Mundu mkanatende cindu cine cakwe, mwine mpaka aliwusye kuti, ‘Ana mpaka cingamucisye catuli? Nganikuŵa kulemwa kuliwusya ciwusyo mpela celeci pakwamba ya lipopelo. Mwacipagwa, jwalijose akusasaka kumanyilila naga lipopelo lili lyakamucisya kusyesyene. Atamose mundu jwambone Yobu ŵawusisye kuti, “Naga ngwaŵilanga, ana mpaka anjanje?”—Yobu 9:16.

Ngani sipite sila, tulijiganyisye kuti lipopelo nganiligamba kuŵa cisyoŵe ca dini kapena mtundu wa mtela. Kusala yisyene, naga tukusapopela mwakamulana ni lisosa lya Mlungu jwakuwona soni pa yindu yakuŵajilwa, jwalakwe cacitupikanila. Ni ligongo lyakwe jwalakwe akutulimbikasya kuti tum’ŵandicileje. (Yakobo 4:8) Sambano, ana mpaka tupate maumbone gapi naga tukupopelaga ndaŵi syosope? Kwende tulole gane mwa maumbonega.

Mwangakayicila, patusimene ni yakusawusya, tukusadandawula mnope. Pandaŵi mpela syelesi, Baibulo jikusatulimbikasya ‘kupopela mwangalecesya’ soni kuti ‘yakuŵenda yetu yimanyice kwa Mlungu.’ (1 Atesalonika 5:17; Afilipi 4:6) Baibulo jikusatusimicisyasoni kuti naga tukupopela kwa Mlungu, “mtendele wa Mlungu wawukusapunda kuganicisya mwakusokoka kulikose, ucicenjela mitima [jetu] soni nganisyo [syetu].” (Afilipi 4:7) Naga tukwakususila yakusawusya yetu Atati ŵetu ŵakwinani, tucikola mtendele wamumtima. Konjecesya pelepa, lilemba lya Salimo 55:22 likusatusalila kuti, “Amtwice Yehofa yakusawusya yawo, ni jwalakwe cacakamucisya.”

Ŵandu ŵajinji ŵakusatenda yeleyi, akusakola mtendele wamumtima. Jwamkongwe jwine jwa ku South Korea lina lyakwe Hee Ran, ŵatite, “Atamose kuti ngwete  yakusawusya yejinji, nambo pangambile kupopela kwa Mlungu, ngusaŵa jwakusangalala mnope soni ngusalipikana kuti ngwete macili gakupilila.” Jwamkongwe jwinesoni jwa ku Philippines lina lyakwe Cecilia ŵatite, “Ngusadandawula mnope ya mama ŵangu ŵacekulwipe mnope mwati ngakusamanyililaga. Ngusadandawulasoni mwampaka nasamalilile ŵanace ŵangu. Nambo ligongo lyakuti ngusapopela kwa Mlungu, yikusangamucisya kuti ngagambaga ganicisya yakusawusya yanguyi. Ngumanyilila kuti Yehofa cangamucisye kwasamalila jemanjaji.”

Ana akulaga mnope nganisyo mwati akuyiwona kuti umi wawo wuli pangosi? Apopele kwa “Mlungu jwakusatutondoya m’litala lililyose.” Kutenda yeleyi mpaka kwakamucisye kuŵa ŵakusangalala mnope. Baibulo  jikusasala kuti jwalakwe ‘akusatutondoya mu yakulingwa yetu yosope.’ (2 Akolinto 1:3, 4) Mwambone, pandaŵi jine Yesu ali alasile nganisyo mnope, “ŵatindiŵele ni kutanda kupopela.” Yakuyicisya yakwe, “Lilayika lyakutyocela kwinani lyawonecele kwa jwalakwe ni kumlimbikasya.” (Luka 22:41, 43) Mundu jwinesoni jwakulupicika, Nehemiya, ŵalasile nganisyo ŵandu ŵakusakala paŵalingagalingaga kuti amlekasye kamula masengo ga Mlungu. Jwalakwe ŵapopesile kuti, “Sambano, ngupopela kuti alimbisye magasa gangu.” Yakuyicisya yakwe yikulosya kuti Mlungu ŵamkamucisye jwalakwe kumalana ni woga soni ŵajendelecele kamula masengo gakwe. (Nehemiya 6:9-16) Mundu jwine jwa ku Ghana lina lyakwe Reginald ŵatite, “Pangupopela mnopemnope pandaŵi jangulaga nganisyo, ngusalipikana mpela kuti namsalile yakusawusya yangu mundu jwampaka angamucisye soni jwakusimicisya kuti pangali ligongo lyakuti ndandawuleje.” Kusala yisyene, Mlungu mpaka atutondoye patukupopela kwa jwalakwe.

Yakusagula yine yatukusatenda mpaka yitukwaye m’weji soni ŵakunonyelwa ŵetu. Ana mpaka tutende wuli kuti tusaguleje yindu mwalunda? Baibulo jikusati, “Naga jwine mwa jemanja akusoŵa lunda [mnopemnope naga akulaga kumalana ni yakulingwa], aŵende kwa Mlungu. Jwalakwe akusapeleka mwakoloŵa magasa kwa jwalijose mwangam’nyosya.” (Yakobo 1:5) Naga tukupopela kwa Mlungu kuti atupe lunda, jwalakwe mpaka akamulicisye masengo msimu wakwe weswela kuti utulongolele kusagula yindu mwalunda. M’yoyo, mpaka tum’ŵende Mlungu kuti atupe msimu weswela ligongo Yesu ŵatusimicisye kuti, “Atati ŵakwinani cacapa msimu weswela ŵandu ŵakum’ŵenda jwalakwe.”—Luka 11:13.

Atamose Yesu ŵapopesile kwa Atati ŵakwe kuti amkamucisye kusagula yindu mwalunda. Baibulo jikusasala kuti, jwalakwe paŵasakaga kusagula ŵandu 12 ŵacacitumicilaga mpela ŵandumetume ŵakwe, “ŵacesisye kupopela kwa Mlungu cilo cosope.”—Luka 6:12.

Mpela Yesu, moŵa agano ŵandu ŵajinji akusimicisya kuti Mlungu akusajanga mapopelo gawo soni kwakamucisya kusagula yindu mwalunda. Jwamkongwe jwine jwa ku Philippines lina lyakwe Regina, ŵasasile yakusawusya yakulekanganalekangana yaŵasimene nayo panyuma pa kwasika kwa ŵamkwakwe. Jwalakwe ŵasoŵaga yakamucisya paumi wakwe ni liŵasa lyakwe, kumala kwa masengo soni kulaga kwalela ŵanace ŵakwe ŵaŵili. Ana cici cacamkamucisye kusagula yindu mwalunda? Jwalakwe ŵatite, “Ngusapopela kwa Yehofa kuti angamucisyeje.” Jwamlume jwine jwa ku Ghana lina lyakwe Kwabena, ŵasasile ligongo lyakwe akusapopela kwa Mlungu kuti amkamucisye. Jwalakwe ŵatite, “Ŵandyosisye pa masengo gangu ga yakutaŵataŵa ganapocelaga mbiya syejinji.” Nambope, jwalakwe ŵatite, “Napopelaga kwa Yehofa mwangalecesya kuti angamucisye kusagula yindu mwalunda.” Ŵajonjecesyesoni kuti, “Nguyiwona kuti Yehofa ŵangamucisye kusagula masengo mwalunda. Masengoga gakusamba ndaŵi jakutendela yindu yausimu.” Wawojosoni mpaka apopele kwa Yehofa kuti ŵacenjele ku yindu yampaka yisokonasye unasi wawo ni jwalakwe.

Tugambile kusala yindu yakuŵalanjikape yampaka yakamucisye kumanyilila kuti lipopelo lili lyakusosekwa mnope. (Alole libokosi lyakuti, “Kusosekwa kwa Lipopelo.”) Nambope, kuti amanyilile naga lipopelo lili lyakamucisya mnope, candanda akusosekwa kummanyilila Mlungu soni lisosa lyakwe. Naga akusaka kutenda yeleyi, tukwalimbikasya kuti ŵaŵende ŵa Mboni sya Yehofa kuti alijiganyeje nawo Baibulo. * Kutenda yeleyi mpaka kwakamucisye kum’ŵandicila Mlungu, ‘jwakusapikanila lipopelo.’—Salimo 65:2.