BIN ngan ko gal thin ney e ga be lemnag nib puluw? Boor e girdi’ ni yad baadag e n’en ni yog Saul nu Tarsus, ni ku yima yog apostal Paul ngak ni bochan e ma fal’eg lanin’rad, ma kub m’ag u wan’rad. (Acts 17:26, 27) Ku boor e thin nu Bible ni taareb rogon ko re n’ey. Bod fare meybil ni tay Jesus ni yog riy ni manang nrayog rok pi gachalpen ni ngar nanged Got nib fel’ rogon miki yag e pi tow’ath rok ngorad.​—John 17:3.

Machane, piin llowan’ ni bod rogon Philo e ba thil e n’en ni yad ma lemnag. Yad ma yog ndabiyog ni ngad nanged Got nib fel’ rogon ni bochan e ir be’ ndabiyog ni ngan nang fan rarogon. Ere, bin ngan e thin e ba riyul’?

Be tamilangnag e Bible ni bay boch ban’en u rarogon Got nib mo’maw’ ko girdi’ ni ngar nanged fan. Bod ndabiyog ni ngad nanged urngin ban’en u murung’agen n’umngin nap’an ni ka immoy, nge rogon feni toar e llowan’ rok, nge gonop rok. Dabiyog ko girdi’ ni ngar nanged fan e pi n’ey. Machane, yugu aram rogon ma rayog ni ngad nanged rarogon Got. Ya bin riyul’ riy e, faan gad ra fal’eg i lemnag e pi n’ey ma rayog ni nge ayuwegdad ni ngad “chugurgad ngak.” (James 4:8) Chiney e ngad weliyed boch e pi n’em nib mo’maw’ ni ngad nanged fan. Ngemu’, ma gad weliy boch ban’en u rarogon Got nrayog ni ngad nanged fan.

RAROGON GOT NDE SUM: Be yog e Bible ni Got e de ‘sum ma dariy e rofen ni ra mus.’ (Psalm 90:2) Ere, dabiyog rodad e girdi’ ni ngad “theeged urngin e duw rok.”​—Job 36:26, BT.

Angin nra yib ngom: Ke micheg Got ni faan ga ra athamgil ni ngam nang murung’agen nib fel’ rogon, ma ra pi’ e yafas ndariy n’umngin nap’an ngom. (John 17:3) Uw rogon ni nge pagan’dad ko re thin ney ni faanra dabiyog rok Got ni nge par ndariy n’umngin nap’an? Ya kemus ni yigoo “fare Pilung ni bay i par ndariy n’umngin nap’an” e rayog rok ni nge rin’ ban’en ni aray rogon.​—1 Timothy 1:17.

LEM ROK GOT: Be yog e Bible ndabiyog ni ngad ‘nanged e lem rok’ Got ni bochan e rib thil e lem rok ko lem rodad. (Isaiah 40:28; 55:9) Ere, riyul’ nrib puluw fare deer ni bay u Bible ni be gaar: “I mini’ e manang e lem rok Somol? Me mini’ e rayog rok ni nge fonownag?”​—1 Korinth 2:16.

Angin nra yib ngom: Rayog rok Got ni nge motoyil ko meybil ni ke tay bokum milyon e girdi’ taab yay. (Psalm 65:2) Mus nga taareb e arche’ ni sparrow nra mul nga but’ ma manang. Machane gur, ra taw nga ba ngiyal’ ma dab ki taw urngin ban’en nga laniyan’ Got ma aram e dabkiyog ni nge nangem ara motoyil ko meybil rom? Danga’, ya dariy e gin nra mus e lem rok Got riy. Maku reb e, ‘ka ba ga’ fam ngak fa nochi arche’ ni sparrow fithingan!’​—Matthew 10:29, 31.

ROGON NI MA RIN’ GOT BAN’EN: Be yog e Bible ni dabiyog ni nge ‘tamilangan’dad ko tin ni ke m’ay i lemnag rok Got ni nge rin’ iram ko tabolngin nge yan i mada’ ko tungun.’ (Eklesiastes 3:11) Ere, dariy e ngiyal’ ni gad ra nang urngin ban’en u murung’agen Got. Dariy be’ nrayog ni nge ‘nang rogon’ kanawoen ni ma rin’ ban’en u fithik’ e gonop. (Roma 11:33) Machane, ba m’agan’ Got ngay ni nge dag rogon ni ma rin’ boch ban’en ngak e piin ni yad baadag ni ngar rin’ed e tin nib m’agan’ ngay.​—Amos 3:7.

Angin nra yib ngom: Faan ga ra beeg ma ga be fil e Bible, ma dariy e ngiyal’ ni ga ra tal i fil murung’agen Got nge rogon ni ma rin’ ban’en. Re n’ey e be yip’ fan ni gubin ngiyal’ nrayog ni nga i chugur e tha’ u thildad e Chitamangidad ni bay u tharmiy.

Bochan ndabiyog ni ngad nanged boch ban’en u rarogon Got ma gathi be yip’ fan ndabiyog ni ngad nanged Got nib fel’ rogon. Boor ban’en ni be weliy e Bible nra ayuwegdad ni ngad nanged Got nib fel’ rogon. Baaray boch e pi n’em:

FITHINGAN GOT: Be yog e Bible ni Got e ir e tunguy fithingan. Be gaar: “Gag Jehovah. Ireray fithingag.” Ba pag 7,000 yay ni bay fithingan Got u lan e Bible. Dariy reb e ngachal ni aray rogon.​—Isaiah 42:8, NW.

Angin nra yib ngom: I yog Jesus ko fare kenggin e meybil ni fil ngak pi gachalpen ni gaar: “Chitamangimad ni ga bay u tharmiy: Ngan tay fan fithingam nib thothup.” (Matthew 6:9) Ere, rayog ni nga mog fithingan Got u lan e meybil rom, fa? Ba m’agan’ Jehovah ngay ni nge pi’ e yafas ngak urngin e piin ni yad ma tayfan fithingan.​—Roma 10:13.

GIN NI MA PAR GOT RIY: Be yog e Bible ni l’agruw yang ni yima par riy. Bay e fayleng ni aram e gin ni ma par e girdi’ riy, ma bay bang ni ka nog e giyow ko kan ngay ni aram e gin ni ma par e pi kan riy ndabiyog ni ngan guyrad. (John 8:23; 1 Korinth 15:44) Nap’an ni yira fanay fare bugithin ni “tharmiy” u lan e Bible mab ga’ ni be yip’ fan e giyow ko kan. Ere, En Tasunmiy e bay ‘tafen’ u “tharmiy.”​—1 Kings 8:43.

Angin nra yib ngom: Rayog ni ngam nang rarogon Got nib fel’ rogon. Jehovah ni ir e En Tasunmiy e gathi ir reb e Got ni gubin yang nge gubin ban’en ni bay riy. Ya riyul’ ni ir be’ ni bay e gin ni ma par riy. Yugu aram  rogon, ma “dariy ban’en nrayog ni ngan mithag rok.”​—Hebrews 4:13.

RAROGON GOT: Be yog e Bible ni bay fel’ngin Jehovah nrib manigil. “Got e ba t’uf e girdi’ rok.” (1 John 4:8) Maku der ma ban. (Titus 1:2) De laniyan’, ma runguy e girdi’ ma ma kireban’ ngorad, ma gathi mmachreg ni ma yib e puwan’ ngak. (Exodus 34:6; Acts 10:34) Maku reb e, baadag Got ni nge mang “tafager” rok e piin ni yad ma tayfan. Ma ireray reb e ban’en ni boor e girdi’ ni yad ma lemnag ndabi rin’ Got.​—Psalm 25:14.

Angin nra yib ngom: Rayog ni ngam mang fager rok Jehovah. (James 2:23) Ma faan ga ra nang rarogon Jehovah nib fel’ rogon, ma rayog ni ngari tamilang u wan’um e n’en ni be yog e Bible.

Rib tamilang rogon ni be weliy e Bible murung’agen Jehovah Got. Gathi ir reb e Got ndabiyog ni ngad nanged rarogon. Ya bin riyul’ riy e, baadag ni ngad nanged murung’agen. Be micheg e Thin rok u Bible ni gaar: “Faan gimed ra gay, ma ra pagmed ngam patgad ngak.”(1 Kronicles 15:2, BT) Ere, mang ndab mu beeg boch ban’en ni i buch kakrom ni be weliy e Bible murung’agen ma ga fal’eg i lemnag e pi n’em ya nge yag nim nang Got nib fel’ rogon? Faan ga ra rin’ ni aray rogon, ma be micheg e Bible nra “chugur” Got ngom.​—James 4:8.

Machane, sana ga ra fith ni nge lungum, ‘Uw rogon ni nggu mang fager rok e En Tasunmiy ni faanra dabiyog ni nggu nang urngin ban’en u murung’agen?’ Am lemnag e re n’ey: Faanra nge mang be’ fager rok reb e togta ni ma sey e girdi’, ma gur, rib ga’ fan ni nge un facha’ ko skul ko togta, fa? Danga’! Ya rayog ni nge fel’ e thin ko fare togta nge facha’ ni yugu aram rogon nib thil e maruwel rorow. N’en nib ga’ fan e nge nang facha’ rarogon fare togta, nge pi n’en ni baadag, nge pi n’en ndabun. Ere, ku arrogon gur nrayog ni ngam nang rarogon Jehovah u Bible. Ma kemus e n’en nib t’uf ni ngam nang ya nge yag nim mang fager rok.

Be weliy e Bible urngin ban’en nib t’uf ni ngad nanged u murung’agen Got, ya nge yag nda chuchugurgad ngak. Ere, ga baadag ni ngkum nang boch ban’en u murung’agen Jehovah Got, fa? Pi Mich Rok Jehovah e yad ma fil e Bible ko girdi’ u taferad ndariy puluwon. Ere, faanra ga baadag ni ngam fil e Bible, ma gamad be pi’ e athamgil nga lanin’um ni ngam non ngak e Pi Mich Rok Jehovah ko binaw rom ara mman ko fare website romad ni www.pr2711.com.