Mateu 15:1-39
15 Asui aintauri Jesus ipiri yepeyepe umpinimawaita farizewita yuiri Jeruzalẽ suiwaraita.
2 Aintaunyee ixupe:
—Marantaa tiaintaumunya tuyuweita ikustumi kuaita rembuewaita? Marantaa tiaintaumuyasuka aintaipu aintaumbau rundere?
3 Asui Jesus unyee ainta supe:
—Marantaa tiperuyari Deus umunduwaa yaruyari arama peramunyaita inyenga sui?
4 Nyãse Deus umbeu kuxima, perespetari pepaya pemaya yuiri pexari umanu kua umbeuwaa puxi ipaya rese imaya rese yuiri.
5 Maa penye pembeu:
—Awa umbeu ipaya supe imaya supe yuiri, kua peputariwaa seirumu hamee aramawaa kuri Deus supe ae.
6 Asui ae timaa kuri urespetari ipaya imaya yuiri. Ape penyenga resewara pemutenyuntuwa kua Deus nyenga.
7 Penye retentuwaita, supiwa utitika perese kua Izaia.
8 Yawe unyee:
—Kuaita miraita aintaumee purangawaa ixe arama aintayuru rimbiwa irumu maa apekatu aintaumanduariwaa sesui.
9 Timaa arama ixe arama kua aintaumbeuwaa purangawaa ixe arama kuaita umbuewaita apigawaita nyenga senyenga sui.
10 Asui Jesus umuatiri ipiri kuaita miraita, unyee ainta supe:
—Kuiri pesendu kua hambeuwaa pekuawa arama mayesawataa ae.
11 Timaa umuaiwa apigawaita umanduariwaa kua uwikewaa aintayuru upe, maa kua usemuwaa aintayuru sui umuaiwa aintaumanduarisawa.
12 Asui umbuewaita aintauri aintaumbeu ixupe:
—Maitaa rekuawate puxi aintaumaa inde arama kuaita farizewita aintausendu resewara rembeuwaa?
13 Jesus usuaxara ainta, unyee ainta supe:
—Sepaya iwaka kitiwara umburi kuri panye kuaita mitima tiwaita uyutima.
14 Timaarese peiku aintasui pexari ainta, nyãse umbuewaita sesaimawaita ainta kua yepe sesaimawaa urasu rame yepe sesaimawaa aintauwari kuri barera kiti.
15 Asui Pedru unyee ixupe:
—Rembeu yande mayesawataa kua nyenga rembuewaa aramawaa ipupe yande.
16 Asui Jesus unyee ixupe:
—Maitaa penye tire será pekuawa?
17 Maitaa tire pekuawa kua uwikewaa yaneyuru upe uwike yuiri yanemarika kiti, asui usemu yanesui?
18 Maa kua nyenga usemuwaa yaneyuru sui usemu yuiri yanepia sui aete umuaiwa yande.
19 Nyãse usemu yanepia sui panye yamanduariwaa tenyuntu, uxari yaputari yayuká mira, uxari yaputari amu kunya yanerimiriku sui, uxari yayumuwarixi, uxari yaputari yamunda, uxari yaganani amuita rese, uxari yambeu puxuwera tenyuntu.
20 Aete umuaiwa miraita umanduarisawa, maa yambau rame tiyamuyasuka yaneipu timaa umuaiwa yande.
Kanaã suiwara
21 Asui Jesus uyuiri aintasui usu arama Tiru kiti Sidum kiti yuiri.
22 Asui uri ipiri yepe kunya Kanaã suiwara kirimbawa umbeu ixupe:
—Inde seruixawa, inde Davi rimiariru pirasua remaa ixe arama, kirimbawa demuniu uiku sembira ipia upe.
23 Asui timaa Jesus usuaxara ae, asui umbuewaita aintaunyee ixupe:
—Remundu uyuiri yanesui nyãse usenui uiku yanerakakuera sui.
24 Asui Jesus umbeu:
—Anyunte sepaya umundu ixe aintapiri kuaita uvelya uyusupariwaita aintasuiwara kuaita Israel rimiariruita.
25 Asui nyã kunya uri umunya benditu ixupe umbeu:
—Seruixawa reajudari ixe.
26 Asui Jesus umbeu ixupe:
—Timaa puranga yayuka meyu tainaita sui yamburi arama yawara mirita supe ae.
27 Asui umbeu ixupe:
—Supite seruixawa maa kuaita yawara mirita aintaumbau meyu uwariwaa aintayara meza wira kiti.
28 Asui Jesus umbeu ixupe:
—Inde kunya kirimbawa reruyari nepia upe ape hamunya inde arama kuaye reputariwaa yawe. Asui aramete ikatuana imembira.
Jesus uyuiri lagu Galileya kiti
29 Asui Jesus uyuiri asui, asui uri kuayentu lagu Galileya rimbiwa upe. Asui uyupiri iwitera rese ape uwapika.
30 Asui aintauri ipiri siya miraita, aintaururi aintairumu puxuwerawaita aintaretima, alejaduita yuiri sesaimawaita yuiri tiwaita upurungita yuiri, siya amuita yuiri, asui aintauxari Jesus ipi ruaki ainta, asui umukaturu ainta.
31 Ape aintaakayemu aintaumaa Jesus supe kuaita miraita aintaumaa irumu upurungitana kuaita tiwaita upurungita, asui purangana kuaita puxuwerawaita aintaretima, asui aintauwatana kuaita alejaduita asui aintaumaawana kuaita sesaimawaita, ape aintaumee purangawaa ixupe kua Israelitaita Deus.
Umee kuatru mili pesua umbau
32 Asui Jesus usenui ipiri kuaita umbuewaita umbeu ainta supe:
—Pirasua hamaa ainta supe kuaita miraita siyawaita nyãse aintaurikuana musapiri ara aintauiku seirumu asui tiaintauriku aintaumbau arama, ape tihaputari hamundu aintauyuiri sesui yumãsi irumu yawaite aintauwari pee rupi.
33 Asui aintaumbeu ixupe kuaita umbuewaita:
—Mametaa maa yapuderi yawasemu pão ike iyaraimawaa upe aintaumbau arama panye kuaita miraita?
34 Asui Jesus umbeu ainta supe:
—Muiritaa periku pão? Aintaunyee ixupe:
—Yariku seti pão yepeyepe pirá miri yuiri.
35 Asui umundu aintauwapika iwi upe kuaita miraita.
36 Upisika kuaita seti pão pirá mirita yuiri, asui umee grasa sese, asui upartiri ainta umee ainta supe kuaita umbuewaita aintaumee arama miraita supe.
37 Asui aintaumbau ae aintaapu ainta panye, asui aintaumuatiri simirera seti sextu teresemu.
38 Kuatru mili aintasiyasawa kuaita apigawaita umbauwaita, asui kunyaita tainaita yuiri.
39 Asui Jesus uxari aintauyuiri isui kuaita siyawaita uwiye igara upe usu arama Magadã kiti.
