NGANI JAKULIJIGANYA 40
NYIMBO NA. 30 Atati Ŵangu, Mlungu Jwangu Soni Mjangu
Yehofa Akusiŵakamuchisya “Ŵandu Ŵakudandawula”
“Akwaposya ŵandu ŵakudandawula ni kugataŵa maŵanga gawo.”—SAL. 147:3.
CHAKULINGA CHA NGANIJI
Chijitukamuchisye kumanyilila yakusatenda Yehofa pakwakamuchisya ŵandu ŵakulagasika nganisyo soni yampaka tutende pakwalimbikasya ŵane.
1. Ana Yehofa akusapikana wuli patukupitilisya kumtumichila?
YEHOFA akusamanyilila chilichose chachikwatendechela ŵakutumichila ŵakwe pachilambopa. Jwalakwe akusamanyilila patukusangalala soni patukudandawula. (Sal. 37:18) Kusala yisyene, Yehofa akusasangalala mnope pakutuwona tuli mkupitilisya kumtumichila jwalakwe atamose tuli mkusimana ni yakusawusya. Konjechesya pelepa, jwalakwe akusaŵa jwakoseka kutukamuchisya soni kutulimbikasya.
2. Ana Yehofa akusiŵatendela chichi ŵandu ŵakulagasika nganisyo? Ana yeleyi mpaka yitukamuchisye chamti uli?
2 Pa Salimo 147:3 pakusasala kuti Yehofa ‘akusagataŵa maŵanga’ ga ŵandu ŵakudandawula. Palilembali Yehofa akumlandanya mpela kuti akumsamalila mundu jwakulagasika nganisyo. Nambo ana m’weji tukusosekwa kutenda yamti uli kuti Yehofa atusamalileje? Kwende tuganichisye ayi. Dokotala jwakumanyilila chenene masengo mpaka asosekwe kutenda yejinji kuti amposye mundu jwawulele. Nambope, mundujo kuti apole mpaka asosekwe kukuya malangiso gosope gampele dokotalajo. Myoyo munganiji, chitulole malangiso gakusiŵasalila Yehofa ŵandu ŵakulagasika nganisyo, soni yampaka tutende kuti tukamulichisyeje masengo malangiso ga chinonyeloga.
YEHOFA AKUSATUSIMICHISYA KUTI TULI ŴAKUSOSEKWA MNOPE
3. Ligongo chichi ŵandu ŵane akusaliwona kuŵa ŵangasosekwa?
3 Tukutama m’chilambo chele ŵandu ŵakwe ngakusanonyelanaga. Chakutesya chanasa chili chakuti jemanjaji akusiŵatendekasyaga achimjawo kuliwona kuŵa ŵangasosekwa. Mlongo Helen a jwatite, “Nakulile mu liŵasa lyele achinangolo ŵangu ngananonyelanaga. Baba ŵangu ŵaliji ŵachiwawa soni lisiku lililyose ŵasalilaga kuti ndili jwangali mate.” Mwakulandana ni Helen, kombolekasoni wawojo aŵele ali mkutendeledwa yangasa yayikusiyatendekasya kuliwona kuŵa ŵangasosekwa. Naga yili myoyo, mpaka ayiwoneje kuti pangali jwalijose jwakusasamala ya wawojo.
4. Mwakamulana ni Salimo 34:18, ana Yehofa akutusimichisya chichi?
4 Atamose kuti ŵandu ŵane ŵatendele yangali chilungamo, mpaka aŵe ŵakusimichisya kuti Yehofa akusiŵanonyela soni akusiŵawona kuti ali ŵakusosekwa mnope. Jwalakwe “akusaŵa chiŵandika ni ŵandu ŵa mtima wekasiche.” (Aŵalanje Salimo 34:18.) Naga ‘ajasile mtima’ ligongo lya yindu yasimene nayo, akumbuchileje kuti Yehofa akusalola yindu yambone mwa wawojo soni akusatenda yakomboleka kuti aŵe najo paunasi wambone. (Yoh. 6:44) Ndaŵi syosope, Yehofa akusaŵa jwakoseka kwakamuchisya wawojo ligongo ali ŵakusosekwa mnope kwa jwalakwe.
5. Ana tukulijiganya chichi pa yindu yaŵatendelaga Yesu ŵandu ŵaŵawonedwaga kuŵa ŵangali mate?
5 Mpaka tumanyilile mwakusapikanila Yehofa patukuganichisya chisyasyo cha Yesu. Pajwatendaga utumiki wakwe pachilambopa, Yesu jwawonaga ŵandu ŵaŵatendeledwaga yangali chilungamo mwamti jwatendelaga chanasa. (Mat. 9:9-12) Pandaŵi jine, jwamkongwe juŵalwalaga ulwele wekulungwa ali akamwile chakuwala cha Yesu pakusaka kupola, Yesu ŵamlimbikasisye soni ŵamyamichile ligongo lya chikulupi chakwe. (Maliko 5:25-34) Yaŵatendaga Yesuyi yalosyaga ndendende ndamo syakwete Atati ŵakwe. (Yoh. 14:9) Myoyo, akakayichilaga yakuti Yehofa akusiŵawona wawojo kuŵa ŵakusosekwa mnope. Mwamti jwalakwe akusayamichila ligongo lyakuti akusamkulupilila soni kumnonyela mnope.
6. Ana chichi champaka chimkamuchisye mundu kumalana ni nganisyo syakuliwona kuŵa jwangasosekwa?
6 Ana mpaka atende wuli naga nganisyo syakuliwona kuwa ŵangasosekwa sikwayichila ndaŵi ni katema? Mpaka atende chenene kuŵalanga soni kuganichisya ndime sya m’Baibulo syampaka syasimichisye kuti ali ŵakusosekwa mnope kwa Yehofa. b (Sal. 94:19) Naga alepele kukwanilisya yakulinga yaŵakwete kapena atengwiche ligongo lyakuti ngakukombolasoni kutenda yejinji mpela mwakutendela ŵane, aŵambaleje kulijimba magambo. Yehofa akusamanyilila yampaka akombole kutenda wawojo. (Sal. 103:13, 14) Naga ŵatendeledwe yindu yangali chilungamo, akalijimbaga magambo ligongo nganatendekasya wawojo. Akumbuchileje kuti Yehofa chachawelusya ŵandu ŵakusatenda yakusakala, soni akusiŵakamuchisya ŵandu ŵatendeledwe yangali chilungamo. (1 Pet. 3:12) Mlongo Sandra, juŵatendeledwe yangali chilungamo ali mwanache jwasasile kuti, “Ndaŵi syosope ngusamŵenda Yehofa kuti angamuchisyeje kuliwona mwakuŵajilwa mpela mwakusambonela jwalakwe.”
7. Ana yindu yatwasimene nayo munyumamu mpaka yitukamuchisye chamti uli patukumtumichila Yehofa?
7 Akakayichilaga kuti Yehofa mpaka ŵakamulichisye masengo wawojo pakwakamuchisya ŵane. Jwalakwe ŵapele upile wawojo wakamula najo yimpepe masengo gakulalichila. (1 Akoli. 3:9) Yakusawusya yaŵele ali mkusimana nayo mpaka yakamuchisye kuti akombole kwapikanichisya ŵandu ŵakusimana ni yakusawusya yakulandanayo. Mwamti mpaka akombole kutenda yejinji pakwakamuchisya jemanjajo. Mlongo Helen, jwatumkolasile jula akusakombola kwakamuchisya ŵane ligongo lyakuti nombenajo ŵane ŵamkamuchisye. Jwalakwe jwatite, “Pandanda nalipikanaga kuti ndili jwangali mate. Nambo Yehofa jwangamuchisye kulipikana kuti ngusanonyeledwa, mwamti apano unejisoni ngukombola kwakamuchisya ŵane.” Apano Mlongo Helen akusangalala pakutumichila mpela mpayiniya jwakutamilichika.
YEHOFA AKUSASAKA KUTI TUKULUPILILEJE YAKUTI ATUKULULUCHILE
8. Ana Yehofa akusatusimichisya chichi pa Yesaya 1:18?
8 Ŵakutumichila ŵane ŵa Yehofa akusalagasika mnope nganisyo ligongo lyakulijimba magambo payindu yakulemwecheka yiŵatesile munyuma, mwine mkanaŵe kubatisidwa kapena panyuma pakuti abatisidwe. Nambope, mpaka tutende chenene kumbuchilaga kuti Yehofa jwapeleche mbopesi jakutuwombola ligongo lyakuti akusatunonyela mnope. Mwamti jwalakwe akusasaka kuti tujikulupilileje mnope mbopesi jeleji. Yehofa akusatusimichisya kuti panyuma pakutujimba “magambo” c pa yindu yatwalemwisye, jwalakwe akusatukululuchila ni mtima wosope. (Aŵalanje Yesaya 1:18.) Kusala yisyene, tukusayamichila mnope kuti Atati ŵetu Yehofa akusaliŵalila yindu yatwalemwisye. Mwamti chakusangalasya mnope jwalakwe jwangaliŵalilaga yindu yambone yatwatesile.—Sal. 103:9, 12; Aheb. 6:10.
9. Ligongo chichi tukusosekwa kuganichisya yindu yatukutenda apano soni yatuchitenda kusogolo mmalo mwaganichisya yamunyuma?
9 Naga akusalaga ni yindu yiŵatesile munyumamu, mpaka atende chenene kuganichisyaga yindu yakutenda apano soni yachachitenda kusogolo mmalo mwaganichisya yakala. Aganichisye yayamtendechele ndumetume Paulo. Jwalakwe jwadandawulaga mnope kuti ndaŵi jine jwalagasisye Aklistu, nambope jwamanyilile kuti Yehofa ŵamkululuchile. (1 Tim. 1:12-15) Ana jwalakwe jwapitilisye kuganichisya yakulemwa yajwatesile kalakala? Ngatukukayichila kuti jwalakwe nganatenda yeleyi, mpela muyaŵelele kuti nganaganichisyagasoni yindu yosope yiyamtendekasisye kuti aŵe Mfalisi jwakumanyika. (Afil. 3:4-8, 13-15) Mmalomwakwe, Paulo jwalipelekaga pa utumiki wakwe soni jwalolaga yindu yachachipata msogolo. Mpela mwayaŵelele ni Paulo, nganaŵa achenjile yindu yamunyuma. Nambo apano mpaka akombole kumchimbichisya Yehofa kwineku ali mkwembecheya yindu yambone yaŵasasile kuti chachatendela msogolo.
10. Ana tukusosekwa kutenda chichi naga munyumamu twatendele ŵandu ŵane yangali chilungamo?
10 Komboleka kuti ndaŵi sine mpaka alagasicheje nganisyo ligongo lya yakulemwecheka yaŵatesile wawojo kwa ŵandu ŵane. Ana chichi champaka chakamuchisye? Atende yampaka akombole pakulinganya yindu yaŵalemwisyeyo, soni mpaka atende chenene kupepesya mwakutyochela pasi pamtima. (2 Akoli. 7:11) Amŵendeje Yehofa kuti ŵakamuchisyeje ŵanduwo. Jwalakwe mpaka ŵakamuchisye wawojo soni ŵandu ŵaŵaleŵelewo kuti akole mtendele wa mumtima.
11. Ana tukulijiganya chichi kutyochela kwa jwakulochesya Yona? (Alolesoni chapachikuto.)
11 Tulijiganyeje kutyochela ku yindu yatwalemwisye. Nambosoni tuŵeje ŵakusachilila kuti Yehofa atukamulichisyeje masengo mwakusachila jwalakwe. Aganichisye ya chisyasyo cha jwakulochesya Yona. Mmalo mwakwawula ku Ninefe kuŵamtumile Yehofa, Yona jwatilile ku dela jine. Mwamti Yehofa ŵamjamwiche Yona soni jwalakwejo jwalijiganyisyepo kandu. (Yon. 1:1-4, 15-17; 2:7-10) Atamose yaliji myoyo, Yehofa nganaleka kumkamulichisya masengo Yona. Mlungu ŵampelesoni Yona upile wakwawula ku Ninefe mwamti pandaŵi jeleji jwapikanile. Atamose kuti Yona jwadandawulaga pa yindu yaŵalemwisye munyumamo jwalakwe jwatesile yiŵamsalile Yehofa.—Yon. 3:1-3.
Panyuma pakuti jwakulochesya Yona akulupwiche mmatumbo mwa chisomba, Yehofa ŵamsalilesoni jwalakwe kuti awujile ku Ninefe kuti akalalichile utenga wa ŵamtumile (Alole ndime 11)
YEHOFA AKUSATUPA MSIMU WAKWE WESWELA PAKUSAKA KUTULIMBIKASYA
12. Ana Yehofa akusatupa chamti uli mtendele patusimene ni yakusawusya yekulungwa? (Afilipi 4:6, 7)
12 Patusimene ni yindu yakusawusya, Yehofa akusatupa msimu wakwe weswela pakusaka kutulimbikasya. Aganichisye yayamtendechele M’bale Ron ni ŵamkwakwe lina lyawo Carol. Mwanache jwawo jwamlume jwaliwuleje. Jemanjaji ŵatite, “Munyumamo twaŵele tuli mkusimana ni yakusawusya, nambo chakusawusya chatwasimene nachochi chaliji chekulungwa mnope. Ndaŵi syejinji twalepelaga kupata lugono, myoyo twapopelaga kwa Yehofa. Mwamti twapatile mtendele wakusawukolanga pa Afilipi 4:6, 7.” (Aŵalanje.) Naga wawojo akulimbana ni kulagasika nganisyo mpaka atende chenene kupopela kwa Yehofa ndaŵi syosope mwampaka akombolele. (Sal. 86:3; 88:1) Amŵendeje Yehofa mwakuwilisyawilisya kuti ŵape msimu weswela, mwamti jwalakwe chachapa yindu yaŵendileyo.—Luk. 11:9-13.
13. Ana msimu weswela mpaka wutukamuchisye chamti uli kupitilisya kumtumichila jwalakwe mwakulupichika? (Aefeso 3:16)
13 Ana wawojo ŵasimene ni yakusawusya yayikusiyatendekasya apano kulipikana kuti ŵangali machili? Msimu weswela mpaka wakamuchisye wawojo kuti akombole kupitilisya kumtumichila Yehofa mwakulupichika. (Aŵalanje Aefeso 3:16.) Aganichisye yayamtendechele Mlongo Flora. Mlongoju paŵatumichilaga yimpepe ni ŵamkwakwe mpela amishonale, ŵamkwakwewo ŵatesile yindu mwangakulupichika mwamti ulombela wawo wamasile. Mlongoju jwatite, “Yindu yangakulupichika yaŵatesile ŵamkwanguyi yambweteche mnope. Namŵendile Yehofa kuti ambe msimu wakwe weswela kuti ngombole kupilila. Atamose kuti pandanda nayiwonaga kuti nganimba ngombwele kupilila, nambope napatile machili mwamti nakombwele kuyipilila.” Mlongoju ŵayiweni kuti Mlungu ni juŵamkamuchisye kuti akombole kupilila. Mwamti apano akusayiwona kuti Yehofa mpaka amkamuchisye payakusawusya yiliyose yampaka asimane nayo. Mlongoju jwasasilesoni kuti, “Maloŵe ga pa Salimo 119:32 gakusalondesya chenene yaŵatite Yehofa pakungamuchisya. Palilembali pakusati, ‘Tinguye litala lya malamusi gawo, pitanjonjechesye lunda lwakugapikanichisya.’”
14. Ana tukusosekwa kutenda chichi kuti msimu weswela wa Mlungu utukamuchisyeje?
14 Ana akusosekwa kutenda chichi panyuma pakumŵenda Yehofa kuti ŵape msimu wakwe weswela? Atendeje yindu yampaka yikamuchisye kuti msimu wa Mlungu ukamuleje masengo mwa wawojo. Yindu yakwe yili kusimanikwa pa misongano ja mpingo soni kulalichila. Aŵalanjeje Maloŵe ga Mlungu lisiku lililyose, yeleyi yichakamuchisya kuti aganichisyeje yakusasaka jwalakwe. (Afil. 4:8, 9) Pakuŵalanga Baibulo, atendeje chidwi mnope ni mundu jwakumkolanga mu nganijo. Nambosoni aganichisyeje yaŵatesile Yehofa pakumkamuchisya mundujo kuti akombole kupilila. Mlongo Sandra, jwatumkolasile jula jwalagasiche mnope ligongo lyakuti jwasimene ni yakusawusya yejinji. Jwalakwe jwatite, “Ngani ja Yosefe jangamuchisye mnope. Jwalakwe nganakunda kuti yakusawusya yajwasimanaga nayo yisokonasye unasi wakwe ni Yehofa.”—Gen. 39:21-23.
YEHOFA AKUSATULIMBIKASYA KUPITILA MWA ŴAKULUPILILA ACHIMJETU
15. Ana ŵani ŵampaka atulimbikasye? Ana jemanjaji mpaka atukamuchisye chamti uli? (Alolesoni chiwulili.)
15 Patukusimana ni yakusawusya Aklistu achimjetu mpaka ‘atulimbikasye mnope.’ (Akolo. 4:11) Yehofa akusalosya kuti akusatunonyela kupitila mwa abale ni alongo ŵetu. Jemanjaji mpaka atulimbikasye pakukunguluka ni weji soni pakutupikanila pandaŵi jatukulondesya yakusawusya yatukusimana nayo. Mpaka atulimbikasyesoni mwakutuŵalanjila lilemba linelyakwe kapena mwakupopela ni m’weji. d (Alo. 15:4) Ndaŵi sine m’bale kapena mlongo mpaka atukumbusye maloŵe ga Yehofa yampaka yitukamuchisye kuti tukombole kupilila. Kupwatika pelepa, Aklistu achimjetu mpaka atukamuchisyesoni mwakutupa yakulya patusimene ni yakusawusya.
Achimjetu ŵambone soni ŵakusamnonyela Yehofa mpaka atulimbikasye mnope (Alole ndime 15)
16. Ana tukusosekwa kutenda chichi kuti ŵandu ŵane atukamuchisye?
16 Ndaŵi sine mpaka tusosekwe kwaŵenda Aklistu achimjetu kuti atukamuchisye. Jemanjaji akusatunonyela mnope soni akusaŵa ŵakoseka kutukamuchisya. (Mis. 17:17) Nambo jemanjaji nganaŵa amanyilile mwatukupikanila soni yindu yatukusosechela. (Mis. 14:10) Myoyo, naga akulagasika nganisyo mpaka atende chenene kumsalila mjawo jwapamtima mwakupikanila. Amsalileje mjawojo yindu yakusaka kwakamuchisya. Mpaka aŵechetanesoni ni jwamkulungwa jwa mumpingo jumo kapena ŵaŵili ŵakusagopoka nawo chenene. Alongo ŵane ayiweni kuŵa yakamuchisya kulondesya mwakupikanila mu mtima kwa mlongo jwine jwachikulile.
17. Ana ni yakusawusya yapi yampaka yitulepelekasye kuti tukapochela chikamuchisyo kutyochela kwa ŵane, soni ana mpaka tumalane chamti uli ni yakusawusya yeleyi?
17 Aŵambaleje kulipatula. Ligongo lya yindu yayikwalagasya nganisyo mpaka ayiwoneje kuŵa yakusawusya kutenda yindu ni ŵandu ŵane. Ndaŵi sine Aklistu achimjawo mpaka alepele kwapikanichisya kapena mpaka aŵechete maloŵe gampaka gakuŵasye. (Yak. 3:2) Atamose yili myoyo, akakundaga kuti yeleyi yalepelekasye kupochela chikamuchisyo champaka ŵape Aklistu achimjawo. Jwamkulungwa jwa mumpingo jwine lina lyakwe Gavin juŵalwasile ulwele wakulagasika nganisyo jwasasile kuti, “Ndaŵi syejinji nganisakaga kunguluka kapena kuŵechetana ni Aklistu achimjangu.” Nambo m’baleju jwatesile yakomboleka kuti atendeleje yindu yimpepe ni Aklistu achimjakwe, mwamti yeleyi yamkamuchisye kuti atande kusangalala. Mlongo Ame jwatite, “Yakusawusya yanasimene nayo munyuma yandendekasisye kuti ngakulupililaga ŵane. Nambo apano ngulijiganya kwanonyela soni kwakulupilila abale ni alongo ŵangu mpela mwakusatendela Yehofa. Ngumanyilila kuti yeleyi yikusamtendekasya Yehofa kuŵa jwakusangalala, mwamti unejisoni yikusandendekasya kuŵa jwakusangalala.”
YINDU YACHACHITUTENDELA YEHOFA MSOGOLO MPAKA YITULIMBIKASYE
18. Ana kusogoloku tukwembecheya chichi? Ana apano tukusosekwa kutenda chichi?
18 Pachangakaŵapa Yehofa chatyosye yindu yiliyose yayikusatutendekasya kuti tulagasicheje nganisyo soni tupikaneje kupweteka. (Chiw. 21:3, 4) Pandaŵi jelejo, yindu yakulagasya nganisyo yatwaŵele tuli mkusimana nayo “tiyichiliŵalichika nditu.” (Yes. 65:17) Mpela mwatuyiwonele munganiji, Yehofa ‘akusataŵa maŵanga getu’ atamose apano. Kusala yisyene, Yehofa atupele yindu yejinji pakusaka kutulimbikasya soni kutukamuchisya. Chatukusosekwa kutenda m’weji chili kwamba kamulichisya masengo yindu yeleyi. Myoyo, kwende ndaŵi syosope tukakayichilaga amta panandi yakuti Yehofa ‘akusasamala mnope ya m’weji.’—1 Pet. 5:7.
NYIMBO NA. 7 Yehofa Ali Machili Getu
a Mena gane munganiji gachenjile.
b Alole libokosi lyakuti “ Yehofa Akusiŵawona Wawojo Kuŵa Ŵakusosekwa Mnope.”
c Kuti Yehofa atukululuchile panyumba pakutujimba “magambo” tukusosekwa kulosya kuti tupitikwiche mtima mwakumŵenda jwalakwe kuti atukululuchile soni mwakuchenga ndamo syetu. Naga tutesile ulemwa wekulungwa tukusosekwa kwasalila achakulungwa wa mumpingo kuti atukamuchisye.—Yak. 5:14, 15.
d Mwachisyasyo mpaka alole malemba gagali pasi pa mtwe wakuti “Kulagasika Nganisyo” soni “Kwamyalasya Ŵane” m’kabuku kakuti Malemba Gakamuchisya pa Umi wa Chiklistu.
