Rayog ni Nge Fel’ Thilmew Got, Fa?

Yira yog ngom ni ngam pining fithingan be’ nib tolang, ma ga ra felfelan’ ya kan tay fam. Girdi’ ni bay u reb e liw nib tolang ni bod e President, nge Governor e danir pining fithingrad. Ere faanra gaar bagayad ngom, “Um piningeg ni fithingag,” ma dabisiy ni ga ra lemnag ni ku be tay fam.

BIN riyul’ e Got e be yog ngodad u Bible ni gaar: “I gag Jehovah. Aram fithingag.” (Isaiah 42:8, NW) Yugu aram rogon ni boor e liw rok ni bod e “En Tasunumiy,” “Gubin Ma Rayog Rok,” nge “Somol Nth’abi Tolang,” machane ma tayfan e pi tapigpig rok ni bochan e ma yog ngorad ni ngaur pininged fithingan.

Bay bayay ni wenig Moses ngak Got ni gaar: “Wenig ngom [Jehovah].” (Exodus 4:10) Nap’an e madnom ko tempel u Jerusalem, me yog Solomon ni Pilung u tabolngin e meybil rok ni gaar: “[Jehovah] ni Got.” (1 Kings 8:22, 23) Ma nap’an ni non Isaiah ni profet ngak Got ni pa’ piyu Israel, me gaar: “Gur [Jehovah] e chitamangimad gur.” (Isaiah 63:16) Ere ba tamilang ni baadag e Chitamangidad nu tharmiy ni ngaud pininged fithingan.

Ra nge fel’ e tha’ u thilmew Jehovah ma ba ga’ fan ni ngaum pining fithingan, machane ku bay boch ban’en nib muun ngay. Ke weliy Jehovah murung’agen e en nib t’uf rok, ma ma pagan’ ngak ni gaar: “Bay gu ayuweg ni bochan e ke nang fithingag.” (Psalm 91:14, NW) Ere ba tamilang ni ku bay boch ban’en ni kub muun ko ngan nang fithingan Got ni bochan e aram kanawoen ni ma yoror Got rodad. Machane, faanra nge fel’ thilmew Got ma mang e be yip’ fan?