Nakulile mumsinda wa Alicante. Msindawu wuli cakungopoko lyuŵa m’cilambo ca Spain. Liŵasa lyetu nganilikamulanaga mwati yeleyi yandendekasyaga kuti ngatamaga mnope pamlango. Ciŵandika nyumba jetu papali malo gakulinganyila matayala. Mundu jwine lina lyakwe José María ŵakamulaga masengo pamalopo ni natandite kunguluka najo mnope. Jwalakwe ŵaliji mundu jwambone soni ŵanonyelaga mnope kupunda ŵamwiŵasa mwangu. Pasimene ni yakusawusya, jwalakwe ŵangamucisyaga mpela mlongo mjangu jusyesyene atamose kuti jwaliji jwamkulungwa kumbunda ni yaka 20.

José María ŵatandite kulijiganya Baibulo ni ŵa Mboni sya Yehofa. Jwalakwe ŵaganonyelaga mnope Malemba soni ŵasalilaga usyesyene wa m’Baibulo. Napikanilaga yaŵasalilagayo nambo nganinayikosyaga mnope, ligongo lyakuti pandaŵijo naliji jwacinyamata ni nakolaga yakutenda yejinji. Nambo yosopeyi yacenjile.

Ngangusanonyela kuŵeceta ya ngosi jelejo. Nambo yampaka sale yili yakuti natesile ngosijo ligongo lyakuloŵela soni ungasamala wangu. Lisiku limope umi wangu wacenjile mnope. Yakuti naliji mnyamata jwamacili yamasile ligongo nawulele mnope soni ŵangonece ku cipatala. Pandaŵijo kwiticisya kuti yeleyi yandendecele kwaliji kwakusawusya mnope mwati naliwusyaga kuti, ‘Ana pana ligongo lililyose lyakuŵela cijumi?’

José María ŵayikaga kukundola, soni ŵalinganyisye yakuti ŵa Mboni sya Yehofa ŵa mumpingo mwakwe ayiceje kukundola kucipatalako. Kwika kwa ŵandu ŵeleŵa kwangwayaga mnope mumtima. Panakopwece m’cipinda ca ŵakulwala mnope natandite kulijiganya Baibulo. Lijiganyolyo lyangamucisye kumanyilila ligongo lyakwe ŵandu akusalaga ni kuwa, soni ligongo lyakwe Mlungu akundile kuti yakusakala yitendekweje. Nalijiganyisyesoni ya yilanga ya Mlungu mpela yakuti cilambo cosope capasi cicigumbala ni ŵandu ŵamlama ŵele ngasaŵecetagasoni kuti, “Une ngulwala.” (Yesaya 33:24) Kweleku kwaliji kutanda kupikana ya cembeceyo cakusangalasya mnopeci.

Panakopwece m’cipatala najendelecele kulijiganya Baibulo. Natandite kwawula ku misongano jine ja ŵa Mboni sya Yehofa, soni nalalicilaga nawo pakamulicisya masengo njinga ja ŵalemale. Nabatiswe pa November 5, 1988 ndili ngwete yaka 20. Yehofa Mlungu angamucisye kuti nayiwoneje yindu  mwakuŵajilwa atamose kuti nawulele. Nambo ana mpaka losye catuli kuti ngusam’yamicila Mlungu?

Nasimicisye mumtima kuti cinjendelecelepe kumtumicila Yehofa atamose kuti ndili jwamlemale. Nasakaga kwawula pasogolo. (1 Timoteo 4:15) Pandanda kutenda yeleyi kwaliji kwakusawusya ligongo ŵamwiŵasa mwangu ŵasisyaga mnope. Nambo Aklistu acimjangu ŵaŵele acalongo soni acalumbu ŵangu ŵausimu. Jemanjaji ŵangamucisyaga kwawula ku misongano josope soni ŵanjigalaga kukulalicila.

Mkupita kwandaŵi yawonece kuti ngusosekwa cikamucisyo cilo ni musi. Ndili mbungunyisye nasimene malo gane gakusamalilila ŵandu ŵalemale. Maloga galiji mumsinda wa Valencia, wawaliji palutando lwa makilomita 160 ca kumpoto kwa msinda wa Alicante. Maloga gaŵele kumangwangu.

Atamose kuti naŵaga cigonele pabedi, naliji jwakusacilila kutumicila Yehofa. Nasumile kompyuta pakamulicisya masengo mbiya syakusapocela ŵalemale. Kompyutajo ŵajiŵisile pambali pa bedi jangu. Nasumilesoni foni. Kundaŵi kulikose jwaŵasamalilaga ŵambambilaga kompyuta ni fonijo. Pangutenda yindu pa kopyutajo ngusakamulicisya masengo cida cinecakwe. Cidaci ngusacikamulicisya masengo ni cipundi cangu. Ngwetesoni katela kanekakwe kangusakakamula ni pakamwa. Katela keleka kakusangamucisya kulemba yindu pa kompyuta soni kwimbila foni.

Ana yindu yeleyi yikusangamucisya wuli? Candanda, ngusakombola kwinjila pa webusayiti ja jw.org soni pa LAIBULALE JA PA INTANETI ja Watchtower. Kusala yisyene yidayi yikusangamucisya mnope. Ngusamalila ndaŵi jelewu ndili mkulijiganya soni kuwungunya mabuku gakutagulila ya m’Baibulo kuti njendelecele kulijiganya ya Mlungu soni ndamo syakwe syambone. Palingamwile lipowo kapena pandengwice, yindu yine pa webusayitiji yikusalimbikasya mnope.

Kompyuta jangu jikusangamucisyasoni kupikanila misongano, kwanga, kupopela, kuŵeceta ngani, soni kuŵalanga pa Sanja ja Mlonda. Atamose kuti apano ngaŵa mkwawula kumisonganoji nambope ngusalipikana kuti ndili mbali ja mpingo wetu.

Foni soni kompyuta yikusangamucisyasoni kamula nawo masengo gakulalicila. Yili yisyene kuti nganimba ngombwele kulalicila nawo nyumba ni nyumba mpela mwakusatendela ŵa Mboni ŵajinji. Nambo yeleyi ngayikusandepelekasya kulalicila. Ngusakamulicisya masengo foni soni kompyuta pakwasalila ŵane yangusakulupilila. Kusala yisyene ngusanonyela kulalicila pakamulicisya masengo foni mwati acakulungwa ŵa mumpingo ŵasalile kuti longoleleje masengo gakulalicila kupitila pa foni. Kulalicila kupitila pa foniku kukusakamucisya abale  ni alongo ŵanganaŵa akombwele kopoka m’nyumba syawo ligongo lya ulwele kapena yine kuti alalicileje.

Nambo ngangusajegamilape kompyuta kapena foni. Lisiku lililyose acimjangu ŵajinji akusayika kukundola. Jemanjaji akusayika ni ŵacinasi ŵawo soni ŵakusalijiganya nawo Baibulo. Payice ni jwakulijiganya Baibulo akusasalila kuti longoleleje lijiganyolyo. Ndaŵi sine, maŵasa gakusayika kuti tutendele yimpepe kulambila kwa peŵasa. Ngusasangalalasoni kupikana ŵanace pakusalila ligongo lyakwe akusamnonyela Yehofa.

Ngusayamicila kupocela acalendo ŵajinji. Cipinda cangu cikusagumbala ni ŵandu ŵakusayika kukundola. Yeleyi yikusasimonjesya ŵandu ŵakusalolela ŵalemale ŵa pamalopo. Ngusam’yamicila Yehofa lisiku lililyose ligongo lyakungunda kuti mbe mbali ja likuga lya abale ŵapacilambo cosope.

Mundu pangomasisye ngusajanga kuti, “Mbali, ngulinjililape!” Ngumanyilila kuti nganimba jika jwangusimana ni yakusawusya mpela yeleyi. Cinga akusimana ni yakusawusya yatuli, Aklistu wosope akusosekwa kumbucila kuti ‘akuputa ngondo jambone jakusunga cikulupi.’ (1 Timoteo 6:12) Ana cici cacingamucisye kutumicilape Mlungu atamose kuti ngusimana ni yakusawusya? Lisiku lililyose ngusapopela soni kum’yamicila Yehofa pakungamucisya kumanyilila kuti umi ukwete lisosa lyakwe. Ngusaŵa jwamtawu pakutumicila Mlungu soni ngusaganicisya mnope ya cembeceyo catukwete.

Ndaŵi syejinji ngusaganicisya ya cilambo casambano soni mwayiciŵela pandaŵi jele cinjikombolekaga kuwutuka ni kusumbasumba. Ndaŵi sine, ngusaŵeceta mwakwelegula ni José María jwakulwala poliyo. Ngusam’wusya kuti, “Tuli tutesile mpikisano wakuwutuka, ana ŵani ŵampaka apunde?” Jwalakwe akusajanga kuti, “Yakupundayo yangali masengo. Cakusosekwa mnope cili kutama m’Paladaiso ni kuwutukaga.”

Kuŵa jwamlemale kuŵele kwakusawusya mnope kwa une. Panaliji mnyamata natesile yindu mwakuloŵela, soni yakuyicisya yakwe yikusambweteka mnope. Nambo ngusayamicila mnope ligongo Yehofa ngananjasa. Jwalakwe andendele yindu yejinji mpela kumba liŵasa lyausimu, soni cembeceyo cambone ca msogolo. Ngusasangalalasoni ligongo lyakuŵa cijumi soni ligongo lyakwakamucisya ŵane. Kuti sale mwakata mwangupikanila mumtima mpaka njile kuti, Yehofa andendele yindu yejinji.