1. Ana kulola ciwulili ca yindu yanganiyitendekwe mpaka kutukamucisye catuli? (Alole ciwulili cacili kundanda kwa nganiji.)

MLUNGU ŵatupele mtuka wakuti tukomboleje kulola ciwulili ca yindu yanganituyiwoneje. Mtuka welewu ukusatukamucisya kusagula yakutenda mwalunda, soni kwembeceya yindu yambone yayicitendekwa kusogolo. Yehofa mpaka alole mkanipaŵe yayicitendekwa, soni kupitila m’Malemba akusatusalila mkanipaŵe yindu yakusogolo. Yeleyi mpaka yitukamucisye kola ciwulili ca yinduyo. Kulola ciwulili ca yindu yanganiyitendekwe kukusatukamucisya kola cikulupi.—2 Akoli. 4:18.

2, 3. (a) Ana kuganicisya yakusogolo mpaka kutukamucisye catuli? (b) Ana munganiji citutagulilane yiwusyo yapi?

² Ndaŵi sine mpaka tukole ciwulili ca yindu yakuti ngaŵa mkutendekwa. Mwambone, mwanace mpaka aganicisye ali akwesile lipuluputwa, nambo yeleyi ngaŵa mkomboleka. Nambo Hana ŵaganicisyaga ya yindu yakuti yicitendekwa. Ŵaganicisyaga yandaŵi jele cacimjigala mwanagwe, Samuyele ni kwawula najo ku nyumba jakulambilila kuti akatumicileje Yehofa. Yeleyi yamkamucisye kuti aŵice nganisyo syakwe pacakulinga cakweco. (1 Sam. 1:22) Naga tukola ciwulili ca yindu yatulajisye Mlungu, nikuti tukuganicisya ya yindu yayicitendekwa.—2 Pet. 1:19-21.

 ³ Mwangakayicila, ŵandu ŵakulupicika ŵajinji ŵaŵakolasile m’Baibulo ŵakwete ciwulili ca yindu yiŵalajisye Mlungu. Ana kuganicisya ya majali gacacipata kusogolo kwakamucisye catuli jemanjaji? Ana kuganicisya ya yindu yambone yasasile Mlungu kuti cacatendela ŵandu ŵakupikanila mpaka kutukamucisye catuli?

4. Cici cicamkamucisye Abele kola ciwulili ca yindu yamsogolo?

⁴ Ana Abele “ŵayiweni” yiŵamlajisye Yehofa? Jwalakwe ŵamanyililaga yaŵasasile Yehofa kwa lijoka panyuma pakulemwa kwa Adamu ni Hawa. Yehofa ŵatite, “Timbice uŵengani sikati ja mmwejo ni jwamkongwejo. Tipaciŵa uŵengani sikati ja mwanace jwa jwamkongweju ni mwanace jwenu, taciŵa ŵakuŵengana ndaŵi syosope. Mwanace jwa jwamkongweju tacikasa mtwe wenu, nipo mmwejo timciluma cindende cawo.” (Gen. 3: 14, 15) Abele ŵaganicisyaga mnope ya cilanga celeci, soni ŵamanyililaga kuti mundu jwine ‘cacilumidwa cindende’ cakwe ni cakulinga cakuti ŵandu aŵe ŵamlama mpela mwaŵaŵelele Adamu ni Hawa mkanalemwe. Cinga Abele ŵakwete ciwulili catuli cakwamba ya msogolo, nambo ŵakulupililaga cilanga ca Mlungu, mwati Yehofa ŵapocele mbopesi jakwe.—Aŵalanje Genesis 4:3-5; Ahebeli 11:4.

5. Ligongo cici kola ciwulili ca yayicitendekwa msogolo kwamlimbikasisye Enoki?

⁵ Enoki nombenajo ŵakulupililaga Mlungu atamose kuti ŵasyungulilwe ni ŵandu ŵakusakala soni ŵakunyosya Mlungu. Jwalakwe ŵalocesye kuti Yehofa caciyika ‘ni malayika gakwe, gele gangaŵa mkukomboleka kugaŵalanga. Caciyika kukwalamula ŵandu wosope. Ŵandu ŵangalumbana cacipocela cilango ligongo lya yindu yakusatenda, soni ligongo lya maloŵe gosope gacabe gakusaŵeceta gakumsisya Mlungu.’ (Yuda 14, 15) Mpela mundu jwakulupilila Mlungu, Enoki komboleka kuti ŵakwete ciwulili ca cilambo cangali ŵandu ŵakusakala.—Aŵalanje Ahebeli 11:5, 6.

6. Ana Nowa ŵajendelecele kuganicisya ya cici Cikumba cili cimasile?

⁶ Nowa ŵakulupwice Cikumba ca mesi ligongo lya cikulupi cakwe. (Ahe. 11:7) Cikulupici camtedekasisye kuti apelece mbopesi panyuma pa Cikumba. (Gen. 8:20) Mpela Abele, Nowa nombenajo ŵakulupililaga kuti ŵandu cacigopoka ku ulemwa ni ciwa. Mkupita kwa ndaŵi cilambo casakelesoni. Nimulodi ŵamsisisye Yehofa ni ŵasakaga kuti ŵandu ŵane amsisyejesoni. Nambope Nowa ŵakwete cikulupi ni cembeceyo. (Gen. 10:8-12) Mwangakayicila, Nowa ŵakulupililaga kuti ŵandu cacigopoka ku ulamusi wangalwe, ulemwa soni ciwa. M’wejisoni mpaka tukole ciwulili ca ndaŵi jakusangalasya jelejo, soni apano jisigele panandi kwika.—Alo. 6:23.

7. Ana Abulahamu, Isaki ni Yakobo ŵakwete ciwulili catuli cakwamba ya msogolo?

⁷ Abulahamu, Isaki ni Yakobo ŵakwete ciwulili ca yindu yambone pakwamba yamsogolo ligongo Mlungu ŵaliji ali ŵasalile kuti kupitila mwa mbeju jawo, mitundu josope ja pacilambo capasi jicipata upile. (Gen. 22:18; 26:4; 28:14) Yisukulu ya jemanjaji yaliji yakuti yicitupa mnope, soni yicitama m’cilambo caŵapele Mlungu. (Gen. 15:5-7) Mwacikulupi, jemanjaji komboleka kuti munganisyo mwawo ‘ŵayiwonaga’ yisukulu yawo yili mkutama m’cilambomo. Kutandila paŵajasile ŵandu umlama, Yehofa aŵele ali mkwasimicisya ŵakutumicila ŵakwe kuti cacawucisya majali gaŵajasile Adamu.

8. Cici cicamkamucisye Abulahamu kola cikulupi cakulimba?

 ⁸ Kola ciwulili ca kwanilicikwa kwa yilanga ya Mlungu, kwamkamucisye Abulahamu kola cikulupi cakulimba. Malemba gakusalosya kuti atamose kuti Abulahamu, soni ŵakutumicila ŵane ŵa Mlungu, “nganapocela yindu yaŵatesile Mlungu cilanga kuti taciyiwona, nambo ŵagambile kuyiwonela kwakutalika ni kuyisangalalila.” (Aŵalanje Ahebeli 11:8-13.) Abulahamu ŵakwete umboni wakulosya kuti yaŵayijembeceyagayo yicikwanilicikwa mwati kwa jwalakwe yaliji mpela akuyiwona ni meso.

9. Ana kulupilila yilanga ya Mlungu kwamkamucisye catuli Abulahamu?

⁹ Cikulupi ca Abulahamu pa yilanga ya Mlungu camlimbikasisye kuti atendeje lisosa lyakwe. Ligongo lya cikulupi, jwalakwe ŵatyosile ku Uli, soni nganakunda kutamilicika m’misinda ja ku Kanani. Mwakulandana ni msinda wa Uli, misinda jelejo jaliji jakuti ngajitama mpaka kalakala ligongo ŵakulamulila ŵakwe nganajogopaga Mlungu. (Yos. 24:2) Kwa umi wakwe wosope, Abulahamu “ŵalindililaga kupocela msinda uŵawutaŵile Mlungu, msinda wa yilimbilimbi yakutamilicika.” (Ahe. 11:10) Abulahamu ‘ŵaliweni’ ali mkutama mumsinda wakutamilicika wakulamulidwa ni Yehofa. Abele, Enoki, Nowa, Abulahamu, soni ŵane ŵakulupililaga kuti ŵawe cacijimuka, soni ŵajembeceyaga mwalung’wanu ndaŵi jele cacitama pacilambo capasi mu Ucimwene wa Mlungu, wawuli “msinda wa yilimbilimbi yakutamilicika.” Kuganicisya yeleyi kwakamucisye jemanjajo kulimbisya cikulupi cawo pa Yehofa.—Aŵalanje Ahebeli 11:15, 16.

10. Ana kuganicisya ya msogolo kwamkamucisye catuli Sala?

¹⁰ Kwende sano tutagulilane ya Sala, ŵamkwakwe Abulahamu. Atamose kuti jwalakwe ŵakwanisye yaka 90 mkanaŵelece mwanace nambope ŵamanyililaga kuti kusogolo caciŵeleka. Yeleyi yamkamucisye kola cikulupi cakulimba. Jwalakwe ŵaganicisyaga ya mwanagwe ali akusile ni kuŵa mtundu wekulungwa. (Ahe. 11:11, 12) Ana cici cicamkamucisye kola cembeceyo celeci? Yehofa ŵaliji ali ŵasalile ŵamkwakwe kuti, “Jwalakweju tinampe upile nipo tacim’ŵelecela mwanace jwamlume. Tinjimpa upile nipo taciŵa nangolo jwa mitundu ja ŵandu ŵa yilambo yejinji. Pasikati pa yisukulu yakweyo ŵane taciŵa acayimwene.” (Gen. 17:16) Sala ali aŵelece Isaki, ŵakwete umboni wakuti yilanga yosope yaŵatesile Mlungu kwa Abulahamu yicikwanilicikwa. M’wejisoni mpaka tulimbisye cikulupi cetu patukuganicisya yilanga ya Mlungu yayicikwanilicikwa.

11, 12. Ana Mose ŵatesile yatuli pakusya cinonyelo cakwe pa Yehofa?

¹¹ Mundu jwinesoni juŵakulupililaga soni kumnonyela Yehofa ali Mose. Paŵaliji mcanda, Mose ŵatamaga m’liŵasa lya mwenye jwa ku Iguputo. Pandaŵijo yikaŵele yangasawusya kwa jwalakwejo kusacilila ukumu kapena cipanje. Nambo acinangolo ŵakwe ŵamjiganyisye yakwamba Yehofa soni cakulinga cakwe cakwakoposya Ahebeli mu ukayidi ni kwapa Cilambo ca Cilanga. (Gen. 13:14, 15; Eks. 2:5-10) Mose paŵaganicisyaga mnope ya yilanga ya Yehofa, cinonyelo cakwe pa jwalakwe cakusile.

¹² Malemba gakusatusalila kuti, “Pakuŵa ni cikulupi, Mose piŵakusile ŵakanile kolanjidwa cisukulu ca Mwenye jwa ku Iguputo. Jwalakwe jwasagwile kulaga pampepe ni ŵandu ŵa Mlungu, kulekangana ni kusangalala ni yindu ya ulemwa kwa ndaŵi japanandi. Mose ŵayiweni kuti kulaga ligongo lya Klistu kwaliji  cipanje cejinji kupunda cipanje cosope ca ku Iguputo, pakuti meso gakwe galiji kusyene pa mbote jakusogolo.”—Ahe. 11:24-26.

13. Ana kuganicisya mnope ya yilanga ya Mlungu kwamkamucisye catuli Mose?

¹³ Mose ŵaganicisyaga mnope yaŵasasile Yehofa kuti cacatendela Ayisalayeli. Yeleyi yakamucisye kuti cikulupi soni cinonyelo cakwe pa Yehofa cikule. Mwakulandana ni ŵandu ŵane ŵakogopa Mlungu, jwalakwe ŵaganicisyaga ya ndaŵi jele Yehofa cacagopola ŵandu ku ulemwa ni ciwa. (Yobu 14:14, 15; Ahe. 11:17-19) M’yoyo, Mose ŵamanyililaga kuti Mlungu ŵanonyelaga mnope ŵandu ŵakwe. Yeleyi yamtendekasisye kuti atande kumnonyela, soni kumkulupilila mnope Yehofa. (Deut. 6:4, 5) Atamose kuti Falao ŵamjogoyaga Mose kuti cam’wulaje, nambo cikulupi, cinonyelo ni kola ciwulili ca yindu yambone yayicitendekwa kusogolo yampele macili.—Eks. 10:28, 29.

14. Ana ŵandu akusaganicisya yindu yatuli?

¹⁴ Ŵandu ŵajinji lelo jino akwete ciwulili ca yindu yakuti ngasiyitendekwa. Mwambone, ŵandu ŵakulaga akusagacisya kuti ndaŵi jine cacisicila, soni ngasakola cilicose cakwalagasya nganisyo. Jemanjaji akusaganicisya yeleyo atamose kuti Baibulo jikusasala kuti umi wetu wosope ‘ukusaŵa wa yisawusyo ni kulaga.’ (Sal. 90:10) Akusaganicisya kuti cacitama ni umi wambone pasi pa maboma ga ŵandu. Nambo Baibulo jikusalosya kuti Ucimwene wa Mlungu ni wawucatendela ŵandu yindu yambone mnope. (Dan. 2:44) Ŵandu ŵajinji akusaganisya kuti Mlungu ngasacijonanga cilambo cakusakalaci, nambo Baibulo jikusasala yindu yakulekangana ni yeleyi. (Zef. 1:18; 1 Yoh. 2:15-17) Ŵandu ŵakusaganisya yindu yakulekangana ni cakulinga ca Yehofa cakwamba ya msogolo cacitenguka.

15. (a) Ana kuganicisya ya cembeceyo cawo kukusakamucisya catuli Aklistu? (b) Asale yindu yacacitendaga pandaŵi jele Mlungu cacikwalisya yilanga yakwe.

¹⁵ Nambo m’weji mpela Aklistu kola ciwulili ca cembeceyo cetu, cinga cakutama pacilambo capasi kapena cakuja kutama kwinani kukusatulimbikasya. Ana mpaka aliwanicisye ali mkusangalala ni yindu yambone yiŵatulajisye Mlungu? Ganicisya yatucitendaga pandaŵi jele Mlungu cacikwanilisya yilanga yakwe kukusatutendekasya kuŵa ŵakusangalala. Mwine mpaka “aliwone” ali mkutama pacilambopa mpaka kalakala. Mwine mpaka aganicisyesoni ali pampepe ni acimjawo ali mkukamula masengo gakulinganya cilambo cosope kuti ciŵe paladaiso. Ali mkutama ni ŵandu ŵakusamnonyela Yehofa. Ali akwete yilu yamacili, soni yakuwoneka cenene. Cacisangalala kamula masengo ni ŵandu ŵakusamala ya wawojo. Cacisangalalasoni ni kamulicisya masengo lunda lwawo pakwakamucisya ŵane soni pakumcimbicisya Mlungu. Mwambone, kwakamucisya ŵacacijimuka ku ŵawe kuti ammanyilile Yehofa. (Yoh. 17:3; Mase. 24:15) Yeleyitu nganiyiŵa sagamisi, nambo yili usyesyene wa m’Malemba wakwamba ya msogolo.—Yes. 11:9; 25:8; 33:24; 35:5-7; 65:22.

16, 17. Ana kutagulilana ya cembeceyo cetu kukusatukamucisya catuli?

¹⁶ Kutagulilana ni Aklistu acimjetu ya yindu yatucitendaga pandaŵi jele Yehofa cacikwanilisya yilanga yakwe, kucitukamucisya kola ciwulili cakwamba ya msogolo. Atamose kuti ngaŵa mkumanyilila mwayiciŵela yindu kwa mundu jwalijose m’cilambo casambano, nambope kutagulilana yayicitendekwa m’cilambomo mpaka kutukamucisye kulimbisyana jwine ni mjakwe soni kulosya kuti tukusakulupilila kuti yilanga ya Mlungu yicikwanilicikwa.  Paulo paŵapite ku Loma, abale ŵakweleko ŵam’yamicile ligongo ‘ŵalimbikasyene jwine ni mjakwe.’ M’wejisoni tukusosekwa kutenda yeleyo mundaŵi jakusawusyaji.—Alo. 1:11, 12.

 

¹⁷ Kola ciwulili ca yindu ya msogolo mpaka kutukamucisyesoni kuti tukaganicisyaga mnope ya yipwetesi yatukusasimana nayo. Pandaŵi jine, ndumetume Petulo ŵadandawile kwa Yesu kuti, “Alole, uwe twalesile yosope ni kwakuya ŵalakwe. Ana sambano nikuti tucipocela cici?” Pakusaka kumkamucisya Petulo ni ŵane ŵaŵaliji pelepowo kuti aganicisyeje yakusogolo, Yesu ŵajanjile kuti, “Nditu ngumsalicisya kuti Mlungu pitacilinganyasoni yindu yosope, Mwanace jwa Mundu tacitama pacitengu cakwe ca ucimwene ni ca lumbili. Sambano jemanja ŵimwanguyisye, timcitama m’yitengu ya ucimwene likumi ni yiŵili kulamula ngosyo likumi ni siŵili sya Ayisalayeli. Nipo jwalijose jwalesile mangwakwe, acalongo acimjakwe, kapena babagwe, kapena mamagwe, kapena ŵanace ŵakwe, kapena migunda ligongo lya une, jwalakwejo tacikola yosopeyo yejinji kupunda yiŵalesile kala yila, kaneko tacipocela umi wangamala.” (Mat. 19:27-29) Petulo ni acimjakwewo ŵatandite kuganicisya ya ukumu wacacikola m’boma jajicilamulila cilambo capasi soni pakwapa majali ŵandu ŵakupikanila.

18. Ana ganicisya pakwamba ya kwanilicikwa kwa yilanga ya Mlungu kukusatukamucisya catuli lelo jino?

¹⁸ Kuganicisya pakwamba ya kwanilicikwa kwa yilanga ya Yehofa kuŵele kuli mkwakamucisya ŵakutumicila ŵakwe ŵa pacilambo capasi. Abele ŵaganicisyaga kuti yilanga ya Mlungu yicikwanilicikwa. Yeleyi yamkamucisye kola cikulupi soni cembeceyo. Abulahamu ŵakwete cikulupi cakulimba ligongo lyakuti ŵakombwele “kulola” yindu yakwayana ni kwanilicikwa kwa cilanga ca Mlungu cakwamba ‘mbeju.’ (Gen. 3:15) ‘Meso ga Mose galiji kusyene pa mbote jakusogolo,’ yayamkamucisye kumkulupilila soni kumnonyela mnope Yehofa. (Ahe. 11:26) M’wejisoni, naga tukuganicisya pakwamba ya kwanilicikwa kwa yilanga ya Yehofa, tucimkulupililaga soni kumnonyelaga mnope. Mungani jakuyicisya tucitagulilana mwampaka tuwukamulicisye masengo mtuka wakutyocela kwa Mlunguwu.