LYAMLUNGU line kundaŵi m’yaka ya pasikati pa 1520 ni 1525, m’katawuni ka Meaux ku France, mwatendekwe cindu cine cakusimonjesya. Katawunika kali ciŵandika ni msinda wa Paris. Pa lisikuli, ŵandu ŵane ŵa m’katawunika paŵapite ku calici cinecakwe, ŵapikene mundu ali mkuŵalanga Ngani Syambone m’Baibulo m’ciŵeceto cawo ca Cifalansa. Keleka kaliji kandanda ligongo ni kala kose ŵaŵalangaga Baibulo ja Cilatini.

Mundu juŵagopolele Baibuloji jwaliji, Jacques Lefèvre d’Étaples (Linali m’Cilatini akusati, Jacobus Faber Stapulensis). Mkupita kwa ndaŵi jwalakwe jwamlembele cikalata mjakwe. M’cikalatamo jwalembile kuti, “Yili yakusangalasya kuti Mlungu akwakamucisya [ŵandu] ŵajinji kupikanicisya Maloŵe gakwe.”

M’yaka yeleyo, Calici ca Katolika nambosoni ŵandu ŵakulijiganya mnope ya dini mumsinda wa Paris nganasakaga kuti Mabaibulo gaŵe m’yiŵeceto ya ŵandu ŵakweleko. Ana cici cacamtendekasisye Lefèvre kuti agopolele Baibulo m’Cifalansa? Soni, ana jwatesile yatuli pakwakamucisya ŵandu ŵajinji kuti agapikanicisye Maloŵe ga Mlungu?

Mkanatande masengo gagopolela Baibulo, Lefèvre jwatandite kulijiganya ya lunda lwa ŵandu, soni ya dini. Jwalakwe jwawungunyaga maloŵe gasyesyene gakwayana ni yindu yeleyi. Jwatandite masengoga ligongo jwayikopocele kuti m’mabuku gakwayana ni lunda lwa ŵandu soni ga dini, ŵandu ŵacenjilecenjile maloŵe gakwe gasyesyene ni kuŵika maloŵe gakusawusya kugapikanicisya, soni mwaliji yakulemweceka yejinji. Sano kuti amanyilile maloŵe gasyesyenega, Lefèvre jwatandite kulijiganya mwakusokoka Baibulo ja Akatolika, jakolanjikwa kuti Latin Vulgate.

Ligongo lyakulijiganya Baibulo mwakusokoka, pambesi pakwe jwayiweni kuti “kulijiganya ya Mlungupe kukusakamucisya . . . kuti mundu asangalaleje mnope.” M’yoyo, Lefèvre jwalesile kulijiganya yakwayana ni lunda lwa ŵandu ni kutanda masengo gagopolela Baibulo.

Mu 1509, Lefèvre jwawandisye buku jine jele mkati mwakwe jwakopele mabuku ga Masalimo * gakulekanganalekangana gakwana 5 ga m’ciŵeceto ca Cilatini. Jimo mwa mabukuga, jaliji jaŵalembile Lefèvre msyenejo kutyocela m’Baibulo ja Latin Vulgate. Mwakulekangana ni ŵandu ŵane ŵakulijiganya mnope ya dini, Lefèvre jwalinjilile kuwucisya kapikanice kasyesyene ka utenga wa m’Baibulo. Litala lyakuŵika mabuku ga m’Baibulo pampepeli lyakamucisyesoni ŵandu ŵane ŵakulijiganya mnope ya Baibulo, soni ŵandu ŵaŵasakaga kuti yindu yicenje mu dini ja Katolika.—Kuti amanyilile yejinji, alole kabokosi kakuti ““ Ana Yiŵalembile Lefèvre Yamkamucisye Catuli Martin Luther?.”

Lefèvre jwaliji jwa Katolika. Jwalakwe jwakulupililaga kuti yindu mpaka yitande kwenda cenene mu diniji naga ŵandu akwajiganya cenene Maloŵe ga Mlungu. Ana yikakombolece wuli kuti ŵandu wosope agapikanicisye Maloŵe ga Mlungu, nambo citamileco gali m’ciŵeceto ca Cilatinipe?

Lefèvre jwaganonyelaga mnope Maloŵe ga Mlungu. Ligongo lya yeleyi jwasacililaga kuti ŵandu ŵajinji agapateje mwangasawusya. Kuti yeleyi yikombolece,  jwalakwe jwagopolele mabuku ga m’Baibulo ga Ngani Syambone m’Cifalansa. Kaneko, mu June 1523, jwakopwesye tumabaibulo tuŵili twamwanamwana. Mtengo wa tumabaibulo tuŵilitu waliji hafu ja mtengo wa Baibulo jamtundu. Yeleyi yatendekasisye kuti ŵandu ŵakulajilila kupata mbiya akombole kusuma.

Ŵandu ŵajinji ŵatunonyele mnope tumabaibulotu. Acalume ni acakongwe ŵakwe ŵaliji ŵakusacilila kuŵalanga maloŵe ga Yesu m’ciŵeceto cawo. Pandanda, ŵapanganyisye tumabaibulo twakwana 1,200. Nambo pambesi pa miyesi jamnono, tumabaibulo tosopetu twamasile.

M’maloŵe gandanda m’tumabaibulotu, Lefèvre jwasasile kuti jugopolele tumabaibulotu m’Cifalansa ni cakulinga cakuti “ŵandu ŵaliwose” m’calici “apikanicisyeje utenga wambone mpela mwakusawupikanicisya ŵandu ŵa Cilatini ligongo lyakuti akwete Mabaibulo ga m’ciŵeceto cawo.” Nambo ana cici cacamkamucisye Lefèvre kusacilila kuti mundu jwalijose amanyilileje yajikusajiganya Baibulo?

Lefèvre jwamanyililaga cenene kuti yijiganyo ya ŵandu yasokonasisye yijiganyo ya dini ja Katolika. (Maliko 7:7; Akolose 2:8) Soni jwayiwonaga kuti jiyice ndaŵi jakuti Ngani Syambone sya m’Baibulo “silalicigwe pacilambo cosope, kuti ŵandu akasokonecelasoni ni yijiganyo yacilendo.”

Ŵandu ŵane ŵamkanyaga Lefèvre gopolela Baibulo m’Cifalansa. Nambo jwalakwe jwalimbile mtima ni kusala pelanga nganisyo syangaŵajilwa sya ŵanduŵa. Jwasasile kuti, “Ana mpaka ŵajiganye wuli [ŵandu] kuti apikanileje yosope yaŵalamwile Yesu Klistu,  nambo ali mkwakanya ŵandu kupikanila Ngani Syambone kutyocela kwa Mlungu m’ciŵeceto cawo?”—Aloma 10:14.

Ligongo lya yeleyi, mwacitemacitema ŵandu ŵakulijiganya mnope ya dini ku koleji ja Paris, jele lina line akusati Sorbonne, ŵasakaga kumlekasya Lefèvre kugopolela Baibulo. Mu August 1523, ŵanduŵa ŵalamwile yakuti pakapagwa mundu jwagopolela Baibulo m’yiŵeceto yamwanamwana. Ŵalekasisyesoni kulemba mabuku gakutagulila ya Baibulo. Ŵatesile yeleyi ligongo ŵatiga yili “yakonanga dini.” Jemanjaji ŵasigele panandi kumlamula Lefèvre kuti ali jwakwimucila dini. Nambo mwenye jwa ku France, lina lyakwe Francis I, jwamkulupwisye Lefèvre.

Lefèvre nganakunda kuti yakuŵeceta ya ŵandu yisokonasye masengo gakwe gakugopolela Baibulo. Mu 1524, pajwamalisisye gopolela Malemba Gacigiliki (mbali ja Baibulo jakumanyika kuti Malangano Gasambano), jwalakwe jwakopwesye mbali ja Baibulo ja Masalimo ni cakulinga cakuti ŵakulupilila apopeleje “mwakulipeleka soni mwakutyocela pasi pamtima.”

Mwangacelewa, ŵakulijiganya mnope ya dini pa koleji ja Sorbonne ŵatandite kujilolasoni Baibulo jaŵagopelele Lefèvre kuti ajipatile magongo. Pambesi pakwe, ŵalamwile kuti ajicome Baibulo ja Malemba Gacigiliki jaŵajigopolelejo pekuga lya ŵandu. Ŵasasilesoni kuti yakulemba ya ŵandu ŵane “yikulimbikasya kwimucila mpela kuŵatesile Luther.” Ŵakulijiganya mnope ya diniŵa paŵamsalile Lefèvre kuti alicenjele, jwalakwe jwasagwile kuti akaŵeceta cilicose. Pali papite kandaŵi, jwalakwe jwatilile mumsinda wa Strasbourg. Kweleko Lefèvre jwajendelecele kugopolela Baibulo mwakusisa. Atamose kuti ŵane ŵatiga kutenda yeleyi kwalosyaga kuti ali jwawoga, nambo jwalakwe jwakulupililaga kuti jwatesile yambone pakutila ligongo ŵanduwo nganayamicilaga usyesyene wa m’Baibulo.—Matayo 7:6.

Pacamasile caka cimo, Mwenye Francis I jwampele Lefèvre masengo gakumjiganya mwanagwe jwa yaka mcece lina lyakwe Charles. Ligongo lya yeleyi, Lefèvre jwakwete ndaŵi jakwanila kumalisya gopolela Baibulo. Jwalakwe jwamalisisye gopolela Baibulo josope m’caka ca 1530. M’caka cicoco, Mwenye jwa Loma lina lyakwe Charles V, jwajiticisye kuti Baibulojo akajikopocesye m’cilambo ca Belgium mumsinda wa Antwerp. *

Paumi wakwe wosope, Lefèvre jwasacililaga kuti dini silece kwiganya misyungu ja ŵandu ni kutanda kwiganya yigakusala Malemba. Jwalakwe jwakulupililaga kuti “Mklistu jwalijose akusosekwa kuŵalanga ni kulijiganya Baibulo pajika, soni kuti uli ukumu wa jwalijose kutenda yeleyo.” Ni ligongo lyakwe Lefèvre jwalipelece mnope pagopolela Baibulo kuti ŵandu ŵajinji akomboleje kujipata. Atamose kuti yaŵasakaga jwalakwe yakuti dini jicenje katende kakwe ka yindu yalepelece, nambo masengo gakwe gakamucisye kuti ŵandu ŵajinji agamanyilile Maloŵe ga Mlungu.