Agambe ganisya muyikaŵelele yindu yikaŵe kuti boma jimo jikulamulila cilambo cosope. Masiku agano, ŵandu ŵajinji akulaga ligongo lya usawuci, nambo ŵane ali ŵakusicila mnope. Nambo boma jakunonyela ŵandu ŵakwe mpaka jilolecesye kuti mundu jwalijose akwete yindu yakusosecela pa umi. Ana akuganisya kuti ŵandu mpaka atamilikasye boma jacinonyelo mpela jelejo?—Aŵalanje Yeremiya 10:23.

Kutandila kalakala, maboma galepele kusamalila ŵandu ŵakwe mnopemnope ŵakulaga. Maboma gane gali gangalwe. (Mlaliki 4:1; 8:9) Nambo Mlungu Jwamacili gose asasile kuti cacitamilikasya boma jambone jajicijinjila m’malo mwa maboma gosopega. Jwakulamulila jwakwe cacisamala mnope ŵandu ŵakwe.—Aŵalanje Yesaya 11:4; Danieli 2:44.

Yehofa Mlungu asagwile Jwakulamulila jwacilambo cosope jwambone mnope jwali Mwanagwe, Yesu. (Luka 1:31-33) Paŵaliji pacilambo capasi, Yesu ŵanonyelaga kwakamucisya ŵandu. Mpela Mwenye jwa Ucimwene wa Mlungu, jwalakwe cacakamucisya ŵandu wosope kuŵa ŵakamulana soni cacatyocesya yipwetesi yawo.—Aŵalanje Salimo 72:8, 12-14.

Ana ŵandu wosope cacim’wona Yesu kuŵa Jwakulamulila? Iyayi. Nambo Yehofa ali jwakuwusimana mtima. (2 Petulo 3:9) Jwalakwe akwapa ŵandu upile wakuti am’wone Yesu kuŵa Jwakulamulila. Pacangaŵapa Yesu cajonanje ŵandu wosope ŵakusakala ni kutamilikasya mtendele soni kwacenjela ŵandu pacilambo cosope capasi.—Aŵalanje Mika 4:3, 4.