NGANI JA PANDANDA | ANA ŴAWE MPAKA AKOLESONI UMI?
Ana Cici Cacikusatendekwa Mundu Pawile?
“Naganisyaga kuti pana malo gatatu gakusajawula ŵandu pawile. Malo gakwe gali kwinani, ku helo, kapena ku puligatoliyo. Namanyililaga kuti nganimba mundu jwambone mwati ni kwawula kwinani. Nganinaliwonagasoni kuŵa jwakusakala mnope mwati ni kwawula ku helo. Nambo nganimanyililaga kusyesyene kuti puligatoliyo gali malo gatuli. Pangali palipose m’Baibulo panaŵalasile ya malo gelega. Yakuti kwana malo gelega syagambile kuŵa nganisyo sya ŵandu.”—Lionel.
“Ŵanjiganyisye kuti ŵandu wosope pawile akusajawula kwinani, nambo nganinayikulupililaga. Naganisyaga kuti ciwa cili mbesi ja yosope, yayikugopolela kuti mundu pawile ngasakolasoni umi wine msogolo.”—Fernando.
Ana pakwete paliwusisye kuti, ‘Ana cici kusyesyene cacikusatendekwa mundu pawile? Ana ŵakunonyelwa ŵetu ŵaŵawile akulaga kumalo kwine kwakwe? Ana tucawonasoni? Ana mpaka tumanyilile catuli kwanga kwa yiwusyoyi?’ Kwende tulole yajikusajiganya Baibulo. Candanda, tulole yajikusati Baibulo pakwamba ya ciwa. Kaneko citutagulilane ya cembeceyo cakwamba ŵawe cacikusasimanikwa m’Baibulo.
Ana ŵawe akusaŵa mundamo jatuli?
YAJIKUSASALA BAIBULO: “Ŵawumi akusamanyilila kuti caciwa; nambo pakwamba ya ŵawe, pangalikose cakusacimanyilila, soni ngasapocela malipilo, pakuti akusaŵa aliŵalice. Cilicose calipatile ligasa lyenu kuti litende, m’citendeje ni macili genu gosope, pakuŵa kwangali masengo kapena ganisya kapena kumanyilila kapena lunda kumalembe kwamkwawulako.” *
Malembe gali malo gakusaŵikako ŵandu ŵawe. Mpaka tujilesoni kuti kuli kumalo kwele ŵandu ŵali kweleko ngakusaganisya kapena kutenda cilicose. Ana mundu jwakulupicika Yobu ŵagawonaga mwatuli malembe? Yindu yosope yaŵakwete yajonasice soni ŵanace ŵakwe wosope ŵawile lisiku limo. Konjecesya pa yeleyi, jwalakwe ŵakopwece yilonda yakupweteka mnope pacilu cakwe cosope. Yobu ŵam’ŵendile Mlungu kuti, “Mkasisile uneji m’malembe [“ku helo,” Baibulo jacikatolika ja Douay Version], mkasunjile kwakusisika.” (Yobu 1:13-19; 2:7; 14:13) Yobu nganagawonaga malembe kuŵa kumalo kwakuli moto, kwacakalagasice mnope. Mmalo mwakwe ŵagawonaga kuŵa malo gakupumulila.
Mpaka tumanyililesoni mwajikusaŵela ndamo ja ŵandu ŵawe mwakulijiganya ya ŵandu 8 ŵaŵawile ni kwimuka kuŵawe ŵakusakolanjikwa m’Malemba.—Alole libokosi lyakuti “ Ŵandu 8 Ŵaŵajimwice ku Ŵawe Ŵakusakolanjikwa m’Baibulo.”
Mwa ŵandu ŵeleŵa, pangali juŵasasile kuti ŵaliji kumalo kwalagasiceje. Yikaŵe kuti ŵandu ŵaŵajimwiceŵa ŵapite kumalo gakulagasicila, ana ngamkaniŵasalila ŵandu ya maloga? Soni ana yeleyi ngamkanayilemba m’Baibulo kuti wosopewe tuyimanyilile? M’Malemba mwangasimanikwa cilicose cakwayana ni yeleyi. Ŵandu 8 ŵala nganasala cilicose cakwayana ni yayatendekwaga paŵawile. Ligongo cici? Ligongo lyakuti jemanjaji nganamanyililaga cilicose, yaliji mpela ali m’lugono lwakuwa nalyo. Ni ligongo lyakwe ndaŵi sine Baibulo jikusakamulicisya masengo maloŵe gakuti lugono pakusala ya ciwa. Mwambone, jikusati mundu jwakulupicika Daudi soni Sitefano “ŵagonile lugono lwa ciwa.”
Nambo, ana pana cembeceyo cilicose cakwayana ni ŵawe? Ana mpaka ajimuce ku lugono lwelelu?
^ ndime 7 Mu Baibulo la Dziko Latsopano la Malemba Opatulika akusakamulicisya masengo maloŵe gakuti “Malembe” pagopolela maloŵe ga Cihebeli gakuti “Shelo” soni ga Cigiliki gakuti “Hade.” M’Mabaibulo gane akusakamulicisya masengo maloŵe gakuti “helo,” nambo yakuti kumalo kweleku kwana moto wakusiŵajocela ŵawe ngayikusasimanikwa m’Malemba.
