Bay boch e girdi’ ni yad ma lemnag ko ke thil e Thin rok Got ni kan yoloy nga but’ fa dawor. I yog Isaiah ni profet ni thin rok Got e “dabi thil!” (Isaiah 40:8) Uw rogon nrayog ni nge pagan’dad ni pi n’en ke micheg Got e ke par ni ka rogon ke mada’ ko ngiyal’ ney?

Bay gelngin Got nrayog ni nge ayuweg e Thin rok ni nge par ni ka rogon ndabi thil. Kakrom e pi pumoon ni ur abuweged e thin rok Got nga lan yu yang e babyor e ur theeged urngin e yol ni bay u lan e babyor nib thothup ni bochan e yad be guy rogon ni nge dab ra puthuyed, ara ra thilyeged, ara ra chuweged reb riy. Yugu aram rogon ma ka dawori flont e girdi’, ere bay boch i yad ni i olobchiy noch yang riy.

Bokum biyu’ yang e babyor ni bay e thin ko fare Babyor nib Thothup riy ni un yoloy kakrom. Faanra bay bang ko yungi babyor ney ni bay bochi ban’en riy nib thil, ma rayog ni ngan taarebrogonnag e thin riy nga yu yang e babyor ni i yoloy yugu boch e girdi’ ya nge yag ni ngan nang e bin nib puluw.​—Ra ga baadag ni ngkum nang boch ban’en u murung’agen e re n’ey, mag guy fare article ni kenggin e “Has the Bible Been Changed or Tampered With?” ni thin ni Meriken ni bay ko jw.org.

Am lemnag fa yungi babyor nni yoloy kakrom ni ka nog fare Dead Sea Scroll ngay ni pirieg boch e girdi’ ni ka nog e bedouins ngorad u lan ba yiy nib chugur ko fare Dead Sea u nap’an e duw ni 1947. Yungi babyor ney e bay riy yu yang ko fare Babyor nib Thothup ni kan yoloy ni ke pag l’agruw biyu’ e duw ni ke yan. Piin boor ban’en ni yad manang e kar taareb rogonnaged e thin ko yungi babyor ney ko fare Babyor nib Thothup ni bay rodad e ngiyal’ ney. Ere mang e kar pirieged?

Ke pirieg e piin llowan’ ni Thin rok Got ni kan yoloy nga babyor ni bay rodad e ngiyal’ ney e taareb rogon ko tin nni yoloy ko som’on. * Kan fal’eg i yaliy e n’en bay ko yungin baaram e babyor ni un yoloy kakrom nge n’en bay ko fare Babyor nib Thothup, ma ke m’ug e mich riy ni aram e thin rok Got. Ere rayog ni nge pagan’dad ni ke ayuweg Got e thin ni bay ko fare Babyor nib Thothup ni nge par ni ka rogon ni fan ngodad e ngiyal’ ney.

Ere rayog ni ngad beeged e Thin rok Got nib pagan’dad ngay ndawori thil e thin riy. Bochan e re n’ey, ma aram e ngad weliyed ko mang e rayog ni ngad filed u murung’agen Got ko pi profet rok.