Ŵandu ŵajinji akusayiwona kuti yili yangakomboleka mitundu josope ja ŵandu kutendeledwaga yindu mwakulandana.

•   Che António Guterres jwali Mlembela jwa bungwe ja UN ŵatite: “Pachilambo chosope, mabungwe, magulu ga ŵandu, nambosoni umi wa ŵandu ŵa lisiku ni lisiku yisokonechele ligongo lya lusagu lwaluli mpela poisoni.”

 Ana yichikomboleka kuti mitundu josope ja ŵandu kutendeledwaga yindu mwakulandana? Ana Baibulo jikusasala yamtuli panganiji?

 Baibulo jikusatusalila mwakusajiwonela Mlungu mitundu jakulekanganalekangana ja ŵandu.

•   “[Mlungu] ŵapanganyisye mitundu josope ja ŵandu kuti atameje pachilambo chapasi.”—Masengo 17:26.

•   “Mlungu jwangali lusagu, nambo akusampochela mundu jwakutyochela mu mtundu uliwose jwele akusamjogopa jwalakwejo soni kutenda yakuŵajilwa.”—Masengo 10:34, 35.

 Baibulo jikusasala kuti wosopewe tuli liŵasa limo mwamti Mlungu akusiŵapochela ŵandu ŵakutyochela ku mitundu josope.

 Uchimwene wa Mlungu wawuli boma ja kwinani uchimasya kulekangana kwa mitundu ja ŵandu. Bomaji jichajiganya ŵandu mwampaka atendeleje yindu ni ŵane m’litala lyakuŵajilwa. Ŵandu chachilijiganyasoni mwampaka amachisye mtundu uliwose wa lusagu waŵakwete pandanda.

•   “Ŵandu ŵa mchilambomo [chachiliganya] ya chilungamo.”—Yesaya 26:9

•   “Ligongo lyakuti mundu jwalijose tachitenda yachilungamo, mchilambomo timuchiŵa mtendele ni bata mpaka ndaŵi syangamala.”—Yesaya 32:17.

 Masiku agano, mamiliyoni ga ŵandu gakulijiganya kutyochela m’Baibulo mwampaka atendeleje yindu ni ŵane mwakwachimbichisya.

•   Kuti amanyilile yejinji, aŵalanje ngani ja mu Ajimuche! ja mtwe wakuti “Ana Pana Mtela Wakumachisya Lusagu?”

•   Aŵalanje ngani ja Chichewa jakuti “Mmene Mungauzire Mwana Wanu za Kuipa Kosankhana Mitundu” kuti amanyilile yampaka atende achinangolo pakambilana nganiji ni ŵanache ŵawo.