena kuti kunda kupindika kukusakamuchisya yitela yine kuti yikatemangukaga. Nombe Aklistu kuti apitilisye kuŵa ŵakulimba mwausimu, akusasosekwa kuŵa ŵakundilila soni ŵakoseka kupindika. Ana mpaka tutende yeleyi chamtuli? Tukusasosekwa kuŵa ŵakundilila kuti tujisyoŵelele ndamo jinejakwe yindu payichenjile paumi wetu. Nambosoni tukusasosekwa kuŵa ŵakundilila mwakuchimbichisya nganisyo soni yakusagula ya ŵane.

2. Ana ni ndamo syapi syampaka situkamuchisye yindu payichenjile paumi wetu? Ana chitukambilane chichi munganiji?

² Mpela ŵakutumichila ŵa Yehofa, tukusosekwa kuŵa ŵakupikana ya ŵane. Tukusosekwasoni kuŵa ŵakulinandiya soni ŵachanasa. Munganiji chitukambilane yasitite ndamosi pakwakamuchisya Aklistu ŵane kuti yindu yipitilisye kwajendela chenene atamose payachenjile yindu paumi wawo. Chitulolesoni yampaka sijile ndamosi pakutukamuchisya m’weji. Nambo chandanda kwende tukambilane ya Yehofa soni Yesu ŵali yisyasyo yambone mnope pangani jakupikana ya ŵane.

3. Ana pana maumboni gapi gakulosya kuti Yehofa akusapikana ya ŵane?

³ M’Baibulo, Yehofa akusakolanjidwa kuti ali ‘jwamachili’ kapena kuti lwala ligongo lyakuti jwalakwe ali jwakulimbangana soni jwangatenganyika. (Deut. 32:4) Atamose yili myoyo, jwalakwe akusapikana ya ŵane. Yindu payachenjile pachilambopa, Yehofa jwaŵele jwakundilila mwakulolechesya kuti yindu yosope yajwasasile kuti yichitendekwa chiyikwanilichikwe. Yehofa jwatupanganyisye  mu chiwanichisyo chakwe kuti tukomboleje kuŵa ŵakundilila yindu payichenjile paumi wetu. Jwalakwe jwatupele malangiso ga m’Baibulo gakupikanika chenene gagakusatukamuchisya kuti tusaguleje yindu mwalunda atamose tuli tusimene ni yakusawusya yamtuli. Chisyasyo cha Yehofa soni malangiso gajwatupele yikusatukamuchisya kumanyilila kuti jwalakwe akusapikana ya ŵane atamose kuti ali ‘jwamachili.’

4. Asale chisyasyo chimo chakulosya kuti Yehofa ali jwakundilila. (Lefitiko 5:7, 11)

⁴ Yehofa akusatendaga yindu mwamlama soni ali jwakundilila. Jwalakwe jwangakanganichila nganisyo syakwe pakutenda yindu ni ŵandu. Mwachisyasyo, aganichisye muŵatendelaga yindu ni Ayisalayeli pangani jakundilila kapena kupikana ya ŵane. Jwalakwe nganajembecheyaga kuti Ayisalayeli wosope chapelecheje mbopesi syakulandana. Mwamti payakutendekwa yine, jwalakwe jwamkundaga mundu jwalijose kupeleka mbopesi mwakamulana ni mwayiŵelele yindu paumi wakwe.—Aŵalanje Lefitiko 5:7, 11.

5. Apeleche chisyasyo chakulosya kuti Yehofa ali jwakulinandiya soni jwachanasa.

⁵ Ligongo lyakuti Yehofa ali jwakulinandiya soni jwachanasa, yikusamtendekasya jwalakwe kupikana ya ŵane. Mwachisyasyo, Yehofa jwalosisye kuti ali jwakulinandiya pajwasigele panandi kwajonanga ŵandu ŵakusakala ŵaŵatamaga mumsinda wa Sodomu. Yehofa ŵalitumile lilayika lyakwe kuti likamsalile mundu jwakulupichika Loti kuti atilile kumadela ga kumatumbi. Nambo Loti jwajogopaga kutilila kumatumbiko. Mwamti jwaŵendile kuti amkunde jwalakwejo ni liŵasa lyakwe kutilila ku Sowali kakaliji katawuni kamwana kele Yehofa jwalinganyisyesoni yakukajonanga. Apatu Yehofa akakomboleche kumkanganichisya Loti kuti agambe kutenda yasalilidwe. Nambo Yehofa ŵamkundile Loti kutilila ku Sowali atamose kuti jwasosekwaga kuchenga nganisyo syakwe syakukajonanga katawunika. (Gen. 19:18-22) Pali papitile yaka yejinji, Yehofa jwatendele chanasa ŵandu ŵa mumsinda wa Ninefe. Jwalakwe ŵamtumisye jwakulochesya Yona kuti akamanyisye ŵandu kuti msindawo yimpepe ni ŵanduwo chajonanjidwe. Nambo ŵandu ŵa ku Ninefe paŵagalawiche mitima jawo, Yehofa ŵakululuchile mwamti nganawujonanga msindawo.—Yon. 3:1, 10; 4:10, 11.

6. Ana Yesu jwalosisye chamtuli kuti ŵajigalile ndamo ja Yehofa jakupikana ya ŵane?

⁶ Yesu jwajigalile ndamo ja Yehofa jakupikana ya ŵane kapena kuti jakundilila. Jwalakwe ŵamtumisye pachilambopa kuti alalichile “kwa ngondolo syesokonechele sya m’nyumba ja Yisalayeli.” Nambo jwalakwe jwalosisye ndamo jakundilila pakukamula utumikiwu. Pachakutendekwa chine, jwamkongwe jwanganaŵa Myisalayeli jwamŵendile Yesu kuti amposye msikana jwakwe ‘juŵakamwilwe ni chiŵanda.’ Yesu chamkamwile chanasa mwamti ŵamposisye msikanajo. (Mat. 15:21-28) Aganichisyesoni ya chisyasyo chine achi: Kundanda kwa utumiki wakwe, Yesu jwasasile kuti, “jwalijose jwakungana une . . . , unesoni chinjimkana.” (Mat. 10:33) Nambo ana jwalakwe ŵamkanile Petulo juŵamkanile jwalakwe katatu kose? Iyayi. Yesu jwayiweni kuti Petulo agalawiche mtima soni kuti akwete chikulupi. Ali ajimwiche ku chiwa, Yesu jwawonechele kwa Petulo yayalosisye  kuti jwalakwe ŵamkululuchile Petulo soni kuti ŵamnonyelaga.—Luk. 24:33, 34.

7. Mwakamulana ni Afilipi 4:5, ana tukusasaka kuti ŵane atuwoneje mwamtuli?

⁷ Tuyiweni kuti Yehofa soni Yesu akusakundilila mwakupikana ya ŵane. Nambi uli pakwamba ya m’weji? Yehofa akusasaka kuti m’wejisoni tuŵeje ŵakundilila. (Aŵalanje Afilipi 4:5.) Mwamti ndaŵi syosope yitendo yetu yikusasosekwa yilosyeje kuti tukusapikana ya ŵane. Mpaka tuliwusyeje kuti: ‘Ana ŵandu akusambona kuti ndili mundu jwakupikana ya ŵane soni jwakundilila? Kapena akusambona kuti ndili mundu jwakanilila nganisyo syangu, jwakalalisya kapena jwangusagamba kutenda yangusaka? Ana ngusachisyaga ŵane kuti atendeje yindu ndendende mpela mwangatendele unejo? Kapena ngusapikanila nganisyo sya ŵane ni kutenda yakusaka jemanjajo naga yili yakomboleka?’ Patukulosya mnope kuti tuli ŵakundilila tukusaŵa kuti tukumsyasya Yehofa ni Yesu. Kwende tulole yakutendekwa yiŵili yayikusasaka kundilila. Yindu yakwe yili payichenjile yindu paumi wetu soni ŵane papeleche nganisyo syakutindana ni syetu.

8. Ana chichi champaka chitukamuchisye kuti tuŵe ŵakundilila yindu payichenjile paumi wetu? (Alole maloŵe ga mwiŵanda.)

⁸ Kuti tuŵe ŵakundilila yindu payichenjile paumi wetu tukusasosekwa kuŵa ŵakoseka kuchenga kaganisye ketu. Yindu payichenjile paumi wetu mpaka tusimane ni yakusawusya yanganituyijembecheyaga. Mwachisyasyo, kulwala, kusokonechela kwa kajende ka chipanje soni yandale m’chilambo mpaka yisokonasye umi wetu. (Jwak. 9:11; 1 Akoli. 7:31) Atamose kuchenga kwa utumiki wetu mpaka kukwaye umi wetu. Chinga tusimene ni yakusawusya yamtuli, mpaka tukombole kujisyoŵelela ndamo jasambanojo naga tukukuya yindu mcheche yakuyichisyayi: (1) kwitichisya kuti yindu yichenjile, (2) kuganichisya yindu yamsogolo mmalo mwaganichisya yamunyuma, (3) kuganichisya yindu yawukukombola kutenda, soni (4) kwatendela ŵane yindu yambone. b Kwende tulole yisyasyo yakutendekwa yisyesyene yayikulosya kuti kukuya yindu mchecheyi kuli kwakamuchisya mnope.

9. Ana liŵasa line lyalyatendaga umishonale lyakombwele chamtuli kupilila yakusawusya?

⁹ Kwitichisya kuti yindu yichenjile. M’bale Emanuele ni ŵamkwakwe lina lyawo Francesca, ŵatumisye kuti akatende umishonale m’chilambo chine. Jemanjaji ali agambile kutanda kwene kulijiganya chiŵecheto soni kumanyigana ni abale ni alongo ŵa mumpingo wawo wasambano, ulwele wa COVID-19 watandite. Yeleyi yatendekasisye kuti akatendelagasoni yindu yalumo ni abale ni alongo. Kaneko mamagwe ŵa Mlongo Francesca ŵajasiche. Mlongoju jwasakaga kuti akasimanikwe nawo pa mwambo wa malilowo. Nambo nganiyikomboleka ligongo lya mlili wa COVID-19. Ana chichi chachamkamuchisye mlongoju kuti akombole kupilila yakusawusya yosopeyi? Chandanda, liŵasali lyapopelaga yalumo lisiku lililyosye ni kumŵendaga Yehofa kuti ŵakamuchisye kuti akombole kulimbana ni yakulagasya nganisyo ya lisiku lililyose. Yehofa ŵajanjile mapopelo gawo kupitila mu gulu jakwe. Mwachisyasyo, liŵasali lyalimbikasidwe ni yajwasasile m’bale jwine mu fidiyo. Jwalakwe jwatite, “Naga mkwitichisya ndamo jimlijo mwachitema ni pamkusaŵasoni ŵakusangalala mwachitema, soni ni pamkusakombola kumtumichila Yehofa soni kwakamuchisya ŵane.” c Chaŵili, jemanjaji ŵakwete mtima wakusaka kulijiganya mwampaka alalichilile pafoni mwamti ŵakombwele kutandisya lijiganyo lya Baibulo. Chatatu, ŵasangalalaga abale ni alongo paŵakamuchisyaga soni kwalimbikasya. Mwachisyasyo,  mlongo jwine jwatumichisyaga utenga wakola ndime ja m’Baibulo lisiku lililyose kwa chaka chamtundu. Nombe m’weji patujitichisye kuti yindu yichenjile, tuchiŵa ŵakusangalala ni yatukukombola kutenda.

10. Ana chichi chachamkamuchisye mlongo jwine kuti akombole kupilila?

¹⁰ Kuganichisya yindu yamsogolo, soni yindu yawukukombola kutenda. Mlongo jwine jwa ku Romania lina lyakwe Christina jwakusatama ku Japan jwatengwiche mpingo wa Chisungu wajwasonganaga paŵawupwatikenye ni mpingo wa Chijapanisi. Jwalakwe nganatamilaga kuganichisya yayatendekweyo. Mmalomwakwe, jwalinganyisye yakuti alipelecheje mnope mu mpingo wa chiŵecheto chasambanowo ni kulalichilaga mwampaka akombolele. Mlongoju jwamŵendile jwamkongwe jwine jwele pandanda ŵakamulilaga yalumo masengo kuti amjiganyeje Chijapanisi. Jwamkongwejo jwakundile kumjiganya mlongoju Chijapanisi pakamulichisya masengo buku ja Asangalaleje Mpaka Kalakala! Yeleyi yamkamuchisye Mlongo Christina kulijiganya Chijapanisi. Nambo chakusangalasya mnope jwamkongwe jula jwatandite kusaka kulijiganya yisyesyene. Myoyo patukuleka kuganichisya yakala ni kuganichisyaga yindu yambone, kuchenga kwakutendekwe mpaka kutukamuchisye kuti tupate upile wejinji.

11. Ana liŵasa line lyamalene chamtuli ni chakusawusya cha kusoŵa kwa mbiya?

¹¹ Kwatendela ŵane yindu yambone. Liŵasa line lyalikusatama m’chilambo chele masengo getu ŵagalekasisye lyatandite kulaga pachasokonechele chipanje cha m’chilambo chawo. Ana jemanjaji ŵakombwele chamtuli kupilila? Chandanda, ŵalinganyisye ya kunandiya yindu yakusasuma. Kaneko, mmalo mwakutamila kuganichisya yakusawusya yawo, jemanjaji ŵalinganyisye yakuti ŵakamuchisyeje ŵane mwakwalalichila. (Mase. 20:35) Jwamlume jwa m’liŵasali jwasasile kuti, “Kulipeleka mnope pamasengo gakulalichila kutukamuchisye kuti tunandiye kuganichisya yakulemwecheka ni kutendaga yakusasaka Mlungu.” Myoyo yindu payichenjile paumi wetu, tukumbuchileje umbone wawukusapagwa patukupitilisya kwakamuchisya ŵane mwakulalichila ngani syambone.

12. Ana chisyasyo cha ndumetume Paulo mpaka chitukamuchisye chamtuli kuŵa ŵakundilila patukulalichila?

¹² Tukusasosekwa kuŵa ŵakundilila patukulalichila. Tukusasimana ni ŵandu ŵakusakulupilila yakulekangana yakwamba Mlungu, ŵakwete ndamo syakulekangana soni ŵakusatyochela kwakulekangana. Mpaka tulijiganye yejinji pa chisyasyo cha ndumetume Paulo juŵaliji jwakoseka kuchenga. Yesu ŵamsagwile Paulo kuti ‘akalalichile kwa ŵandu ŵamitundu jine.’ (Alo. 11:13) Yeleyi yatendekasisye kuti Paulo ŵalalichile ŵandu mpela Ayuda, Agiliki, ŵandu ŵalijiganye, ŵandu wamba, ŵandu ŵa maudindo soni mamwenye. Kuti akombole kwalalichila mwakwayika pamtima ŵandu ŵeleŵa, Paulo jwaŵele “yindu yosope kwa ŵandu ŵakulekanganalekangana.” (1 Akoli. 9:19-23) Jwalakwe jwaganichisyaga mnope kwatyochele ŵandu ŵakwalalichila soni yakusakulupilila. Yeleyi yamkamuchisye kuŵa jwakundilila ni kumlalichilaga mundu jwalijose m’litala lyakuti amyiche pamtima. M’wejisoni mpaka tulalichileje mwakamula mtima naga tuli ŵakundilila kuchenga kalalichile ketu kuti yikamulane ni mwaŵelele mundujo.

13. Ana ni chakogoya chapi chakuchisala pa 1 Akolinto 8:9 champaka tuchiŵambale patukuchimbichisya yakusagula ya ŵane?

¹³ Kundilila kukusatukamuchisyasoni kuti tuchimbichisyeje yakusagula ya ŵane. Mwachisyasyo, alongo ŵane akusanonyela kamulichisya masengo yindu yakulisalalichisya pele ŵane ŵanganonyela. Nambosoni Aklistu ŵane akusanonyela kumwa panandi ukana, pele ŵane ŵasagwile kuti akamwaga. Aklistu wosope akusasaka ali akwete yilu yambone nambope jemanjaji akusasagula matala gakulekanganalekangana gakwakamuchisya kola chilu chambone. Myoyo,  naga ndaŵi syosope tukusayiwona yindu yatusagwile kuŵa yakamuchisya mnope ni kwakanganichisyaga ŵane kuti atende yatukusaka mpaka twakuŵasye. Yeleyi mpaka yitendekasye kuti ŵandu mumpingo aŵe ŵagaŵikangana. Nambo ngatukusosekwa kutenda yeleyi. (Aŵalanje 1 Akolinto 8:9; 10:23, 24) Kwende tukambilane yisyasyo yiŵili ya m’Malemba yampaka yitukamuchisye kutenda yindu mwangapundanganya soni kuŵa pamtendele.

14. Ana tukusosekwa kumbuchila mfundo syapi sya m’Baibulo patukusagula yakuwala soni kasalalisye ka wumbo?

¹⁴ Kawale soni kasalalisye ka wumbo. Mmalo mwakutupa malamusi pangani ja kawale, Yehofa jwagambile kutupa mfundo syakuti tukuyeje. Mpela ŵakutumichila ŵa Mlungu tukusasosekwa kuwala m’litala lyampaka limchimbichisye jwalakwe. Tukusatenda yeleyi mwakuŵa ŵakundilila, ŵakulinandiya soni “ŵaganisya chenene” pa kawale ketu. (1 Tim. 2:9, 10; 1 Pet. 3:3) Myoyo, tukusaŵambala kuwala m’litala lyakuti ŵandu agambeje kuganichisya ya m’weji. Mfundo sya m’Baibulo mpaka syakamuchisyesoni achakulungwa ŵa mumpingo kuŵambala kutamilikasya malamusi pangani ja kawale soni kasalalisye ka wumbo. Mwachisyasyo, achakulungwa ŵa mumpingo wine ŵasakaga kwakamuchisya ŵachinyamata ŵaŵajigalile kasenje ka wumbo kakaliji kakuwanda. Ŵachinyamatawo ŵasengaga wumbo kuti siŵe syejipi nambo ni ngasisakulaga. Ana achakulungwawo akakamuchisye chamtuli ŵachinyamatawo nambo mwangapa lilamusi? Jwakulolela dela jwasalile achakulungwawo kuti akasalile abale ŵachinyamata ŵala kuti, “Naga mli ku pulatifomu, ni ŵandu ŵakupikanila akuganichisya mnope mwamkuwonechela mmalo mwakuganichisya mnope ngani jimkuŵecheta, nikuti pelepo kawale soni kasalalisye kenu ka wumbo kali kakulemwecheka.” Kalondesye kangasawusyaka kakamuchisye ŵachinyamatawo kupikanichisya mwangalajila kwapa lilamusi. d

15. Ana ni malamusi soni mfundo syapi sya m’Baibulo syasikusatulongolela patukusagula chikamuchisyo cha mtela? (Aloma 14:5)

 ¹⁵ Chikamuchisyo cha mtela. Mklistu jwalijose akusosekwa kusagula jika yampaka atende pakusamalila chilu chakwe. (Agal. 6:5) Mklistu pakusagula chikamuchisyo cha mtela, akusasosekwa kupikanila malamusi ga m’Baibulo pangani jakuŵambala myasi soni yamisimu. (Mase. 15:20; Agal. 5:19, 20) Nambo pana yindu yine yakusasosekwa kusagula jika. Ŵandu ŵane ndaŵi syosope akusajawulaga kuchipatala kuti akapate chikamuchisyo cha mtela. Nambo ŵane akusapata chikamuchisyo cha mtela mmatala gane. Myoyo, chinga tukuyiwona kuti litala line lyakwe lya chikamuchisyo cha mtela lili lyakamuchisya mnope kapena lyakogoya, nambope tukusosekwa kuchimbichisya yasagwile abale ni alongo ŵetu pangani ja chikamuchisyo cha mtela. Pangani jeleji tukusosekwa kumbuchilaga mfundo mcheche syakuyichisyasi: (1) Uchimwene wa Mlungupe ni wawuchimasya yilwele yosope. (Yes. 33:24) (2) Mklistu jwalijose akusosekwa “agambeje kuŵa jwakusimichisya” pa yindu yampaka yimkamuchisye pangani ja chikamuchisyo cha mtela. (Aŵalanje Aloma 14:5.) (3) Tukajelusyaga ŵane kapena kutenda yindu yampaka yakuŵasye. (Alo. 14:13) (4) Aklistu akusalosya chinonyelo soni akusakumbuchila kuti mkamulano uli wakusosekwa mnope pa mpingo kupunda nganisyo syawo. (Alo. 14:15, 19, 20) Patukukumbuchila yindu yeleyi, tukusakamulana mnope ni Aklistu achimjetu soni tukusakamuchisya kuti pampingo paŵe mtendele.

16. Ana jwamkulungwa jwa mumpingo mpaka alosye chamtuli kuti ali jwakundilila pakutenda yindu ni achakulungwa achimjakwe? (Alole chiwulili.)

¹⁶ Achakulungwa ŵa mumpingo akusasosekwa kuŵa chisyasyo chambone pangani ja kundilila. (1 Tim. 3:2, 3) Mwachisyasyo, jwamkulungwa jwa mumpingo akajembecheyaga kuti ndaŵi syosope achakulungwa achimjakwe chajitichisyeje nganisyo syakwe ligongo lyakuti jwalakwejo ali jwamkulungwa mnope. Jwalakwe akusakumbuchila kuti Yehofa mpaka akamulichisye masengo msimu wakwe weswela kumtendekasya jwamkulungwa jwalijose kusala yindu yampaka yikamuchisye kuti achakulungwawo asagule yindu mwalunda. Nambosoni naga yakamulene achakulungwa ŵajinji ngayikukasa mfundo sya m’Baibulo, achakulungwa ŵakundilila akusakamulana nayo atamose yili mkuti ŵakwete nganisyo sine.

17. Ana Aklistu ŵakundilila akusapata umbone wamtuli?

¹⁷ Aklistu akusapata maumbone gejinji ligongo lyakuŵa ŵakundilila. Tukusasangalala kuŵa paunasi wambone ni Aklistu achimjetu, soni tukusakamuchisya kuti mumpingo muŵeje mtendele. Tukusasangalala ni yitendo ya abale ni alongo ŵakulekanganalekangana ŵakusamtumichila Yehofa mwakamulana. Nambo chakusosekwa mnope, tukusasangalala kumanyilila kuti tukusamsyasya Mlungu jwetu Yehofa jwali jwakundilila.