Le Organización Mundial de la Saludoʼ (OMS), ku yaʼalikeʼ tak tu kʼiinil 23 tiʼ mayo tiʼ 2022, tsʼoʼok u kíimil 6.27 millones máakoʼob yoʼolal le COVID-19. Chéen baʼaleʼ tu kʼiinil 5 tiʼ mayo tiʼ 2022, le OMS xanoʼ tu yaʼaleʼ maʼ xaaneʼ maas yaʼab le máakoʼob tsʼoʼok u kíimloʼoboʼ. Lelaʼ bey tu yaʼaliloʼ tumen tu añoil 2020 yéetel 2021, kíim «kex 14.9 millones máakoʼob yoʼolal COVID wa yoʼolal uláakʼ kʼojaʼaniloʼob». ¿Baʼax ku yaʼalik le Biblia yoʼolal le baʼaxoʼob ku yúuchloʼobaʼ?

•    Jesúseʼ tu yaʼaleʼ «yaan u yantal kʼaakʼas kʼojaʼaniloʼob», lelaʼ maases yaan u yilaʼal «tu tsʼoʼok kʼiinoʼob» (Lucas 21:11, 2 Timoteo 3:1).

 Le baʼax tu yaʼalaj Jesúsoʼ jach táan u yilaʼal u yúuchul bejlaʼeʼ. Utiaʼal a wojéeltik u maasileʼ ilawil le xook: «¿Baʼax eʼesik kuxaʼanoʼon ‹tu tsʼook kʼiinoʼob›?».

•    «Le Dios mantatsʼ ku líiʼsaj óoloʼ [...] ku líiʼsik k-óol tiʼ tuláakal le baʼaxoʼob k-muʼyajtikoʼ» (2 Corintios 1:3, 4).

 Yaʼab máakoʼob tsʼoʼok u kíimil wa máax tiʼobeʼ tsʼoʼok u líikʼil u yóoloʼob ikil u xokikoʼob le Bibliaoʼ. Wa taak a wojéeltik u maasileʼ ilawil le xook: «Bix jeʼel u xuʼulul u sen yaatal a wóoleʼ: Ilawil le consejoʼobaʼ» yéetel «Áantaj utiaʼal máaxoʼob yaachajaʼan u yóoloʼob».

•    «Taalak a Reino, beetaʼak baʼax a kʼáat, jeʼex u beetaʼal teʼ kaʼanoʼ bey xan ka beetaʼak way luʼumeʼ» (Mateo 6:10).

 Maʼ kun xáantaleʼ «u Reino Dioseʼ» yaan u tsʼakik tuláakal máak, le kéen úuchuk leloʼ «mix juntúul u kajnáalil le luʼum ken u yaʼal: ‹Kʼojaʼanen›» (Marcos 1:14, 15; Isaías 33:24). Utiaʼal a wojéeltik u maasil yoʼolal u Reino Dios bey xan baʼax ken u beeteʼ, ilawil le video ¿Baʼax u Reino Dios?

 K-invitarkech a xok le Bibliaoʼ, beyoʼ teech yéetel a familiaeʼ yaan u kiʼimaktal a wóoleʼex ken a beeteʼex baʼax ku yaʼalik bey xan ken a kaneʼex u maasil yoʼolal u jatsʼuts promesaʼob Diosoʼ.