Iyayi, dini syosope ngaŵa kuti sili syakulandana. Baibulo jikusasala kuti pana dini syejinji syasikusajiganya yangamsangalasya Mlungu. Dinisi sili m’magulu gaŵili.

Gulu jandanda: Dini syasikusatumichila milungu jaunami

 Baibulo pajikusala ya dini syasikusatumichila milungu jaunami, jikusakamulichisya masengo maloŵe mpela “syangali mate,” “milungu jaunami,” soni “jangali kose mate.” (Yelemiya 10:​3-5; 16:19, 20) Yehofa a Mlungu ŵawusalile mtundu wa Aisalaeli kuti, “Mkakola milungu jine, akaŵe une jika.” (Ekisodo 20:​3, 23; 23:24) Aisalaeli paŵatumichilaga milungu jine, “AMBUJE ŵapile nawo mtima.”​—Numeli 25:3; Lefitiko 20:2; Ŵakulamula 2:13, 14.

 Masiku aganosoni Mlungu jwangasangalalaga ni kulambila “milungu.” (1 Akolinto 8:​5, 6; Agalatiya 4:8) Jwalakwe akwaŵenda wosope ŵakusaka kumtumichila kuti atyoche mu dini syaunami. Baibulo jikusati, “Mwaleche jemanjajo soni mŵe pajika.” (2 Akolinto 6:​14-​17) Naga dini syosope sili syakulandana soni sikusakamuchisya ŵandu kuti amlambileje Mlungu, ligongo chichi jwalakwe akwalamula kutenda yeleyi?

Gulu jaŵili: Dini syasikusamtumichila Mlungu nambo mu litala lyangaŵajilwa

 Ndaŵi sine Aisalaeli ŵalambilaga Mlungu pakamulichisya masengo yikulupi soni misyungu jakutyochela ku dini syaunami. Nambo Yehofa jwakanile yakuti ŵandu amtumichileje jwalakwe kwineku ali mkutumichila milungu jaunami. (Ekisodo 32:8; Detulonomo 12:​2-4) Mu ndaŵi ja Yesu, jwalakwe ŵajamwiche achimlongola ŵa dini ligongo lya yiŵatendaga pakumlambila Mlungu. Yaŵatendaga jemanjaji yalosyaga mpela akusamlambila Mlungu nambo yisyesyene yakwe yili yakuti ŵaliji ŵachinyengo. Tukuŵecheta yeleyi ligongo lyakuti jemanjaji, ‘ŵanyosyaga yindu yayikulungwa ni yakusosekwa yisyesyene pa malamusi ga Mlungu, mpela kulamula kwa chilungamo, kutenda chanasa ni kuŵa ŵakulupichika.’​—Mateyu 23:23.

 Masiku aganosoni dini jajikusajiganya usyesyene ni jajikusakamuchisyaga ŵandu kuti amlambileje Mlungu. Usyesyenewu ukusasimanikwa m’Baibulo. (Yohane 4:​24; 17:17; 2 Timoteo 3:​16, 17) Dini syasikusajiganya yakulekangana ni yajikusasala Baibulo, jikusatendekasya ŵandu kuti atendeje yindu yangamsangalasya Mlungu. Ŵandu ŵajinji akusaganisya kuti yijiganyo mpela yakuti mwa Mlungu jumo mwana milungu jitatu, mundu akwete msimu wangawa soni yakuti mundu akusalagasidwa ku moto yikusatyochela m’Baibulo. Nambo yijiganyo yeleyi yatyochele kwa ŵandu ŵakusatumichila milungu jaunami. Dini syasikusajiganya yeleyi sili ‘syamtega,’ kapena kuti syangakamuchisya ligongo sikusajiganya yakwamba misyungu mmalo mwakwiganya yakusasaka Mlungu.​—Maliko 7:​7, 8, Malangano Gasambano 1992 Edition.

 Mlungu akusaŵengana ni dini syasikusamlambilaga mu litala lyangamsangalasya. (Tito 1:​16) Pakusaka kwakamuchisya ŵandu kuti aŵe paunasi wambone ni Mlungu dini jikusasosekwa kwakamuchisya ŵandu kuti akoleje ndamo syambone. Mwachisyasyo Baibulo jikusasala kuti, ‘Naga jwine akulitenda kuti ali jwa dini mnope, nambo ali jwakuŵecheta yangalumbana, dini jakwejo jili ja mtega, soni akusagamba kulilambusya. Dini jisyesyene jajili jangali ulemwa pameso pa Mlungu Atati, ni aji: kwakamuchisya ŵanache ŵa masije ni achakongwe ŵawililwe myisawusyo yawo nambo soni kuligosa jika ku yangalumbana yosope ya mchilambo chapasi.’ (Yakobo 1:​26, 27) Baibulo ja King James Version jakamulichisye masengo maloŵe gakuti “dini jangali chilichose chakuchisakasya” pakusala ya kulambila kusyesyene.