RIB ga’ fan e musik u wan’ piyu Israel kakrom. Ba ga’ ni ma weliy e Bible murung’agen e girdi’ ni yad be chubeg e pi talin e musik ma yad be tang. Bin riyul’ riy e ba ga’ yang ko Bible e ni yoloy ni bogi tang ni bod fare babyor ni Psalms, nge Tang rok Solomon, nge Lamentations. Be yog ba ken e babyor ni kenggin e Music in Biblical Life ni be tamilangnag e Bible “ni boor ban’en ni ma rin’ piyu Israel ni yad ma musik riy.”

Musik ni yima tay u nap’an ni yibe rin’ boch ban’en u reb e rran ngu reb. Piyu Israel e yad ma musik ni ngar daged e n’en bay u lanin’rad. (Isa. 30:29) Piin nib pin e yad ma chubeg e tambourine, ma yad ma yon’ boch e tang ni ma k’aring e felfelan’, maku yad ma churu’ u nap’an ni yibe tay boch e madnom ni bod e ngiyal’ ni kan dugliy be’ ni nge mang pilung, ara nap’an ni ke gel boch e salthaw ko mahl, ara nap’an e pi madnom ni yima tay ni fan ko liyor. (Judg. 11:34; 1 Sam. 18:​6, 7; 1 Ki. 1:​39, 40) Ku ma yon’ piyu Israel boch e tang ni nge dag gelngin e kireban’ rorad u nap’an ni ke yim’ be. (2 Kron. 35:25) I yog fare McClintock and Strong’s Cyclopedia ndariy e maruwar riy ni “pi Hebrew e yad boch e girdi’ nri yad baadag e musik.”

Pi pilung u Israel e yad baadag e musik. I fek Saul ni Pilung David nga tafen e pilung ni nga i musik. (1 Sam. 16:​18, 23) Boch nga tomuren u nap’an ni mang David e pilung me ngongliy boch e talin e musik, miki tunguy boch e tang nrib manigil, miki yarmiy rogon e piin ngaur chubeged e pi talin e musik ma yad be tang u tempel. (2 Kron. 7:6; Amos 6:5) Solomon ni Pilung e immoy girdien e tang rok ni pumoon nge ppin.​—Ekl. 2:8.

Musik ni fan ko liyor. Bin th’abi ga’ fan riy e i fanay piyu Israel e musik ni fan ko liyor rorad ngak Jehovah. Bin riyul’ riy e, 4,000 e pumoon ni ur chubeged talin e musik u tempel u Jerusalem. (1 Kron. 23:5) Yad ma chubeg e cymbal, nge harp, nge rappa. (2 Kron. 5:12) Machane gathi kemus e piin ur musikgad ni fan ko liyor rorad ngak Jehovah. Ku boor e girdi’ nu Israel ni yad ma yon’ fapi tang ni ka nog e Pi Tang ko For Nga Lang ngay u nap’an ni yad be milekag nga Jerusalem u gubin e duw ni fan ko pi madnom ni yad ma tay. (Ps. 120-134) Ku be yog boch e babyor ni i yoloy e pi Jew ni ma yon’ piyu Israel boch fapi tang ni bay ko Psalm a u nap’an e abich ni yima tay ko Paluk’af.

Ri kub ga’ fan e musik u wan’ e girdi’ rok Got e ngiyal’ ney. (Jas. 5:13) Pi tang ni gad ma yon’ e bang ko liyor rodad. (Efe. 5:19) Musik ni gad ma tay e ma taarebnagdad e pi walagdad ni Kristiano. (Kol. 3:16) Ku ma pi’ gelngidad u nap’an ni gad be mada’nag boch e magawon. (Acts 16:25) Musik ni gad ma tay e aram reb e kanawo’ nrib manigil ni gad ma dag riy nib mich Jehovah u wan’dad mab t’uf rodad.