Ofesi jakulolela masengo ga Mboni sya Yehofa ku Rwanda soni ku Zimbabwe yimpepe ni achakulungwa ŵa mumpingo, akukamula masengo gakwakamuchisya abale ni alongo ŵakulajilila kupata yakusochela ya pa umi ligongo lya mlili wa kolonafayilasi.

Pa Epulo 2, 2020, Komiti ja Nyambi ku Rwanda, japeleche chimanyisyo kwa achakulungwa ŵa mumpingo. Chimanyisyochi chaliji chakwaŵenda kuti awungunye abale ni alongo ŵakulajilila kupata yakusosechela ya paumi ligongo lya mlili wa kolonafayilasi. Chakulinga chakwe chaliji chakuti abaleŵa apate chikamuchisyo. Ligongo lya chimanyisyochi, achakulungwaŵa ŵalinganyisye yakuti abale ni alongo apochele chikamuchisyo cha yakulya soni yindu yine yakusosechela paumi.

Pali pamasile mawiki gaŵili, ofesi ja nyambi ku Rwanda jatamilikasisye makomiti gakwana 31 gakwakamuchisya ŵane pajitendekwe ngosi. Makomitiga gapeleche yindu mpela utandi, mpunga, mbwanda, njete suga soni mauta gakutelechela ku maŵasa gagasosechelaga chikamuchisyochi. Pakwiganaga apano maŵasa gakwana 7,000 gapochele chikamuchisyochi.

Mlongo jwine lina lyakwe Nizeyimana Charlote ni ŵanache ŵakwe ŵatatu panyuma pakupochela chikamuchisyochi ŵaŵechete maloŵe aga, “Nguyamichila mnope pakupitilisya kutukamuchisya mwakutulimbikasya mwausimu soni pakutupa yakusosechela ya pa umi m’masiku gakusawusya ga mlili wa kolonafayila. Ngusoŵa yakuŵecheta ligongo lya chikamuchisyochi.”

M’bale jwine jwasasile yayatendekwe pa lisiku liŵasalilidwe kuti chapochele chikamuchisyo cha yakulya. Jwalakwe jwatite, “Palisikuli ŵamkwangu ŵakomweche ligongo lyakusoŵa kwa yakulya. Mwangajembecheya, m’bale jwine jwanjimbile foni nikusalila kuti njawule ngajigale yakulya ya liŵasa lyetu. Yayatendekwagayi nganinayikulupililaga. Lisiku lyeleli nachesisye kupolela soni kuyamichila kwa Yehofa pa chikamuchisyo chitwapochele.”

Mlili wa COVID-19 utendekasisye kuti ŵandu apitilisyepe kulaga ni sala.

Ofesi ja nyambi ku Zimbabwe, jasagwile makomiti gakamuchisya pajitendekwe ngosi gakwana msano kuti gakamuchisye abale ni alongo. Konjechesya pelepa, ofesi ja nyambiji, jalinganyisye yakuti jwalijose komboleka kupelekaga yakulya soni yindu yine kwa abale ŵaŵasochechelaga chikamuchisyochi. Makomitiga gakugaŵanya yikamuchisyoyi.

Pakwikanaga apano, makomitiga gakamuchisye abale ni alongo mwakwapa utandi wakwana makilogalamu 62,669, mauta gakutelechela malita gakwana 6,269, somba syejumu syakwana makilogalamu 3,337, soni mbwanda syakwana makilogalamu 5,139. Abale ni alongo 7,319 ni ŵapochele chikamuchisyochi.

Liŵasa line lyalikusalijiganyaga Baibulo soni kusonganaga mwakutamilichila nganilikola chakulya. Liŵasali lyasangalele mnope lili lipochele chakulya kutyochela kwa m’bale jwakusalijiganya nawo Baibulo. Mkaniliyiche lisiku liŵapoche yakulyayi, m’busa jwa ku dini jawo jakala ŵayiche ku liŵasali kukuliŵenda kuti lipeleche mbiya syakuti akasumile yindu yakusosechela ya pamlango pawo. Liŵasali lili liweni kulekangana kwakupali pasikati pa ŵa Mboni sya Yehofa ni m’busaju, lyalanjile ku diniji.

Ngatukukayichila kuti Yehofa chapitilisye kujaliwa masengo gakwakamuchisya ŵandu ŵakulaga nambosoni kulolechesya kuti abale ni alongo ŵetu ku Rwanda soni ku Zimbabwe, akupochela yindu yakusosechela pa umi wawo.—Masengo 11:29.