Ana papikene maloŵe gakuti, “Mbesi jiŵandicile!” akusaganisya ya cici? Ana akusaganisya ya m’busa jwajimi kusogolo ali mkulalicila mwamacili ni makono, Baibulo jakwe jili m’miyala? Kapena akusaganisya ya mundu jwine jwakwete nde1u, soni jwawete mkanjo ni kulitaŵilila lamba m’ciwuno ali ajimi mumsewu kwineku ali ajigele cikwangwani celembe utenga wakwamba kumala kwacilambo? Kuganicisya yakutendekwa yeleyi mpaka kwatendekasye ŵane woga, kayicila soni ŵane mpaka yasecesye.

Baibulo jikusasala kuti, ‘Mbesi tijiciyika.’ (Matayo 24:14) Jikusajikolangasoni mbesiji kuti jili ‘lisiku lyekulungwa lya Mlungu’ soni ‘Alamagedo.’ (Ciunukuko 16:14, 16) Kusala yisyene, dini sikusasala ngani syejinji sakusokonasya pakwamba ya mbesi. Nambo Baibulo jikusasala yisyesyene ya nganiji mwangapita mumbali. Maloŵe ga Mlungu gakusatukamucisya kumanyilila kuti mbesi jisegele panandi. Cakusangalasya cili cakuti gakusatusalilasoni yampaka tutende kuti citukulupuce. Candanda, kwende tulole ngani syaunami pakwamba ya mbesi kaneko citulole yisyesyene yakwe. Ana Baibulo jikusasala yatuli pakwamba ya “mbesi”?

1. KONASIKA KWA CILAMBO COSOPE NI MOTO.

   Baibulo jikusasala kuti, ‘[Mlungu] ŵacitamice cilambo capasi pa yilimbilimbi yakwe, kuti cikasicitenganyika mpaka kalakala.’ (Salimo 104:5) Lilembali soni malemba gane gakusatusimicisya kuti Mlungu ngasajonanga cilambo cosope capasi kapena kunda kuti cijonasice.—Mlaliki 1:4; Yesaya 45:18.

2. CINDU CAKUTENDEKWA JIKA.

   Baibulo jikusasala kuti Mlungu ŵatamilikasisye ndaŵi jisyesyene jakwika kwa mbesi. Tukusaŵalanga kuti, “Nambo ya lisiku kapena ndaŵi jakwe, pangali jwakujimanyilila. Atamose malayika gakwinani ngagakumanyilila. Atamose uneji Mwanace ngangumanyilila, nambo Atati jikape ni ŵakumanyilila. Sambano mkalamuce, m’ŵeje mesope, ligongo ngamkumanyilila kuti ndaŵijo tijicikwanila cakaci.” (Maliko 13:32, 33) Mlungu jwali “Atati,” ŵaŵisile ‘ndaŵi jisyesyene jakwika kwa mbesi.’

3. KUMALA KWA CILAMBO KWAKUCITENDEKWA NI ŴANDU KAPENA YINDU YINE YAKUGWA KUTYOCELA KWINANI.

   Ana cici cacicitendekasya kuti mbesi jiyice? Lilemba lya Ciunukuko 19:11 likusati, “Nakuweni kwinani kuli kwewuguce, nipo japali haci jeswela. Jwakukwelapo jwakwe akusaŵilanjidwa ni lina lyakuti Jwakulupicika nambosoni Jwakuwona.” Pa Ciunukuko 19:19 tukusaŵalanga kuti, “Kaneko naciweni cilombo ni ayimwene ŵa cilambo capasi ni makuga ga asilikali ŵawo ŵangondo. Jemanjaji ŵasongene kuti amenyane ngondo ni jwakukwela pa haci jula, pamo ni likuga lyakwe lya ngondo.” (Ciunukuko 19:11-21) Atamose kuti maloŵe gane pa lilembali gali gakuwanicisya, nambo mpaka gatukamucisye kumanyilila kuti Mlungu cacitumisya malayika ga ngondo kuti gajonanje acimmagongo ŵakwe.

1. KUMALA KWA MABOMA GAKULEPELA GA ŴANDU.

   Baibulo jikusasala kuti, “Mundaŵi ja ayimwene ŵelewo, Mlungu jwakwinani tacitamilisya ucimwene wele ngisiwujonasika. Tiwucikasanya ni kugamasya ma ucimwene gane gosopego, nipo ucimwene welewopewo tiwuciŵa mpaka kalakala.” (Danieli 2:44) Mpela mwatusasile kala pa songa jatatu jipite jila, ŵacacijonanjidwa ali “ayimwene ŵa cilambo capasi ni makuga ga asilikali ŵawo ŵangondo.” Jemanjaji ‘cacisongangana kuti amenyane ngondo ni jwakwela pa haci jula, pamo ni likuga lyakwe lya ngondo.’—Ciunukuko 19:19.

2. KUMALA KWA NGONDO, NGALWE, NI YINDU YANGALI CILUNGAMO.

   “[Mlungu] akulekasya ngondo mpaka kumbesi kwa cilambo capasi.” (Salimo 46:9) ‘Pakuŵa ŵandu ŵakulungamika ni ŵacacitama pacilambo cino, soni ŵandu ŵakulupicika ni ŵacacisigalila kutamilicika mwelemo. Nambo ŵandu ŵangalumbana, Mlungu cacatyosya pacilambo cino, ŵandu ŵacinyengo cacacuŵa kwakoposya m’cilambomo.’ (Miyambo 2:21, 22) ‘Mlole! Tinayisandusye yindu yosope kuti yiŵe yasambano.’—Ciunukuko 21:4, 5.

3. KUMALA KWA DINI SYAUNAMI.

   “Ŵakulocesya yaunami soni ŵakutaga mbopesi akukamulana nawo. . . . Ana timcitenda cici patijiciyika ndaŵi jakumalisya?” (Yeremiya 5:31) “Pa lyele lisikulyo, ŵandu ŵajinji tacitiji kuti, ‘Ambuje, Ambuje, ana ngati uwe twaliji mkulalicila maloŵe ga Mlungu mu lina lyawo? Ana ngati uwe ŵeŵala ŵitwatendega masengo gamacili gejinji mu lina lyawo?’ Pelepo tinjasalila mwangasisa kuti, ‘Ngingummanyilila kose. Mtyoce apa ŵandu ŵa yitendo yakusakala!’”—Matayo 7:21-23.

4. KUMALA KWA ŴANDU ŴAKUTENDEKASYA KUTI CILAMBOCI CISAKALE.

   Yesu Klistu ŵasasile kuti, ‘Aku ni kulamula kwakwe: lilanguka liyice m’cilambo capasi, nambo ŵandu akunonyela cipi kupunda lilanguka, ligongo yitendo yawo yili yakusakala.’ (Yohane 3:19) Baibulo jikusasala mwacaŵelele conasiko ca cilambo cosope mu ndaŵi ja mundu jwakulupicika Nowa. ‘Cilambo capasi cajonajidwe ni mesi ga cikumba. Nambo Mlungu akulamwile kwinani ni cilambo capasi ca masiku agano kuti yisunjidwe kuti tayijoce ni moto. Akuyisunga mpaka pa lisiku litacilamula ni kwajonanga ŵandu wosope ŵangakusamala ya jwalakwejo.’—2 Petulo 3:5-7.

Pa lilembapa, “lisiku litacilamula ni kwajonanga ŵandu” akulilandanya ni conasiko ca “cilambo” ca mundaŵi ja Nowa. Ana cilambo cakwe capi cacajonasice? Ngaŵa cilambo capasi cisyesyeneci, nambo ‘ŵandu ŵangasamala ya Mlungu,’ acimmagongo ŵa Mlungu. M’yoyosoni, ŵacacijonajidwa pa “lisiku lyakulamula” lyalikwisali ali ŵandu ŵali acimmagongo ŵa Mlungu. Nambo ŵakusamnonyela Mlungu ni ŵacacikulupuka, mpela mwayaŵelele kwa Nowa ni liŵasa lyakwe.—Matayo 24:37-42.

Agambe ganisya mwaciciŵela cilamboci Mlungu pacacityosya yakusakala yosope! Kusala yisyene, utenga wa m’Baibulo wakwamba ya mbesi wuli wambone ngaŵa wakogoya. Nambope mwine mpaka aliwusye kuti, ‘Ana Baibulo jikusasala kuti mbesi jiciyika cakaci? Kapena jiŵandicile? Ana ngusosekwa kutenda yatuli kuti cingulupuce?’